Upa T. Gougin,ex-Minister si
Lamka, June 5: Zosuan/Zomite’ adia kipumkhatna leh zalenna ding sualtute’ laka makai khat ana hi tawntung Upa T Gougin(87), MA & ex-Minister teknat ziakin tenna inn Zouveng ah si a, June 6, 2012 (Nilaini) in a tenna inn compound uah zahna lianpi tawh aluang kivui ding hi’n kigen hi.Upa T. Gougin bel ‘Zou Nampi’ Pa(Father of Zou nation)’chih minvuah hial a om hi a,amah Politician kia hilou in journalist leng ahi hi.
Upa T. Gougin makaihna in kum 1972 in Zomi National Congress(ZNC) kichi pawlpi dingkhia a, aman Zomi adia pan lakna thuaptu khat hiding in huaikum mah in ‘Thuthang’ kichi Newspaper pankhia hi.Kum 1988 in People’s Conference(PC) leader leh Mizoram Chief Minister-lui Brig(retd) Thenphunga Sailou tawh pangkhawm a panla in Zomite kigawmkhawmna dia pawlpi lianzaw Zomi Re-Unification Organisation (ZORO) dingkhia a,
May 19-21, 1989 sung Champhai khua ah First Zomi World Convention om a, huai ah palai 20,000 val paikhawm uhi.
Amah panlakna ziakin Hill house pung dinglai kiam zawmah a, MNF movement hatlai in Manipur singtanggam ah sepaihte’n ganhing bangmai a bawlin van pawdia khawsungmi ut-le-dah a zat uleng tawpsan uh a, huai hunlai a ‘sepaihte pawt pua’chih kigen minthang leng beithei hi.
Upa T. Gougin in journalist ahih banah politician kia leng hilou in kum 2002 in Central Church, Zou Presbyterian Church Synod ah saptuam enkoltu Upa dingin telchingin om a, December 15, 2002 in Muollum Presbyterian Church ah Manipur Gam Presbytery (MGP) Moderator Upa H. Nengkhai in Ordination pia hi.
Lead Bank scheme leh DLCC meeting om
Lamka, June-5: DC/CCpur makaihna tuni zinglam in DC office a BRGF Resource Centre ah Lead Bank Scheme tawh kisai meeting om a, huai ah SBI/CCpur branch ah Clearing House om ding thu gen uh a, huai clearing house omhun ah bank tuamtuam ah cheque a sum lakkhiat dingte’ SBI account ah deposit theih ding hi’n kigen hi. CCpur dist a bank branch tuamtuam SBI, UBI, MSCB, HDFC, CBI leh Vijaya bank te’ adin kum 2012-2013 sung in Dist Credit Plan/Annual Credit Plan (Ariculture, Industries, Service) tungtawn a loan piak khiat theih ding Rs 6686 lakh approved uh hi’n kigen hi.
Lead Bank Scheme tawh kisai meeting zawh in Dist Level Co-ordination Committee(DLCC) meeting om hi. DC/CCpur in June 11, 2012 tanin DLO te’n office land document-te DC office a submit dingin theisak a, DLO te’n khateng in mahni deptt ’ nasep inspection bawl ding leh DC office a submit zel ding in theisak hi. SDO/BDO teng in sub division headquater chiat ah ni 10 sung bek omchiat ding in DC in theisak a, DC/CCpur in kalteng in DLO office khat zel visit ding hi’n gen hi. Revenue leh Hill House tax tawh kisai kha teng in challon tawh DC office ah submit zel ding in DC in theisak hi. Huaiban ah June 12, 2012 in Total Sanitation campaign tawh kisai DC/CCpur makaihna in meeting om ding in thupuk uh a, huaini mah sunnung in Traffice Awareness meeting om din kigen hi. DLCC review meeting June 25, 2012 zinglam in Leimatak ah SDO/Henglep inntekna a om ding in thupuk uh hi’n kigen hi.
Lamka khawpi ah leng Pre-paid system
Lamka, June-5: Electricity department in Imphal a Khwairamband Bazar leh Paona Bazar area ah Prepaid Meter System a pat bang un Lamka khawpi sung ah leng huchibang pat theihna ding in buaipih lel uh a, hileleng nasep taktak a patma un a gui(wire/cable) khen masak sawmlai uh hi’n kigen hi. Imphal khawpi sung ah Prepaid Meter System zatna munte ah dakkal 20/24 tanpha electric meivak piak hi a, huailouin electric meivak/power a guk a la leh a thelthang kichi sekte leng nasataka kiam hi’n kigen hi.
T. Gougin suunna thu puang
Lamka, June-5:RW Ro Za Thang @ ST Parte, President, United Zo Indigenous Peoples(UZIP) in Upa T. Gougin,ex-Minister sihthu a zak phet in Aizawl apan Manipur Express office phone a contact in suunthu puang a,Zomi makai leh nam itna ziaka a damsung hun tamzaw zang ahihna ah it-huai sakthu leh Zomite adia awnghuk dim vuallouh manna hi’n puang hi. Aman lusuunna thuak T. Gougin’ innkuante thuakpih thu leng puang kawmin Pathian apan khamuanna ngetsak hi.
CDSU makaite’n Chairman, SSC mu
Lamka, June-5: CCpur dist ah Staff Selection Commission(SSC)saina a Exam Centre omtheihna panla a Delhi zin CDSU President Lalkhohao Chongloi,Secy Ginzomsang leh Vice President Kaithianjoy te’n May 31, 2012 in SSC Chairman N.K Raghupathy kimuhpih uh a, CCpur dist ah SSC exam centre omna ding a official confirmation pedin ngen uh chihthu om hi. SSC Chairman in official confirmation kipe ngeilou ahihdan theisak a, hileleng CCpur dist ah SSC exam centre omna dingin 99 % zawhsa ahihdan ana theisak hi’n gen uhi. July 2012 in SSC saina in LDC leh Data Operator lakna ding advertisement kibawl hun ah CCpur dist leng SSC exam centre din telkha ding a, huai chiangin CCpur dist a SSC exam centre ding 100 % lawhching hita ding chi’n CDSU makaite ana theisak hi’n CDSU thusuak kingah hi. CDSU makaite June 2, 2012 in Dehi apan hong tungkik uh hi’n kigen hi.
PCCP makaite Delhi ah zinkhia
Lamka, June-5: Peoples Consultative Committee on Peace (PCCP) a Spokesperson ban ah Zomi Council Chairman LB Sona leh PCCP makaite’ zan in Delhi ah zin uh a, amau Delhi ah a om sung un UPF political demand ‘Autonomous Hill State’ tawh kisai in Union Home Ministry a mi poimawh tuamtuam kimuhpih ding uh hi’n kigen hi.
Army-te’ mat mi 2 bail in pawtkhia
Lamka, June-5: 46-Assam Rifles te’n May 29, 2012 nitak in Bungjiten Singh @James (34)s/o Ngangan Jiten Singh ginlelh ziakin Kangvai ah mankhia uh a, May 30, 2012 in 1/ 11 Gorkha Rifles te’n Tuibuong Forest gate ah ginlelh ziak mah in T Dinesh @ Sanathoi (38) s/o (late) T.Kulla Singh of Tuibuong Forest mankhia in Imphal Police ah pekhia uhi. Imphal Police te’n CCpur Police ah a case pesawn uh a, mi 2 te CJM in ni bangzahhiam sung Police custody a omdin pekhia a, Police te’n tuni’n mi 2 te CJM cout ah dingsak nawn uh a, CJM in bail in pawtsak hi’n Police thusuak kingah hi.
June 15, 2012 tan hun omlai
Lamka, June-5: Central Institute of Plastic Engg & Technology(CIPET),Takyelpat,Imphal nuaia training course tuamtuam adia lunglutte adingin Manipur Express office apan application form manbei in June 15, 2012 tan laktheih ding hi.
MDC/Saingaikot in inspection bawl
Lamka, June-5: ongkai Baite, MDC(21-Saingaikot ADCC) in tuni zinglam in huai Sangaikot Constituency sung a school omte inspection bawl hi. Huai hun ah AI of schools, ADCC ban ah KSO Sangaikot block a executive makaite’n kithuahpih uh hi’n kigen hi.
EURO 2012 Fixture tamlou chik om
Poland leh Ukraine gam ah June 8-July 1, 2012 sung leitung a football kimawlna minthang ‘EURO-2012’ om ding a, huai fixture kimtaka colour a ki-print khia tamlou chik omlai a, a deihte’n Manipur Express office leh mun khenkhat ah Rs. 20 lel pia in leitheih theih ding hi.
SUUNNA
K. Lianzual@ Zualpi (32) s/o K. Hnunkhum of Tedim Road,Lamka sungna leh natna tuamtuam ziakin Imphal a Shija Hospital ah etkol a om hoihthei tuanlou in tuni nitak dak 8.00 velin Lamka hong tungkik a, tuni nitak dak 10.40 velin si hi. Aluang June 6, 2012 in Lamka hanmual ah kivui ding hi.
IRB personnel 1 in alawmte 3 akaplup zawh in amah leh amah kikaplum
Imphal, June-5 : Maphou Dam a posting a om 6th IRB personnel khat in a thautawi lai LMG in a seppihte seppih Havildar 3 a kaplup vek zawh in amah leh amah leng kikaplum hi. Thu kizadan in tuni nitaklam dak 3.00 velin Maphou Dam a 6th IRB post a om rifleman Kaikhohau in havildar 3 -Thoudam Birbal (35) s/o (L) Ibochoubi of Toubul Makha Leikai, Khamzathang Ngaihte (54) s/o Gengou of New Lamka, Vengnuam leh Haorongbam Diben (49) s/o Ibobi of Thoubal Khekman kap a,huaizawh in amah leh amah leng kikaplum chihthu om hi. Thoudam Birbal leh Khamzathang Ngaihte amun ah sipah uh a, Haorongbam Diben bel RIMS puaktung himahleh damzoulou in RIMS ah si hi. Police top official te’n thil omdan a zak uh thiltunna mun delhpah in suizui uh hi’n kigen hi.
Paona bazar ah Prepaid system
Imphal, June-5:Paona Bazar area a electric consumer-te ading in zanzek akipan in Prepaid Meter System zat kipan a, huai akipan in electric consumer te’n ni 1 sungin dakkal 20 akipan dakkal 24 tan electric meivak ngahthei uh chihthu om hi.Prepaid Meter System zat ahihman in electric meivak/power tamtak thelthang mahle tu’n 55.09% vel saved zawh hita chihthu leng kiza hi. Imphal Electrical Divn No. 1 a EE T. Ibochouba in a gendan in Paona bazar a electric consumer 100% velin Prepaid Meter System in la uh a, tunung zekin Thangal bazar, Ragailong, Deulah lane leh North AOC area ah leng Prepaid Meter System kizang pah ding hi’n kigen hi.
Venus Transit et-theih ding
Imphal, June-5: GP Women College a Observatory Unit ah June 6,2012 zingsang dak 4.27 akipan zinglam dak 10.20 kikal in Venus planet leh ni(sun) kizon a a om laitak ‘Venus Transit’ et-theih ding a, huai en dinga kuante kiang ah Manipur Sc & Technology Council(MASTEC) in manbei in vanlam a thil etna(Solar Viewer) zangin etsak chiat sawm uhi. Huai Venus Transit kichi kum 105 hal zela thiltung ahihman in hibang hun lemtang khahsuah(miss) khate adin damsung a leng thiltung nawnlou ding a puang in MASTEC te’n kuapeuh in enchiat dingin theisak uhi.
Bus in naupang kum 5 phulum
Imphal, June-5 : Kakching Lamkhai ah tuni zingsang dak 7:00 velin ‘Purnima bus’ (No. MN-01/1677) in naupang kum 5 ding mi phulum hi. A kigendan in naupang Y. Ningkhom Thoungampa (5) s/o Brojen of Kakching Makha Leikai anu tawh Kakching bazar hawh auto apan kumkhia in bahara a piak laitakun Bus in Y. Ningkhom Thoungampa phukha a, a mun ah si hi’n kigen hi.
Thudang kizadan in tuni sunnung dak 2:30 velin Bishnupur a Loukoipat lutna bul ah Tata Magic in lamlian kianga khawllai Tata Tipper l phukha a, Tata Tipper in akiang a phone a paulai Zamkhohau (28) s/o Lenzalam of Saikul village phukha phei in Zamkhohau pen si chihthu kiza hi.
Umananda in MPP President len
Imphal, June-5: Manipur People’s Party(MPP) President Dr Nimaichand Luwang in medical profession(doctor) semkawm in MPP President a let lemtanglou chi’n May 29, 2012 in President hihna apan kitawp a, MPP Central Working Committee in Vice President M. Umananda in President mawhpuakna lensak uhi. Zan a MPP Central Working Committee tukhawmte’n M. Umananda(71) in a tompen in keng kha 3 tan kha 3 sung MPP President dinmun len ding in thupukna bawl uhi.
NRL oil pump ah bomb kipai puak
Imphal, June-5: Thoubal PS huamsung Thoubal Haokha a NRL Oil Pump ah tuni nitak dak 7:35 velin meltheihlouhte’n Chinese hand-grenade paihkhum uh a, huai a gate bul ah puakzak in mi 2 liam uhi. Aliam mi 2te Thokchom Kumar (54) of Thoubal Haokha Mamang Leikai leh S. Khelen (50) of Thoubal Kyamsiphai hi uhi.
SSPP Aizawl Joint HQ te’n Siamsin Meet nei
Aizawl, June 5: SSPP Joint HQ, Aizawl te’n June 2, 2012 in Aizawl a Chanmari YMA hall ah Siamsin Meet–cum-Presidential Election nei uh a, huai ah President thak dingin Ginlalmuan telching uhi. Huai Meet ah Chief Guest in Rohlun Hauzel, Minister pang a, Guest of Honour in Thlamuana, Director,Transport deptt/Govt. of Mizoram pangin inntekpa in Haukhum Hauzel, IAS (retd) pang hi. Siamsinpawlpi member lam tuamtuam alawhchinna ngah Lalremruata Kullai (2nd Position of MCS, 2012), Malsawmkima Kullai ( 6th Position, HSSLC (Sc), 2012) leh T. Thangneihkimi – Medalist, Taekwondo( International Level) te kipahpihna in memento pia uhi.
Huai hun ah lasiam tuamtuam Rosy K Remsangpuii, Zonunmawii, Sangtei Khuptong, Vungthansang, Thuamsanglian ban ah SSPP Choir leh ZBC – BYF ten lapawl sa uh a, Dinthar Child Develelopment Centre a naupangte’n cultural dance tuamtuam lahna nei ua, AG Sunday School naupang te’n Choreography show nei uhi.Election Commissioner Liansangvung in President thak din tuhtu omlou in Ginlalmuan ching ahihdan puang a, Pastor G.Sanglian(EBC) in President thak leh Siamsinte thumsakhi. K.Guite in Siamsinte hasotna thu gen a, Mizoram a student organisation - MZP leh Hnampual Zirlai leh NESO apan makaite’n leng uap in thugenna hun leng zang uhi. P Ginlalmuan ahihleh Delhi SSPP Jt HQ a Vice-President lenlui hi’n kigen hi.
.