Zomi Nam Ni Nuamtaka Zatzoh Hita ~Enes Shoute for Zogam.Com

February 20, 2013 (Nilaini) sunnung dak 2:00- 8:00 kikal sung Thyagaraj Stadium, New Delhi ah a kum 65 chinna Zomi Nam Ni nuamtak mai in kizang hi. Zomi Youth Association – Delhi Region inntekna nuaia kizang ahi a, muntuam tuam akipat in mi tamtak hiai programme zang ding in paikhawm hi. Zomite laka kipumkhatna, ki itna, lemna leh muanna hihkhan sem ahihna dinga kumtenga zatzel ahi a, nikum in Zomi Council theihpihna toh BOAT, Imphal ah zat in oma, tukum in national capital ah Zomi Council deihna bang a zat ahi. Hiai hunzatna a kihel ding in Delhi khopi sunga ana om College, University student te, Government leh NGO/Private Company nasemte kihih awngthawl in asang asim mipi tampi petmah apaikhawm ban uah khual zahtakhuai dia chial Chief Guest dia chial Union Home Minister Shri Sushil Kumar Shinde honghoh theikei mahleh I Guest Of Honour uh Shri Oscar Fernandes, MP & Chairman, Parliamentary Standing Committee on Human resource Development ban ah Functional President Pu T. Phungzathang, Minister, GoM leh Chief Host Pu L.B. Sona, Chairman, Zomi Council te hong kihelthei uhi. Amaute kialou special invitees Lamka khopi apan Tribe tuamtuam a heutute, Zomi Council steering committee, MDC te leh mi poimoh tuamtuam ban ah Shri H.S. Brahma, Election Commissioner of India in leng ahong uaptheih ziak in pichingsak tuan mahmah hi. I chi inam sunga siamna tuamtuam nei Zogam Artistes te akipan la ngaihnop huai taktak mai ngaihkhiakna, tumging tumsiam te akipan biltak huaitak a ging kilawm ngaihkhiakna bang, nam tuamtuam ten pu-pa laam a chinte uh etna bang in hun kizang a, nidang laia pi-pu te kizepna dante bangle lahna kinei hi. Zomi nungak/tangval Delhi khopi sung akipana hongpai khawmte puan ze tuamtaum akichei in, a siangthou theipen a kizemte et anuam in lungkim huai mahmah khin hi. Pu-pa puante kepbitna leh tawisangna leng hikawm in Red Carpet Photoshoot zong stadium lutna kongmai ah neih in oma, zomi nungak-tangval, nupi-papi, aneu-alian akihel khalou aom ding un a gintakhuai kei hi.

Dak 2:00pm ahong hihtak in Zogam Artistes ten siamtak in Delhi Zomi Nam Ni 2013 Theme Song, Sian siamsa piaksa luahsa Zogam hi chih Pu V. Siampu in aphuah tumging kilawmtak maite toh stage tunglam ah kisawi ziahziah kawm in hon awi tamai uhi. Mr. Manga Vaiphei leh Dr. Grace ten hiai programme zat hunsung hunukna kilawmtak leh feltak mai in honlak pat utoh kiton in Christianity ihong hihma lam ua Pi-le-pute omdan tomchika lahna (Presentation) stage tunglam ah thupitak a neih in omngal hi. Tuazoh in Delhi Zomi Nam Ni 2013 programme honna in zuingal a, Pu Gin Sian Lian Pau makaihna in Zomi phamsa te sunna, it in ngaimah le hang amauten hiaibang hunte honzat pih thei nawnlou ahihman un amaute phawkthakna in mipite tutna akipan dingtou in dai dide in sunna hun minute khat kizang hi. Tuazoh in Delhi a Zomi Pastor mi 10 ten amau uniform chiat uh silhkawm in Rev. P.K. Lianmang makaihna in Zomi nam pumpi ading in thumna akiton in nei uhi. Zomi Pastor ten thumna ahon neihzoh tak un zaideih awihsiam Liani Parte in stadium sung thawn zuazua hial in “Ei tuibang kigawm le, kuan gibing hongkhen dia…” chihla honsa ngiahngaih mai hi. Stage tung khauhtak leh muanhuaitak akibawl, sing kilhkhawm maimai leng hilou sik akibawl, mawk chip maimai lou ding tung ah rock ziahziah ding in Zomi lasa siam mahmah leh ihawmthoh uh Muan Hangzou honglut a, hall sung thawn zuazua zouhial in lasiam mah Ginlian Hangzou toh Zomi Nam Ni lapi sakna honnei uh toh khutbeng zek lou leh kivuang zeklou a tu aomtak aleh chihnop huaiphial ahi, naksiam law mahmah uh himai!! Aamauten special no. ahon piakzoh utoh kiton in Pu Vumsuan Naulak, Preident ZYA Delhi Region in mipite vaidawnna thu siamtak in hon gen a, ZRO presidential message Pu Thanglianpao apat zong simkhiakna hon nei hi. Zomi Nam Ni kichipen mipi khuta thuneihna aomna ni, Ukpite apata suahtakna leh mipi khuta vaihawmna ahong kingakna ni achiamteh ding. ZRO in tatsatlou hial in ahihtheihteng suah in Burma gam ah mipi vaihawmna tunding nawnna ding in panla ding a, tupna toh masuan in gingtatak leh mukholkawm in I pangtouzel ding uh chia agelh ban ah UPF nuaia Autonomous Hill State Manipur gamsunga inget pen uh leng I tupzoh na zahzah ua kingah mai ding ahi. ZRO in gamgi khensia a zomite vaihawmna khata kigawm khawm na dinga apanlak pen tawpsan ngeikei dinga, itup te uh imualsuah masiah hangsantak in kalsuan tou ding ahih dan zong gelh hi. Zomi Nam Ni ilopna uh tungtawn ua zosuante kipumkhat zaw sem ding adeihthu agelh ban ah, phamsa salphate zahna sangpekawm in, amaute kipumpiakna in honsu thathou ahih dan leng gelh hi.

Programme abanban ah paitou ziahziah in akallak ah zaila oihsiam ten biltaihuai taktak mai in zaila hon-awi ziahzial zel uhi. Lia Vungngaihlian in “Israel mite na pi bang in” chihla siamtak a ahon sakzoh toh kiton in Bangalore apan Zomi Nam Ni artiste dia hongkuan Lia Rody Za Lien Sing in honsata ding ahi chih hunkemten ahon puangtak in mipite phurzak in kikou zuazua maimah uhi. Zahkai sim adiam ah khatvei sapna in stage lam honzuan mankei mahleh lungkelou in samthak nawn ua, stage nunglam apat special number present ding in honglut bangtuh mipi husa alum humhum maimah hi. Aman a aw hoihtak toh “ka lampi uh” chihla hon awiziahziah a, kuamah aphe velvul leng omlou in limtak in atutna munchiat uah mipiten ana ngaikhe khipkhep uhi. Tua zoh in Keynote Address ngaihkhiakna Chief Host Pu L.B. Sona, Chairman, Zomi Council in honnei a, aman athugen sung in Tribe tuamtuam a makaite ban ah ZC Steering Committee stage tung ah dingsak a, thugenna azoh in amaute khatkhat in mipte theih ding in pulakna leh mellahna nei hi. Tutung in hih thugenna tang ding aseh mitam mahmah a, ahihhang in mitamzawte chihdan in ah thugen siamthei mahmah ua, tomkim taktak leh siam taktak ngen in gen uhi. Tuazoh in Joycee Vaiphei leh Mercy & Co. ten siamtak maituak in Special No. hong present nawn uhi. Lasate lah amel uh hoihthei, a aw ulah hoih, a luck thei mahmah mai uh. Dr. Grace, I compare nu un Joycee kiang ah Yes or No a dawn ding in, Are you single and ready to mingle? Chih adot aleh, It’s a little bit complicated but… May be chi’n dawnga Tangval te ading in lam-etna lianpi omthei ahi chih ahon puangzak tak un mipi nuipuak zuazua maimah uhi. Tuazoh in Paite Cultural Troupe leh Zomi Innkuan, Delhi ten cultural dance lahna siamtak mai in honnei ua, mipi mittai sak mahmah mai uhi. Lamdan chituamtuam ahong lathe uh ziak in Pu-pa te ana hausa mahmah uh ahi chih honphawk khesak thakthak a theih in om hi. Amaute zoh in Hoilianting leh RD ten Special No. pezom ngal uhi.

Hunpi Functional President Pu Phungzathang Tonsing, Minister, Govt of Manipur in Zomi Nam Ni izat uh amawkna a zang ihi kei ua, Falam, Burma gama February, 20 ni 1948 kuma Zomi National Conference makaihna toh General Assembly aneih uh tungtawn a hong kipan khia ahihdan tomkimtak in gen a, amawkna azang ihi kei ua, omze neitak leh gennei tak azang ihi uh chin gen hi. Tuni a Zomi Nam Ni izatna tungtawn ua dialdial a, diamdiam a, kithutuak leh pumkhat zawsem a Zomite itengkhop ding uh adeihthu gen in ZYA-Delhi Region te thilpiak pia in ahun zou hi. Aman thugenna ahon zohphet in Delhi singer minthang Mr Hangkhanlian in “Zogam aw” chihla hall sung thawn zuazua zen in hon awi ngengeih hi. A aw pawtkhia piching in ngaihnop mahmah a, Delhi te V.Siampu ahi chileng igenkhial kei ding. Hiai bang a tualsuak lasasiam ineihkhak uh hampha lua hihang! Tuazoh in Muan Hangzo & Lia Irene ten special no. nuamtak mai in mipite honvak zomngal uhi. Short Speech- MLA chingthak leh Zomi te ading a khuam muanhuai Pu Vungzagin Valte, Parliament Secretary in masawna, khantouhna leh kigawmkhawmna thupitak I Zomi Nam Ni zat un hontunleh chih adeihthu tomchika hon gen ziahziah in ahun zou hi. Tutung thugente thugen siamthei asak thu uh mi tampi in gengen maimah uhi. Pu Valte ahihleh I zogam khopi ua kipan a zi toh hiai Nam Ni zang dinga hong zin ahi uhi. Programme sunuam leh sugamlum tuan mahmah, I Zogam ua kipat a rock star minthang hongkuan Mr. TTLal Zou, Paupu Lenlai film a artiste, stage performance nei dinga sap ahihtoh kiton mipi husa lum zuazua maimah. Khutbeng kikou husa in hall sung thawn zuazua maimah a, aman “Mauna ngen hi, Mauna ngen” chih dance step nalh taktak maitoh mipite hon tokphur mahmah hi. Comparer, Dr. Grace in tangval laina hia, ka kim ka kiang ah nungakten hon dotsak in ahon chi ua chi a adotna a dawnna ah tuh Tangval thakkik ka hi chi a, nungakte ading a Points To Remember khat hong hinawn hi. Hiai hun ah Delhi apat naupang lasaksiam leh Album minthangtak ana bawlkhia, The ZoKIDS tenleng “Zolei it zatam te..” chihla siamtak mai in hong present uhi.

Speech- I zogam khopi uh Singngat A/C apat I MLA neihthak liklek uh Pu G.S. Haopu in slogan thupitak mai, Zomite Pathian in hong it a, lungdam huai mahmah hivo!!! Kalaisai!! chi in hon kikoupih zuazua maimah hi. Igam, inam uleh ikhosungte uh akhantouhna ding in Pasian phawkni hang in amah pin amah ngen le hang hong vualzaw ding ahihdanthu saulou agen in ahun zou hi. Lia Vunggohching akipat special number ngaihkhiak ahong hhzoh nawntak in thugenna tomkim I Zogam ua hong kipanmah leh ADCC Chairman Pu Langkhanpau Guite in siamtak mai in honnei nawn hi. Zomite nam khangtou ahong hih ding adeihthu hongen a, athugen sung in I MDC neihte uh mi 10 khatkhat a mellahna aneih ban ah organizing commtt te kiang ah adeihna bangbang uleh khovel pumpi adeih uleh leng alei ding uh chi in I MDC te uh laka numei ineihsun uh Pi Grace Zamnu tungtawn in thilpiak pekhia uhi. CCPur apat MDC dang 3 te leng hongtel utlua uh himahleh hongkihel theilou uh ahihman in deihsakna sangpen honkhak uh ahi chihleng hon pulak ngal hi. Aman hun ahonzoh phet in Artiste mithang Muan Hangzou in “Sunday Morning kholai ka vak” chihla nalhtak in hon rock ziahziah a, musician te lah hi, mipite lah hi, hon tokphur zakgawp ahihman in honsasa maileh chihnop huai zezen hi. Stage performance siama, la asak chiang inleng kipe zou mahmah ahihman in ngaihnop huai tuanse hi. Tuaozh in Zogam Martial Arts lahna Master Tuankhankhup leh alawmten minute tamlou ahon nei ua, mittai huai mahmah. Self-defence style tuamtuam, position lak dingdan dan leh skills tuamtuam aneihte uh staget tung ah mipite muh ding honlak ua, akhup athal in stage tung ah hong kilep ziahziah mai uhi. Hiaibang siamna nei ei Zomite bang om ihihchiang in midangte phalah tuanlou ding hi hang chih honmusak mahmah hi.

Tuchiang in ei Zomi nam sung ah leng siamna tuamtuam nei kitam mahmah maita a, music lam ah leng midangte engnawnlou leh midangte siamna kia ngaihkhiak hinawntalou in eisung mahmah ah leng siamna nei tampi omta hi hang. Musician ineihte uh lak ah Mr. Thanlian & Jimmy Thang ten I Nam Ni zat uh hong subuching saktuan mahmah mai uhi. Amau ziaka hiai programme lohchingthei ahi chileng igenkhial kei ding. Amau akuhkalna uleh achihtaknate uh ziak in nekzonna ding tham in theihna leh siamna neita ua, Delhi khopi sung ah leng mite suan leh muantham mahmah khat ana hita uhi. Zomite hichibang talent hoihtak nei Nam ihihkhak ziak un hampha lua hi hang! Lasa siam, tumging tumsiam tampi neimahle hang hiai programme a kihel ding in chialtuam bangzah hiamte akipan in session khat Zogam Artiste te ading in thupitak a neih in om a, pau na ding hun man leng omlou hial in mitte tai in, bilte tai mahmah hi. Ahun, amun, agam in honzil bangngial houh hileh zankhawvak in ngaikhiakhia maimah leng uthuai bang sak in om hi. Pupa tawndan ah lah I hausa thei ua, Gam ngaihla, Phatna la leh Itna late mahmah ah leng minuai aom ihi nawn tuankei uhi. Hiai banga vualzawlna itante uh kembit touzel in, hihkhang touh in hong om semsem leh chih deihhuai mahmah hi. Thu-le-la tampi a kipolhlimna nuamtaka neih ahih zoh nung in ahun bangleng hongsawt dekta, khua inleng honmial khumta ahihman in ut leh utlouh thu hinawnta lou in Farewell Speech genna hun Pu Thangzalun Khuptong, Secretary, ZNN Celebration Committee in siamtak a ahon neih phiahphiah zoh in Closing Prayer Rev Jamkholun Mangte, Pastor, ZCF Delhi in honnei a, khelahtak mai a programme zoh ahong hita hi.

Tukum 2013 Zomi Nam Ni zat ahihma ni February 19 (Sepnawnni) in Jawaharlal Nehru University a Committee Room ah Session III akikhen in Zomi Intellectual Circles kimuhkhopna om hi. Hunpi masapen ah “Socio-Cultural Challenges and Opportunities” chih thulu zanga kikupkhopna leh suina nei uh a, huaizoh in “Economic Challegens and Opportunities” chih thulu zang in Seminar paper Dr. Kamkhenthang Guite in piakna neinawn hi. Session III na ding in “Political Challenges and Opportunities” chihthu suina leh kikup khopna neih in om a, thumanpa tampi genkhiak in om hi. Hiai hunte ah ZRO Adviser Pu K Guite in leng thugenna hun neia, UPF in a deman Autonomous Hill State tungtang genna nei hi. Tulel a Central Government toh SoO nuaia om hunsung pen tukum August kha chianga beita ding ahi a, hiai demand toh kisai in Memorandum leh Charter of Demand piaklut khit ahihtoh kiton in tunung zek chianga Government palaite toh kimuh khawmna neihpah ahonghih alam et thu leng gen hi. Hiai demand lohching ahihchiang in Manipur singtanggamte ah khantouhna ahongpung dinga, muanna leh bitna leng ahong om semsem ding chin genbeh a, I kim ikiang uate demand tungtang agenna ah KNO in Kuki State a demand pen SoO thupiakte palsat ahi a, Naga mipite adinga Alternative Arrangement hi in Kuki statehood demand hitazong leh namtuam zattuam a kikhenna ding hi zaw in Manipur singtangmite ading in muanna leh bitna hontun lou ding ahihdan zong genbeh hi. Heutute adiak in ZYA-Delhi Region malakna nuaia ZNN Celebration Committee te hahpanna, chihtakna leh kipiak zohna liauliau a khovel pumpi a democracy lianpen atheihtham India khopi a ZNN zangthei ihi uh chihhaihvual louh ahi a, hichibang makai leh heutu muanhuai ineihkhak uh hamphathuai in suanhuai mahmah mai uhi. Tuni’n hiai hun izatdan uah ilung uh akimna hia? Festival zathouh a zangkha ihi uh hia? Kivelthak a, etkik thak zel ding dan ahi. Hunpaisate I hih ngeiteng mah hihtou, igen ngeiteng mah gentou denzel houh ihi uh hia? Nang leh kei in ngaihtuah dinga poimoh mahmah khat ahi. Kumlui sangin tukum ah bangtan in kalsang itawi zaw ua, I Nampi ni ana zat masakpen ni un Makaite in mipite maban pai dingdan thupukna tampite la in ana zangta uh hi. Zomi Nam Ni damsawt henla, hongkhangtou in hong phungching semsem hen!

************************************

Zomi Nam Ni rocks Delhi ~Ninglun Hanghal/TSE
NEW DELHI, Feb 20 : Cultural extravaganza and performances of traditional songs and dances marked the 65th Zomi Nam Ni (Zomi National Day) celebration here in New Delhi today.

A strong contingent of Tribe leaders, MLAs and MDCs from Churachandpur district including renowned Zomi Artists graced the auspicious occasion.

Oscar Fernandez, MP and Chairman Parliamentary Standing Committee and HS Brahman, Election Commissioner who were part of the celebration emphasized upon protection of rich culture, tradition for the Zomis as proud Indians.

President of the Paite Tribe Council, Vaiphei People’ Council, Teddim-Chin Union, Simte Tribe Council, United Zou Organization, Mate Tribe Council, Gangte Tribe Council, and other leaders were present, including twelve District Council members and State legislative member, Vungzagin Valte, Manga Vaiphei and Ginsuanhau.

In his keynote address, LB Sona, Chairman of the Zomi Council, the executive body of the Zomi Federation called for a durable peace, a political space for the next generation.

Recalling the long journey of the Zomis across India and the border, functional president Phungzathang Tonsing, Minister of Health & FW/GAD / CADA encouraged and motivated the youth while also emphasising on the need for communal harmony. He said that an occasion such as this is the beginning of unity and progress.

Chairman of ADC, Churachandpur, Langkhanpau Guite put forth the need to upgrade ADCs in Manipur at par with the ADCs in other North Eastern States . “The talks between Government and SoO signatory groups have to be sped up,” said Guite.

Ahead of the Zomi Nam Ni, a conclave of Zomi intellectuals from Manipur and Delhi converged at Jawaharlal Nehru University. Zomi thinkers, leaders of traditional civil bodies, political leaders, students had an indepth deliberations on challenges faced by the Zo people as a political minority, as victims of the post colonial rule, across South East Asia. Self rule and Autonomous administrations of their own inherited ancestral lands echoed the conclave.

******************************

Limlak tamzaw anuaia link te ah:

ZOMI NAMNI - images by Min Khuptong

ZOMI NAMNI - images by Benjamin D Samte

ZOMI NAMNI RED CARPET PHOTOSHOOT - images by Benjamin D Samte 

ZOMI NAMNI : ARTISTES AND MUSICIANS - images by Siam Naulak