December kha a innlam pai di, Christmas va zang ding chihte ngaihtuah in lungkimna leh kithalawpna in ka pumdim a, ka ngaklah mahmah mai hi. Khalam thil himhim leh Christmas bangziak a kilawm ahia chihte ngaihtuah kha hetlou leh salam thilte kia ngaihtuah in ka kithalawp petmah a, innlam ka pai chiah, “Bang chi’n ka om dia aw, ka lawmten hon na ngailai di ua aw, ahihke’h ka mikhual gawp dia aw? Khawk kei amaute ziak a innlam paidek lah hilou ing a. Ka nu leh ka pa om na vele,” chihte ngaihtuah in leh “Ka nu leh ka pa a ding in bang ka puak dia aw, inn kiim a ka lawm naupang neu chikchikte a ding in bang ka puak dia aw…?” chih khawng ka ngaihtuah nilouh a, “day dreaming” a chihte dan un thil dang bangmah ngaihsak lou in ka etna mun ngal en in nui heuhau kawm in ka tu deidai hi.

Nidang a innlam ka pai chiang a, ka nu-le-pa'n hon nadawn ua, a mel ua kipahna leh a mit ua itna tak toh hon na vaidawnte uh bang ka ngaihtuah hi. Nei in nei kei le-ung le tate hong tung chi in, “Bang meh huan pih le’ng lim a sa dia aw?” Ka meh duh bang khawng ahi di aw chihte hon dong in, ka duhte uh hon huansak ua hon duat petmah uhi. Khovel a lal penpen sang in leng lal zaw hi in ka kithei a nuam ka sa thei petmah hi. Tuate khawng ka ngaihtuah chiang in innlam pai a, ka nu-le-pa mel ka muh ding kal bang ka ngaklah deuhdeuh hi.

Innlam paina di ticket khawng bangchik chiah ka u Ching in hon ngaihtuah pih dia aw.... chihte ngaihtuah leh ngaklah tak in ka om a, va dot zihzeh di lah kisuanlah huai ka sa zel. Himahleh a guk in ka ngaklah petmah. Ka lungsim bang a om hithiat thei kei zozen hi. Huchia ngaklah tak a ka omlai in ka u Ching in honsam a, kei leng ticket lak sawm a huai hon kikuppih nuam hi ding a gingta pah in kipak tak in ka va hoh pah hi.

Lam-et banglou tak in ka pai theih louh ding dan thu hon nagenpih a, huai ka zak phet in ka gingta theikei a, ka dong tuantuan zozen hi. Naa kasa petmah a, ka na ngaihtuah teng ngaihtuahna maimai petmah ahi kholdiak in ka thei hi. Kei diakdiak houh innlam ngai dia le ngai tuanse ka hi a, innlam ka om nakleh chim chihte ka nei vang mahmah. Kuamah leng phawk lou hial khop in ka om sek a, ka nu-le-pa ngai diak petmah ka bang. Nungak kichi sim mah leng, innlam ka om nakleh amau kiang a giah bang ka ut sese a, amau kiang ngen ah ka lum sek hi.

Ka nu-le-pa ka ngaih mahmah ban ah innkiim-innkiang a naupangte ka ngaina thei petmah a, innlam ka paichiang in amau a din vai khutsiam taktakten buangnai sia a a bawl uh milem, lenna lem, leh a tuamtuamte bang ka puak zel. Amaute leng kipak in hon ngaina thei mahmah sam uhi. Piching khat himahleng amaute toh kipolh a, a lunglutna bang ua gari leh thau lem kimawl pih, melmuh tongsan a naupangte etnopte et khawm, nuihzat huai thilte a nuihkhawm zaizai a amaute toh hunzat khawm leh amaute utut hihpih ka ut lamtak ahi hi.

Hunte hong pai liam zel in, Christmas naih deuhdeuh ahih man in, “Mama am coming home,” chi in facebook khong a hon update souhsouh zomah ua, ka eng toh ka hehtha khawng suak in, lungsim se deuh in a eng selua, “Kuama’n hon eng kei,” peuh chi in ka na ngaihtuah bilbel sek hi.

Delhi a ka Zomi pihte leng pianna vangkhua a tun-le-zua leh iit-le-ngaihte tualleenna lam zuan ding chi a kithalawp thei mahmah uh ahingei ding a, niteng in meltheih hi in theihlouh hita leh Delhi lenna phual ah muh ding om zou gige hi. A lomlom in hong kinawnkhe zungzung bang uh chu… Delhi khopi a kei chauh hon taihsat sawm uh chih di khawng a bang hial hi. A melte uh i et chiang in a maitai un a kithalawp thei mahmah uh chih a muh theih mai a, enghuai petmah uh ka sa hi.

Ka sepna mun apat in Phai khopi a lenna phual boh ding lenna pen ka na mu thei maimah a, a lenkhiak ma teng uh bang ka va gal etet sek: a lengkhiak ua a tummang matan uh bang ka va en kawi vungvung kha sek mai hi. Ka ngaihtuahna ah hichi bang hun a innlam i pai theih keileh le lenna phual apat bek kibuk mang tak ding chih peuh ka ngaihtuah mawkmawk hi. Mi lungleng leh nehnou tak ka hih man in ka khasiat tha lamlam bang suak in ka mittui pawtna dia kilawm louhna munmun khawng ah hongpawt mawkmawk sek. Haihuai ka kisak hun a tam a, kei kia in ka kahnuih phemphom zel hi.

     AW NANG VAIMANG DECEMBER KHA
     Kei ding in lungzuanna lel hi chia,
     Ka lungzuan hon phawng khiakhia di lel a
     Bang ziak a hong tung gige na hia???
     Bang hang a hiai bang a lungzuan zatam sial ding a mimbang na piang ka hiam???

Mi tampiten i ngaklah mahmah uh Christmas ni chu a hongtungta ngei a, kei ahihleh kikhop ding leng phur hetlou in ka om hi. Innlam pai theilou a hiai Delhi khopi a mi theihluat le omlouhna mun a Christmas zat maiding chih ka ngaihtuah chiang in ka lin mahmah mai. A lehlam ah ka khasiat tha khawng suak maimah a, himahleh i ut thu a thil pai theilou ahih man in ka kideek teitei. Kilungkim sak teitei in ka u te mai ah lungkim a ka buainate uh theisiam tak dan in ka om a ngai mai hi. Himah leh a guk in ka pona mahmah a, ka khase petmah mawk hi.

Hichia thawmhau kisatak a ka omlai in ka u Ching in, “I va kikhawm ding,” chi’n hon zawn a, hilele ka na utkei hi. Nidang a a phur penpen, zingkal a kikhawm, tawp chia nupi-papite lenkhop hun natawm a nu-le-pa toh va lengkhawm sek, zanchiang a lah lenkhop tawp tan huchia hun zang sek ka hih man in hichia ka utlouh mawk pen lamdang a sa mahmah hi. Ka u Ching in ka pa ana hilh pah a, ka pa'n ka lunglen lam thei ahi ngei dia melmuhlouh tongsan tungtawn in hon houpih sawm hi. A hon phone a himahleh ka pau peih tha leng suak lou ahihman in ka phone ka la utkei a, ka ging suak sak den. Huchia nihvei hiam a hon phone zoh in ka u Ching phone ah a hon phone nawn a, ka na dawng ut tuan kei a, himahleh ka Uching in hon sawl teitei ziak in a tawp in ka la khongkhong hi.

Ka pa’n, “Na dam na uh maw Mawi? Christmas Chibai aw,” chi’n hon hou pan a, mun khat a ka zat khawm theihlouh uh poi a sak thute hon gen pih hi. Amau leng hon ngai mahmah, lenkhopna hunte a hon ngai lua uh ahih dan leh hiai bang hunte zangkhawm thei in om le-ung a utthute hon genpih a, huai in hon khasiat sak deuhdeuh ziak in ka mittui bang a luang hial hi.

Himahleh hiaite maimai a kisuk khasiat leh kithadah sak louh ding ahih dante leh Toupa Jesu van a Pa aang a lungmuang tak a omlai ei mikhialte hon itna ziak liauliau a Pa aangsung nuamtak apan hong paisuk a, leitung kihhuai tak mun a GAN ANN piakna kuang a hong piang ahihna ah eite a ding a ni thupi penpen ahihdante hon gen a, kenleng paulou hial in ka na ngai khiakhia hi. Hiai nite in Toupa Jesu Khrist Iungsim ah piangsak thak in khovel neih-le-lamte leh khovel thilte a kisu buailou ding in leh hiai Delhi tualpi a Christmas zang thei ding a ka om khak thil kipah huai lua leh thupi lua ahih dante ka pa'n hon genpihte'n ka lung a muang sak in hi kasa mahmah mai. Hichia thawmhau leh ka bah hun a hon huai thei leh hon thuhilh thei pa ka neih man in ka kipahna a lian kholdiak hi.

Ka ngaihtuah thakthak leh nu-le-pa hon itna lian hi namaizen e, ei a taten bel i utte gen a ut bangbang a om, amaute thu leng ngaihsak lou a i om hun uh tam petmah a, nu-le-pate mawl i sak leh i zumpih hun bang omsek zomah lai hi.

Huchia lungleng tak a ka om lai in, “Bawi, Pathian phatna lasa a na vualte biak-inn a hong ding ka muh chiang in nidang a laa na lunglut luat a Guitar beek hon leisak un, ahihke’h pa ka guitar ding hon bawlsak in na chih laite ka bilkha ah honglang kikkik a, na lunglut lai in hon na kingaihsak zouleh zaw maw, na nu-le-pate ka chitlouh man uh ahi. Hon ngaidam in aw,” chi a ka nu'n hon gen ka bilkha a hong gingging a, ka nu-le-pa ka ngaihna hong lian mahmah mai hi.

Mite bang a neizou leh pil-le-siam hi le uh a ta ittakte uh toh mun khat a heikhawm a, tun-le-zua ang a singdang englou a, selungtuak a heikhawm ding chih a ut dingdante uh ka ngaihtuah kha nilouh. Singdang gamlei a, simmoh, genthei thuak a ka om ding uh hon phal hetlou uh ahih dan khawng ka ngaihtuahna ah hong lian semsem hi. Ei a tate'n amaute i itna sang mah un amauten a hon itna uh lian in thupi zawtham chih ka theikhe thakthak hi. Nu-le-pate tung a ka kampau kilawmlou leh a zakdah ding ua ka gen khakte bang ka lungsim ah hong lang dundun zozen a, kisikna leh kisuanlahna ngen in ka pumdim. Mite eng a ka om hun ua koute sang a amaute lungsim ana nazaw ahih dante ka theichian semsem hi.

Christmas innlam a zangdia ana paithei hileng hiai thil thupi sum-le-pai in a lei zohlouhte thei suah ding in ka kigingta kei. Nuamtak in ka nu ka pate kiang ah ka zang ding a, himahleh hiai itna thupi leh goumanpha kisel gu ka muhkhiak pen ka mukhe kha ding in ka gingta kei hi. Pathian in hiai teng theikhe ding a hiai bang lungzuannate hon tuaksak hi ding in ka ngaihtuah na ah honglian mahmah hi. Ka lungkimlouhna leh a lemgel ka theihlouh pen a hon theihsiam sakna ziak in kipah thugen in leh ka maban a thil hongtungte leng kei a ding a hoih leh a deihbang a hong tung ahi ka chih theihna ding in ka nget beh lai hi.

December kha a hong naih taak toh kiton in hiai article ka hon gelh tei a, kei bang a lungleng leh innlam ngai vungvung a om, sungkuante toh zangkhawm theilou leh puanthak hiam leitung thil mite neih bang neizou lou a, genthei leh khattang kisa i na omtham uh ka ging ta. Huai hun a Pathian vualzawlna leh eite a hon itna thu ngaihtuah thak a, eite hon it a hon tan ding a Paa angsung nuamtak mai nusia leitung a hongpai a, inn hoih leh thupi sung leng hilou GAN ANN piakna kuang a hong piang i Toupa Jesu Krist i lungsim sung ua piangsak thak ding in i kideihsak pen mah leh ka hon thukhah nop pen ahi hi.

AW NANG VAIMANG DECEMBER KHA kei ding in punna thupi tak na na hi maw......

Read other article by the same writer: Na Tongsuah Khuaizu Sa'n Khumzaw