Minam kician leh picing a kingaihsunte pen, pupa ngeina leh tawndan kician nei te ahi hi. Tua ahih manin pupa ngeina leh tawndan a nei khawm milip pen minam khat in kingaihsun hi. Tua ngeina leh tawndan tuamtuam i neihkhopte zuun khaw puahkhawm lo-in bang zahtakin kigawmkhawm ding i sawm zongin, amawkna pi suak ding hi.

Zomite  minno tuamtuam bang hong kivawh in, nam tuamtuam bang kekin khen tampi-in i kikhen uh hi, ahih hangin minam khat i hihna uh kuamah in telkhial ngeilo hi. Bang hangin minno tuamtuam nei napi-in minam khat kici thei i hi hiam, cih a tom in kong gen ding hi. Eite pen minam khat i hihna pen bang dang hang hilo in, a hong suang i pu-pate khat hi a, i khangui zong khat hi in, ngeina khat a nei khawmte i hih man ahi hi. Min tuamtuamin hong khen zongin, i Zo ngeinate i zuun ciangin minam khat i hihna kiphawk kikkik hi. Minam khat hi a ngeina a zuun nuamlo, pu-pate tawndan zong a zui nuam lo pen minam mangthang in kingaihsun hi.

Zomite pen tualsuak minam i hi hi, ba’mcihleh leitung mun tuamtuam a tualsuak minamte mah bangin ngeina leh pu-pa tawndan kician a nei, a khang-a-khang a pu-pa satsa gam a luahsuk ngekngek minam i hih man ahi hi.

Tu hunthakah min tuamtuam hong kipiate hang leh tua minte tungtawn a, kipawlkhopna i bawl tuamtuamte hangin kitelkhialna bang piangin, unau melhaih hun bang zong na kinawk kha khin zo hi. Ahih hangin, Zominte pen minam khat i hihna bei tuan lo ahih manin, khangnote in lungsim a tangzaizaw ngaihsutna nei in, min tuamtuam-pawl tuamtuam i neihte uh sangin, i pu-pa ngeina, Zo ngeina te zuun in, i pawi tuamtuam te bawl khawm le hang zomite lak kilainatna hong khang semsem in lung kituak in mainawt ding hi hang.

Tua ahih manin, i pu-pa khanggui zom in, i pawi tuamtuamte bawlkhawm in, i Zo late sa khawm in, i Zo lamte lamkhawm in, i Zo puante silh khawm in, i Zo ngeinate zuikhawm in, i Tungsianmang pakkhawm in, i Zo gam zuunkhawm in,  a-zu-a-va kemkhawm in, vulhloh gantate cingkhawm le hang Zophualva in zong Zogam hong zuan kik ding a, phualva ki-itna bang itna zomite lakah hong khang semsem in, Zomite hong khenthaang pawl tuamtuam leh min tuamtuam te hong bei hiaihiai in muihmang ding a, tualsuak zomite hanlung ciam khawm in, khang kawm diam ding hi hang.

Zo kumthak ah cidamna leh cihtheihna khattek tungah, i biak Pasian in hong piata hen. Amen.