Manipur Express kum 31 chin zatna om
Lamka, May-31: Manipur Express issue masapen May 30, 1981 a kisuahkhiak nung kum 31 a chinna(31st Anniversary) zan in Khuga Dam kianga Tourist Lodge mun ah staff-te leh tualsung Agent-te kigawm mi 100 vel paikhawm in zat hi a, huai ah Ginsuanhau,MLA & Special Patron khuallian hi a, Chief Guest in Langkhanpau Guite, Chairman, ADC/CCpur & Special Patron pang hi. TN Haokip,MLA & ex-Minister/ex-Assembly Speaker leh T. Manga Vaiphei,MLA & Chairman MTDC huai programme zatna hun ah Special Guests in pang uh a, Special invitees in Ngamhao Touthang,MDC & Patron leh Tongkai Baite,MDC pang uhi.
Chief Guest Ginsuanhau,MLA in Manipur Express in kum 31 mel amuh kipahhuai sakthu gen a, Manipur Express tungtawn in gam leh mipi adia phattuamna tamtak om ahihdan leng genkawm in maban ah leng huchibang nasep sunzom zel dingin Editor leh a seppihte hasotna thu gen a,Express masawnna ding leh khantouhna dingin a hihtheih om liaite ah kidamlou a pang ding ahihdan gen hi.
Chief Host Langkhanpau Guite, Chairman, ADC/CCpur in Manipur Express kum 31 chinna lopna hun ah inntek hihna atan kipahthu gen a, kingakna tham ching leh Newspaper piching ahihna ah kipahpihthu gen hi. News pichingsem bawlkhiak tupna a Editor leh staff-te panlakna kipahhuai sakthu a gen banah latute adia leng kipahhuai sem ding in agent leh hawker te’n zingsang baihtheipen a hawmkhiak gige sunzom ding in leng hasuan ngen hi.
Special Guest TN Haokip,MLA in a genna ah News piching leh pukselou dia sutzop theihna ding in hun leh tha-le-zung seng a gimtaka nasep banah sum-le-pai leng tamtak manphah(loss) hun om ahihman in journalist cause adia tupna khauhtak neiloute adin thil hithei vuallou hi’n gen a,huai tungtang ah Editor leh a seppihte pahtakhuai sakthu gen hi. :
Special Guest T.Manga Vaiphei, Chairman, MTDC in Newspaper simlam a lunglut hikei mahleh Manipur Express ngaina in simzel ahihdan gen a, Express saite’n Journalism spirit neitak in support tuam leh khentuam neilou in hangsantak a gen dingte gen a panla hi a gen in pahtakthu taklang hi.Manipur Express a thusuahte tungtawn in mi tamtak in sepna mu ahihdan a theih in kipahhuai sakthu gen a, Manipur Express innkuan a tel ahihmanin maban ah leng tuni a Chief Guest, Chief Host leh Special Guest tawh pangkhawm in panlak theihna omteng ah taiselou a panla khawm ding uh hi’n gen hi.
Special Invitees Ngamhao Touthang,MDC leh Tongkai Baite,MDC in leng Manipur Express in kum 31 mel a muh kipahpihthu gen uh a, Manipur Express ziaka mipi tamtak in news kia hilou in thil tuamtuam a leng navakna leh phattuamna a ngah dante uh taklang uhi.
Editor L. Chinkhanlian in tutunga Anniversary lopna pen low-profile takin staff leh agent/hawker-te kia in innkuan sung programme zat tawh kibang in simple taka zat ahihdan gen a, hongtungding November 2012 chiangin Patron-te laka certificate piakkhiakna function tawh kithuah ‘Post Silver Jubilee celebration’ programme a piching thei bangpen in zat hiding chi’n gen hi. Zan a 31st Anniversary programme zatzawh in anluang luina leng om hi.
TN Haokip Foundation Meritorious Award piakna function
Lamka, May-31: TN Haokip Foundation(TNHF) Trust saina in zan sun in Bijang Community Hall ah 59-Saikot Assembly Constituency bialsung a ‘HSLC Examination,2012’ a Topper mi 3 kiang ah ‘TNHF 8th Meritorious Award-2012’ leh Best School telkhiak kiangah Award piakna function om hi.Huai ah Sielmat Christian Hr Sec School akai H.Hmingropui Sungte s/o L Lawilien Sungte of Sielmat in aggregate marks 433 mu in ‘All round topper’ hihna la a, kipahman cash award Rs. 20,000 + citation + certificate ngah hi. St Mary’s H/S akai Thangminlun Kipgen s/o Paokhotong Kipgen of Koite village in Maths subject ah 90 marks mu in topper hihna la a, cash award Rs. 15,000 + citation + certificate ngah hi. St Mary’s H/S akai mah Science subject ah 89 marks mu in Topper ah Lhingpahhoi d/o Seikhojang Haokip of B.Vengnuom in Science subject ah topper hihna la a, kipahman in cash ward Rs. 15,000 + citation + certificate ngah hi. St Mary’s High school apan student 99% lawhching in scoring points 1100 a muh ziakin a, Saikot A/C sunga ‘School of the Year 2012’ hihna la a, cash award Rs. 10,000 banah citation+certificate piak hi uhi. Rev L.B Angam, Mission Director, ECCI in Award ngah mi 3 te leh School of the year 2012 adin Pathian kiang ah thumsak hi.
TNHF Award piakna function ah Manga Vaiphei, MLA & Chairman,MTDC khuallian in pang a, Functional President in Ginsuanhau, MLA pang hi. Special Guests in Langkhanpau Guite, Chairman ADC/CCpur; Demmang Haokip Vice-Chairman ADC/CCpur; L Mangkhogin Haokip, IPS, SP/CCpur leh Sister Lily Maria Principal St.Mary's High School pang uhi. Kamsuanlun EM, ADC; Tongkai Baite MDC, Ngamhao Touthang MDC, Hrila Hmar MDC, Nehthang Mate MDC, Khaipao Haokip MDC leh Baby Lhinghoihkim Touthang, IFS ban ah mi poimoh tamtak in leng huai hun uap uhi.
TN Haokip, ex-Minister & ex-Assembly Speaker in thugenna ah student-te hanthawnna ban ah Maths leh Science subject ah kitaitehna om deihna ziaka hibang Award pankhia ahihdan gen hi. Aman agenbehna ah TNHF Meritorious Award in 59-Saikot A/C sung kia huap nawnlou in district pumpi huamsak sawm ahihdan leng gen hi. USA gam pumpi ah Paul Pudaite in Maths topper hihna a lak theih leh student tamtak- te’n leng India gamsung pumpi ah Science leh Maths ah topper hihna lathei ahihdan leng gen hi.
Chief Guest in Award sang mi 3 te’ nu-le-pa te mi vangpha ahihdan gen in awardee te kipahpihthu gen hi. Nidanglai hun leh tuhun kibang nawnlou in tuhun computer age ahihman in khawvel a pilna leh siamna asan dungzui in huaite delhpha dia student-te’ kisa chiat ding in hasuan hi. Student te’n Pathian muan a poimawh banah kuhkal taka laisim ngai hi’n gen a, awardee mi 3 te’n maban ah hahpan sem ding in hasuan hi.
Functional President in agenna ah Award sang student te'n mahni hihna manghilhlou a, kalbi sangzaw ngahna ding a hahpansem ding in hasuan hi. Aman a genbehna ah student te’n mahni pianna nu-le-pa, Pathian leh teacher te’ zahtak dending in leng thuhilh a, nu-le-pa te’ lam etna tan tungzou ding a panla ding a hasuan kawmin laisiamte ading in IAS, IPS, IRS chihte hitheivek ahihman leng gen hi.
RHSS ah Felicitation programme
Lamka, May-31: Rengkai Hr Sec School(RHSS) apan Class X & XII examna a lawhchingte kipahpihna ‘Felicitation cum Thanks Giving 2012’ tuni sunnungin om a, huai ah Dr. Suresh Babu, IAS, Principal Secy, Edn(S) khuallian a pang in student lawhchingte kipahpihna a ‘Commemoration’ kibawl a honkhiak banah student lawhchingte lak ah kipahman pekhia hi. Guest of Honour in Ms Jacintha Lazarus, IAS, DC/CCpur pang a, Joseph Lalrothang, ZEO/CCpur leng tel hi. Rev Vanmawia in student lawhchingte ading in thumsak hi.
Chief Guest in a thugenna ah dist danga govt school tamzaw zattaklou khop a a omlai in CCpur district ah RHSS telin govt school khenkhat in lawhchinna thupitak a ngah uh kipahpih thu gen hi. Tutung CBSE saina a Class XII result suak ah Manipur mi in topper hihna a lak ziakin India Prime Minister in kihoupih dingin telkhia a, huai in Manipur state min hoihsak ahihdan leng gen hi. Guest of Honour a pang DC/CCpur in student lawhchingte kipahpihthu gen a, maban ah leng kuhkal taka pang dingin hasuan hi.
Principal Secy, Edn(S) in S. Vanlalruala, Principal, RHSS kianga thuchiam bawlin, kumnawn akipan RHSS ah Top 10 tan tungpha omleh, a service hun kum 2 behlap sak hiding chi hi. RHSS apan HSLC pass zah 85% tung a, huaite lak ah 1st divn. 12; 2nd divn. 60 leh 3rd divn 2 hi uh a, mi 19 in subject tuamtuam ah letter marks mu uhi. Class XII(Arts stream ) ah pass zah 91% tung a, 1st divn 8; 2nd divn 10 leh 3rd divn 6 hi uhi. Science stream ah pass zah 46% tung a, 1st divn 5; 2nd divn 7 hi uhi. Neikhoneng Haokip in 72.8% a zou in HSLC Topper Award sang a, Hoihneikim Changsan in 67.2% a zou in Class XII (Arts) Topper Award ngah a ST. Khaiminthang in 64% a zou in Class XII (Sc) Topper Award sang hi.
Police-te’n jail ah koih
Lamka, May-31: Jacob Malsawnlien (18) s/oLalhngakzing of Pherjawl tulela Peace Lane a om apaisa May 20, 2012 nitakin Rengkai hanmual gei ah tema dawt ahih ziaka damzoulou a si tawh kisai in Police te’n ginlelh ziakin May 21, 2012 nitak in H.Thangchinlian(32)s/o H.Thonzagin of Zoar Veng, Bungmual man uh a, ni 8 vel Police custody ah a om nungin zan in Police te’n CJM court ah pawkhia uh a, CJM in Judicial custory(Jail) a om ding in thutan khum a, huaiziakin Police te’n zan in jail ah koih uh chi’n Police apan kiza hi.
SYO President in Quarter hong
Lamka, May-31:Sim Veng a om SYO Hall campus ah Chowkidar quarter ding building kibawl tuni zingsang dak 7:00 in T.Goukhomang, President/SYO & Presidetn ZYA in hong khia a, Rev S.Kaikhanmang, Executive Secy NTBCA in Pathian kiang ah thumna in lan(dedicate) hi.
Gari neu gu kimankhia
Lamka, May-31: Light House lane ah zanhal nitaklam in Robert Fima (30) s/o Sawma Fima of Light House lane in a zatlai Hero Honda(No. MN-01R-7776) kigu a, zan in gari neitute'n Tuithapi khua ah gari mukhia uh a, Police te'n gari gupa Md Hussain(26) s/o Md Abdul Haque of Saiton mankhia uhi. Police te'n gari gupa tung ah FIR No.56(5) 2012 CCP-PS U/S 380 IPC registered uh a, tuni'n CJM court ah dingsak uh a, CJM in Police custody a omding in phalsak hi.
Customary Law tawh kisai Workshop
Lamka, May-31: PTC HQ saina in tuni zinglam dak 11:30 in Hiangtam Lamka a PTC office Conference Hall ah Paite Customary Law Amendment tawh kisai in Workshop om a, huai ah PTC makaite ban ah mipi hunkhop paikhawmte’n amendment bawl ding Customary Law draft tuamtuamte kikumkhawm uhi.
Kipuk in meikhuk bawhkha
Lamka, May-31:Davindra (30) s/o Sonilalsha of New Bazar tuni zingsang dak 5.00 velin an huanlai khawphawklou a kipuk in meikhuk bawhkha a, a khut langnih kangliam a, dist. hospital ah admit in om hi. Huailou in Paugoulian (27) s/o Gouminthang of Gangpimual leng zanhal masa(May 28) in Aina khawkiang a Lungchuang ah singbeam suilai khoihkhial kha in a heipi zat in a taklam khepi toutan kha a, dist. hospital ah etkol in om hi.
TRABDA office hong ding
Lamka, May-31: TRABDA pawlin Laitui Medico kiang Tipaimukh Road ah Waiting Shed-cum- Ticket Counter ding a bawl uh zouta uh a, June 1, 2012 zingsang dak 6:00 in Dongzakai, Chief of Hilltown in khuallian apang in hongkhe ding hi.
Theihgigena mualsuang honna
Lamka, May-31: D. Ginkhotual of Pearsonmun in a tapa D. Thangkhanmang leh Zamngaihnem te nupa banah a tapa mah D. Vungliansang theihgigena mualsuang honna June 1,2012(Sintawpni) zingsang dak 7.30 in a inn-mun uah programme bawl a, huai hun uap chiat dingin ngainatu kuapeuh chial hi. Zingsang dak 7.30 akipan zinglam dak 11.00 tan mahni kiman hun dandan in itna mualsuang honna ankuang um dingin D. Ginkhotual leh a tapa upapen D. Kamsuanthang in ngainatute kuapeuh chial uhi.
Suunna
Tungkhopau (46) s/o Paulam of Saipum village tuni sunnung in dist. hospital ah TB natna ziakin si a, June 1, 2012 in Saipum khua ah kivui ding hi. Amah ahihleh tulel a Singngat Police Station a ASI sem ahi hi.
Vumlunmang, IAS kipahpihna om
Imphal, May 31:Vumlunmang, IAS (Manipur-Tripura joint cadre) tulelin central deputation a omkhia in Ministry of Home Affairs(MHA) ah Director semlai May 12, 2012 in Joint Secretary ah kaisang hi. Delhi Paite Inndongta (DPI) governing board te'n a kaisanna kipahpih in tuni’n North Block a a office chamber ah hun vazatpih uhi. DPI Chief Khatchin Langel in kipahpihna thilpiak pia a, DPI governing board member Upa Khamkhanpau Guite leh Upa T. Kaithang in thumsakna leh Pathian kiang a kipahthu genna nei uhi. Vumlunmang in World Bank ah Adviser apang in USA khawpi Washington ah kum tamkuamtak omkhin a,
kum 17/18 vel service lai ding hi’n kigen a, tua ziakin state ah Chief Secretary dinmun tanpha lenthei dia service lama fel leh nasemhoih a ahi hi.
Manipur leng bandh ziakin nawngkai
Imphal, May-31: Opposition pawlin petrol man khang lungkimlouh ziakin tuni zingsang dak 5.00 akipan nitaklam dak 5.00 tan India gam pumpi ah bandh puang uh a, Manipur ah leng Co-ordinating Body of Trade Unions Manipur pawlin bandh support in hahtakin pan alak ziakin Imphal khawpi ah tuni’n bazar, dukan/hotel,commercial centre leh oil pump teng kikhak a,school leh college tanpha kikhak hi. Manipur leh state dang kawmtuah Inter-state Bus service leng omlou a,Imphal leh district tuamtuam kuamtuah Bus service teng a pailouh banah passenger Bus service leng kimulou hi.Hileleng buaina thiltung bel zak omlou hi.
Agri Minister in kipahpihna sum pia
Imphal, May-31: Mohammed Ismat(21) s/o Md Bashirur Rahman of Lilong Haoreibi village,Thoubal district in Zenith Academy,Imphal apan Class XII zilin CBSE saina a Class XII examna ah Science stream ah marks 500 lakah 495 mu in North-east India ah Topper hihna a lak ziakin Agriculture Minister Md Abdul Nasir in kipahpihna latsakna in tuni’n a office chamber ah simple function neihpih in Md Ismat khut ah Rs. 1,11,111 pekhia hi. Manipur apan student khat in Topper hihna a lak in Manipur state a minthansak banah minhoihna tun a,state dangte’n leng Ismat enton ding a deihthu gen hi.
Combined team in KCP 2 man
Imphal, May-31: Thoubal Commando leh 15-Assam Rifles kithuah combined team in tuni zingsang dak 4.20 velin Thoudam Maning Leikai lak operation a bawlna uah KCP(Noyon group) a tel Th. Khamba (21) mankhia uh a, amah akipan in 9mm pistol 1 leh atang 4 mukhia uhi. Combined team in amah thudotna akipan in KCP(Noyon group ) a Finance dept. a sem Th. Inao (30) Thoudam Maning Leikai leng a inn apan handgrenade 2 tawh mankhia uh chihthu om hi. Imphal East Commando pawlin leng thuguk a theih ziakun Hatta Golapati area ah operation bawl uh a, KCP 1 mankhia uhi.
Police-te gamtatdan mawhpaih
Imphal, May-31: Senapati district sung Sadar Hills a Saikul Hill Town Committee te’n press release suah in a taklatna uah Police personnel duty te’n Imphal-Saikul kikal a tai garite akipan sum tampipi laksak uh chi’n mawhpaih thu puang uhi. Thusuak in a taklat dan in zan nitak in leng police personnel duty te’n gari 2 akipan in Rs. 2000/- tuak a a laksak ban uah driver khat leng soisa uhi. Saikul Hill Town Committee te’n thil omdan enzui ding in thuneitute’n ngen uh a, Home department in explanation call bawl a suikhe teitei din leng ngen uh chihthu om hi.
Myanmar in helpawlte huntawp pia
Nay Pi Daw, May- 31: Myanmar govt in zanin Myanmar gamsung a kibu leh pansan a om Manipur phaizang helpawlte vauna khauhtak bawlin June 10, 2012 tan a Myanmar gam nuse ding leh a camp teng uh khakvek dingin thupia chihthu om hi. Prime Minister Dr Manmohan Sngh in Myanmar gam a veh lawhchinna khat hidanin kigen a, Bhutan leh Bangladesh te’n leng a gam uh North-east biala helpawlte’ zat dingin phal nawnlou uh chih ahi hi.
Myanmar govt thusuakin a gendanin Manipur phaijang helpawlte’n huntawp piak a sungin thupiak a zuih kei ua leh sepaih thahatna zatkhum hiding chi uhi. Tulelin Myanmar gam ah Manipur helpawl group tuamtuam 15 vel om uh hi’n kigen hi. India lam apan security force-te leng pilvang(alert) mahmah din zaksak hi un kigen hi. Manipur phaizang helpawl tamzawte’n Myanmar gam pansan uh a, camp piching taktak tanpha nei uh hi’n thuguk sai mite’n gen uhi.
.