Lungsim ki hongtak a puanbuk kaihpalh hunta - Zogam.com founder's 15th Anniversary message.
Ei singtangmi laka website upa pen Zogam.com in kum sawm leh nga mel a muhtheih man in amasa pen in i biak uh Pathian (Yahweh) kianga thupina ka pe masa ahi.
Tulai a social media minthang Facebook, WhatsApp, Twitter chihte om ma pek in Zogam.com ana om a, ei singtangmite a diak a zosuante a dingin social media platform masapen in ana pang a, khovel kil li a om zosuante ding in kithuzaktuahna, kimeltheihtuahna, houlimkhawmna mun leh khotaang a dia khanlohna tuntu in ana pang gige a - bridging the Zomis chih ana paipih ngitnget hi.
Kum 15 bang a hong chin hial leh Zogam.com hong kipatkhiakdan bang lungsim ah hong lang a, computer nei zoulou a mahni pocket money neih sunsun zang a Cyber cafe tungtawn a bawlkhiak ahih dan bang ka phawk hi. Khovel kil li a Zomite baihlam taka munkhat a kithuzaktuah a, kitanauna hoihsem bawl a poimohnate mukhol in Zogam.com March 9, 2003 in New Delhi ah patkhiak in ana om hi. Huchi in lunglutna ki bang lawm leh vual tuamtuamte toh pangkhawm in tutan tatlou in kum 15 mel i mu thei uhi.
A tuung in ei Zomite a di bik a bawl himah leh tuchiang in Zogam.com nam tuamtuamte a ding in platform poimoh leh manpha hong suak ta hi. Hiai in i puanbuk uh kaihpalh a poimoh dan hon musak a, lungsim lian pu a nam teng bridge ding mohpuakna nei a kihih dan hon musak hi. Zogam i chih Zosuan (zonahthlak) leh zou gam (highland) a teng nam tuamtuamte a ahih manin, huaite intektheihna mun tuh Zogam.com di mah ahi.
Website etkolh a baihsam hetkei a, lungkiat ni leng a tam hi. Ei lak a website tuamtuam ki bawl tampi om mahleh a paisuak tamlou hi. Kum 15 sung in mi tuamtuam, lungput tuamtuam nei tamtak toh kana kisukha tham a, lawm tampi leng aki nei a, hon mu utlou bang le omtham ding hi. A hoih leh pha ka tuahte kei a ding in zillai hoihtak hi a, hinkhua a dia sinsakna manphatak hi zaw hi.
Memberte thugelhte toh kisai in gen le sak om neneuh sekte toh kisai in kupnop ka nei hi. Public forum ahih man in thu hoih leh hoihlou omkhawm di mah ahi a, i sim noplouhte paikaan a, i sim nopte kia sim thei ding a zalenna nei i hih uh chih phawk thak ni. I khantouh dungzui ua public forum a thu ki gelhte lungsim kihongtaka lakdan i siam uh hunta hi.
Tuchiang in eimi laka Zogam.com a theilou leng om nawn dingin ka gingta kei hi. A phattuampih tampi leng om ding in ka gingta a, kipah huai ka sa hi. Zogam.com tu dinmun tan a tuntheihna ziak bangmah dang hi lou in Pathian vualzawlna leh ka seppih admin tuamtuamte leh honna nungthuap gige member noute ziak ahi.
Zogam.com hoihzawk sem na dingin feedback ka poimoh gige ua, pangkhawm zel ni uh.
Zogam.com in masuan zel hen la, damsawt hen!
Ginza Vualzong
Founder Zogam.com
## Special thanks to Siam Tonsing for the beautiful 15 years logo design.