Ex-S/S Sgt David Khamlianthang @ David K. Ngaihte

(26.02.1976 to 28.08.2012)

• Pianni / Khua : 26 Feb., 1976 / D. Phailian (Lamka)

• Min Phuaktu : Evan G. Thawnzakham

• School Kaina: Don Bosco H/S, Thangkhai Govt. H/S, Jamdal Memorial H/S,

                        Royal Academy, St. John's (Shillong),

                        Mizo Modern (Shillong).

• XII /Degree : MBC / Manipur University

• Zi Neih Ni :     12 May, 2002

                       (Aji – Mrs. Chiinkhansiam @ Siamnu

                       d/o Thangnou Samte, Gangpimualkawi)

• Tate :            1) Miss Haukhanlun @ Tete (05.07.2003)

                       2) Miss Biaknunhoih @ Nunnun (10.05.2008)

• ZRA a Sepna :1) Seppat kum – 2003

                       2) Specialised in INT Work, Special Operation, Defence Liaisoning & Group Commanding

                       3) Awarded best cadre during BMT at Songtal

                 4) Sepkhakna munte – Lamka, Camp Muvanlai (Teikot), Hiangtam Khunou, Suangdoh, Phaitong / Thanlon, Shillong, Aizawl

                    5) A nasep hoih kipahpihna in Army Major khat in Pistol khat pia a, aman Pawlpi heutulian' khut ah pelut hi.

• Pawlpi Min in : 29 Aug., 2005 jan dak 11 vel in Pawlpi' min a nasem a Lamka town sunga gari a pailai, amah gari heek, arms bangzahhiam toh CRPF patrolling party in man uhi. 57 Mtn Divn. Army-te'n apoimoh banga zatdia David apiak uh I/Card nei ahihman in tua toh mankhawm ua, alawmte ZRA cadre 5 toh Sajiwa Jail ah kha 8 vaal ataang uhi.

 

• Thukhupna:

David bel heutute leh pawlpi' vai, nam vai leh mi' hoihna di ahihnak leh aju-ahaam thuak ngap, ngalhat mahmah mi ahi hi. Tuabanga mihangsan leh kipumpiak ahihman in gal-matawng, zum-le-hiam leh mei-aam sik masa a apanna hun tamtak om hi. Nu leh pa leh asanggamte'n innsung ngaihtuahna hang in ki-awngsut ding in hun tamtak ah kun jel mahle ung tawpthei mawklou ahihdan hon hilh sek hi. Himahleh, hun hong pai jel in heutute' kiangah khawlsak ding bang in ana kinget hun om mahleh khawlsak in om tuan lou a, 'suspend' a a-om hun in leng hinsak kikpah in om hi.

Ahun tawplam ah, election vaai bang a Pawlpi leh heutute' deihdana apan laknate ziak in mite' muhdah leh huat lawh hialin om a, suangkulh baang avajut nung nasan inle ngohtheihna chituamtuam a ngoh in omlai hi. Amah zong miteng' deihbang a gamtang a dik bukim zoulou mah zaw ahingei ding - ka lam-et louh leh gintak louh laitak un sihna khop a mohtan sak in ana omta maimah hi. Huchiin, gam-le-nam vaia a-it leh ahakkol puakpihte' khutlum ah soisak lup in om hilhial a, aluang nasan leng ui-le-aak si bang maia phummang mai ding, iim zoh hileh iim mang tawntung ding chih ahingei dia; nungleh heensawmsa, ataltanga 9mm pistol toh suktuaha kap hingei dia upmoh (or avuhvang thoh uh!?) in akhuplama kokhuk (1'.8"x5'x2'.5") kitou ah lupsak in oma, leisai in vuk uhi. Amun bel Pangzawl khosak a Bus Terminal Building kibawlna sak deuh a paitouh lampi apan veilampang ahi. Aluang photni in, nungak-tangval tamtakte gari lian leh neu 20 val bang a kuan in, tupi leh suahdul leng zangngam lou in David luang akhuk apan khut mahmah toh akhuat khia uhi. Huchiin, a sungkuante leh mipite' itna ziak in David' luang kilawmtak in August 30, 2012 suun in EBCC Bethany leh YPA Bungmual Unit makaihna in Pastor M. Ginzatun in thusamna nei in Bungmual Hanmual ah vuiliamna kinei hi. Lam-et louh khop itna toh gamla leh nai apanin suunpih tute hong paikhawm uh a, nampuan chituamtuam aluang tuamna lel zong 200 phial mahmah hong lut a, tuni dong kidong lailai hi.

June 2012 a ZRA apana tawpsak ahihna ziak leh ahinna laakna ziakte innmun program (August 30, 2012) a heutute' thupiak bangbang a inndongtate laka khat in mipite' maia hon simkhiakte hiai anuaiate ahi:- (aziak thei ut mi tamtak kihilh senglou ahihmana hong kisuah mai ahive)

     1) Suspended once – Revoked. Suspended again and Terminated.

     2) Pawlpi' buaima deuh a Ration ladia hong kuante kianga Pawlpi' buai di ana genkhol in President in sam – pai utlou.

    3) Nihveina dia Thonkhogin tungtawna sam nawn – hoh tuanlou.

    4) Tutung buaisunga taikhia. Gauhati base a hiai lama pawlpi mite vau. Secy hial tawpsak thu, etc.

    5) Tua hong paina Defence sunga mi khat-le-nih tunga action ladia hong pai.

    6) Pawlpi kalh a anasep tamluata ahihman a action laak ahi.

Hiai atunga thute adik leh diklouhna bangmah i genthei keia, gen leng isawm kei. Ahihhang in, Gauhati ah bel David hohlou in anawi atsak (Sielmat Christian Hospital a a-at) damtheilou leh sawt apana taksa noplouhna aneihdette ki-enkolsak di chiin Delhi ah asanggamte pansan d'in hong zin a, dawr neuchik bawl ahihman in dawr van lak didan khawng ngaihtuah kawm in Sadar Bazar bang le hoh hi. Innlam apai inle Delhi apan naupang zundaap(diaper) tampi pua hi. Huan, Gauhati apan Reliance Mobile number zang in mi vau kichi mahleh huai number amah a ahihleh hihlouh ka theichiang nawnkei chi a, kum 2010-11 kikal laka Hiangtam Khunou leh Teikot Muvanlai a a-om lai in zaw Reliance SIM Card khat zangkha zual chih gena, huai pen bel sawta alawmte kuahiam pia ahihdan leng Delhi ah gen hi. Lauthawng hetlou leh thah a om maimah dia kiginlelhna nei hetlou in Delhi apan Lamka hong pai a, azan thumna di'n azi-le-tate toh ki-it leh lungmuang tak mai in hiamhei khat mah toh leng omlou lupna a ihmu hithit lai pistol zanga pikhiak in om hi. Thil omdan ginglel pah zaw ahingei di, taikhiak leh kikou leng sawm lou in 'goh ding belam in asihna mun ding azot' bang mai in thumang tak in alawmte zui hi. Amah soisa ding leh atawp dong a ahinna tung a gamtang ding in alawmte, amin ua ana saptheih ngekngekte mah, sak-le-khang apan hong taikhawm ana hidan ahi uhi. David' hinna tung a hichi guih a thiltung di kisalezaw...chihchih in om a, "e'n mi' hoihna di, damna di igeelgeel laia i melma leng hilou, ilawmte'n hiai bang teng ana sawmsawm uh hita'h", kichi phiing hi. David' hinna tunga hiai bang thiltung Pawlpi' deihthusam hilou a, mi khat leh nih bek lunggeel ahih ding ka lau mahmah uhi. Bangteng hileh, hinna laakna ding hial in hiai ngohnate tuh evidence/proof om vek himhim ding in agintakhuai. India Gam Dan nuai ah zaw, Nov. 26, 2008 Mumbai Attack a hingmat omsun Aftab Kasab bang Supreme Court of India in si dia athutan khum nung nangawn in 'India President kiang ah ngetna (appeal) abawl theilai ding' chih hilai tel a maw?? Zomite'n 'Zo' leh 'Mi' khenlou ding in tunung in zahngai mahmahta ni, Pathian' hon piak gam a lemna, muanna leh bitna toh khangtou a i teen theihna ding in.

"Melma in hong thahsak zohlouh uh, galhang leh salpha David' hinna ahakkol puakpih alawmte ngekngek in hong laksak uh ee...", chi-in kahtam ka louta mai uhi. Amah sih jan in khasumvel om in, sun in nisumvel om hi, achi uhi. Zogam salpha' sisan luang in ki-itna leh lemna chii Zomite' sung ah hong tuh hen aw. Amen!

"Dougal kisiah kei ni maw, gamlei it vang in,

Simthu i hawm khial zong in ziin hawmkhelh chi ni"

 

David zi leh atate

 

Aphum na kokhuk