Mi genthei' ading in agentheihna ziak a kingaihsiat sang in gentheihna in bang sin ding hon pia hiam chih zonkhiat a, tua sinlaite a kihehnep amanphazaw hi. Kingaihsiatna lah bang ding mah in aphatuamkei a, sinlai ah bel pilna a om a, hinkhua a lamphathei hi.

Ka hinkhua masalam teng lawmte eenna in ka na zangsam hi. Pianna khua mahmah in leng mi ka phakei pah hi. Karbi Anglong gampalak a khua le chihtaak ngellou, inn sawm khawng omna ah khovel maituah ding a khahkhiat in ka om hi. Sawtlou nung in ka pianna khua gammang in a nawmvalh hi. Mi mundang a ataatzoh mahmahkei uleh a pianna khua uah kiikthei ua, ke'n tua bang kiikna ding tuan khua ka neikei hi. Tuazah dong a suanding neilou khat ka hi hi. Tua mun a ka hinkhua tam ka theimankei. Ka keelnou uh ka puak laikhawng, lawmte toh kelkum, khuangbai tohlai khawng, innkiang a chinggah tam neekluatziak a ekthazoulou a kahlai khawng, tangkum man a kuanlai khawng, singhon kawm a zusa tul a dawtlai khawng, tuilou tui' tup lai khawng hon ngappih ua, sai khekhap sikkhak chia kawng tantan tumpukpuk lai khawng ka thei mialmial hi. Ka papite' sangkil a sangak vun kilip, asung a vaai kithun, ak innsung a aluut ngamlouhna ding a kikoih leng ka mitkha ah a omden hi. Khatvei tuh lou lampi a dawp tung a leilawn dia singluang lianlou kikhung ka zuih laitak in alanglam ah keel khat in leng ahon zuiphei a, alaitak ah ka kituntuah uhi. A keel pen dawplak a sawnkhe zok ding chia ka sawn thahahleh ana kiplua ahihmanin kei ka hoikhiak kholoh hi. Nu-le-pate'n lounaa aseplai un buuk ah ana ki-om a, khuai mei-amtawi kichite'n hon bibi se uh ahimanin kikap neelnuul khazel hi. Huai chiang in buuknuai ah mei ahong semsak zel uhi. Buhkhetna kiang a pialthang ngak a buhpawl a kibawl buuk a hon tutpih lai bang uh ka thei mialmial hi. Hun khenkhat ah khomui kuan in innkong ah mei kisem a, singsawl liankuam khat phut in singluang peuh khenging in the kizol zel hi. Loulai a beelkaan kung a tuang a kisawi ekek bang thil nuampente lak a khat ahi. Kuate hiam in ka innkiang uah inn ahong lam uhi. A khuam ding a a sing zat uh ahawng khum didi ahihmanin nitaklam in khosung naupang teng in a hawng ka kheuhkhin hi. Tua sing min ka pa ka dot leh hon hilh zaw hive'n ka mangngilhkhin nawnta hi. Khatvei leuleu ka sanggamnu toh dainawl a thei-aktuam ne ka kichih uleh abang va nekha ka hi di uam ah, ka gui ua, luak peetmah in ka lua uhi. Tuangtung a luakte bang vutbuah nadan bang ka theisam uhi. Lupna tung leh lukham natan a ana lawdan ka hi uhi. Kelta tangmai kichi tangmai dandeuh, neuchik, phok liplep khat akine zel a, zogam a omlou adiam ah ka nekha ngeikei hi. Hiai teng liimliam khawng ka mangtheih miilmial hi. Hiai lai in bel naupang mawl kihilai ahihmanin eenna leng akithei naikei.

Huchiin hinkhua sawng nihna zang ding in Zogam ka hong tung hi. Khua kitheita ahihmanin sang a neizawte eenna bang ahong lian mahmah hi. Pawl li pawl nga bang kihita, lawm i ngaih hun laitak hive'n, skul kaitawp lawmte kholailam a akikaihkhawm lai un ei i vok-an aat di toh, inn teng a vok-an kidoh i khonkhawm di toh, akibuai mahmah langlang hi. Krismas ahong tung a, lawmte'n thaulem hoihtaktak, atang pawtthei bang ahon tawi ua, en ahihleh keep kaappuakthei haamhaam akinei hi. Lawmte'n bmx luisim khawng ahon nei ua, ahon tuansak uh lam-en in athuthu un a ki-om a, himahleh akituangkha mengmengkei lai hi. Lawm tv neite houh alung uh tuahlouh ding akilau mahmah a, athuthu uh man ahimai hi. 'No retreat no surrender', 'Iron Monkey' chihte' kithanlai hive'n, Pathianni nipi skul kaitawp lawmte'n 'huaite' inn ah video suak,' chi in teng nihnih bang kidong in aluut uhi. Ei lah i nu-le-pate'n video etna di sum hon pengeilou uh ahihmanin innlam zotsan angai hi.

I aak vulhte a kallak a goh chihlouh saneek bang leng a om mengmengkei hi. Sang limdeuhte bang ei neekkhaak ding in a kikoih himhimkei. I nute Lamka ahohni khua un naia-sawm sang khawng, kukis i chihte pawl khawng, sangthawp(bread) khawng ahon puak uleh ahilel hi. Huai leng khamtak a neek ahikei lai hi. A hon puak uh tamloulou in unauteng ahon kihawmsak ua, avaal zingkal chia di'n ahon siitsak tiilteel lai uhi. Mi khenkhat bel aneu uapan in ana sumphal pah ua, kei bel ka huchi kei. Huaihamna ana tamtan khadeuh ka hi dia, atamtanpen hih ka ut a, unaute hop ding bang ka thasialthei hi. Sum a leithoh neektheihte khaat (mengmenglou) mahleh lou leh huanhai-vaimiim, tangmai, mazel chihte ahihleh nu-le-pa' taihmaak ziak in kuamah ki-eng samlou hi.

Hun hong paizel in, hinkhua in thilhoih bang leng hon tun zelsam zaw ahi dia, mahni toh kikhom ding solkal buhpang sawkthei in hon koihsam hi. Ahuchih toh kiton in i sanggamte bang in pasal bang hon neihsanta uh, a anei nailou teng bang leng sepna ziak bang in munkhat ah ki-omkhawm thei nawnlou hi. Tu in ahihleh i nei leeluu keita zong in i duh neekna ding bel a omsamta hi. Himahleh duhpeen nangawn eikia a neek ah kamlimna leh lungkimna omkei na tel e! Neek ding tengteng keikia'n uun leng ka na chihlai a om a, tu in ka uunta ngei a, himahleh kipahna ana omkei tel! A om sunsun kihawm dialdial a, khamngellou a neeklai a manphatdan muhkhiat hun ahi maimah hi.

Neulai a ka huaihamna mah khanpih in tudong in leng ka thilphal naikei lailai hi. Ahi a, kei bel sumchiil kichih utlou in chiilsiam ka kichizaw hi. Naupang genthei mahmah ka muhchiang in ka lungtang phelkhat in panpih utna anei a, huchihlai in aphellang khat in piakkhiat ding haksa asa hi. Neulai a gentheihna ana kipaltaai sim ahihmanin tua bang a genthei saamte awlmohna bang lungsim ah ahong suakthei saam hi. Neulai a gentheihna himhim ana theilou a, eenna himhim ana phawkloute'n tuate' haksatna atheihpih saam ding ua aw ka chi hi. Ka sumchiilna dou teitei a tasamte' lam a baanzaak ding ka chih chiang in leng 'hiai ka lei di omlai, huai ka suktuah ngai phot a, huailam a huaizah seenngai a,...' huchih nalam in alemtheikei naak hi. A phattuamna tam hetlou khakhat a internet zatman akimkhat in khiam lengle naupang khat skul kaiman khanih-khathum nguut huzou ding hinapi huai leng ka khiam ngamkei hi. Damzel leh hiaiteng-huaiteng ka suktuah zohlam chiah ka kipan ding, huailam chia loh leng tamdeuhta ding hive'n ka chilungsim hi. Himahleh ka lungsim guuk ah bel denlam chiang a neihvaal apan tampi ka piak sang in tu a kidaihlou sasa a ka khen geigeite'n lungkimna hon tun zaw ding ahi chih ka thei hi; neih hun ahong tuntak a mahni kia a duhpen nangawn neek a kamlimna leh lungkimna a omlouh a, akidaihlouh lai a kihawm tiiptiip a, a-om bangbang neekkhawm dialdial a manphatzawk bang in. Huan ah bangchituk in loh pungsuk in pungtou mahleh kidaih ni ahong tung ngeikei ding chihleng ka haihkei hi.

Tulai bang houh tua bang a baanzaak nuamte' adia sangkil nangawn kaan ngailou khop a baihlam ahihtheihna ding in mi phatuamngaite'n lampi hon bawlta uhi. Teach Zodawn, Nehemia Project, Daniel Scholarship chihte huhna ding in innlum a om a, internet mai a minute nih leh thum zatzual a leng hitheita ahihmanin ape thasialte' adia paulap ding tampi hon phiatmangsak uhi. Tuazah a baihlam ahihtoh, ei mimal thil ding a poimohlua lah hilou lah mantam sim pipi khawng lei chiang a lungsim a siamlouh hon tan gige ding, naupang khat akumthum skul kaina a vakzou ding zah a puannak silhkhat lel i lei ok-ok hun a lungsim hon kam gige ding ahihleh khanawn apan pencil khat aleizou tazong in ka kipanta ding ka chizel hi. Khovel ah zaw i suktuahzoh leh i deih leng nei mah ni, huchih kawmkawm in mi panpih leng thasialkei ni ka chi hi.

Ka neulai hinkhua tua bang ana hilou a, deihdeih got a om a, taaksapna leh eenna kichi himhim ana theilou hileng tua ka mihinna put bang ka pu de aw chih ka ngaihsun khazel hi. Ka duhduh khamtak a ne a, Nipini teng a video en gige a, vok-an buaipihna a ka hunzat teng kholai a ana zang hileng tua ka tunna tan ka tung de aw ka chi hi. Sangzaw tham ka tung mai de aw, ahihkaleh lawmte bang a khovel' nawmvalh in ka om de aw? Khovel in zaw ei hoihna ding mah a honna siam tawntung himah in teh ka chihdek chiang in lah tua bang a khovel in ana nawmvalh mi khenkhatte banghang a ahoihna ding ua ana siam saamlou hiam chih ka theizoukei zel hi. Hiai ka chih hang in neulai a khosaktheih utlou ka hikei hi. Ka utlaw sam a, himahleh ana khosa theilou ka hihmanin ka kihehnepna ding kizon ka hilel hi; sehal in a batphaklouh grape pen 'athuukthuuk toh' chia a kihehnep bang in.

Taaksapna leh gentheihna' haakkol ana baat chiatchiat leng, taaksapna leh gentheihna himhim ana theilou chiatchiat leng, khente mi suak ua, khente suak zoulou se uhi. Houh mihingte'n deihteelna nei hetlou i hi ding e. I lampi ding sialkholhsa om a, deihteelna i nei i chih uh tua lampi i zuihlai a i ut leh kil khatlam i neh a, i utleh alai i zuih banglel houh ahi ding e hon chisak dekdek hi. Ahihkaleh deihtelna zalentak ziak hizaw ding hiam? Tua hitaleh i deihteel pentak deih ding eithu mah hia?

Khovel paipai mah ahihchiang in hinkhua maban sawnzel ding ahi dia, khovel in hon siam liai aleh hinkhua sawng thumna a luut hun hong omsam ding hi. Khovel in bangchi bang a hon pi ding ahiam ka theikei. Tua ding a kimanta ka hihiam leng ka theikei. Abang chibang teng in hon pi taleh, nopna a kipahdan siam a, dahna aleng kihehnepdan sintouhzel ding hive'n chin. Huchi kawmkal ah duhpen nangawn leng eikia a neek ah kamlimna leh lungkimna himhim omlou ahihdan leh kidaihlou sasa a khen tiiptiip a neekkhawm-taakkhawm liailiai amanphatdan mangngilhlouh ka sawm ding hi.

Huan hiai bang thu ka gelhlai in miteng in neulai hun neichiat a, tua neulai hun apan gen-le-sak ding bang hiam beek om ding a, ahihleh banghang a mi hiaizah zouzai lak a mi tawmchikte kia in sa a gen uh ahi de aw chih ngaihsutna ah ahong luut hi. Houh ahai teng mah in haiman tangkoupihpih houh ahilel di uh e, mihai leng adaih dide lai in mipil bang a seh ahi chih gelh ahi ngal a.