Neulai in lawmte toh ‘aim in life’ chuh hi chiahlou lah kizawitawn mahmah “ut-ut kisuaksak theile’ng” chi’n khovel a i utpen khawng kigensiak in kitui thei mahmah hi. Huailai khawng in ‘Sepaih sap/Doctor/Lenna hek’ chihte lou-ngal a dang gen di kithei se lou! Theihna mawltak sungkhia a, kigensiak ekh-ekh sam a kihihna ah kitumsang mahmah chih di hi’n teh, huailai khawng a di’n bel. Himahleh, huailai kia hilou in tuchiang in leng hiai, tua i gente a niamlua ahi zenzen kei, ut-ut kisuaksak thei a, hiaite kisuaksak hile hangleng a sit-huailua ahi sam kei hi.
Nam changkang leh khangtoute’n thupil thupi, nalh leh lungsim khoih mahmah chihkhong hau un chin, enle kinei thou mahleh ei’ thupil khenkhat-te’ bang mitheih a leng zumhuai phetlou zahlakhuai thei di hialkhop hileh kilawm bang ana om chitchiat sese in chin. “Tupna a sang leh kiatna leng a sang” chih leng a om a, hiai chuh a hoihlou ahi kei. Himahleh, hiai khawng va kichih khum vettak di le ka sa kei! Tupna sang neih ding, i kiat lele a nuai(leitual) i den sukkuk ma a ahiang kibattangna di tam a tam na di aka. “To become a good wife/husband for someone special” chih nekh-nakh khawng zaw thringlua, hou gop, tulai vai kei!
“Khovel a ut-ut kisuaksak thei le’ng” chi’a duhthusam ka samsek laikhawng un “La Siam” chihkawng bangchuh ana kithei kha vetlou la aw. Laa bel ana omkhin thamta mah e, lasiam leh minthang bangleng tamta! Deih Anglai Vol. I-XII a laa teng bangleng kitheivek hial kei mahleh, kizui theivek simmawk hi.Huaibanah, langaih kilunglut in nuam kisa a, tape neite’ inn ahihke’h nitaklam dak 4:20-4:40 (Paite Programmee) chiang in Radio neite’ kiang/inn pellou in kitung den sam hi. Laa na-na-na chuh ana kingaina phetlou in lasiamte’ ana  kingaisang mahmah thou eive, lasiam hial ana ki-ut khakei mai a hiven!
Mihingte’ i piankhiat a kipan in hihtheihna, chilkiveina leh tempaina (talent) khatbeek toh kipiang khawm hi.Hiai i tempaina ahihke’h chilkiveina, i pianpih pen en i sukkuang beh a, mite’ theih dia i taklat, pichin leh chinlouh bel thutuam. Hiai talent i chihte pen Pathian a kipan vualzawlna ahi a, himahleh, kiguizuih leh akhang-khang a kiluahsawn touh-thoh a batna chiangle om ka sa. Mikim/miteng’ tung a bel hilou in. A diak in lasiam te’n ta-le-nau a honneih chiang un a tate’ uh khatbek in amau, a suangtute’ sun in laa lam beithei teitei sim uhi. Huan, lasiam i chihte’ pen Pathian  a kipan vualzawlna leh deihsakna tuambiik tangte ahi uh chile’ng chikhial sautel di’n ka kingaihsun kei. Chihbel, laa kichi mihingte kia hilou in ganhingte tanpha in leng ngainuam leh pakta mahmah (tei) ahih man un. A tungtuanna mahmah khat nawn chuh, “Laa i chih thu ahi a; thu i chihleng laa ahi” i chi ua, tua toh kiton in thu a i genchiang theih tatak khollouh bangleng laa a chiangtak a gentheih chihbangleng om veve hi. Huaiziakin, laa i chihpen tungtuan mahmah ahihna ah lasiam leh ‘aw’ hoihneite’ en-huai in ngaihsang huai mahmah uhi. Khenkhat ngialngial houh lasiam vuak hilou, melhoih lai sawnsawn zo-mah!
Huai ut-ut khawng ka kitelsiak lai un  ‘lasiam’ ana tel khale’ng bangla ka sa d’aw. Pathian la maw, Zawlla ahihke’h Gam Ngaihla?? Pathian la sale’ng lah ka om dan, khohei-gamtat leh ka lasak hong kituak kei lo-mawk leh mite’ nuihsan lel hi di ing a! Zawlla sale’ng lah tamtakte’n koihdan tuamkhat honnei mawk zel di ua! Gam ngaihla ah gen-le-sak om keipen chi’n sa leng lah changkang gawp i d’uam ah gamngaihla hoihsa leh ngaisang ki-omnawn manglou zel... Salou a om di lah kei a kipan a hihtheihna om pen bangmahlou suah a, kua-mah theihlouh dia kiselgu phetlou a mangthangsak lai zo-mah di ing a... Bangla sapeuhmah di ka mah diam aw! Lasiam ka na telkhaklouh hampha hina maizen ing e!! Hilele, laphuahsiam bek ana tel kha himhim mai le’ng zaw...eh! hileh bang la ka phuak d’aw???
I lak a lasiam tamzawte’n Pathian la a sa tangpi ua, a hoih in a pahtakhuai mahmah uh. “Pathian in ‘aw’ a honpiak bangdi’n a mah’ phatna louh di’n ka zang thei dia” chihbang chuh nak thupilua ahi. Himahleh, ngaidih- a tung a igensa mahbang a mite’ hon et-dan leh muhdan a tuam khak diing lauhman a lunglutlou phetlou, ei mahmah leng Pathian la hial sa dia Pathian toh kizopna hoihtak neiloupi  a Pathian la sa pongpong mawk ihih khak ding lauhuai ka sa khemkhem ve! Na om dan, khohei-gamtat  toh na lasak kimil mahmah lou banah, nang a kipan huaila sa dia lunglutna leh kipiakzohna, Pathian toh kizopna hoihtak neilou pi, mite’ theih leh ngaih a kilawm, mi’ maivilna maimai na a Pathian la sa pawpaw mawk na hihkhak le pen khovel a mi hehpihhuai penpen te’ lak a khat na hi kha ding! Pathian theih leh ngaih a zawlla sak hoihlou leh khelhna ana hihkhak tak zenzen leleng zawlla sate’ sang in huntawpni chiah(na kisik keileh) na thuak leh maituah diing thupi in sahzaw lou di a maw??!!
Laigelh mite’n le a paipih deuh uh(a thugelh uh) om in chin, gam-le-nam vai thute gelhsiam napi’n Itna thu(Love story) gelh thei hetlou chihbang le om hi v’aw. Tua toh kibang in, lasak siamna zong in laa peuh a siam veklou, zawlla sang a Pathian la siamzaw, Pathian la sa zawlla siamzaw leh a sak mahmah bangle lunglut zaw chihbang om di’n ka gingta mawk hi. Hichibang a om inchu ei’siampenpen, i chil kiveina lam pen mah zuihmai a hoihzaw mai diam chinuam dan ihih chu. Pathian la kia i sa ua, a hoihkei ka chihna ahi kei, himahleh, ei’ a kipan mahmah a le huai Pathian la hial sa dia kiminloupi a Pathian la saksang in i late’ lak ah ‘Zawlla/La tualleng’ chih bang ana om tei buang ahihna ah zawlla sa sukmai lele Pathian’ ngaih in le bang a se-tel lawmlawm khol dia hia?? Ahitak in zaw, Pathian la sa le om di, zawlla sa bangleng omlai ding  banah, gamngaihla sa le. Kigensia leh koihdan tuam chihte om mawklouh a, mahni siamzawng leh lunglutna lamchiat mah chitak leh tupguh neitak a paipih a, a kul-le-poi mawh na mun a kipanpih tuah siausiau zawk-mah lai di chuh ahih zen a!
Leitung a i damlai in bel ei’ kia a bangmah kisem theilou leh  bangmah tan kitung zoulou akihihna ah mite’ maivil a, mite’ pahtak, muh leh theih a kilawm diing bek in omtheile zaw se kei, huai di mah hi. A taktak in bang hikholkei lele. I lak ah bangkim a taktak hilou, a potham lel ngen mah hilou hia, maw le?. Huaiziak in, ‘Khap tamna lamlam mah zuih dupdup’ phot  ngaile zaw hikha mah in teh! Kua mah soisel thei khang!
A siangsiang a  gen  in zaw i lasiam masa lamte’ un ana pansual kha ua hi. Huai ziak in, tuni tan dong in zong i lungsim uah tamtakte’n ‘music leh khamtheih(siatna)’ ana mekbelh denlai ua, kipai khe thei taktaklou nilouh hi. Music lunglut, ‘aw’ hoihtak nei leh lasiam mahmah lah nu-le-pa’n huailam adia kong honsak nuamlou. “Pathian la kisa leh sungte’n honphal d’uh, bangmah genlou di uh ahi” chi’a Pathian toh kizopna taktak neiloupi a Pathian la sa pongpong bangleng om di’n ka gingta mawk ve! Tua hihman in, Pathian in mihingte’ kal a itna  a bawl, huai la a sakkhiat di pen i lak a haksa lo mawk simta hi. Gamngaihla bel Pathian la te’n le a sa thou un, a sa khawmsuk ziau ua, gam itna la leh Pathianla bel kiho khollou hi’n teh!!
Mihing’ damsung kichi tomkhah, meipi hongkai a mangnawn zel maitoh tehkak ahi liuhleuh tel hi. Huaiziak in, sihnung a tangtawn-tangtawn, beini om ngeilou a khamuang, lungnuam leh kipaktak a i om theihna dia khalam dinmun kibawlphat a, Pathian toh kizopna hoihtak neihkan om kei mah. Himahleh, miteng kihichi vek zoulou hi. Leitung a dam lai, sa a khosa lai ihih man in khalam kia a hunkei, salam thilte- leitung hauhna, nopsakna, minthanna leh sum-le-pai chihte bangleng a loutheilou ahi. Ka chihhang a leitung nopsakna- khelhna, mit-utna, sa-utna leh thanghuaina te lak ah ikibual ding Pathian phawklou in i taisan ding ka chihna ahi zenzen kei. Hitheiliai le bel, khalam leh salam dinmun te gel kituaktak a a khankhop ding uh ahi. Ahihhang in, kua mah a hichi zou a ki-om kei, gin-na ankam tangchiah le neizoulou te ihihna uah leitung tomkhah i damsung bek ua bel khalam a i hatzoh vekvuk keileleng salam bek a hatzohsawm a minthanna delh ding ahi.Khalam a kibulphuhna hoihtak neite kan a en-huai khovel ah om kei.
Ahi, Bangteng gen mahle hangleng i ‘aw’ neihte a honpetu’ phatna leh pahtawina  a zatkaan om kei mah e. Pathian toh kizopna hoihtak nei a, a zangtheite’n zang mahni. Pathian toh kizopna hoihtak neiloupi, a kilawmsakna maimai a Pathian la sa a, a minsiangthou su-bot loh tulel i hih khak diing a lauhuai ka chihman hi. Banah, zawlla in i khalam dinmun, Pathian toh i kizopna pen a su dengdel in a sutan zou sam dia hia, a pil a, kidekzohna neite’ a di’n. Pathian  lungsim i theikei na a, Pathian in le zawlla a huat pumlum na di le om taktak di a maw, Itna lah a ma’ bawl hi ngal a!! Lasiam Hile’ng Bangla Ka Sa Mahmah D’aw...!!

Lasiam Hile’ng... | ZM Tonsing | ©23/10/12