Lai ka gelhlouhna hun sawtpi ahita a, gelh utlouh man leeng hilou in kichinlahna leh fellahna ziakin ka ni leh hunte hong mawk beibei kha hi. Hiai hun sung in khual gamla le ka zinkhe kei bok a, himahleh August 22-Sept. 7, 2012 kikal in Aizawl bel ka va zinkhe ham hi. Hiai le ka research work toh kisai a field work dan a zinkhe guih ka hi a, hikei leh phazou loulai diing ka bang hi. Huchibang in laigelh diing leeng ka ngim khop a, ngimthoh a tukum bang hong beidek guih zel ahihman in ka khualzinna a a gam mite kava muhdan leh, amun a na om imi isate ban ah amaute toh kava kikupkhaak thute uh khenkhat hon gelhkhe leng ka chi hi.
    Mizo-te bel Pathian thu ahat biik ua, a limsang thei khop mai uh. Sunday ni in a Biakinn-te uh a kihong nitum a, kholak ah omdan hoihlou himhim a kimu kei. Khamtheih kham leh nungak tangval kizui ngulngul chihte avang khop mai. Kholak a laizial teep leeng a omkei bok. British-te hun lai bang in Pathian thu a deihlai ua, kumzabi 20na bullam a a limsang (revival) bang uh ahiden sim lai uhi. Paite bel a tam mahmah diing chih muhtheih in a om a, himahleh tu in Mizoram context ah nam mang lellel ahi uh. Hiai bel a gammite’ geeldan mah ahi a, tu 2011 General Census ah tribe min in kisimpina a paisak kei ua, Mizo min dan in a gelhlut top uhi. Amun a omte gendan in, Siamsinpawlpi, Aizawl Branch in 2011 Census a Paite chih min a omlouh lamdang sa in Mizoram Government ah a complain ua, himahleh tribe wise list teng kilakhia ahi chih dawnna amuhdan uh hihtuak. Hiai toh kisai thuchian theite’n hon update leuchin uthuai mahmah hi.
    C. Chawngkunga, Ex-Minister toh ka houlimna uah, Paite ka hi a, himahleh Paite ka kichi utkei. Aziak ahihleh Mizo in hon khaikhawm a, Mizo kuamah a tuam hilou in, akichi peuhmah Mizo ahi mai uh. Paite bel nam mangkuan ahita a, tu in apau uh pau mangkuante lak ah atel. Gam deihna chang leh demand na chang lah a thei sikei ua, gam neilou na nana chu apau uh le amang diing. Mizo a i lungkim in tuh ei aham pha a kihi mai, achi hi. Amah ahihleh MLA term 3 vel na chingsa ahi a, a term nanung pen 1997 hiam tan ahi hi. Buailai a Peace Mission dan a Mizoram apan hongkuante lak a khat ahi hi. Ka behmin tak bel Chongthu ahi a, Hauzel te ka hi ua, Paite ka hi uh a kichi hi.
    Ex-Minister Thansanga Hangshing leeng a taksa hat mahmah lai a, 1972 a Mizoram Legislative Assembly a Speaker masa pen ahi a, MA, Ph.D leeng ahi zawmah hi. Laibu tuamtuam leeng a bawl a, huaite laka khat, Paite in Mizoram kichi, Tribal Research Institute, Mizoram Government in 2011 in a republished hi. A laibu bawl, A Century of Government and Politics in North-East India, Vol. iii-Mizoram, S. Chand & Company Publication, 1987 bang honna present hi. Amaute Mizoram Paite laka mi masa leh poimoh masate ahi uhi.
    Pa Vumzakap, Retd. Administrative Officer, Nehru Yuva Kendra, Mizoram Government in hichin hon gen—Census a lah Paite hon telsak nawnlou uh, Mizo a hon gelhlut vekta ua, innlam ate’n lah hong ngaihsak ban taktak zoulou, hiai mun alah maphu di taktak om bok silou, denchiang a i nam mansuah petmah diing ikei ua, hiai lah Mizo-te policy na hi gige. Mizo nahthlak hon chi tei si uh, i pau lah Mizo pau a pom teltei ut si zellou uh. Autonomous District Council lah kuamah ka pe nawnkei diing uh, chi uh, Pawi leh Lakhei Autonomous Dist. Council bang leeng kou piak ahikei, Mizoram State omma a Assam Government in ana piakziak ua neikha ahi uh, kou piak di hileh kuamah ka pekei diing uh, chih hilai. Hmar-te bang leeng Sinlung min dan a regional council pomsak khemkhem tei na ua, atak a autonomous status taktak piak a utlouh pi uh. En lah bangmah bohzui nachang theilou, tua i phut kei uleh bel i tribe min bang leeng hon lakhe den diing ua, tunung a chu autonomous region bang leeng nget haksa mahmah ta diing, chihte amah gendan taangpi ahi.
    Mimbung papi khat Aizawl a ana teng lui khat in leeng a lung hihmoh thu hon hilh a, Nam makai diing a omkei a, ana omsa eimi te’n lah panlak utna le neilou, tua vai polel te’n lah hichi lam ngaihtuah baan dia om lou, ana khotual kipumpiak thei di upa nih khong hon septel uh henla hon consult zel leuzaw a lampi di kithei mahmah hiven, chi hi. Innlam apan heutute hon zin a omchiang ualah Mizo kamsiam a ana sulung awi zel uh adiam ah a thu taktak hon genkha lou a kikzel uh bang a…, chiphet hi.
    Heutupa J. Thanglianpau ka dotna ah, Kei leh Muana Hangshing in tuh sukpi khat pan kana laden ua, himahleh hon zuitu di mi omlou ua, Muana lah ken ka zuihkei leh amah kia in semzou samlou, tangval lai hun tengteng tuh nam adia na kizang bei amai ve, hon chi hi. Regional Council tan bel Mizoram Government in hon tah ngei ua, himahleh Autonomous District Council lou deihlou na kichi in, huaitan lah kiphusuah zou talou, ami atai di mahmah ki omlou ahihna ah, Paite bel tribe recognition na kihisak zou in, tun Muana Hangshing lah zi nei in, Champhai ah omta. Tu a i ngetmeng keileh denchia muh haksata di, eimi khua bei hiaihiai, Paite pau siang zang kho 10 zong ki-omzou nawnlou di hi. Denchia eimi teng zong hong Mizo suakvekta di a, zekai lam ahita, chih hon gen hi. Mizoram ah bel Paite dan in hon theivek ua, Paite min in ki-omkhawm a, opan kilakhawm mai hi. Paite minlou hon recognized tuanlou ahihman un, Zomi min bangpen zadah mahmah leuleu diing uhi. Paite ahihleh Mizo nuai ah koihthei vanglak ua, Mizo lou pawltuam a om diing bel phal bilbel lou diing uhi, chih hon gen behlap hi.
    Thukhitna in, Mizo-te bel nuam mahmah ua, a lungsim uh le lian in Offis khong a hoh leeng eilam banglou in siamlua uh ahih man un ngaihnat huai mahmah uhi. Numei staff-te bang hon deihta uh a de aw, chih dekdek in omthei hi. Himahleh amau pau i zat sung nuam ua, ei pau zang leng hon etdan uh tuam pah hi. A lungsim uh a let dung zui in doha nei thuk mahmah ua, eilam in huai theilou i bang. A lehlam ah mundang a omkhe khalou tam uh ahihman in, a lungsim uh kochik in neu mahmah lel hi. Mizo pau kia miteng in a zat diing un ngaihsun ua, Mizo pau zangkhem peuh Mizo dan in ngaihsun thei leuleu uhi. Taxi ka tuanna khat ah, innlam a te’n hon phone kha ahihman un ka kihou ua, ka kihou khit un ka nung a tuangte bang pau a, Paite pau hiale, chiin kidot bawl uhi. Taxi driver pa’n, hi, Paite pau ahi, ken tuh ka theikhen theita khop mai, Paite pau leh paulou chu ka theichiang lua, achi hi. Huaikhit in keikiang ah, nidang deuh in ahihleh, mi tengteng Mizo pau din kingaihsun a, paudang deuh zangte bang i zakchiang in i etdan danglam pah geihgeih hi. Mundang potkhelou ngen a kihihman in paudang tuamkoihna om pahpah a, tuchiang in ahihleh kihuchi nawnlou deuh hi. Mun dangdang ahle ki-om tamta, pau tuamtuam le kipomtheita hi, hon chi hi. Keibel taxi ka tuanlai geihgeih in ka sungten hon phone kha gige zawmah ua, eipau ngen in kava pau bualbual gige hi. Poibang kinak saklouhlua hinmaw!