Innsung khosak nuamsalua a piang kahikei na a kuamah simmoh ding ka ut sam kei hi. Mikhenkhat bang a diklou tak a mu a khosak nopsa tak a khosak saang in diktat tak a muh sunsun ne a neihzoh sunsun a kizem a om nuam kasa zaw hi. Numeisia himahleng diktatna ka ngaipoimoh a lungsim leh taksa kikep sianthou a thupi pen a kakoih gige ahi hi. Ka sianthouna kuamah hon suksiatsak ding kaphal kei himhim hi. Itna paulam a ka taksa tung a khut hon nga lel leng ka ngaithei himhim kei... Nungak kahih ziak in tangval mawk bawl ding in kakiphal kei... ka ki ngaihpih tangval in etlahna toh hon en a katheih bangzah hiam leeng kakhenta. Ka it zohlouh ziakleh ka ngaihlouh ziak in min hon ngaihtuah maiding a himahleh amausang aleeng ka itzaw leh ka ngaihzawk ziak a nitampipi ann nezoulou leh tuidawn zoulou a ka thuak gimpih leeng a omthan hi. A hihziak in mibang a hausa a neih le lam mou vanken ding neilou kahihman in ka taksa siangthouna ka pasal ding penpen kiang a kiten ni a piak katup thupi pen ahi gige hi. Sianthouna kagen tuh ka virginity sukmang kia uapsak kahi kei a kataksa tung a ka puak ka angbawk leh ka muk natan uap a sianthouna kepbit na, avek in ka uap sak hi.

Huaiziak in mitam piten taksa utna neilou leh tuailai sisan hatziak a phurna neilou numei natna veibang in hon gen uhi. Taksa utna neilou kahikei a midang bang in thuk pipi ngaihtuah a ka tangval ngaihte toh ki tawp a kikoi utna neilou kahikei... bangchik hiam hun in ngaihtuahna thuk taktak ka ngaihtuah hun a om sam a taksa utna suk pichin pihdia etlah luat leeng kanei tham hi. Huchih hun in kidek haksaksa kasa tham hi. Mite hihdanlou hituanlou hiven ka it leh ka ngaih hiven kikawi a kitawp pih maiding kalung sim ah ka ngaihtuah hun atam mahmah hi. Huaihun chiang in zaw kidek a haksa a sianthouna kepbit sawm a haksa mahmah hi. Ahihziak in kikep bit teitei kasawm ziak liauliau in kidek zohna hon pia hi. Ka tuppen ki kep sianthouna ka poimoh ziak in tangval tampi hon nopneh toh ka ki melma hial ua poi kasa kei... mihing chiatchiat sex toy dan a ki et a zat ki sawm chih himhim.. huchibangte melma hih poi kasa kei hi. Ka khauhluat ziak ahi ngei ding lawm khenkhatte sang a etlawm zaw himahleng leengla ka neitawm zaw gige hi. Ka ki kep siangthou utna ziak in tangval ki neptheihna ding a kampau kazang ngeikei... om dan kia a kiven hun a katheihlouh ziak in ka kampau nasan in ka kiveng hi. Huaiziak in ki hisak, bangmah hilou kiliansak chih in ka om hi. Ki chiam nuih a kipolh utlou kahikei... zahmoh tellou inle kichiam nuihtheih lua hi.

Pawl 12 kazoh in maban sin ding ut mahleng innsung haksatna ziak in zomtheilou in private sikul ah kha khat a 1200 loh in kasem a naupang toh kithuah nuam kasak lam ahih toh ka nnasep ka enjoy mahmah hi. Ahihziak in kha khat a 1200 kia loh kahihman in Sawm Akhat kapiak a Provident Fund hon cut chiang un a tawm mahmah a akidaih hetkei hi. Huchih hun in kalawm nu khopi a sepna nei.. khakhat a 15000 val loh a khateng a anute keiloh zah leh sawm phial khakzou sek a om a amah huaihotna nuai ah keileng khopi a sepna ding om chi in hon zawn a ka innsung mite phalna toh kava kuan hi. Kalawmnu a na settle sa ahihziak in omna ding buaipih hetlou in a mau kava bel hi. A maubel kou vengte mah numei 3 leh pasal 2 toh innluahman ki share a room lian huntawk khat luah a hi ua keitoh kavek un miguk kapha uhi. Kalawm nu huaihot naziak mah in sepna ding ka mupah a khakhat a 18000 loh ding in ka kihou lem uhi. Ka lungsim a nuam mahmah a inn luahman teng leh kei poimoh ding ka koihkhit nung aleng singval inn lam a khak theiding kahihziak in kalung a kim mahmah hi. Ahihziak in nungak hoih lel leh tangval hoih lel lai toh room sungkhat a khosak khawm nuam saklouhna kanei mawk hi. A hihziak in mithak pen baan ah a neizoulou pen kei utdan a khosa thei kahi kei hi. Huchi in kha tamkuam kahon sepnung in ka pasal ompihte uleng misia hilou a mihoih mahmah a hihlam uh kahon theih in nuamsak louhna kanei nawn kei hi. A mihoih dan uh le tuai chih dia hoih a ma uah kusuah lele hon en ngamlou ahi ua numei toh omkhawm dia huphulh huai hetlou a hi uhi.

Ka nel mahmah ua hihding nengneng natawm a hih ua fel leng a fel tuak uhi. A khen chiang in sawl tawl bang a leng zattheih in ka sawl zialzial uhi. Tuaisim mahle uh pasal ahihziak un inn kiang inn pam ten hon nopneh kei zaw mah ua kachiam nuihna uh ahi sek hi. Kha 6 kasep zoh in ka sepna shift uh ahon kheng kual ua keileh Khualpu in day shift katang kha ua a dangteng in night shift atang uhi. Pasal khat toh numei khat room khat a zan chia giak khawm ding hihmah le ung nopsak louhna ka neikhol kei.. aziak chuh ka giahpih dingpa a mihoih a ka sianthouna hin suksiatsak utna leng a neihlouh ding baan ah hon suse dek lehleeng thagum a leng zou mahmah din kaki gingta hi. Ka gintaak bang in khatam khop ka giah khawm sung un Khualpu'n etlahna mit in hon en ngeikei a keileng a etlah theih ding in ka om ngeikei hi. Huchi bang a kougel kia ka inn luahna a zan giak khawm zel kahihna uah ka lawmte un "nou nupa" chih khawng a hon chiam nuih in zahmoh sim pipi in "tuzan na ihmu man uhia" chin hon chiam nuih zel ua huai hun chiang in Khualpu tuh keisang in a zum zaw a ahehthei zel hi. Kenle a tuung in zadah simmah leng chiam nuih dongtheilou haihuai a batna chiang om ahihman leh a hon chiam nuihpihpa uh huphulh huailou lua ahihman in poiksa kholkei hi. Huchin a kha a simbang kougel kia kahong giak khawm ta uhi.

Nikhat tuh ofis pailam ka naak haksa kasa sim a natna maimai hiding in ka gingta a pai mengmeng a inn a lup kal ka ngaklah mahmah hi. Inn katun in a hong na deuhdeuh a ka khekol suahkhin towel teng in ka ofis uniform suah khin puannak silh manlou in thuak hak mahmah in ka awm hongbing hi. Puanak silh ding ngaihsak thei kahinawn kei a lupna tung ah ka thal lupsak hi.Huchia ka omlai in Khualpu kisil khin phet towel kiateng in hon mu a kenleng chimoh kahihdan pauzou keimah leng kakhut in kahilh a amanleng kamel mual hon muh in hondelh pah hi. "Chingnou..bangchi e..." hon chi a pauzoulou kahih ziak in a action in ka awm a khut a hon sawn (pump) ding in kahilh hi. Ka angbawk tunglak sawn ding a kisuanglah mahmah hi. Sawn kindia kahilh ziak in hon sawn a a natlai in bangmah phok keimah leng hongdam tak in sisan hatlai kahihman in kalung sim hongtuam mahmah mai a Khualpu paikhiak ding kalau gumawk hi. Thakhat in Khualpu hong kuunsuk in ka muk a hontawp a kidek zoulou in kenle kana tawpthuk a katheih louh kal in ka siangthouna kuamah sukbuah ding kaphal louh tuh tom chik sung in kamansuah maimah hi. Ka nih un ka kisuanglah mahmah ua Khualpu'n tuh "ngaihdam aw Chingnou" hon chi hi. Katuplouh pi a huchia ka om khak poi kasa petmah hi. Ka sianthouna ka kepbit utziak a ka itluat khenkhat in kawi hon sawm lel ua hon subotloh ut chia haksa sa pipi a khen ing a tua ka it leng hilou kialou a mel hoih kasaklouh leh pasal ding ale ka et louh tung a ka sianthouna ka mansuah mai poi kasa a chih dingdan theilou in ka kap ek ek hi.

Ka ki ngaihtuah a kuadang moh hilou in kei kia moh ahi chih kathei hi. Taksa hatlai leh sisan hat ngaihtuahna lel leeng thuaklah hun lai a pasal kiatoh room sungkhat a ka giahkhawm ka kisiik mahmah hi. Huchi bang a hon ompih kalawm nu bang ka hehsan tha a suak a huchibang a ka ompihpa Khualpu bang ka muhdah tha a suak hi. Ki siik in kap ek ek mahleng Khualpu in gending theilou in et leeng hon en ngamkei a chih dingdan theilou in a om thethu zezen hi. Bawlthak theih himahmah leh ka ut petmah mai a hihtheih omtuanlou chuh kah louh hih ding ka neikei hi. Thohkhiat a ki khailup hial ka ut a himahleh inn a ka nu leh kapa ka ngaihtuah chiang in huchia paisan thei kahi kei hi. Chimoh lua in kei leh kei ka kihehnem a mi hihlouh dan hilou hiven chi in ki halhsak kasawm zel a himahleh halhna dingvual a hikei hi. Ka taksa kepbit na ah kazou a himahleh ka om mun kateel khelh ziak in katup ka loh ching kei hi.

Huchibang a om nawnlouh kasawm a nibang zah hiamtuh Khualpu toh houleng kihoulou in ka om zezen uhi. A hihziak in taksa hatlai leh sa utna in hon phak hun hong tungzel a huaihun chiang in taksa utna in khatvei hihsa bang hon chisak in a kideek zoh a haksa ta hi. Huchia nupa bang a ka omkhawm munziak un ka kal uah ku itna imlou pi in ki ngaihna in vai honghawm a kikhiat lahna liantak kahon nei tuak ua kingai mahmah in kakhosa uhi. Lawm te kal a nupa bang a om theihdet hilou ahihman in kou gelkia a om a ka utbang uleh ka ut hun ua gamtat theih kahon lung gulh ua itna tellou pi a taksa utna pichinsakna dinglel a kingaihna masuan in inn katuam luah uhi. Taksa utna hihpichin nading intuh kougel kia a om a nuam mahmah hi. A hihziak in kakaal ua ki itna omlou tuh ka taksa utna uh hongkiam hun a hong om a huaihun chiang in ken Khualpu ka muhpeihlouh bang in a manleng a hon mupeih kei a kinakna hon tun in a khenchiang in a khut hon khak khum zel hi. Ka haiziak a thuak kahimai a chi in ka nu kapa kiang ahlah kagen ngamkei a kalung sung naa in ka chimoh mahmah hi.

Taksa utna abeichiang a kina zel... taksa utna in hon phak chia ki ngailua bang a ka utna uh ka sukpi chin zel lai un a gah hong lang a nau kahon pai hi. Ka hehtha lamlam a suak a ka it leeng hilou a hoih kasak leeng hilou toh kiten ding chih ka ngaihtuah chiang in haksa kasa mahmah hi. Kiteen pih keileng lah kei zawlta neiding kahita a gawtmun sang a le haksa sazaw ding in ka kigingta hi. Zawlta pai a minsiat saang in chi in Khualpu kiang ah hon kiteenpih ding in kangen a atuung in hitheilou ding ken midang ngaih neikahi hon chi zawmah hi. A ta kapai ziak a kiteng loutheilou kahihdan uh kahah genziak in hon kiteen pih a nupa bang in kahong khosa taktak uhi. Kuamah theipih louh a kiteeng dan a ka omtak un Khualpu suk kipah sak a ki itsak kasawm a himahleh a manle hon it taktak theikei hi. Vangsiatna in hon bawm i chi diam vangphatna in hon bawm i chizaw diam nikhat Khualpun hon tawpek ziak in kagil a nau khathum ding a tui in hong luang mang a huai hun lemtang a la in khualpun hon taisan hi.

Keikia a om kahong hi a inn luahman tamtoh luah khawmpih ding mi kazong hi. Huchi in eimi mah pasal khat toh live in partner dan in kahong om khawm nawn uhi. Huai chian tuh hon it a hon kiten pih leng khawk salou chi in hon genzel a a takding sa in ka yes hi. Huchin a hihzongsang sa kahihman in lupkhawm khawk sakna kanei kei a taksa utna deek zohsawmnu tuh taksa utna addict kahong hita hi. Kuamah theihlouh a gamta ka kisak kal in niteng in ka omdan masa thei ana hiding ua hon mupeuh in taksa utna sukpichin nading in hon en ua papi tangval chih omlou in ka luck zezen hi. Ka maitang ah kuaman mihoihlou chin hon koukei na a ka nung ah nuihsan leh leiphen khum in ka om hi. Eimi pasal tampite taksa utna ka thoihdam zoh in kuaman hon ngeingaih nawn kei ua KA PAAL A HEUTA HI.

[Pathian in taksa utna liantak toh hin siam khawm vek ihihman un i utna uh hongsuah chiang in kuapeuh in kideek haksa kisa chiat hi. Huai hun a mahni thahatna a kidek zoh nading in i om na mun poimoh mahmah hi. Kidek theihna ding tuh mun lemtak, kuamah theihlouhna mun a numei leh pasal om khawmlouh a damdawi hipen hi. Kuamah tanchin gen kihikei mahleh hiaidan circumstances ziak a tuplouhpi a khelhna a khem lut in tampi i omta ua huchibang a om utlou te a ding a lamlak tu neuchik a hihkhak leh chih deihna a Tuailai Ni special a i gelh ahi. A na ki tuak kha a omleh tup mawng hilou a coincidence ahi kha hilel ding hi]

©Siamsinna leh Vakiangbu