THANGSUAH ZOGAM GOVERNMENT ~By: K.Thansang @Sang Quptong
THUMASA:
Kum 2150 AD, April 7 ahi a, ka Birth Day ahih ziak in ZOGAM INTELLIGENT AGENCY (ZIA) a ka seppih te’n, Birth Day wish khawng hon bawl zungzung laitak un ka Phone hong ging a, ka et leh Hill Town a om, TRIBAL MUSEUM neitu(enkoltu) apan ana hi a, ka pick-up toh ki tonton in, Museum sung a Talpak te’n buaina vabawl uh ahih dan hon zasak hi. Ken leng kanuai a sem naupang te 3 (thum) toh amun kadelh pah ua, buaina bawl Talpak-te mi 5(nga) kava mankhia ua, Zogam Police Station,Lamka District ah kava koih ngal uhi. Hiai hun ahih leh kei sana but en a ka chiamteh dan in 10:30 am ZST ( Zogam Standard Time) ahi hi. A lehlam tak in, Gensau deuh lai le, Zogam Intelligent Agency kichi kuim 2059 AD a, I makai masa te un, Bungmual Khua a ana phuhkhiat uh ahi a, aki phuhkhiat nung kum 100 bang ching nuam di hita hi.
PU-PA TE HUN SUTKIK NA:
Zogam PS a sem, Suparentendent of Police (SP) ahih leh ka lawmhoih mahmah, College kana kaikhoppih Khual Changsan kichi ahi a, aman UPSC nuai ah kum 2135 AD in IPS ngah a, India gam mun tuamtuam a kum 13 sung a sep(Service) nung in, 2149 AD February ni 20, Zomi Nam NI chet in I gam ua, Zogam Police Station ah hong sem pan a, kum 1(khat) hoihtak a sepna hita hi. A nasep hoihte ziak in Independence Day, Republic Day chihte ah Award bangzah hiam ana sang ngeita hi. Zomite a dia mi poimoh tak ahih man in, Zogam Independence Day leh Zogam Police Raising Day hun te in leng a khut mahmah ah Appreciation Certificate leh Bravery Award piak in ana om ngeita hi.
Zogam Police Station a Inspector a sem, James Minlian ahih leh Psychology Master ahi. Himahleh Zogam Civil Service(ZCS) Exam na ah Zogam Police Service ( ZPS ) mu a Zogam Police Station ah kum 2 sung semta hi. Amah toh kaki theih masak na uh ahih leh University of Zogam College of Intelligent ( UoZCI ), Hiangtam Lamka a kakai lai apan ahi, kou junior te ahi a, himahleh ka lunglut na uh chituam diak a om ziak a kithuah thei mahmah kahi uhi.Huai nung a, Zogam Institute for Integrated and Intelligent System ( ZIIIS ), Vengnuam a kaki suan apan in kaki mukha nawnkei uhi. Kei kahih leh Geography Master kahi a, himahleh tua ka sepna Zogam Intelligent Agency a ka sep ma in, NEHU University, Shillong nuai ah Psychology lam tamlou kava zilkha zek hi.Martial Arts leng Master Singkhan, Pearsonmun kiang ah kum 2 kana zilkha hi. Tulel in ahih leh ZIA ah Head of Intelligence (HOI) leh Director dinmun kalen kop hi.
Nidang a ‘ Lamka Police station ‘ ana ki chi pen tua ‘ Zogam Police Station ‘ chi a kikheng ahih dan Magazine kumlui mahmah ‘ The Lamka Chronicle’ apan katheih ahi. Police Station gei a lampi toupai, Tipaimukh Road kichi leng, Lampi bawl(pioneer) te’n Tuivai muk sun dia a bawl uh, ‘TUivai muk’ a chih dek ua leh ‘ Tipaimukh’ chi kha ua, tuni dong huai min puden ahi hi. Lampi dang khat, Tedim Road tulle in lian in maam hinhen mah leh kum 100 paisa khawng a lampi kuakna ngen a dim, akhen chiang a ana thuap thohzel uh ahih dan zanlam in Tongdam Magazine ah kasimkha hi. Gintaak haksa bangsim mah leh nidang a I Zogam uh Puahlouh leh zuunlouh a tulpan ana kai gawp ahih dan Magazine kumlui taktak, ka Pu’n ana kep khak te apan theihtheih in om hi.
Genlai vanglak in, Guite Road khAwng bang leng kum 100 paisa a naak siat mahmah ahih dan khawng website I neihte uh ’ Zogam.com, ZogamOnline.com leh Phualvatimes ‘ chih te ah alim toh muhtheih in om hi. A khen chiang a Gari taingam omlou a, a khawl depdup hun uh tam mahmah hihtuak hi( Source : Guite Road Transport Co-operative Society ). Tu hun in Zoudawn lam, anai tawp in Mualnuam KHua tan khawng dakkal 2 sung khawng in aki tung zatzat mai a, himahleh I pi leh pute uh hunlai in lampi siat ziak in Dakkal 9 khawng bang lampi hoihlou tawn in ana ki sing neunneuh sek uh hihtuak hi. Upa lam deuhte gendan in, amau hunlai a Nekgukna (corruption) mahmah ana maingal lua hihtuak hi. Amau hunlai in, Talpaak te zuhuan sa, puang khilkhel khawng ana dawn ua, tawlkhat sung Nupi pawl ten chiangpum toh ana doudal uh ahih dan ka pi’n hon hilh ngei hi. Tulai a eilak a om, Zogam Zu Company ( ZZC ) ten Kaihlam leh Mualnuam Allu( p0tato) apan Zogam Vodka a bawl te uh deihsak huai hina maizen uh e, damtheih na a di’n lah ahoih si a. Tulai in I Zogam uah Laizial tep leh TUibuk muam chih khawng a om nawn kei a, I pi leh pute uh hunlai in bel Gawbul Dum mahmah ana teep riahriah lel ua, Tuibuk khawng bang leng singpi zat in ana zang uhi.
I Pu leh pa te uh hunlai in, tua Government School luun mahmah te ‘ Bawng Buuk’ bangmai in ana om a, Phamsa it leh ngaih te zuang hongthou uh henlan, I Zogam uh hon muhpih lai le uh Paradise toh kibang sahial ding uhi ( amau hunlai toh teh in ). Tua Lamka leh Mata kekal a Sazuakna mun om dendon te nidang in, Lamka khopi sung lampigei ut na munmun banah, New Bazar leh Damkam Bazar lak a ui leh aak toh kituh a omna mun apan ki Suankhia ngen ahi hi. Tulai in Cement Zuakna Khopi sung ah omkei mah leh kum 100 paisa a khopi sung ut na munmun chih phetlouh, puan zuakna gei khawng ah om hi. Mipil I tamta ua, Sum tellou a Gam leh Nam it, Zogam Mosi leh Zogam Gandhi I tam taak ziak un khopi sung hindan nuamtuam mahmah ta hi. Thangzam Road tou a Puan zuakna kivual suaktou deudou te khawng pi leh pu te’n hong muhpih sam le uh chihhuai himai maizen e,…! Hiai khawng I genkkhak chiang in zaw, Makai masate ngaihna lenpuan bang thaksak zel hi. Lamka Damdawi inn lah nidang bang nawn talou in, kum 100 paisa a SPF solkal in Manipur a vai ahawm lai ua, Health Minister ana hi ngei, Phungzathang Tonsing panlakna ziak in Hill Tribal Medical College om banah, electric leng 24 hours pai den hi.
ZOUDAWN LAM VEHNA:
Kum 2152 AD, December ni 2 ahi a, Zinglam Dak 6:30 am ZST agin toh kiton chet in ka Phone hong ging a, ka et leh, “ You have a voice message “ chih ana om hi. Kintak a ka ngaih(listen) ngal leh, Thanlon bial a MLA, Pu. Zokhankhual @ Tiger of Zomi in, “ Sang, tuni Nitaklam dak 3:00 pm, ZST in, Lennuam Airport, Khawminthang ah na seppih te bangzah hiam toh hongpai un aw, ka Bial Christmas Ma a vehsuak teitei kasawm ziak in, nang leh na seppih te’n non zuih uh ngai di ahi. Gari number “ ZG 02 Z-1213 “ kichi, na Office ua noute hong pi dia honsawl di kahi a, na Office uh, Tunkhopum Road Gouchinkhup Veng ah kim thrap in ana om un aw “ hon chi hi.
Ka seppih-te, Zi nei nailou teng kaban e-mail ngal a, tuni gam kuankhiat nang om ahihdan leh kisa sa a hong kuan ding in ka hilh ngal hi. OFFICE ka tunkim tak un, seppih zi leh ta neisa teng innmun a ana om a, Synod Hall, IB Road a nitak Programme zang dek om ahih dan leh Talpak ten buaina bawlsawm ahih dan uh thuguk kazak te ka hilh vek a, pilvang leh navaak tak a om gige ding in ka thukhak hi. Kou tunkik hun di kitheilou ahih manin,Vice Director Tuangpu Guite kiang ah Incharge ka pekhia hi.
Nitaklam 2:30 hong gin tak in, ka phone ah message hong lut a, ka et leh “ Sir, Office mai ah konngak, na man dekta uh hia?” chih teng hong kikhak a, ken leng MLA pu Driver pa ahih dan kathei ngal mai hi. College Road tawn in ka taisuk vengveng ua, Lengtonghoih Restaurant ah singpi ka dawnsuk malam uhi. Hun in hon ngaklou ahih man in, kindeuh in Lennuam airport lam ka naihsuk vengveng uhi. Amun katun tak un MLA pu toh kimu in thil omdan bangkim leh a plan teng hon hilh ngal hi. A omdan tak bel, MUVANLAI Helicopter a pai a, Mualnuam khua a nitaklam ann nek di chih ahih banah, nitak hun a Zomi Youth Association, Mualnuam Unit te makaihna a PUBLIC Meeting neih di chih ahi hi. Dak 3:00 pm hong ging tak in, LENNUAM Airport apan MUVANLAI Helicopter 4 zang in kong kizui khe ngitngit ua, Helicopter khat pen ah ahih leh US apan, Doctor leh Nurse te adim in tuang uhi.
Minute 10 vel di khawng ka leng nung un, Mualnuam Playground hon bohpih ua, mipi a siing a sim in honna vaidawn uhi. School naupang neu chikchik ten Welcome Song hon sa uh bang zaw, school kailai khawng phawkthak vungvung in om hi. Kou ZIA lamte ahih leh MLA pu om nana a ka om uh poimoh ahih man in, ZYA makai te’n Guest House ah hon paipih uhi. Ka tun na uh Guest House min ahih leh “ TAWLDAM HIUHIAU ZIN INN “ a kichi a,anuai ah “ ZOGAM GOVERNMENT “ chih leng kigelh suk lai hi. A Guest House min toh kituak in a nuam hiuhiau khop mai, tui dawn dia om te lah, vot ngeingei in, ‘ZOGAM SIKTUI’ chih minvoh uhi.
Nitak Public Meeting dak 11:00 pm vel a zou in, Guest House lam kazuan uhi. Electric a hoih vaakluat ziak in, sun vak mah bang hial hi. Ka lupma un, MLA pu’n Zingchiang khaw mipite ki ensaknuam a om leh I Doctor leh Nurse ken te un a en di ua, nitaklam ann Songtal a ne di’n I leng phei nawn di uh hon chi a ka ihmu ta uhi. Zingkal in Aak hong khuang vengvung ua, thoh hun ana hi maimah zel hi. Tawldam hiuhiau sung a lupna te nopdan kam a genkhiat zoh di ahi kei, midang in leng va zang kha le uh chih ka deihsak mahmah hi.
Huchi bang a, Khaw khat khit a khat ka veh touh ua leh ni 10 zoh in Thanlon khopi ka tung khongkhong uhi. BUkpi leh Zoutung chih te khawng ka veh masak ziak ua Thanlon tung pah theilou kahi uhi. Ka pu’n unau melhaih buai(1997) lai khawng a Thanlon kidouna phual ahih dan hon hilh lam ka phawk khe zungzung hi. Inn a tam mahmah mai a, khua kaphak nasa te uh Mualnuam ah inn 4000 vel om a, himahleh Thanlon ah bel inn 5000 lak vel om din ka um hi. A khua omdan a nuam mahmah mai, Suahlam doh mualpang a om ahi a, tangtak a I daak touh leh tumlam doh a om, Mualnuam khua paak phengphung kigal muh thei hi.
Khua a banban a vehtou in, ka mission uh chu ni 15 sung in kaz0u uhi. December ni 2 a kapat uh ni 17 in, bangmah buaina omlou in LENNUAM AIRPORT ka tungkik thei uhi. Lennuam Airport ka tung un ka lak ua taltaak mahmah khat in thuumna hon nei a, kou hon pi dia honna ngak CAR tuamtuam 5 zang in ka paitou ngal uhi. SAULIIM RESTAURANT a ann netou malam in, a sak zek a om Creative Photoshop ah ka Tour neih sung ua lim kila te sawpsak din kakoih tou kawm uhi. Ka gim sim mahmah mai a, zi nei hileng zAw ki malis sak dia hoih lua hiven….!!
Nitak in, ZGTV( Zogam Telivision) ten Thanlon MLA leh a kaih zatamte hong tungkik ta uh ahih dan ZoSuan Zomi teng theih din hong puangkhia uhi. Ka pa’n dot nop ahau khop mai, Zoudawn a piang a zoudawn mah a khanglian ahih ziak leng ahi dia, gam omdan khawng hon dong sipsip hi. Sing leh loute amau hunlai toh teh in a tul mahmah mai, himahleh Lampi kiang ah Dol Sing leh Taak sing te a vangkim in ki Suan a, Lampi nuamsak tuan mahmah ding ahih dan kagen hi. Kou bel lenna zang a pai kahih man un, lampi nopna zar kazou kha kei uh. Lou neihna lam ah Shifting cultivation muh di a om nawnkei, Apple farm khawng a dim in om a, agah leng lianthei mahmah hi. Lamka khopi a Apple kizuak te khawng gamdang apan I sak leh Zogam Apple mah ahih dan ka thei khia hi. Pisciculture kichi bang leng Zomi-te kivakna khat suak hi. Zogam Product himhim gamdang in ngaina ahih man un, Behiang International Trade Center tungtawn in gamdang ah ki thonkhe zungzung hi.
“
KHUPCHING LEH NGAMBAWM MEMORIAL PARK “ VEHNA:
Nitaklam khat, anne zou phet ni neem zul, Pathian in Adam leh Evi a na veh sek hun di vel in, Ngulthawng Bazar khang a om, “ KHUPCHING LEH NGAMBAWM MEMORIAL PARK “ ah walking kawm in kava hoh hi. Nungak leh tangval banah naupang hunnuam zang mi tampi ana om uhi. Awl a pai a, khawmui zul a tung kahih man in leh Phalbi lai ahih man in khua bang hisim threithruai pah hi. Awl a Gate a lut in singkung nuai a bench awng khat om ahih man in huailam kazuan phei hi. Tutna a tukawm a naupang te kimawl khawng ka na enen hi. ELECTRIC lah hoih mahmah mai, a park sung teng a taan vaak phehphuah mai hi.
Huchia naupangte kimawl en a, ka neulai hun khawng ka ngaihtuah dundun laitak in, ka paam lam ah Numei kikou aw ka za a, ka etphei leh Zomi Nungak duangching mahmah khat, mai kituamsa a om pasal 4 in mat a sawm laitak uh ka mu hi. Ken leng kindeuh a delhphei in, pasal khat a awm ah ka tuan thal phei ngal a, khat a khabe a suphei kawm in adang khat a awm ah ka mantang ngal hi. A mel uh et in Zomi ahi kei uh chih a chiang mahmah mai, ka totthal pa hong thou a, hong thoh toh ki tonton in ka matpa chihlouh siah toh Park pawlam ah a taipawt uhi. Ka matpa ID ka check leh Meitei Underground,tunai a kiphut khethak Meitei Tigers Force ( MTF) kichi te ahihdan kathei a, a khatveina ahih man in leh Zogam Government toh SoO suai kai ahih man un, huchi bang a gamtang nawnlou din ka thuhilh a ka paisak hi.
Ka kiang ah, Zomi Nungak a ding a,leilak a om a puan za silh ka tawm a kapiak kawm in, “ Bangmah na chi kei na maw?” ka chih leh keiziak a bangmah chi manlou ahih dan hon gen a, ki Suanglah kawm tak in kipahthu hon gen hi. Ka en tuantuan zozen a, amel ahoih khop mai, vansawltak abang hial hi. A duang lah ching mahmah mai, hichi zaw deuh leh chihna di himhim a om kei. Pathian in a hiainu a bawlna din midang te a bawl sang a hun sawt zaw a la ngeinei di va chih di lah uang lawdeuh bang hi. Vai Mistry siam taktak ten, ngentel leh siamnel tak a abawl uh abang hial a, a thil neih teng lah pucca ahi mai hi. Amin Luni Valte ahih dan hon hilh a, tulle a Lengtonghoih Beauty Parlour a Manager ahihdan hon hilh hi. Kenleng kamin, K.Thansang, Khuptong Street House No. 54 a om kahihdan kagen a, ka sepna leh hihna banah, a poimoh hun a ki thuzak zel di chi kawm in ka email- This email address is being protected from spambots. You need JavaScript enabled to view it. leh phone number ka pia a,a inn tan uh vakha in kaki khen uhi.
Luni melhoihna in hon zou mahmah mai a, kapai kawm in a omdan khawng ka ngaihtuah den hi. Love at first sight chih ana om taktak ahi dia aw ka chi vungvung sam hi. Maimit siing diaudiau a,zalkhun tung a ka om laitak in ka phone hong ging a, ka et leh number vuak ana hi a, kenleng Luni hidia ka gintak ziak in ka pick-up pah poppop hi. Ka gintak mah bang in, Luni ana hi petmah a, kipahthu hon gen tuantuan in, a pa’n hon houpih nuam ahih dan a gen hi. A pa toh kaki hou ua, a pa’n a tanu hunkhia kahih man in kipah etsakna in ann ne din honchial a, ken leng ka ‘aw’ pah hi. A ni zing a ann ne dia vakuan in, thu tuamtuam ka genkhawm ua, Luni pa Zogam court a Judge lui ahih dan kathei khia hi. Suun hun a Office kaingai ahih man in, hakal a sa neng lian pipi dawtkhe kawm in ka pai kiksan pah hi.
KAPKHOVUNG SPORTS STADIUM AH:
Office a,ka room sung ah ka tu a, kanui heuhau gige hi. Local News ; Manipur express leh Lamka Post ka dohkan tung ah ana om a, Sports Column ka et leh K.NGUL-CHIN-LIAN MEMORIAL Football Tournament a Final, Zomi Football Club leh Maniwood( Meitei Film Star-te) kipeek duh ahih dan kathei a, ken leng Office kai tawp a hiai match lapman teitei ka sawm hi. Ka ngaihtuah na ah Luni hong lut ngal a, phone a houpih in nitaklam Dak 3:00 a football kimawl va en khawm din ka zawn a, aman leng a sepna uh tuni khawl ahih man un, manthei di ahih dan hon hilh ngal hi. Hiai football Final match ahih leh KAPKHOVUNG SPORTS STADIUM a om di ahi a, hiai Stadium ahih leh Sports Authority of Zogam (SAZ), Zogam Government et kolna na nuai a, Hiangtam Lamka a om ahi. Nidanglai a Lamka Public Ground a chih sek pen uh ahi hi.
Sawm kholh na bang in, Football kimawl kava en ua, anuam khop mai, nidang a 3rd WORLD ZOMI CONVENTION(*3WZC) hiaimun mah a azat lai khwng uh limlak I et leh leivui a pumdim hi a, tua bel Carpet Grass in pumdim ta hi. Zogam zaw pallun taktak ahi ta, Zogam paakzu te dawn ding in khuaimu ten hon zuan souhsouh tamai ua, Hill Tribal Medical College leh Zogam Zu Company khawng pansan in Zogam zu tawp kiaikiai uhi. Ka football match et uh a nuam khop mai,himahleh huai sang a etnop huai zaw khat kakiang ah a tu a hiven. ZOMI FC te’n a thazoh mahmah mai uh, Half time tan in 3-1 in ZFC te’n ma kai ua, afull time in maniwood te 6-1 tak pawsak keihkuih maimah uhi. Stadium sung a Zomi aneu alian kikou ging in World Cup khawng bang ahi tuan a hon chisak hial hi. Ka neulai a, ZFC te Manipur State League a ava tel ua pan a, a fans uh ana hitou gige kahi hi.
Thil dangdang ngaihtuah mah leng,ka thil ngaihtuah te a CHORUS maimai ahi a, kakiang a tu Luni pen bel a VERSE ahi hi. Ka itna a lian deuhdeuh mai a, gensuk mai di ka dia aw ka chi zel hi. Gen ngamlou in Inn katung kik ua, hunlem dang om chiang a dia siit mah kabang zozen hi. Korea pau zang a, ‘Saranghae’ chia nuihchiam a lelsuk nadan lah omlou ahih man in, Pathianni sun kikhop tawp a “ KHUPCHING LEH NGAMBAWM MEMORIAL PARK “ a kimu din kaki thukim uhi. A inn uah kava kha a, kei leng ka gilkiallua ahih man in kindeuh in innlam zuanin kaki khoh pah vengveng hi. Kaki hahsiang a, ann kanek zoh in facebook online zual in ka lumkawm hi. Ihmut kasawm zohpeuh leh slide show bang hial in ka mitkha ah Luni hong kilang dundun mai hi. Atawp in, ka muh nawn hunhun in itna thu kagen ding chi in kaki khim ihmu thei khongkhong hi.
HUN TOMCHIK sung NOPSAKNA LEH 0PERATION NGAL-KHAAT:
Ka phone ah message hong lut a, HOULIM HOTEL,APOLLO Veng a Zomi Council Administrative Office gei a om apan ana hi a, Meltheihlouh te’n Demand Letter vapia ua, ni nih sung a,a sum demand uh 2 crores a piak kei ualeh thilhoihlou tungthei di ahih dan hon zaksakna uh ahi hi. Office a ka omkim laitak uh ahih man in, ka seppih teng ka samkhawm a thil omdan hilh in, Information kaihkhop theih nana a kaikhawm di leh pilvang tak a om din kahilh ngal hi. Huai banah, tua kipan ni 2 sung hunnuam zang a, maban a nasep di guansa a kakoih, HOULIM HOTEL khoih a aom ngeingei leh OPERATION NGAL-KHAAT neih ngal sawm kahih dan leng ka zasak sawnsawn hi.
Kei leng, bangchi hiam khat a thil omdan hong dikkei leh sih leh hin kal a ding a Operation makaih sawm kahih man in, Luni kiang ah itna thu genlou theilou kahih dan kathei thakthak a, zingchiang Pathianni di ahih zawkmah ziak in fuh kasa sawnsawn hi. Pathianni kikhop tawp in, kaki hahsiang a, “ KHUPCHING LEH NGAMBAWM MEMORIAL PARK “ lam kazuan pah hi. Ka tun in Luni melmuh din a om naikei, minute 5 hiam ka ngak nung in hong tung khongkhong a,keilam manoh in ki Suanlah meltak in hongpai a, aduang hong sawiphei ngiahngaih ahih man in,kamit mundang ah aki heikhe thei mahmah kei. Ka hoih etluat ziak in, Slow Motion a hongpai bang in kamu hial hi. Kakiang hong tun in, ‘ Usang, sawt nonna ngak ta hia, kong zekai kha a ngaihdam aw?’ h0n chi hi. Kenleng, ‘ sawt konna ngak naikei, keile tua tungphet chihtheih ahi, nong paithei a kaki pak’ ka chi hi.
Singdang kuamah englou in houlung kong kikum khawm ua, a sam kaikhe ngihngiah te huih in a mut selsel te bang in houlim sutui diak abang hi. Bangteng hileh maban a lah na gol leh huphulh huai mahmah khat kinei ahih man in chi in, lungsim tawng pan itna simthu gen d’in kong kithawi pan a, ka gawl bang kakhuah phalhphalh masa a, ka tutdan bang ka bawllem masa zozen hi. Sih leh sih chi in, Luni kiah,” ka theih nuam tengteng hon dong leng a poi law diam” ? ka chih leh “ non dotnuam nak leh non dot zahzah kon dawng di, poiloulua ahi, keilel tak kiang a dotnop non neih kaki paklua ” hon chi pah hi.
A mittang vom kilkel hoihtak a en in, “ Tulaitak In tangval nanei hia Lun ”? ka chih leh hong ki ngaihtuah dedu a, “ Hi, tunaichin apan in tangval hoih mahmah khat,ngaih mahmah nei kahi…….” Hon chi bang zaw, High Tension electric current khoihkha mah kabang hial hi. Dang awksim kawm in, a mi thei dia le phulou himah leng, a tangval ngaih kua a chih ka dot leh ki lamet phaklouh nung pi in, LUNI in, “ Ka tangval ngaih mahmah maw Usang…………………..nang nahi..” chiin ka bil buuk ah, a awneem tak in hon chi siausiau hi. Hiaithu ka zak phet in ka kipak petmah mai a, om didan le kathei kei, “ kenle hon ngai petmah kahi aw LUN…” ka chih kawm in, ka kawiphei chot mai a, aman leng kiptak in honna kawi thuk sam hi. Kidaam lou hial in amuk ah ka tawp chenchen a, deihthoh tak in aman le honna tawp thuksam hi. Hiaini pen kei a di’n first love leh first kiss ni hong suak ta hi.
Tuni zet chu, Luni toh khen lou ding a tongchiam bawl in, Khovel a mipilpen Kumpi Solomon in a theih zohlouh ITNA kha ka tangkha hoih mahmah mai hi. Dakkal kimkhat hiam hun kazang lai ua, Luni in nitaklam ann huandi ahihdan honhilh ziak in, Checkpu Road a om, Zuansialching Restaurant ah singpi leh sang sa vitvit in sunglam a te ka khem lungdam ua, huai a sawt omlou in LUni, a innlam uah kava kha suak ngal hi. Hiai hun chet in zaw, Maban a Operation Lauhuai mahmah maituah dia gelsa a om ka mangilh zou top hi. LUni te innkong ka tun un, gari apan a pawt khia a, a window ah hong daak kik in, ‘’ neklim ni aw Usang, kon ngailua…….” Chi in kelkong(gate) lam hon zotsan ta hi.
A gate ua a lut tumtan ka en a, alut zoh a taikhe ngal dia kaki sak leh ka phone call hongpai a, Apollo Veng a HOULIM HOTEL Manager apan ahi a, Meltheihlouh hiamhei tawi Pasal 7 te’n hotel va opkhum ua, a sum demand uh kintak a apiak kei ualeh Hotel sung a om, Customer te dam a kuamah pawtsaklou di ahihdan uh hon hilh hi. Nop kasak sung a tom khopmai, kindeuh a ka seppih teng kiang a e-mail thonkhia in, Office a annek zoh kimchiat di’n theihsakna ka bawl hi.
Anne zou, Office lam ah kindeuh in katai a, Luni kiang ah ama theihdia hoih kasak tamlou kagen lel a, honna thumpih di ahihdan hon gen hi. Ka lawmte hong tungkim tak un, Confidential Room ah ka lut ua, huai ah thil paididan leh Panmun di hawm in thu poimoh tuamtuam, Map tungtawn in kaki hilh ua, pilvang tak a gamtang chiat ding a kahilh zoh in, “ OPERATION NGAL-KHAAT “ chih minvoh a om na ziak ka pulak a, ka seppih ten leng hoih asa chiat uhi. Ngal-khaat kichi ngal chikhat ahi a,ngal tal ahi. Ngal dang tetoh takhawm lou in amah kia in tuam tat a, a hapak bang sau mahmah in lauh neitawm mahmah hi. Tuamah bang in, hiai HOULIM HOTEL luhkhiat na di ah a lom a kizui lou in, khatkhat a ka panmun uh leh hihdi chiat uh lauh neilou hial a semsuah di’n kaki sa ua, thuum khawmna nei in a taisia omlou dia kichiam in tha thak tettet ngen in ka om chiat uhi.
Ka vek ua mi 6 kahi ua, Special Agent Sanglun Tawmbing ahih leh Nehrumarg petsukna bul, Tedim Road a pang din kakoih a, huai kiim nai a mi om teng le kihem khesak in pilvang theitawp in om hi. Office ah Special Agent mah Numei khat, Zomi nungak hangsan Nemching Tonsing kakoih ua, amah toh kaki thuzak den uhi. A poimoh bangbang a zattheih din, Zogam Police te leh Zogam Army te om din, thu ka pekhin diam hi. SI Mungpu Hatlang Zomi ahih leh St. Joseph School gei a, Khumujamba lam lutsukna ah ka koih a, Inspector TeCy Lian Valte ahih leh Nehrumarg khanglam pang ah kakoih hi. Kei leh C-in-C BK Suan Zomi in HOTel sung a luttheih didan kangaih tuah ua, lawmdang te toh ki thuzak den kahi man un, a poimoh hunhun a hon delh theih dia mansa a om din kahilh vek hi.
Hotel kongkhak lam ka naih a, C-in-C Suan Zomi bel Hotel nunglam a kong ah ana pang hi. Window vang a ka et guk leh Demand bawl-te heutu pa, ZOMi te lak a ki chamsak tak a pauphanphan kamu pah hi. ZOmi te sisan a, a temta silsiang sawm ahih dan khawng ka theih tak in kaki dekzou nawnkei, Civil dress a pai kahih man un, Customer te bang in kong ah kalut a, kiphasak tak mai a pau phanphan kiang lam tangtak in kanaih phei a, ka naih kawm in ka lawm dangte kiang ah Hotel kimveel a hong om di in ka hilh vek hi. Hiai a pau phanphan pa ahih leh “ KHUPCHING LEH NGAMBAWM MEMORIAL PARK “ a Luni khoih dek pa, a awm a ka totthal pa ahi chih ka khawnung theih khiat hi.
Hotel sung a ka chipih Zomi 150 vel om dite’n hon muh tak un kipak leh lungmuang in ana phe siausuiau uhi. Migilou te leader pa’n, “ nang le a langlang ah kidaih lah na cia, tu nitak in ka temta in na sisan a duh zahzah a dawn dia, na mi leh sa te mitmuh ngei in amai uah na sisan leivui toh ka polh dia, nalu tankhia in ui leh aak te kituh di’n ka gam uh IMphal lam ah ka pawsuk ding ” hon chih muatmuat tak in chu, kidek a haksa tel mai, a gei ah a lawmte mi 6 a ding ua, Meitei Tigers Force (MTF) te’, Zogam Government toh SoO suai kai sa helpawl ahi uhi. Master Singkhan apan Martial Arts kazil te kizang kha nailou ahih ziak in, zatna di hunlem hoih mahmah suak ahih man in, aguk tak in kaki pak mahmah a, aw khauh deuh in, “ nagam uh hing leh dam in na tung kik nawn kei ding uh “ ka chi khe gumgum a. Kindeuh a thumvei kilep phei in, Back Horse Kick in a biang aah ka saatphei ekh a, a dang te a pangngam omkei uh. A heutu pa uh I khoih hial leh zaw, adang teng aaktuam a khumsa ahi mai uhi. A lawm dang mi guk teng zuktal bangmai in, ka khutlum thuk haksatdan atheih ma un konglam ah a taipawt vek ua, himahleh a suakta khat lel leng omlou in konglam a pang te’n ana ki mawlpih leklek lel uhi. A vek un kathat ua, Zogam Police te sam in, a luang teng uh h0ng lakhe ngal uhi.OPERATION NGAL-KHAAT chu lohching tak a zoh in omta hi.
A nitak in ZGTV ah ka gamtatna uh hong ki hoihgen mahmah mai hi. Huai nitak zet in chu, phone call tam ka dong khop mai, munchih mualchih a om Zomi te hon ki pahpih lou omlou uhi. Siluang te IMphal lam a tun suk un, Talpak te a sousang mahmah ua, Moirang lak khawng ah gari tai khat lel leng a omkei a chi hial uhi. Lamka lam buaina in hong pehtouh di venna in Zogam Army leh Zogam Police te ki galging sa in om uhi. Ka Nungak nun le ka lohchinna uh ana thei ahi ngei dia, nitak ka lup dek in hon call a, thuumna thil hihtheih dan hon theichiang sak hi. Imphal a Agent muanhuai mahmah Mungboi Sektak in, Meitei Tigers Force ten tuzan a aguk a hong lut sawm ahih dan uh hon hilh a, pilvang tak a omchiat din hon vaikhak hi. Himahleh a ninawn lam tan in leng bangmah thuthak zak di a omkei hi.
OPERATION GIGEP:
Hunte hongpai zel in, kum 2154 AD March ni 15, Khanglui lai a Zoudawn lou neihna dan in, “ Tap Phou “ hun laitak in, ZYA Hall Khawminthang ah, ‘ ZOMI NAM MAKAI KHAWMPI ‘ kichi sai in om a, Zomi a Tribe 9 kikhaikhawm te apan leh Gam tuamtuam a I Nam makai te uh hong paikhawm souhsouh uhi. Khawmpi palai-te a vek ua mi 5000 bang pha mahmah dia tuat ahi a, neek leh dawn banah giahna di te Zogam Government in mohpuakna tengteng Zomi Mother’s Association te kiang ah nga vek ua, Nu ten leng Nampi a dia hihtheih sun chi in, kithalawp tak in a hih didi uh hih vaiveng tawmtawm uhi.
Khawmpi pai lellel ahi a, himah leh Talpak Helpawl khenkhat in Zomi makai khenkhat thah sawm in, Khawmpi tawpni di,20th March ngak uh ahih dan kathei suah ua, Nam Makai te bittak a koih (0msak) ahih theih na din Operation chituam mahmah khat patkhiat louh theihlouh din hong om nawn hi. A buaihuai mahmah bel, Meitei helpawl Imphal apan hong kuan ten koimun pansan hi uh hiam chih ki suikhe bunlou hi. New Bazar, Old Bazar leh Khumujamba a Hotel minthang mahmah ; Pumbuuk Hotel, Zuansialching Rastaurant, Tomba Fast food Hotel leh adg. te ban luhkhiat louh upai dang omlou suak hi. Muanmohna diak bel Talpak te a mah, Khumujamba a om,’ Tomba Fast Food Hotel’ kichi ahi a, March 18th nitak a Operation pat dia ki thukim in, a Operation min dia “ OPERATION GIGEP ‘’ chih zat din lem kasa vek uhi.
Thuguk dang khat zak ahih na ah, galvan hoih taktak toh kithuam te MUVANLAI AIRLINES a hongpai a,Lennuam Airport sak zek a om, Khawmpi omna ZYA Hall lak enkhe ngal dia hongpai di chih ahi nawn hi. Hiaithu kazak phet in Lennuam Airport a Zogam Industrial Security Force ( ZISF ) te ki galging sa a om din ka ngen ngal hi. Bang chi hiam a, Airport a matkhiat ahih kei ua leh KHumujamba lam target a neih di lungsim in kanei hi. Zomi-te Hotel Manager teng bel hoihtak a ka houpih khit vek ahi a, banghiam thuthak om leh hon hilh pah din ka ngen bok hi.
Hunte hongpai zel in, March 18th ni a, Office a ka sana pi taak un leng ka thilsawm uh thei mah bang in, kinpai diak abang zauzau hi. Lungsim kinoh ngen in ka om ua, MUVANLAI AIRLINES in LENNUAM AIRPORT nitaklam dak 1:00 pm a boh di ahih man in, ZISF ( Zogam Industrial Security Force ) te apan thuthak ngak in Office ah ka thu khipkhep uhi. Dak 1:00 bang hong pelh hial tak in bangmah thu zak kaneei kei uh, himahleh a khawnung lam in ka phone ah message hong kithon a, “ Talpak melpu, mi 5 ( Numei 1 tel in ) ZOGAM AIRLINES ah hong pai ua, muanmohhuai sak ziak in hoihtak in Body leh Luggage check kinei ua, matkhiat bangmah omlou phot ahi “ hong kichi hi.
Hiai hun chiah ah zaw, kalung abuai khop mai, a vanzat dite uh hiaimun a omsa hi di’n ka gingta a, ahihlouhn tawp in leng Moirang a koih ua, awl a zathun di chiang a valak di chih a tupdan uh hi din ka gingta hi( Kei Zeldim thubawl in). Hiai na diahdiah leng denchiah ahilou lam tak ah thil hongpai kha ding chih kalauh ziak in, tu nitak mahmah a OPERATION GIGEP pat di’n ka lunggel simsim ta hi. Huai di’n ah Khumujamba a ka muanmoh uh Hotel target masa ahi a, annek ma a, Customer dan a kisiam a amun va etkhiat ka sawm uhi. Mi tampi noinoi poimohlou ahih man in, chi in Vice Director Tuangpu Guite leh Special Agent Nemching Tonsing te, nungak leh tangval hun awl zang maimai dan a atheih na di un kava hohsak uhi.
Gamkuan tegel hong tun un, thil omdan kakan ngal a, Tuangpu’n kavek ua kazak diu’n “ Hotel Room No. 321 ah pasal 5 om uh ahi chih, Zomi nungak, huaimun a sem omsun khat in honna hilh siausiau a, hongpawt khiat uh ka ngakngak hang un hong pawt khe ngeikei uh. ZOlianu, huaimun a sem pen kiang ah Director( kei hon chihna) email ka pia a, huai a thil omdan hon hilh zel di’n ka ngen a, kong paisan pah uh “ a chi hi. Kou leng annek zoh hunhun a hiaimun a kim teitei ding in kaki thukim ua, anne din kaki khenta uhi.
Anne dia ka inn lam uh, KHUPTONG STREET a kataiphei laitak in, This email address is being protected from spambots. You need JavaScript enabled to view it. apan in email kamu a, huai ah “ ZIA Director nahi na maw? Kindeuh in kon kimuhpih nuam, nong paithei diam? “ hon chi a, kenleng paithei di kahihdan kagen zoh in, kindeuh a ka gari heikawi in Khumujamba lam khu vengveng in kadelh ta hi. Ka Pistol kuah selbawl deuh in Hotel sung ah kalut a, Zolianu in honna welcome ngal hi. Table khat ah ka tu a, huai ah customer dan a ki limbawl in chow plate khat kangen a, Zolianu in hong piak kawm in, kapam lam a table khat a kichamsak tak a tu Talpak melpu mi 5 te a enphei zauh a, kenleng ka theisiam ngal hi. Hiai talpak melpute chu ka gimneih pah ngal mai ta hi. A omdan uh a mitsiip huai mahmah khat chu, I Zolianu uh sam in, a taw khawng ana betsak uhi. Ka lungsim in, nitak chiang a a thuak didan uh theile uh zaw, ka chi vungvung sam hi.
Bangtan hiam ka om nung in, ka thilnek kagai a Zolianu in ka Chow nekna plate hong lak sung in, “Innkong a Dustbin sung ah Pistol 5, puansia votdumgial bang a gial a tuun in kana koih dia, nitak chiang a konghoh hunhun ua, na Plate a koih a puanngou a khuh kawm a nong piak di ahi, kongbul a security pa Talpak te ahih ziak in kou kong toilut di uh lemlou ahi ” chih teng kagen a, alu su ngaungau in hon pai khiatsan hi. NUngak nei mahleng kava hoh manngei kei, Zogam ka iit vang in Nungak taan leng le khawk kasa kei hi. Ka hamphatna mahmah ahih leh ka nungaknu, Luni Valte in honna theisiam mahmah hi.
Inn ah anne din kapai a, ka sungte kiang ah tu nitak a na thupi khat sem dia kisa kahih dan u leh nitak banghiam a chih leh Inn a giak manlou ale omthei ka hihdan kagen kawm in ann kane a, huai hotel sung a Talpak te omdan ka mitkha ah Projector bangmai in hong ki kapkhe zungzung hi. Ann le gilvah in kane theikei, a giahna uh Room Number lah theihsa ( 321) ahih man in, huai in thil tampi hon dawn zangkhai pah hi. Ann nezou, ka pa kiang ah thumna hon neihsak in lan ka kuan khe pah di ka chi a, ka chih bang a ka pan thuumna a hon khakhia a, Pathian hatna muang kawm in Office lam ka zuan pah tingteng hi. Office ka tunnung sawtlou in ka lawmte leng hong kimpah uhi.
Confidential Room a lut in, Hotel sung lut apan daak pah GIGEP a, hiai OPERATION GIGEP lohching tak a zoh na dia hihtheih tawpkhawk suah ngai ahih dan ka hilh hi. Zogam a din I hinna uh I it kei ding ua, sih leng I kihta kei ding uh, Zogam Government in hon muanpen uh leh Suan pen uh ihih man un, I hinhtheihna uh I suah ua, Zogam I hum ding uh ahi chih leh thil tuamtuam gen in, vanzat di bangkim le saifel vekta kahihdan katheisak sawnsawn hi. A phur lou ka omkei uh, Pistol 5 koihsa diam ahi a, Special Agent Nemching ahih leh Office mun a ana om nawn didan in ka ki thukim uhi. Formal Dress in kapai ua, muanmoh a ka omlouh na di un kei leh Mungpu kaki zui ua, adang mi 3 teng group tuam dan in om uhi. Ka lut phet un, zolianu’n ka genbang in honna hihpah kei a, honna etthoh giugiau masa hi. Ka mit a sign ka piak theisiam ahi ngei dia, Pistol pen hong pe nailou in Mualnuam allu a kibawl Zogam Vodka hong pia hi. Ka kiang nai ua tu Talpak mi 5 ten thawm ahau mahmah mai uh. Mi 5 leh mi 5 kibei dia kisa gu chu kahi peuhmah uhi.
Ka gei uh taklampang, laam 3 vel di a ki gamla a tu ahi ua, ka lawmdang uh mi 3 te bel kamai ua dohkan om ah a tu ua, kithei ngeilou dandan in ka om uhi. Hiai Talpak te khawhei dan ka en zuizui ua, thilkhat chu plan nei uh abang sim hi. Khat hong dingkhia a, I zolianu uh sam in, kiss din aki sa mawk a,ngawng kawi vengvang in koulam bang hong nga phei heihai hi. Zomite a simmoh na alian tel mai, kaki dekzohna in hon daih nawnkei, ka Zomipih hicia bawl a om ka sisan in pawzoulou ahih man in, sisan sa vitvit toh kading khia a, ka lawmdang te bel amau omom in ana om uhi. Huchia hehmel tak a kadinkhiat mawk leh a khah gaih a, zolianu leng kintak in konglam ah a taipawt ngal hi. Kei leng tusuk nawn in ka om dan tuam zot hiin ka thei a, a boss pa uh den a hon engbawl mahmah pa a room lam uah a paiphei a, amau lak a tel numei pen in leng a delhzui pah hi.
Plan ka bawlkholh bang un, Zolianu konglam a va taipawt pen in, puanngou a kikhuh plate liansim khat hong tawi a, kamai uah hon koih toh kiton in, a mit apan tui hongluang kamu a, kahehtha hong suak lua ahih man in, kindeuh a Pistol lakhe ngal in ka lawmte’n le amau a di ciat second 6 leng paimanlou in lazou uhi. Kakiang ua tu Talpak melpu mi 3 omlai ahih man un, huaite uumkual phei ngal in, Body check ka bawl ua, Vice Director Tuangpu in ahih leh Hotel Manager leh Security pa kiang ah, ZIA te kahih dan uh leh thil omdan bangkim ana theisiam sak pah hi. Lai poimoh mahmah khat, Meitei Tigers Force te Letter Head zang a kigelh ka musuah ua, Pistol leng 3 ka laksak uhi. Huai ka lai muh uh hoihtak a ka et leh MTF a C-in-C in suai a kaihkhum, huai ah tua mi 5 te MTF te khut zat ahih dan ka musuah a, Sniper le supply uh ahih dan kathei ngal hi.
Ka lawm midang thum te’n tua ka mimat te uh ana veng ua, kei leh Mungpu in Room Number 321 lam pilvang tak in ka zuan ngal uhi. Room kong ka tun un, numei aw kaza ua, ka ngaih hoih ua leh nuamsa a thuum hen hen ahih dan ka thei uhi. Kou leng hiai hunlem mansuah sawmlou in, kong ki Suangkalh himah leh deihtheih in thakhat thu in katuan hong ua, lupna tung ah puanak silhlou in ana om ngei ua, kenleng a pasal pen a lu a kap pai ngal in, a khuak bang kitheh khe phuah zozen hi. A numei nu’n kapkawm in ka kaplupsa pasal luang bohkhum a, a lu a si leh khuak neng pawt te khawlsak sawm in hum tentan hi. Huchia ka omlai tak un, Mungpu’n , “ Nou maw, ka Zogam uh hongsu minsia a, noptaal na di a hong zang gige, kum 100 paisa a Lamka Damdawi Inn huangsung a buaina ana bawl te le nou mi leh sa mah nahi uh “, chih toh a numei nu a nungzang ah 3 vei mawngmawng kap tuan a, kisat pah sengseng lel hi.
Kintak a pawt in, Khual Changsan IPS/ Zogam Police Station ka phone ngal a, amau leng minute 5 sung in hong tung ua, siluang te lim la in, thil omdan bangkim a chiamteh nung un ka mimat te uh toh a Station lam uah taikik pah vengveng uhi. Hiai hun chiah in zaw,lung anuam khop mai……..Nam makai te lubuk chu humbit zou kahi phot peuhmah uhi. Zogam I chih chih Khawvel kilchih ah lawibang hong THANGSUAH ta hi. Koule Hotel neitu te kiang a thiltheisiam ding leh adiak a Zolianu kiang a kipahthu gen in Office lam kazuan pah vengveng ua, hiai hun in nitak dak 12:00 bang ana gingtou dek man hi. Office ah Pathian kiang a kipahthu gen in, innlam kazuan pah vengveng ta uhi. Pathian in Zomite khovel theih din thangsuah sak a, huai ziak tak in “ THANGSUAH ZOGAM GOVERNMENT “ chih mi teng ki houlimna suakta hi.
WRITER’S NOTE:
“Thangsuah Zogam Government “ chih thupi pansan a i thugelh pen, phuahtawm pumlum ahi a, mun min, mi min leh hotel min hiam a ki zangkha te , kisuk mualphou na dia kizang hilou ahih dan kon pulaak hi. Banghiam nampi a dia zak thadah huai di, genkhak leh gelhkhak om leh na ngaihdamna uh kon ngen hi".
2010~KAKIPAK~2013