Pawl 7 hi in ka kithei. Numei khat ka class-te uh hoih kasa lomawk a, skul kai bang amah ziak in ka phur hial hi. Amai a lai theilou khong a din a, salte'n hon zep/gawt ding khong ka ut hetkei hi. Lai a siam mahmah mai a, kou pawl ah khatna in a pangzou den a, a khen chiang in kei bang kana kisuanglah sek hi. Amah muh ding chih ziak in skul kai di bang kisil lou in ka kuan ut hetkei zel hi. Hoih sa mahmah vuak ka kisak lai in naupang chik chilou a ana guk ngaih lokhin kana hita hi. First bell ging ma minute 15 khong in skul a hong tung gige a, skul hong kuan ka muh ut ziak in a hong tung ma minute 10 khong in kana tung masa zel a, kana gal melh sek hi. Kum kim bang a pai liamta, ngai lah ka kichi ut kei a, ahihhang in amah ka muh louhchiang in lah ka lungsim a muang kei a, bang chidan a dia aw.... chih kia ka lungsim ah a hong kilang den hi.

Ani ani in ka lungsim a luah zou deuhdeuh a, naupang chik ka hih ziak in iitna hiding in ka koih thei kei himhim hi. Iitna kichipen theisiam ding in ka naupang lolai ka kichih kawmkawm a, a lampi ana tawn nilouh ka hihdan ka khonung theih thak hi. Lawmte'n hon dem bawl chiang bang un ka heh mahmah a, ahihhang in ka lungsim bel nui hiauhiau dan aitu. Pasal a houpih mun deuhte, ahihkeh amah toh kimaingal deuhte bang chu enn toh hazaat kithuah himai. Vuak ek bang ki-ut himai, a om khawm uh i muh chia i tha bang thak tettet mai dan hin maw. Sports hong hita, huai pasalte mah toh hong kizui uh, nek di a neih ua leh ne khawm uh, a pasalte'n a dang uh a tak chia a tui puakte uh va dawn sak zel uh. Kare! Huai chiang bang a chu, na duh ua leh nou le kipuak ve ua chi a va vuak ek ut huai himai. Vokha vanglak le huai huntak in zaw kithat kha suak leh kilawm. Huai ahihhang a en bel kamkhat le va kihoupih ngam lou. A houpihte hua chidan eive.

Kum hong bei a, kum hong thak zel chih bang deuh in hun hong pai zel ahihman in a kum nawn inle ka kituak kha nawn uhi. Huai khong chiang in bel kilian simta ahihchia kam khat kam nih khong kihoupih ngam panta hi. Skul kuan le amah toh kihou/kiton khak ut ziak in lampi gei khong ah kana ngak a, kituak kha chidan deuh din plan ka bawl deuh gige hi. ;) ;) ;) . Hong kimai ngal simsimta. Hilehle nikum a pasalte le omthou uh ahihchia hun teng a va kihoupih thei lou zel aichu. Hazaat kipan nawn tageet. Huai pasalte skul hong kailouh ni uh bang, ahihkeh lai theilou a classroom pua a a ding hun uh leh salte'n a zep/gawt chiang bang ua "Khara haap o" va chih uthuai himai.

Hun leh nite ang pailiam zel in, kum leh hate ang kikheng zel ahihman in summer vacation ang kipanta hi. Nidang a niteng a amah mulou a ki-om theilou phial a, tua kha 1 bang amah mulou a om di chih ka ngaih tuah chiang in ka lung a kham mahmah mai hi. Exam zoh ni a mi a kipahpah mai zen uh toh kei bel ka nui vak kei hi. Suti hong kipanta, lungleng chidan deuh a nikum a class photo-te bang va ki-en deuh zut. Huai bang lukham nuai a koih zenzen hilai. Nitaklam khat futbol sui dia ka kuan leh ka veng ua a lawmnu kiang a hoh hong kiklam toh ka kituak ua, vak kuau zezen hileng a kilawm hi. Kei le a mulou dan a om (hon houpih khak leh chih lametna ziak a) kawm a a kiang deuh khong ua va pai chih leh hon na en in chin hong neu hieuhiau lel, hon houpih lou daih, Geihrer!!! Ahihhang in huai nuih mai pen ka mitkha ah a mang thei mahmah kei a Star Movies, Star Plus, HBO leh channel dangdangte a film i et chia advertisement a tam sang in leng hong dawk tam zaw hi. Kipe hoih ka diam, hon houpih lou a hon nuihsan na ziak ka ngaihtuah chiang in aman leng hon ngaihziak a hon zahtak hi in ka thei mawk hi. A ziak di dang theilou ka hihman in a tawp in try kon sawmta hi. Try ka sawm hang in kam a gen ngam dite ka hihet kei, kei ah huai tan a genna ding in hangsanna leng ka neikei a, Love Letter gelh mai ka hon sawm zawta hi. Ka lawmpa toh Love Story bu tuamtuam eipau toh sappau toh kaikhawm in kon en ua, lungsim khoih mahmah dia gelh ding chih ka tup uh ahi.  Suti lai a study table a tu in lai va gelh le sungte'n hong muangmoh khak di uh lauhna ziak in, zan dak 12 nung in ka lupna tung ah ka gelhta hi. A hoih thei pen dia gelh ut ka hihman in tam veipi mahmah gelh a suak a, dak 3 lam in a hoihpen di chi a ka tel ka hon gelh khin khong hi. Ka ngaituah chiang in ka ngai mahmah mai a, amah lou a hinkho zat ding khong ka ngaihtuah ngam kei a, pasal tamtak in taksa etlah ziak khong a a khem khak di khong ka lau mahmah mai hi.

Zingkhua a hong vak a, ka laithon gelh pe ding in zing ann nek khit in a veng lam uh kava zuan pah vengveng mai hi. A inn uh va lut ngam lou ka hihman in a innkim uah hong pawt khak kilam-en in ka vak lehleh mai hi. Dakkal 2/3 khong ka ngak nung in leng a hong pawt tuan kei a, kei lah va lut ngam lou ka hihman in, nidang chia kuan thak di chi in ka paisan phot mai hi. Nibang ziah hiam huchia kava velhvelh nung in leng ka pethei tuan kei a, ka laithon bang ka kho-ul ziak in a hoih nawn kei a, gelh thak bang a ngai hial hi. Ka gelh thak nung a leng pe thei tuanlou ka hih man in, a tawp in skul kai nawn chiang a piak mai di chi in ka laithon gelhsa pen ka nuai tom a ka paih mai hi. Nibang zah hiam nung in skul kai a hong hun nawn a, ken leng laigelh thak in a lem hunhun a piak ding in lau pipi in skul ah ka po gige a, ka piak ngam ngeilouh ziak in 3/4 lam gelh thak a ngai a, a tawp in kum in a hon beisan khong a ka pe thei nawn kei hi. Ka omna uh kisuan ziak in skul khat ah ka kai khawm kha nawn kei ua, ka iitna masa deih lua hinapi in tang khalou ka suak maimah hi. A thu khonung a ka zak chiang in huai hun lai a aman leng honna ngai ahihdan leh kei muh ut ziak a ka veng lam uh hong phazel ahihdan ka za a, a numei pen in pat ding a utlouh ziak a kei pat ding ana ngak ahihdan khong ka theih thak chaing in kisikna ngen in ka dim a, sap kik theih hileh chihbang ka ut mahmah mai, lah ahithei nawn kei, ka iitna masa kei zahkai ziak in a chaantu in ka pangta hi.

Ka iitna masa Zogam ahi a, Zogam a teng Zomite a ding ahi. Zogam a zomite toh om khawm a, amau toh hinkhua zat khom nuam in bukim kasa hi. Zomi lou in a hon tuh sawm a hong maingal a hong nel mahmah chiang in ka haza mahmah a, vuak a thah bang ka ut hial hi. Alehlam ah Zogam (a leitang kia) pen leng ana iit midang a tam mahmah ua, zogam a zomite iit kei lou leng ana tam mahmah zel hi. Zomite ka iitdan(iitna tak ahihdan) leh a hoihna ding  gen ka tup chiang in, gen theihlouh lauh huai mahmah thil a tam a, gen ngam lou in ka gelh thoh zel mai hi. A zogam vuak iitte'n bel utut, koikoi ah a gen thei zel uhi. Huai a hihleh chi in ka kipat sawm zel a, ahihhang in a hihi hi heh ka awlmoh/iit nawn dah di ka awlmoh tam leh ka khovel bei nang nai chih ziak in ka tawp kik zel hi. Ka awlmoh/iit ziak in ka gelh thoh zel a, ahihhang in a sim ding pen in a sim ut mahmah hang in a sim kha tuan kei a, huchi in ka gelh sa  ahong lui a, ka gelh thak zel a, simlouh in a hong om zel a, ka iitna masa zogam pen ngai mah leng tuadan abat touh zel leh aw singdang ang hon zal san dia... iitna simthu hon lel kha hileng aw...!!! chihlouh gen ding dang a om kei ding hi.....