Numei leh pasal vuaktang a om lemlak thehzakte ziakin buaina sousang
IRB personnel 4 matkhiak in om: mipi thangpaite’n PS buden
Lamka, June-30: Khuga Dam area kim ah numei leh pasal kilawmlou taka bawlse kawma lemlak June 25, 2013 nitak dak 7:00 velin social media (internet) tungtawnin khahkhiak hi a, hiai tawh kisai in Police te’n IRB personnel 4 a matkhiakte uh mipi khut a pekhe dinga phutna in tuni nitaklam in Lamka Police Station kong ah mipi tampi kipunkhawm in buaina piang a, mipi leh Police-te kinawhtuahna thupitak piang in Police te’n round tamtak blank fire bawl uh a,mi ahunkhop leng aliam om hi.

Tuni sunnung in Hiangtam Lamka(Vengnuam) a CCpur Joint Women Organisation(CJWO) office ah meeting om a, huai ah student organisation-te leh civil society leader hunkhop tel uhi. CJWO President Sawmi in agenna ah thil tungtawh kisai innsung dongta a kihoulemna om leleng CJWO in hichi maia koihlou in a case enkaitou ding hi’n gen a, complaint bawltu social activist CT Lian Guite leng thuap touzel ding uh ahihdan puang hi.CDSU te’n leng thiltung tawh kisai in CT Lian leh CJWO te’ panlakna kithuahpih leh support uh ahihdan gen uhi.

Huchih lai in, CJWO lam apan kizadan in Khuga Dam a IRB omte’n numei leh pasal sex a kipawllai leh vuaktang a omlai photo la in social media(internet) tungtawn a khahkhiat louhna ding in Rs 1000 la in sumdawnna a nei zel uh hi’n gen uh a, IRB te’ thilhih hoihlou Pathian in awinawnlou in hiai teng tung ahi chi uhi. Numei leh pasal vuaktang a omlai lem khahkhiat tawh kisai SP/CCpur in a genna ah thiltung a serious mahmah ziakin police in ngai serious mahmah chi a, FIR kibawlsa pansan in U/S leng khek lamdang leh a poimawh bangbang a bawl zel hiding chi hi. Aman a genbehna ah Police-te’n a thuaktu (victim)te’ statement hoihtak in la ua, tuzing in Khuga Dam ah spot inquiry bawl in amun mahmah ah thil omdan suizui in 1st IRB personel 4 leng tuni sunnung dak 3:25 a matkhiat hi’n gen a, govt dan (law) dungzui a vaihawmkhum hiding chi hi.

Police te’n IRB personnel 4 te’ tungah FIR No. 51 (6) 2013 CCP-PS U/S 354/341/34 IPC registered uh a, apoimawh bang in U/S behlap touhzel hiding chi’n SP in gen hi. Khuga Dam a om 1st IRB te’n numei leh pasal vuaktang lim a khahkhiat thu uah matkhiak a om Hav Thyam Chaoba Singh(47) s/o (late) Th Khongnem Singh of Khong Ahanbi, Thoubal; Ningthoujam Dokendro (43) s/o N.Pishak Singh of Shyam Chirag Mayai Leikai, Hav T.Sonlian Tungdim (26) s/o Ginlianmang of Mata leh Hav Nengsuanmung(35) s/o (late) L.Gouchin of Sahei Road, New Lamka hi uhi. Nitaklam dak 5:00 vel in mi bangzah hiam in Mata khua zuan in Hav T.Sonlian’ te inn petrol zangin halman zek uh a, mipi’n phelhmit in inn halsawmte’ laka tel 1 mankhia uhi.

Police station ah mat a om IRB personnel mi 4 te’ statement police te’n a laklai un Police Station gate bul ah mipi’n mat a om mi 4 te mipi khut a pekhe ding in phut uhi. Nitak dak 6:20 velin mipi’n Police Station suangin deng uh a, Police leh IRB te’n tear gas leh blank fire bawl uhi. Nitak dak 10 tan in leng mipi sousang mahmah in police station gate suang in kiden huan uh a, gate tung a kitak Lamka Police Station sign board a densiat banuah, police station lutna gate bul mei in haal uh a, police station sunga traffic police te’ office leng mei in halman uhi.

Police te’n blank fire abawl ziak un Thangnunmuang(26) s/o G. Khanthong of Zenhang Lamka thautang in a tawbou veilam kha in pailet a, Obed Thangtansang (25) s/o Khamzapau of Zenhang Lamka leng thautang leng in a lusip nawkkha a, Lulun @ Mika (18) of New Lamka leng liam a, amaute Dist Hospital ah admit in om uhi. Aliam mi 6 vel lak ah midangte bel a serious louhziak un dressing bawlzawh in Doctor te’n paisak uhi. Tuni taka Police station a buaina ziak in Imphal leh Moirang apan Police commando te’n gari 10 vel zangin Lamka hong delh uh a, nitak dak 11.00 velin Police station tung uhi. Nitak dak 11.00 velin mun khenkhat ah patau dak tanpha a khen ding pawl om a,mun tuamtuam apan mipi hon in Police station a zot nawn ziakin Commando hong tungthakte’n nitak dak 11.15 lakin thau tamvei kuamtak kang ging uhi.

Tuni nitaka thil om ziakin Assam Rifles-te telin Para-military force tamtak leng Police Station ah om uhi. Thiltung zakphet in Ginsuanhau, MLA (Singngat A/C); Langkhanpau Guite, Chairman, ADC/CCpur; Kamsuanlun EM/ADCC leh student makai tamtakin police station delh uh a, mat a om IRB personnel-te mipi khut a pekhe dia ngen mipi thangpaite tanpha tawh kinawktuah kha uh a, himahleh akhawnungin awl-awl in vengthei hi. Huai hunah, nungak-tangval mi 5,000 valin police station tanpha luh sawmin kiphin uh a, Tipaimukh road leh Tedim road ah mipi pumdim uhi.

Dist Admn in 144 Cr PC puang
Lamka, June-30: Tuni nitak dak 6:20 vela kipan in Police Station kimlak ah buaina om a, mipi hawldalhna ding in Police leh IRB te’n teargas leh blank fire kap uh a, buaina thupi sem omding dalna in District Magistrate/CCpur in tuni nitak 7:00 apan thuthak om masiah adingin khawpi sung ah 144 Cr PC puang hi. Cr PC 144 om sungin munkhat ah mi 5 sanga tamzaw omkhawm phal hilou a, kuamah hiamhei leh galvan tawikhia leng om theilou ding chih hi a, hileleng 144 Cr PC in Police leh security personnel-te bel huamlou ding chih ahi hi.

DC/CCpur hongtung ding
Lamka, June-30: Uttarakhand state sung Mussoorie a ‘Lal Bahadur Shastri National Academy of Administration’ ah April 29 -June 27, 2013 sung ‘Carreer Training’ a tel Ms Jacintha Lazarus, IAS, DC/CCpur in training zawh in Tamil Nadu state a tenna khua uah tawldam a, a kigendan in July 1, 2013 in Chennai apan Imphal hongzuan ding a,nitaklam in Lamka hongtung ding hi’n kigen hi.

PT Sports complex ah student-te giaklut

Lamka, June-30: Khominthang, New Lamka a SSA Residential school akai student 100 te’ tuni’n PT Sports complex a Hostel ah giaklut uh a, Pastor H.Kamzachin, Local Pastor EBCC Vengnuam in Pathian kiang ah thumsak hi. SSA Residential school a hosteller 100 te ading in Health Minister Phungzathang Tonsing in thousilen 50 pia a, bialtu MDC M.Gouzamang, EM in LED lamp 55, football 2, volleyball 2, net 2 leh ball pump 2 pia hi. SSA tungtawn in hosteller-te’ ading bedsheet, mattress, pillow, annek kuang, nou leh vanzat tuamtuam leisak uhi. Teacher 4 in hosteller-te giahpih uh a, head cook 1 leh Asst cook 3 in zing leh nitak in an huan gige ding uhi.

SO apan Under Secy in kaisang
Lamka, June-30: Ministry of Home Affairs nuaia om Intelligence Bureau(IB) a Section Officer sem Ngulminthang Langel zanzek in Under Secretary (payscale Rs,15600-39100+grade pay Rs 6,600) dingin kaisang(promotion ngah) chihthu kiza a, amah Delhi mun mah ah posting ding chihthu om hi. Ngulminthang bel hun sawtkuamtak Jammu & Kashmir a posting ahi hi.

Accident ziakin mi 1 liam
Lamka, June-30: Tuni sunnunglam in Tunzakap (35) s/o Kappu of HQ Veng, kuate hiam in a vuak ziakun a taklam pheipi guh kitan a, dist. hospital puaktung in om hi. Huailou in Tuibuong ah Bolero in Tractor a phutkhak ziakin tractor driver Vanlal (35) s/o Jamkho liam hi.

Ginliansang tem a dawt mi 8 mankhia
Lamka, June-30: Henry Ginliansang(28) s/o Ngaikhanching of RK Puram 7, New Delhi, zan nitak dak 10.08 in office kaitawp Satya Niketan apan innlam zuanlai meltheihlouh pasal 8 velin tem in dawt uh a,a taksa mun 6 liam in AIIMS Trauma Centre tut in om hi. Police-te’n suizui pah in Vaite mi 8 mankhia uh a, huaite laka mi 3 kumchinglou hi’n kigen hi. Police-te’n chi-le-nam tawh kisai a gamtatna hilou in suamhat pawlte gamtatdan hi’n DCP (South) B S Jaiswal in gen a, huai mi 8 te khamtheih hihzongsang hi un gen hi. Ginliansang in tulelin Ph.D sinlel kawm in sem a, lampi pailai meltheihlouhte’n khawlsak in sawtlou nungin tem in dawt uhi. Police thusuakin a gendanin khut khate leh dawtliam a om pen veng kibang a khawsa hi uh a, nidangin huai veng a om Ms Nirbhaya kichi sualluih in om ngei hi.

 

Ginthianmuan tuni’n Tuitha ah kelum

Lamka, June-30: Lawmte mi 32 in tuni sunnung dak 12:30 velin Bus 1 zang in Lamzang hanmual lui gei ah picnic dingin kuan uhi. Amau laka mi 3 in Tuithalui vapha in kisil uh a, mi 3te laka Ginthianmuan(19) s/o Thangzalian of Phailian(Royal Academy campus) tui a kia in alawmte’ 2 in hutkhiat sawm mahle uh hunkhe zoulou in si hi. Picnic akuante’n an leng huan manlou in sunnung dak 2.00 in Dist Hospital ah alawmpa uh pawtung uh a, himahleh leh hihtheih bangmah omnawn lou hi’n kigen hi. Ginthianmuan tulelin Royal Academy ah Class IX simlel hi a, July 1, 2013 in Phailian hanmual ah kivui ding hi.

IMPHAL NEWS
CM in tuni’n JNIMS enkhia
Imphal, June-30: Chief Minister O. Ibobi in tuni’n Porompat a om Jawaharlal Nehru Institute of Medical Science(JNIMS) mun vapha in thil omdan enkhia hi. CM in JNIMS pen full fledged banah India gamsung pumpi a Medical College minthangte laka khat hithei ding in Cabinet Minister te’n JNIMS puahna tawh kisai in pan theihna tenga panpih ding in ngen hi. CM in a genzelna ah JNIMS thuneite’n thil tuamtuam a luikhiakte’ uh tungtang ahithei tana ngaihtuah hiding in leng gen hi.Tuni a CM in JNIMS a phakna hun Cabinet Minister hunkhop in zui uhi.

Business Advisory Committee meeting
Imphal, June-30: Manipur Assembly Monsoon session pailel July 1, 2014 a bei ding himahleh Govt in Bill khenkhat a ngaih poimawh ziakin zan a Cabinet meeting ah Assembly Session ni tamlou sung behlap dingin hoihsakthu gen uhi.Huai dungzui in July 1, 2013 zinglam dak 10.00 in Assembly a Business Advisory Committee pawlin session hun behlap ding tungtang kikum ding uh chihthu om hi.Govt in khamtheih(drugs) zuak leh puate tunga gawtna khauhsem piak theihna dingin Narcotics and Psycho-strophic Substances Act,1985 ah provision khenkhat behlap a tup ban ah numei leh naupangte tunga tangsiatna dalna ding ngai poimawhdeuh hi’n kigen hi.

Army-te’n galvan selna luhkhia

Imphal, June-30:Phaijang helpawlin Kumbi, Moirang, Sugnu leh Dampi area lakah ah security-te’ attack asawm ban uah Moirang Khunao lak ah helpawlte’ giahna om chih thuguk zak ziakin Red Shield Divn nuaia 33-Assam Rifles pawlin Moirang Khunao gei lak ah search operation a bawlna uah AK-47 rifles 4, magazine 16 leh atang 575, radio set 5, grenade leh explosive hunkhop banah thautang chituamtuam mukhia uh hi’n kigen hi.

Numei 1 sual(rape) in om nawn
Imphal, June-30: Imphal East a Nongmeibung Purana Bazar a om Naorem Pritam kichi in March 2013 in Class-IX simlel numei kum 14 mi amah kia inn a omlai sual a, sual(rape) a om numei nu Kakhulong a a pute’ inn ah etkol in hi. Naorem Pritam mat himahleh bail in khahkhiak hi a, zan nitaklam dak 4:00 velin numei pen Kakhulong a dukan ah van lei a kik lam in Bolero a tuang pasal 6 velin pimang in kisualhuan uh chi’n kigen hi. A pianna nu in police ah complaint a bawl tawh kiton in tuni’n RIMS hospital a Forensic department ah sual a om numei medical check-up bawl hi’n kigen hi.
Sualluih a om in media-te’ ma ah a gendan in zan nitaklam dak 4:00 velin Kakhulong a dukan a vanlei a kiklam in Bolera atuang pasal 6 in damdawi a napsak ban uah alu tuam in building kibawl zou nailou khat a khuam tawh henkhawm uh a, amai tuamna a lakkhiak sak ua leh March kha a amah sualtupa mah leng mu hi’n gen a, pasal om tengin kisualhuan uh a, amuh mahmah in leng a coat silh halsak uh hi’n gen hi. Mi 6 te’ potkhiakzual kal in a khihna uh kiphel thei in taikhia a, a taina lam ah rape ahih masak lai a mah enkoltu Maibi(priest) inn mu a, huai apan inn tungthei hi’n gen hi. Numei pawl tuamtuamte’n tuni’n sual a omnu RIMS ah va-veh uh a, huai ah mi rape-te’ a kintheipen a matkhiak ding in demand bawl uhi. Numei tunga tatsiat demna a Rally omni a sual a om hi’n leng kigen hi.

 

Student Union 12 in semkhawm ding
Imphal, June-30:Koirengei a Letpao Haokip inn ah zan in Thadou Students Association, Gen. HQ te’ saina in ‘Resurgence of Common Brotherhood’ chih thupi zangin Get-together om a, huai ah Paite, Chin, Simte, Zou, Hmar, Gangte, Vaiphei, Thangkhal, Mate, Aimol,Kom leh Mizo apan Student Union a President tuamtuam tel uh thusuak in gen hi. Hibang a nam tuamtuam kala kinaihsema ding Programme om ziakin tamtak in kipahhuai sakthu gen uh a, student pawl tuamtuamte’n semkhawm dingin kichiam uh hi’n kigen hi.

 

FCI in khateng in PDS item pia
Imphal, June-30: Food Corporation of India(FCI) in Manipur mipite adingin state govt tungtawn in kha tengin antang matric tonnes(MT) 7887, wheat matric tonnes 1106 leh chini(sugar) matric tonnes 1470 pekhia(allocate) gige uh hi’n gen uh a, huchibang foodgrain thilte a mu ding mipite lak kimtaka tung mah hiam chih bel FCI te’n theibanlou uh hi’n gen uhi.

 

MLA in Diagnosis Centre hong
Imphal, June-30: Dr. Ng Bijoy,MLA in Chief Guest a pangin tuni’n Porompat a JNIMS crossing gei ah ‘Leima Diagnosis’ kichi hong khia a, huai hun ah Functional President in Dr. Allendoris, (retd.) Senior Pathologist, RIMS pang a, Guest of Honour in Th. Bonbihari Singh, Manager,Imphal Urban Co-operative Bank pang hi. Leima Diagnosis neitu Ksh. Sanathoi Singh in a genna ah ‘World Class Equipment’ zangin testing tuamtuam neihtheih hiding in taklang hi.

 

‘Visa on arrival’ zat ding zekai thei
Imphal, June-30: Manipur govt in Moreh ah ‘Visa on arrival’ office honkhiak sawmin panla mahleh Central govt. tawh hoihtaka kithuzaklouh ziakin zekai theiding in kilang a, Moreh ah Integrated Check Post (ICP) bawlzawh masiah ‘Visa on arrival’ office honkhiak lemtanglou ding hi’n kigen hi. Home Ministry leh External Affairs Ministry apan team khat in khalui in Moreh ah Visa on arrival office mun ding enkhia uh a, Custom office complex ah bawl din lemsa uhi. Land Port Authority of India nuai ah ICP bawl hi a, ICP bawlna mun sung leh pawlam a bypass lampi kibawl in ICP bawlna nawng kaisak mahmah a, hiai in ICP paida ding leng hihbuai pha hi’n kigen hi.

 

Helpawl a tel 1 mankhia
Imphal, June-30: Imphal West District Police a attached police commando te’n zanhal in Keishampat a Yumsha Chicken Centre gei ah UNLF active member khat mankhia uh hi’n kigen hi. Mat a om Mayengbam Premjit Singh (42) s/o Devendro Singh of Wabagi Thingel Leikai hi’n kigen hi.

 

South-east Asia gamte tawh kikawmtuahna ding in Imphal ah International Airport a om poimawh –O. Ibobi,Chief Minister
Imphal, June-30: India in Myanmar leh South-east Asia gam tuamtuam tawh kizopna hoihsem a mitsuan ziakin ‘Look East Policy’ kichi paitouh pih zel a,huai sepsuahna ding a poimawh ahih dungzui in Centre in Imphal a Tulihal Airport leng ‘International Airport’ dingin zanhal nitakin puang hi. Chief Minister O. Ibobi in Imphal Airport tu’n International Airport a puan ahih tawh kiton in amasa in Imphal-Myanmar,Imphal-Thailand,Imphal-Singapore leh Imphal-Malaysia gam tawh International flight tungtawn in kikawmtuahna baihlam tak kipan theita ding chi’n gen hi.
Centre in International Airport dinga project lemsakna apiak zawh kha 1 achin akipan in Imphal Airport puahna nasep kipan a,Centre in nasepna enzui dingin technical team tanpha sawl uhi. Imphal Airport mun kekletna dingin khatveithu in Airport Authority of India(AAI) gam acres 700 alian keklian(acquired) hi’n official thusuak in gen hi.AAI Joint General Manager Rakesh Bhatnagar in a gendan in sun-leh-zan in nasep hi a,kum 1999 a Airport building kibawl leng lui nailou ahihman in nasepna(upgradation works) 85% vel zawh hita chi’n gen hi.Hileleng International Airport adia kiching huntawk ding leh kum 20 tan daih ding building lianzaw leng bawl hiding chi’n Bhatnagar in gen hi.
Imphal Airport a lenna tukna mun(apron) leng Airbus 2 tan khatvei thu a tu(landing) thei ding in keklet lai hiding a, tulelin Airport a security hold area khatvei thu in passenger 350 tan lel omthei a,huai leng passenger 700 tan khatvei thu a om thei dingin keklet hiding chihthu om hi.Domestic leh International flight leng feltaka thuahkhawm theihna ding in Airport Authority of India in panla lel uh chih ahi hi. Guwahati leh Imphal banah tulelin North-east ah operational airport 8 om a, huaite lakah Imphal airport, Guwahati leh Agartasla airport kia ah night landing facility om hi.