Zodawn ah gari lampi nasan a tun louhna mun ah genthei haksatna tampi tawh kana piangkhia hi. Zing thouphet loukuan dia kisa in ka pa tawh ka kuankhe zel ua, ka nu awl a hong kuan in ka neek ding uh ann hong puakzel a, lou buuk a ne in annkam bang a lim thei mahmah mai hi. Ahitazong in lungsim pilna lam ah zaw ka niam mahmah mai hi. I ngaihtuahna, I lungsim a kochiik mahmah a, mite tawh teh ding in a kihai mahmah mai hi. Hilele khosung achu nuam kisa mahmah in kuamah a ki eng law tuankei hi.

Tuuk tuui te hong luang khit nung hun sawtlua le pai nailou in biakinn khawng ah pau ngaihna tungtawn in leenkhawm laa te hong kikhah ta a, lungleng mite adin a lunglen huai mahmah mai hi. Lawm tampi mundang a omte’n innlam hon zuan zungzungta ua, innlam a ana khosa tampite bang inleng Lamka lam ah Krismas puan ding lei ding chi in a zinkhe zungzung uhi. Ka muhchian ka eng mahmah mai a, himahleh ka neihsa uh chin hetlou ahi chi theilua ka hihman in a englou, a utlou dan in ka om mai hi. Ahitazongin ka nu leh pa te’n hong theisiam ua, hong itlua uh ahihman in ka khanvualte eng vungvung a ka om ding phallou uh ahingei dia ka lou ua piang meh leh thil tuamtuamte zuak in Lamka lam a hong hawhpih sawm uhi. Ka kipak petmah a, alehlam ah ka khasiat asuak petmah hi. Aziakbel a tapa neihsun uh ka khasiat a mi ka eng ding a phallouh man uh ahihlam ka theihluat ziak in.

Lamka lam ah ka va zin ua, chikmah a khualzin ngeilou ka hihman in et nop bang ka hau petmah mai a, lampi gei a sepna tawh kituak hetlou a inn thupitaktak kibawlte, lampi ah sum neekguk a kilei gari taai zungzung te bang etnop kasa mahmah mai a, amau hihna pen hilou in a gou neihte uh ka eng thei petmah mai a, amau neih bang khatvei tei neih ding ka tum tinten tamai hi. Inn a om a ka nute’n nasep thilbangkim a hong na chiil sa uh ahihmanin Lamka a ka tunna a ka pute inn ah leng inn bang va zuut pih in tui bang kava tawipih gige a, ka pute’n leng hong kipahpih in honna iit petmah mai uhi. Huchi’n ka nute kiang ah hiai I nau uh huai a loukhou a aomdet hoihlou ahi, ka inn uah hong om henla lehkha hong sim leh hoih ding hive aw chi’n ka pate kiang ah agen uhi. Ka pate’n hiai thu azak un a kipak petmah ua, lem ana sapah mai uhi. Keile Lamka a omkha ta diing chi in kuamah theihpih hetlouh in kana guuk nuihnuih mai hi.

Krismas leh kumthakte nuamtakmai a ka hon zatkhit nung in Lamka lam ah ka pute kiang a om ding in ka hong kuansukta hi. Ka lungsim a nuam mahmah mai a, kuamah eng ding leng ka nei nawnkei. Himahleh ka lawmhoih taktak tampi Lamka a siamsin ut tampi tanau omna ding neilou leh sum leh pai a haksat ziak a Lamka tung zou loute ka mangngilh hetkei a, amaute ka ngaihtuah luat ziak in ka mittui gari sung ah ka nulnul mai hi. Kipahluat chiang aleng mittui in zui zel ahi achih uh zaw kei tung ah hon tung ahi chih ka thei thak semsem hi. Khovel I chih zaw hichileh chih na ngen ahimai maw…

Lamka ka tung a, ka pi leh pu ten hong deihsak mahmah ua, skul hoih penpen ah hong kaisak pah uhi. Keile ka pawt ngeikei a, inn a om in ka nu te nasep teng ka seppih gige a, deihsakna ka tang mahmah mai hi. Lehkhasim dia om ka hih bang in lehkha ka hun neihteng in ka simsim mai a, ka exam chiangbang un khatna ah ka pang gige mai a, ka pu bang a kipak thei petmah mai hi. Alehlam ah ka tualniam luat ziak ahingei dia, ka skul kaina ah ka lawmte’n hong simmawh petmah ua, “SINGTANG PA” chih khawng in hong tawng gige uhi. Himahleh kenzaw ka hihna mah ahi a, ka theisiam a hehna inle ka ngai hetkei a, ka nui lel hi. Huchi kawmkal ah ka classmate te numei khat Hoihnu kichi in honna hehpih lua ahingei dia, kei hon tawngtawngte bang ana hehsan a, kuaman lawm dia leng hon deihlouh lai un lawm in hon zang a, amah lou lawmhoih kuamah ka neikei hi.

Kumte hongpaizel a, maban sunzom zel in pawl X bang ka hong simta hi. Ka lawmhoih Hoihnu tawh ka kingaina deuhdeuh ua, skul kailou bang ka om ni un damlou ade aw chi in inn bang a ka ki pawttuah gige uhi. Ka theih hetlouh kal un ka kal uah itna ana lian mahmah khinta mai hi. Nidang banglou in ka omna peuh ah thildang ka ngaihtuah thei nawnkei, Hoihnu kia ka lungsim ah hong omdenta hi. Huchibangin amah leng om ahi ngei dia, ka pu zahtak mahmah hinapi in ka pu phone bang ah hong houpih den maita hi. A tawptawp in keile kideek zou nawn mahmah lou ka hi ngei ding a, Hoihnu kiang ah ka itna simthu kam a lah gen ngamlou ka hih chiangin lehkhathon in ka gelh a, kalawmpa ka pesakta hi. Ka piakni nitak bang ka ihmu theikei, hon dawngkei phut mawk de aw, hon dawnglou hitaleh ka zum mah ding chih peuh ka ngaihtuah khopmai hi.

Kumtawp hong hita a, nidang a inn lam pai a lawm leh vualte tawh hun nuam zatkhawm utpen himahleng tu in zaw innlam ka utna leng a beita. Hoihnu ka ngailaw petmah a, amah mulou a hinkhua zatding ka ngaingam nawnkei hi. Ka hun awl teng uh, suty ni teng in ka kimu gige ua, ka kikhelah thei mahmah mai uhi. Piching a sepna bang nei hileng kiteen mai bang ka ut mahmah uhi. Ahita zongin huailah thil hithei ahi naikei hi.

Nikhat ka pu ziingthou pan kitchen lam ah singpi dawn ding in hong pai a, a singpi ladia kisalai thakhat in hong puuk phutmawk hi. Ka lungkham mahmah mai a, ka pi tawh hospital lam kava naih uhi. Himahleh vangsiat huaitakin lamet aom nawnkei a, ka pu si ahitamai hi. Ka om dingdan leng ka thei zou nawnkei a, ka lungsim in bangmah ka ngaihtuah theita kei hi. Aziakbel ka pu deihsak ziak liauliau a hiaitan tung ka hi a, ka pu tapa in hon guuk hazat mahmah a, ka pi tawh hithei hileh hon omsak nawnlou ut lamlam ahi uh chih ka haih hetkei hi. Kei adi’n chu vangsiatna sawnsawn ahi mai hi.

Hunte hongpaizel a, ka pu hon beisan nung in keile innluah ding zong in a langlang ah ka vaakta hi. Vangphat huaitak mai in hoihnu te innpam zek a innkhat kava mu a, huai a om ding in ka kisa ngal hi. Innlam a nu leh pate’n lah bangmah hong khak zoulou phot uh ahihmanin skul kai tawh kilawh thuah in ka om hi. Suty ni teng in Rickshaw bang kava tawl zel a, mite hehpihna dong ka hi ngei dia, van puak ding bang atam thei mahmah mai a, ka buh leh meh leina ding, ka innluahman ding bang ka mu gige mai hi. Ka nasepna a ka gim theihluat manin Hoihnu kiang bang kava phaman pahpah kei a, achang bang in hong muangmawh a hon hehsan zawmah lai hi.

Hoihnu ka itna a lian semsem a, hon hehsan hun chiang inle ka heh ngeikei a, numei ahihziakin ka theisiam petmah mai hi. Huchi ahi ziakmah ahingei dinga, aman le hon iit deuhdeuh mai hi. Himahleh kenzaw ka ut teng leng ka gen ngamkei, kei amau tawh teh dia genthei lua ka hihmanin. Ka gentheih luat ziak in Hoihnu nu in hon deihsak kei a, ka tanu nu gentheitak a khosa din ka phalkei hon chihkhum hi. Hoihnu nu kampau na kasa law petmah a, kenle nuam salou kahihmanin Hoihnu kiang ah, “Hoih, ka hinkhua ahaksa lua a, nungakte adia le ngaihtak ka hikei, huaiziakin a hausa deuhte tawh non kiteng mai ding uam???” ka chi hi. Ka itlouh ziak hilou in ka itluat ziak a ka gen ahi. Midang nei mai dia sawl himahleng midang nei din ka lungsim in a phal theikei, ka mittui a luangluang mai hi.

Ka itpen Hoihnu te inn a lah utlaw lengle va hawhthei ka hikei, lah amah mulou a hinkhua zat haksa kasalua hi. Pasal hausa khat tawh kiteng dia sawl himahleng ka itna a lianlua a, ka taisan ngamkei. Hoihnu inleng midang a deihkei a, keimah hon chi tinten a, a nu’n hong hal mahleh mihing daai zaw kuaman a kai zoukei, kimuhtheihna ding hun ka nei thou veve uhi. Full Moon nitak chiang bang in ka pawtkhawm sek ua, nuam kasa thei mahmah uhi. Amah lah midang neih utlou, kenla midang ngai theilou ka hih chian daltu tam mahleh Sihtanpha in aw chi’n ka kichiamta uhi. Achang bangin Hoihnu in hong pi ta maive nangtawh hinkhua zatkhawm ka ut ta chi’n hong genzel a, himahleh ka hihna in chin nailou ahihmanin lem ka na sa ngamkei hi.
Huchia Hoihnu tawh ki it petmah a ka omlai un nikhat a inn uh kava pha a, Hoihnu ana omkei a, anu vuak ana om hi. Hiai ni in Hoihnu nu nidang ana bang hetkei. Amaitai mahmah a, hoihtakin honna houpih hi. Ki houlim a hun kazat touhtouh lai un, ka gintak hetlouh pi in “Muan, Hoihnu pasal neihcia na lawmhoih ahihna tawh non innteek pan ding aw” hon chi phut mawk hi. Lamdang sakna tawh ka en a, “Nu, bangchik chiang in maw…???” kachi leh, kalnawn Saturday chiang in hong chi a, etna ding nasan zong ka thei nawnkei a, keile pautam nawn lou in innlam ah kapai vengveng mai hi.

Ka gentheih luat ziaka ka itpen leng tangzou nawnlou chih ka ngaihtuah a, thuaksiam haksa kasa petmah mai hi. Hoihnu pasal neih ding thu ka zak apan sunkhua zankhua in lupna tung ah hun ka zang denta mai hi. Hoihnu pasal ding bel Police a sem ahi a, a kam neih ziak a anu’n a gawm ahi a, Hoihnu leng a ut hetkei chih ka thei a, ka ittawh ka hehpih petmah hi. A kiten ding thu uh hong kithan tawh kiton in ka ki itdan uh hong thanga, Hoihnu pasal ding pa’n ka kalthu uh ana za a, mihoih leh fel mahmah ahihmanin a kiten ding uh lem honsa nawnkei a, hiai bawl gentheihlouh ale gentheisa Muamuan ka su genthei utkei, ka hehpihlua, Hoihnu tawh kiteng lengle vangphatna in ka nei tuankei ding a, ka hinkhua leng a nuam tuankei ding hon chita hi. Kei tawh Hoihnu adin zaw a kipahhuai petmah, himahleh a nu adi’n zaw a zakdah huai petmah mai ding hi.

Nikhat Hoihnu nu in hon sam a, keile thumangtakin kava hawhpah hi. Huchi’n anu’n “Muamuan nang mizawng, genthei pa ziak amaw ka tanu nu’n pasal hoihtak khat a chaan” honna chipah ngal hi. Gen ding ka theikei a, ka mit hah leng a haksa petmah mai. Hoihnu hon kouna teng pautam lou leh hi hetlou in ka mittui hong luang zungzung mai hi. Ka nu leh pa ka itna hong lian semsem a, ka gentheihdan bang ka lung ah hong lang semsem a, leitung lungngaih mittui luanna peel a leen bang ka ut tha asuak mahmah mai hi.

Awl in inn ka pai a, lupna tung ah ka lum a, mittui tawh ngaihtuah tampi tawh ann leng nezou lou in ka lum dap mai hi. Huchia ka lup lai in, ka kong hong kikiu a, kenle ka mittui teng nulsiang zok in kong kava hon leh ka lawipa ana hi a, “Muan, chibai!!!” hon chi phut mawk a, lamdang kasa mahmah a, bangthu om hiam ka chi leh, “Muan, kha lui lam a kaam I va gelh, Bank PO pen a result suak a, ei tegel ki lawhching ahi honchi phut hi. Ka kipaklua a, kanih un ka nuikhawm ekek uhi. A lehlam ah Hoihnu nu bang ka phawk zawzen a, hong housiatna, gentheipa chia hong houna kampau khawng ka phawk khe zawzen hi. Huchi’n………………………………..