DI/AI of Schools incharge a semte amau sepna School chiat ah kik ding uh-Minister
Govt school a teacher-te’n a sepna school chiat uah a tate uh kaisak ngai ding
Imphal, June-1: Education Minister M. Okendro Singh in Thoubasl Wangmataba a om Fancier Abhiram Hr Sec School a Class X & Class XII passed-te LS Cinema Hall a kipahpihna programme zatna ah Manipur a education system bawlhoih taktak theihna dingin govt school a sem teacher-te’n amau sepna school mah ah a tate chiat uh a kaisak ding uh ahi, chi’n govt in order suahpahta ding chi’n gen hi.Huailou in School Education deptt ah incharge a Dy Inspector of Schools(DI of Schools) leh Asst Inspector of Schools(AI of Schools) a omte leng amau teacher ahihna uh school chiat ah kiksaak nawn c hiat hiding uh chi’n gen hi.DI of Schools/AI of Schools a poimawh aleh organised service ahih dungzui in Manipur Public Service Commission(MPSC) saina nuai ah DI/AI ding in Manipur State Education Service(MSES) lak hiding chi’n Minister in gen hi.
Education Minister in a genzelna ah High School leh Hr Sec School tamzaw ah regular Principal omlou leng a omna dingin panlak hiding in gen a,teacher-te transfer policy leng rationalised hiding in gen hi. Govt in education bawlhoihna dia policy a guan dungzui in govt school a teacher-te’n amau sepna school chiat ah a tate uh a kaisak ding uh chih hi a, huai dingin order leng suahkhiakpah hiding chi’n gen hi. Huailou in Education deptt ah DI of Schools leh AI of Schools post tamtak incharge dana sem tamtak a om phattuamna sangin manna lam hizaw a, adiakin huaite lakah Matriculate teacher a hunkhop leng tel uh chi hi.DI/AI incharge dana teacher tamtak a om uh thilhoih ahihlouh ziakin amaute a sepna school chiat uah kiksak hiding uh chi’n leng Minister in gen hi.
Minister in education deptt thiltup a genna ah laisiam student leh quality education bawlkhiak hi a, huai dingin private school hi’n govt school hileleng huaite eite a mah ahihman in govt in private school leh govt school akul leh poimawh bangin puah in enkol ding hi’n gen hi.Manipur apan student tamtak in state dangah laizil in omkhia uh a,huaiziakin Manipur apan sum tamtak khateng in state dang ah thonkhiak hi gige chi’n leng Minister in gen a, student tamtak huchibanga state dang a kuankhiak ngaihlouh theihna ding in Manipur ah leng education tawh kisai vanzat poimawh(infrastructures) leh facility tuamtuam bukimtak a om poimawh chi’n gen hi.
Govt school puah hoihna dingin mark basis a en in govt school a kai student-te stipend piak hiding a,privater school-te tawh kibang thei ding khop in govt school-te leng ahithei tana bawlhoih leh puah hiding chi’n Minister in gen hi.
MLA(Singngat A/C) in PHC vanzat tungthakte enkhia
Lamka, June-1: Health & FW Minister Phungzathang in May 26, 2012 a Singngat Primary Health Centre(PHC) building thak a hon ni’n a gen bang in vanzat tamzaw koih hita a, huaite Ginsuanhau, MLA(60-Singngat A/C) in tuni’n va enkhia a, vanzat poimawh dangte ngaihtuah touhzel hidin gen hi. PHC staff te’n bialtu MLA kiangah compound sung leh a lampi black topping a bawl ding, fencing bawl ding, transformer leh solar lighting system koih ding, doctor 2 leh Grade-IV 3 koih ding banah ambulance 1, MO i/c leh doctor dangte zat ding official vehicle ngen uh a, tuikholna ding leh pump leng ngen uhi.
MLA in huaite ngaihtuah hiding in gen a, ambulance omna din panlak hiding a, pucca road baswl ahih banah leh light koih pah hiding chi hi. Aman vanzat poimawh dangte leng ngaihtuah hidia chiam kawmin staff-te huhna in Rs. 5000 pia hi. Aman PHC enkhe zel ding hi a genkawm in govt employee-te mahni sepna mun chiat a om dingin thuhilh a, kumthak akipan in teacher te’n leng amau sepna mun chiat uh a zotna ding ua panlak hiding chi hi.
Tuni’n Singngat PHC a vanzat tungthakte MLA in a etkhiakna hun ah SDO/Singngat, P. Sianzadong, MDC(Singngat); Tongkai Baite, MDC(Sangaikot) 2nd OC/Singngat Police leh Haukholian, Chief of Singngat i/c tel uhi.
Subroto Mukherjee Football hunkhakna om
Lamka, June-1: DYASO/CCpur saina in May 26, 2012 apan Lamka Public Ground, Tuibuong Peace Ground leh Zion Ground,Molnom ah pasal kum 14 & 17 nuailamte ading in Dist Level Inter-School Subroto Mukherjee Football Tournament 2012 om a, tuni sunnung in Lamka Public Ground ah hunkhakna program ah Chief Guest in Langkhanpau Guite, Chairman ADC/CCpur pang a, Functional President in Henkholun Doungel, Dist Youth Co-ordinator, YNK/CCpur leh Guest of Honour in Lalvullien Joute, President CSDA pang uhi.
Chief Guest in kimawlmite ading in mahni kithununna(self discipline) poimawh mahmah a, zu-le-sa tawh kuamah kizou ngeilou ding hi’n gen hi. Student- te ading a poimawhpen Education hi a, a nihna Sports hi’n gen hi.Tuni a kimawlna a vuallel leh vualzoute’n zu-le-sa a lawm hiam kisiatbat lou ding in leng ngen hi. Kimawlna a vualzoute kipahpihthu gen in a vuallelte leng puaknatpih thu gen hi.
Under 14 yrs ah H.M English leh Hill Rose kimawl uh a, hun tawp tan ah 1-1 in kidraw uh a, Penalty ah Hill Rose in 9-8 in zou hi. Under 17 yrs ah Thangkhai H/S in Immanuel English School 2-0 in zou uh a, Thangkhai H/S te tunung in Imphal a State Level Inter-School Subroto Mukerjee Football Tournament ah CCpur sikin kuanding uhi. Under 14 yrs ah Best goalkeeper hihna Hill Rose Jr H/S apan Felicon leh Best player hihna Hill Rose apan mah Verdon in la uhi. Under 17 yrs ah Best goalkeeper hihna John Guite of Thangkhai H/S leh Best player hihna leng Thangsuanlal of Thangkhai H/S in la uhi.
Patkai College apan lawhching
Lamka, June-1: Patkai Chistian College ah BA, BSc, B.Com leh BCA result suak a, Lamka lam mi ahunkhop lawhching uh a, huaite lak ah mi bangzah hiam in sangtak in zou uhi. l Political Science (Hons) ah Donthiandim in 1st class a zou in marks 66.83 % mu a,2nd position la hi. Botany(Hons) ah Vunglalven in 1st class in passed a, marks 67.71 % mu in 3rd postion la a, Zoology (Hons) ah Chingnun in 1st class a passed in marks 68.07 % mu a, 6th postion la hi.
DLCC meeting hun kisuan
Lamka, June-1: DC/CCpur office a BRGF Resouce Centre ah tuni zinglam dak 11:00 apan Dist Level Co-ordination Committee(DLCC) meeting om ding himahleh DC in Imphal ah official meeting a neihziak in June 5, 2012 sunnung dak 12:30 a om ding in ahun kkisuan chihthu om hi.
Kisual a phelhna lam ah liam
Lamka, June-1:Paul Sangzuol(42) s/o Fimlalthang of Saidan zan nitak dak 10.00 velin a khua uah pasal kisualte a phelhna lam in tem a satkhak in om hi. Thutut kingahdan in Paul Sangzuol in kisualte a phelhlai in kisualte laka khat in tem lukui zang in a muk satsak a, doctor te’n mun 6 khuisak uh a,aman in tuni tan an nethei nailou hi. Paul Sangzuol tu’n dist. hospital ah admit in om hi.
Army te’n mi 1 mankhia
Lamka, June-1: 46-Assam Rifles te’n May 29, 2012 nitak dak 11:30 vel in Kangvai khua ah mi 1 a tenna inn apan mankhia in Imphal Police khut ah pekhia uh chihthu om hi. Matkhiak a om Bungjiten Singh @ James (34) s/o Ngangan Jiten Singh hi a, Imphal Police te’n CCpur Police ah a case pesawn uhi. Tuni’n Police te’n CJM court ah ding sak uh a, CJM in June 5, 2012 tan Police custody ah oming in phalsak hi. Police thusuak dan in Bungjiten Singh bel h PLA atel hi'n gen uh a, FIR No.57(5) 2012 CCP-PS U/S 20 UA(P) A.Act registered uhi.
Airtel office mun kisuan
Lamka, June-1: Tedim Road leh Red Cross Road junction a Airtel office tunai zek in Tedim Road apan Appolo Veng lutna bula Chhungi building( opposite Suakhnun & sons building) ah kisuan hi.
Lawhchingte kipahpihna
Lamka, June-1:SSPP Hiangtam Lamka Unite te'n June 2, 2012 in Hiangtam Lamka a YPA Gen HQ Hall ah Class X & XII examna ah lawhching Hiangtam Lamka huamsung a SSPP member -te kipahpihna program nei ding uhi. Huai Pastor Jamkhanthang, Local Pastor, EBCC Hiangtam Lamka in Pathian kiang ah thumsak ding a, DC/CCpur Ms Jacintha Lazarus,IAS leh bialtu MDC Kamsuanlun in student-te hasotna thugen ding uhi.
Malaria positive 3 mukhia
Lamka, June-1: Dist Malaria deptt te'n May 2012 khasung in damlou mi 1550 sisan test uh a, huailak ah Malaria positive 3 mukhia in huaite avekin PF ngen hi'n kigen a, May 2012 khasung in Malaria ziaka misi official record omlou hi'n kigen hi.
Gari neu gu kimankhia
Lamka,June-1: Light House lane ah zanhal nitaklam in Robert Fima (30) s/o Sawma Fima of Light House lane in a zatlai Hero Honda(No. MN-01R-7776) kigu a, zan in gari neitute'n Tuithapi khua ah gari mukhia uh a, Police te'n gari gupa Md Hussain(26) s/o Md Abdul Haque of Saiton mankhia uhi. Police te'n gari gupa tung ah FIR No.56(5) 2012 CCP-PS U/S 380 IPC registered uh a, tuni'n CJM court ah dinsak hi a, CJM in June 5, 2012 tan Police custody a omdin pekhia hi.
Nahtang nou deihte’n laktheih
Lamka, June-1: Tuibuong a Dist Hort & SC office ah nahtang(banana) nou(sapling) tamlou tung a, adeihte’n office ah ngaihven ngaiding chi’n DO (Hort &SC) apan kiza hi.
SUUNNA
V.Tuanzathang (60) h/o Ngaikhovung of Sinzawl zan nitak dak 10:00 velin Dist Hospital ah damlou in si a, tuni’n Sinzawl khua a vuiding in Lamka apan kipawkhia hi.
Oil pump-te nitak dak 9.00 tan kihong
Imphal, June-1: Imphal East leh Imphal West a Oil Pump om teng tuni nitak dak 9.00 tan kihong a, Uripok a Jas Gas station leh Porompat a Oil pump bel kha 1 sung nitengin dakkal 24 sung kihong ding hi. CAF & PD Minister M. Okendro in tuni’n dakkal 24 sung service dingin Jas Gas station hongkawm in a genna ah black a diesel leh petrol zuakte dal tupna ziak banah inn-mun a thautui zuakte ziaka innkang om sek govt in a deihlouh ziakin Oil pump te’n tuni akipan nitak dak 9.00 tan chiat hong uh hi’n gen hi. Minister in a genzelna ah Centre in Manipur adingin kha tengin SK oil kilolitre(KL) 2112 hong pia a, govt adia alou teilou a poimawhzah sit hiding a, adangte govt rate bikhiah tawh kikim in mipi laka zuak hiding chi’n gen hi.
Craftperson-te Award piakna function
Imphal, June-1: Directorate of Commerce & Industries saina in tuni zinglam dak 10.30 akipan in Porompat a DIC complex a om Food Processing Training Hall ah khutsiam silbawl siam tungtuan(Outstanding craftpersons)te leh Artisan-te lak ah Award piakkhiakna function om a, huai ah Chief Guest in K. Govindas, Minister(Commerce & Industries) pang hi. Minister in kum 2011-2012 sunga State Handicrafts Award mi 10 pia a, midang 12 in Merit Award ngah uh a, mi 19 kiang sah Inspirational Award piak hi uhi. Huai function ah O. Nabakishore Singh,IAS, Principal Secy(Commerce & Indus) leh V. Tualthang,Director(Commerce & Indus) leng tel uhi.
Combined team in galvan hunkhop mukhia
Imphal, June-1: Imphal East Commando leh 28-Assam Rifles kigawm combined team in helpawl om chihthu zak ziakin tuni zingsang dak 5.20 velin Imphal East district sung a Uran Chiru, Awaching leh Sandong Senba Maring village lak operation bawl uh a, zingsang dak 6.30 velin Awaching tang ah plastic a kitun galvan tamtak mukhia uhi. Galvan a muhkhiakte uh G-3 rifles 1, magazine 1, Chinense made handgrenade 1, HE 56 handgrenade 1, Lethod cell 3, AK tang 52, M-16 tang 28, .32 US made carbine tang 15, AK magazine 1, 9mm pistol magazine 1, 1-com high frequency set 1, Chinese made Cordex wire fit 9 leh electric detonator 3 hi a, thil omdan suizui ding Irilbung PS ah pekhia uhi.
A/R te’n orphanage Home ah panpihna pia
Imphal, June-1:27- Sector Assam Rifles tuni’n ‘Salvation Army Baby Home’ kichi nu neilou tagah kepna mun a naungek 7 omte panpihna thilpiak tuamtuam vapia uh chi’n PIB(Defence Wing) thusuak in taklang hi. Naungek leh naupang etkol a omte naungek neuchik akipan kum 4 kikal mi hi uh a, Salvation Army-te etkol ahi uhi. Baby Home a Managing Board te’n security-te apan itna thilpiakte ziakin kipahthu gen uhi.
Meltheihlouhte’n bomb paihkhum
Imphal, June-1 : Imphal PS huamsung Keishampat Leimajam Leikai a om W. Nabakumar (60) tenna inn ah zan nitak nungin meltheihlouhte’n handgrenade khat paihlut uh puak a, himahleh asi leh liam omlou chihthu kiza hi.
Mikhat sisa in kimukhia
Imphal, June-1:Irilbung PS huamsung Keirao Makting Mayai Leikai mun a Iril lui pang ah tuni zingsang dak 4;30 velin misi khat kimukhia hi. A kigendan in misi pen Idiaz Khan (25) s/o Md. Rahman hi a, a innkuanten zan zinglam dak 8:30 vela pawtkhia inntung kiklou hidan in gen uhi. Idiaz Khan bel VDF apang tulelin Porompat PS a posting hi’n kigen hi.
.