LAWM ngaina mahmah mi khat THANGPU kichi naupang fel leh nasep kizen lahlou khat a om hi. Kum 15 a phaak in Sunday skul leh biakinn kaai chihte taima mahmah hi. A siam theiloulua hikei mahleh a unau dangte sang in lehkhasim chau zawdeuh hi. Huchi’n kumte a hong pai liamtouh dungzui in laisiamna lamah saulua ana tung zoukei mahleh khosung leh saptuam vaite ah ahun neih bangzel in kilawptak in telsek a, a taimak leh felna ziak in a thilhih bangpeuh ah suanhuai mahmah khat a hong suak hi.

Nikhat a lawmte va tawn in Sunday skul kai di’n hong kuankhawm uhi. Sunday skul kaitawp in a lawmte mi toh hong kiselbuai kha uhi. Aman leng lepsawm in a hihtheihkham in pang hi. Himahleh lem zoulou in a lawh dingdan thei tuanlou in atawp in a lawmte paisan in innlam ana zotsan hi.

A veengsung uah tuailaite saina in naupangte kikhopna omsek hive’n, kikhopna a tel di’n anu’n Thangpu sawl hi. Thangpu leng thumangtak in kikhopna ah va tel hi. Nikhat vengsung naupangte kikhopna a tel di’n a lawm Siampu va tawn a; Siampu-te inn apan kuankhia uhi. Kikhopna mun ding thei chianlou ahihman un mi thawm ngaikawm in kholaidung ah a hong kizuui hauhhauh uhi. A tawp in kikhopna mun a hon zongsuah thei khongkhong ua; himahleh mi ana tamsimleh lut ngam pahlou uhi. Thangpu leng hong lungngai zek in Siampu kiang ah, “hon zui in”, chi’n Siampu kizuilut sak hi.

Tangvalnou ahih utoh kikhopna ah nungak melhoih leh ngaihbaang simsim khong a hon mukha ua, zumsim inlah a nopna tak hi’n le a theizel uhi. Thugentute’ thugente bang hoihtak in a ngaikhia uhi. Kikhopna a Special no. leh kipolhlimna tuamtuam kisaite bang nuam a sa mahmah uhi. Huchi’n zaan leng hong sawtdekta chihding in a kikhopna uh hong tawp hi.

Kihoulim kawmzel in Innlam hon manoh ua, Siampu kiang ah, “Lawm Siam, tuni i va kikhopna nuam nasa hia?” chi’n Thangpu’n dong hi. Siampu bel kikhop ngaina mi a hih khollouh toh lungkim chi ngellou in, “Bangziak a kikhawm dia na hon zot eita?!” chi molh hi. Thangpu’n maksa in agen dingbang thei pah zozenlou in atawp in kisuanglah kawmtak in, “Siam, vengsung kikhopna a ka telpatna ding ahihman in kikhopna mun ding ka theihlouh toh hon tawn ka hi” chi hi. Huchia kihou tou kawmkawm in a hong pai uleh inn a hong tung ua, a lawmta un mangpha kikhak in hong kikhen uhi.

A ninawn ziing beltak in Siampu-te’ inn ah Thangpu a va hohnawn pah a, baih lawlai ahi dia Siampu ana thou naikei hi. Himahleh kimaingalsak in Siampu lupna lam ah va lut galgal hi. Siampu’n leng zingkhangpi a alawm va hoh a muhleh maksa deuhmai in, “Bangchi e, na hong lol(bel) ngei!” ana chi a. Thangpu’n kupnop, gennop nei a hihdan hilh hi. Siampu leng awl in hong kizekhe ngiaingiai a, Thangpu’ gennop bang thu amahmah de aw, chi kawm in kihahsiang hi. Huchi’n Siampu leng a hong mantak in pawtkhia uhi.

Lampi ah Thangpu’n, “Zaan a kikhopna ah numei khat hoihsa ing a, ihmutlouh lohhial kei ve” a chihleh theihnop chitak in Siampu’n in leng, “a kua pen eita?” chi pah hi. “Ke’n le chu a min thei chiahlou.. ‘Ching’ kichi hileh kilawm” Thangpu’n chi nawn hi. Siampu’n, “Aw! huaipen ahihleh ka muhlem chiang in k’on gensak di, na deihleh”. A lawmpa’n zohpih ngei dia lam-en in chikmah a nungak ngai/buaipih kha ngeilou a hihman in Thangpu bel Chingnu ngai in a ngui zozen hi.

A kalnawn in veeng kikhopna ah Thangpu’n Chingnu a hon mukha nawn a, zakta kawmpi in houpih hi. Huchi’n heutute makaihna nuai ah laa bang hon zilkhawm sek ua awlawl in midang theihpihlouh in amau gelkaal ah kingaihnatna khat a hong piang hi.

A chang in a lungsim ah Chingnu hong zualsim mahleh Chingnu’ dinmun a theihlouh baan ah lehkha sim mah poimohzaw a ngaihtuah in Thangpu’n poimohlua ahihkei nakleh inn a om-in lehkha sim charchar sek hi. A chang in bel Chingnu a muh utnate hong lian tultul in a itna thu va geen maibang a ut hi. Himahleh Chingnu’ dawn dingdan khong a suangtuah chia’n kisuzahlak maimai hihkhak ding laau in, Chingnu muh tamlouh mah hoihzaw hi’n leng a theizel hi.

Thangpu bel chikmah a zawlsai ngei nailou ahih toh itna mit-hah kichi bang a theisiam kei a, Chingnu guukngaih ahihdan bel kichiang mahmah hi. Kingaihtuah sekmi ahihziak in va geen hileh Chingnu dawnthuk dingdan khong suangtuah in achang in kipe-hoih in amah kia khong in nui heuhau sek hi. Achang inlah Chingnu hoih salua ahihman in tangzou dia kigingtalou in ‘Chingnu-te khong keibang lelte a ding hikei e’, chi-a ngui dedu in, mahni kikheem lungkim sawm in Matric exam ding bang focus tum zaw hi.

Hunte hong kivei in Krismas kuan hong hita a, Biakinn cheina tuailaite khut a ngak hive’n tuailaite’n le mi kidaihlouh ziak in naupang pawl apan a fel deuhdeuh numei leh pasal bangzah hiam zawn uhi. Thangpu leng biakinn chei dia chial a omkha ahihman in Biakinn ah ava hoh hi. Biakinn cheina a Colour Paper leh Balloon in samzek chihziak in a lei di’n Thangpu tuailai heutute’n sawl uhi.

Biakinn gate bul tungta chih ding in Tuailai heutupa’n, ”Nang kia nuam na sakkei khakleh chi’n Chingnu leng ka hon sawl a, ana ngak aw.” Chingnu leng nuihmel pukawm in, “Eh! UThang lah na hi a. Na damzel maw. Bang khong na hihsek a?” Thangpu’n leng nuui heuhau kawm in, “Damzel mah ing e. Bang hih chihluat le omkei, siamsinna lammah buaipih hi veng aw. Nang la... na damzel na maw, Bang khong na hihsek a? Lai simsim mai na hi ding maw, na vaang ngei e.” chi hi.

(sutzop di)