Minister in ZYA gam hong ding
Lamka, Nov-25: Zomi Youth Assn. (ZYA) Gen HQ in Buallian khawkiang a gam liantak a neih uah office leh Conference Hall bawl sawm uh a, Nov 28, 2014 zinglam dak 11:00 in Health Minister Phungzathang Tonsing, Chief Guest apang in hong ding a, Rev. Dr. B.Luaichinthang, EBC in Pathian kiang ah lan ding hi. Huai ah Guests of Honour in Dr Chaltonlien Amo, Chairman HAC; T. Manga Vaiphei, Chairman MTDC; Vungzagin Valte, Parliamentary Secy; T.N Haokip, MLA; Ginsuanhau, MLA; Langkhanpau Guite, Chairman ,ADC/CCpur leh Lunminthang Haokip, DC/CCpur pang ding hi. Chief Host in LB Sona, Chairman, Zomi Council pang ding a, Special Guests in Demmang Haokip, Vice Chairman ADC/CCpur makaih in MDC member 24 te ban ah Mannuamching, CEO/ADC leh T.Kammuanlal Simte, AC to DC pangding uhi. Special Invitees in HYA GenHQ; YMA Manipur Group leh KKL, Gen HQ makaite pang ding uhi.
Street Campaign patna din hong
Lamka, Nov-25: Action for Women and Child Advancement (AWCA) te'n Nov 25-Dec 10, 2014 sung International Forthnight Observation of Violence Against Women zatna kawm in Street campaign nei uh a, Lunminthang Haokip, IAS, DC/CCpur in tuni in Lailam Veng a AWCA office ah hong hi. DC in a thugenna ah Pathian in numei leh pasal akibang in bawl a, pasal leh numeite role play ding om hi'n gen hi. Khawvel ah Violence Against Women apan suahtakna ding in numei te'n mahni kivenna dingin Martial Arts zil dinga deihsakthu gen hi.
Tuni'n khawpi sung mun 3-Tedim Road-Lailam Veng junction; Bijang Family Lane leh Tuibuong Forest Gate ah street campaign nei uh a, gari taituah te ah Women Helf Line No. tawh kituah Sticker belh zel uhi.
Misi om : Kim Joe kikhak ding
Lamka, Nov-25: M/s Kim Joe office kiang ah tuni sunnung dak 1:00 velin Upa L. Lalthangluoi’ a sihziak in Nov 26, 2014 in Kim Joe kikhak ding a, consummer te’n theisiam ding in ngen uhi.
EBC Kumsim Khawmpi om ding
Lamka, Nov-25: Evangelical Baptist Convention (EBC) Kumsim Khawmpi 66veina Dec 10-14, 2014 sung New Lamka a Gospel Centenary Hall ah om ding a, Dec 10,2014 nitak dak 5:30 in Rev.V. Thangkhangin, Director of Institutions in hong ding hi. Khawmpi sungin Rev S.Vung Minthang, Gen Secy, EBC in Pathian thu gending a, Bible study hun ah Rev L. Kham Kho Lun, Director of Missiones, EBC in makai ding a, Seminar ah Rev Dr S.Langzakham, DS, Lamka South Divn. leh Rev Paukhanmang Guite, DS, Lamka North Divn. te’n sinsak ding uhi.
Traffic Police te’n Special Drive nei
Lamka, Nov-25: Traffic Police te'n zan in Tuibuong Peace Ground gei, Tedim Road ah Traffic Special Drive nei uh a, tuni'n Dist Transport office kong Tedim Road ah sunzom uhi. Traffic Special Drive hun ah 2-wheeler gari a tuang helmet khuloute ban ah Diesel Autorickshaw-te gari document check uhi. Zan a special drive ah gari 15 matkhiak hi a, tuni'n gari 30 vel man uh a, gari khat ah Rs.100/- zel fine sak in TR-5 receipt cut zel uhi. Traffic Police te'n traffic special drive nei touzel ding uh chih ahi hi.
Music Festival adi’n thumkhawmna
Lamka, Nov-25: Nation Wide Gospel Music Festival 2015 tawh kisai in NWGMF Prayer department makaihna in Nov 29, 2014 (Saturday) zingsang dak 6.00 in Muolvaiphei Prayer Mountain ah thumkhawmna om ding hi. Thusuakin a gendan in Dec.15, 2014 in Rengkai ah 2nd Motivational Programme -cum - Advance Christmas zat hiding a, kisakkholhna paizel kawm in Nov 22, 2014 (Kiginni) in meeting om a, Nov. 23 in leng programme zintun ding "Rengkai Churches Youth Leaders" tawh meeting nei uhi.
Micro Credit Plan training
Lamka, Nov-25: NABARD panpihna zang in Relief and Development Dept, EAC te'n tuni in Zenhang Lamka a Rengkai Road a EAC office ah 'Training Module for Micro Credit Plan for Women Self Help Group nei uh a, Rev Darziding, PO, HSP in hong hi. Huai hun ah Prasan Kanti Das, Manager, UBI/CCpur Branch; L. Hrangchal, Secy, Relief & Dev. EAC; leh L. Lamzamuan, Project officer, RDD/EAC te'n sinsak uhi.
KNO in thupuan poimawh bawl
Lamka, Nov-25: T. Stephen, Infor & Publicity, Kuki National Orgn (KNO) in thupuan bawlin a taklatdan in student khenkhat in school compound ah khamtheih leh drug hih uh chihthu zak hi a, huai dalna ding in KNO in Nov 26, 2014 kipan panla ding hi’n puang uh a, kuapeuh in kithuahpih dingin ngen uhi.
Huailou in pharmacy tuamtuam te’n leng khamtheih thilte himhim doctor’ lehkha tellou in kuamah pekhelou ding in theisak uh a, dukan leh pan dukan hibanga zuak leh supply matkhiak a om leh ngaihdam hilou ding chi’n thusuak in gen hi.
Inntung apan kia in liam
Lamka, Nov-25: Vanlalchhawna (40) h/o Esther of New Bazar, Lamka, tuni’n inntung a Vapal (Pigeon) an pe dia kisa, tuahsia in inntung apan kia a, leitual kidenna in a tal (forehead) leh mun tuamtuam liam a, dist. hospital ah etkol in om hi.
SUUNNA :
N.Thanglianmang (68) f/o N.Phungzamuan of Vengnuam, New Lamka, tuni nitaklam dak 3.30 in RIMS casualty ah heartfail in si a, nitak dak 6.30 in Lamka a vui din hong kipua a, Nov. 26, 2014 in YPA hanmual, New Lamka ah kivui ding hi.
Upa Lalthangluoi (90) f/o Darhmingthang of Rengkai tuni sunnung dak 1.00 velin cancer ziakin si a, Nov 26,2014 in Rengkai hanmual ah kivui ding hi.
IMPHAL NEWS:
PM dakkal 1 valdeuh om ding
Imphal, Nov-25: Prime Minister Narendra Modi in Nov 30, 2014 a Imphal hongphak hun ah dakkal 1 valdeuh om ding hi’n kigen hi. Nov 30, 2014 nitaklam dak 3.00 velin PM hongtung ding a, Hapta Kangjeibung a Sangai Festival hun khakna ah dakkal 1 vel om ding hi’n kigen hi. Huai zawh in Nityaipat Chuthek a BJP Manipur Pradesh office ah party worker-te kimuhpih ding a, dakkal kimkhat vel khit in Nagaland a Hornbill festival uap dingin Impghal nuse ding hi’n kigen hi.
Manipur Med. Council in nasep pan
Imphal, Nov-25: Manipur Medical Council (MMC) in tuni akipan in nasep kipan uh a, Manipur Medical Council a Registrar Dr Kalam Lokendro in a gendan in MMC Act 2009 dungzui in member bukim a om banah Executive Committee leng guan hi a, President in Dr Sinam Rajendra pang chi’n gen a, Vice President telin Executive Member 6 a om banah Sub-Committee 4 leng bawlkhiak hi’n gen hi. Manipur a doctor teng kum 1 sungin MMC ah aki-register uh ngai ding a, ki-register loute practice theilou ding uh hi’n leng Dr Lokendro in gen hi.Intern a om medical student te’n leng temporary registration a bawl uh ngai ding hi’n gen hi.
CM Secretariat ah meeting om
Imphal, Nov-25: Chief Minister O. Ibobi makaihna in tuni’n CM Secretariat ah Council of Minister-te, Parliamentary Secretaries leh top official tengin meetin nei uh a, Nov 30, 2014 a Prime Minister Modi in Imphal hong phak ding tawh kisai a hih ding poimawh tuamtuam omte genkhawm uh chi’n thusuak in gen hi. Meeting ah Prime Minister kianga memorandum piak ding ah bangbang thil poimawhte telsak ding hiam chih thu leng genkhawm uhi. Prime Minister in Manipur hongphak ding ziakin Special Protection Group (SPG) platoon honkhat leng tuni’n Imphal hongtung uh hi’n kigen hi.
Sangai Festival ah CCpur Day kizang
Lamka, Nov-25: Hapta Kangjeibung a Sangai Festival 2014 zatna ah tuni nitaklam dak 4.30 akipan in n CCpur Day zat hi a, CCpur district akipan Minister/MLA-te leh DC/CCpur banah DLO tuamtuam tel uhi. Huai hun ah Kom Cultural Troupe, , Thadou Cultural Troupe , Zou Cultural Troupe, Hmar Cultural Troupe, Zomi Cultural Troupe, Mizo Cultural Troupe, Thadou Kuki Cultural Troupe in cultural programme tuamtuam zang uhi. Semika Band te’n Eimi Achievers' Award lapi sa in, Six Strings Band, ICI Central Choir, Benny Khongsai, Muan Hangzo, Janet Varte, Naemy Haokip leh Joycee Vaiphei apan lasak ngaihkhiak ahi hi.
UNC President din Gaidon ching
Imphal, Nov-25: Senapati district HQ ah tuni’n United Naga Council (UNC) vaipaw ding telna om a, kum 2014-2018 sung UNC President dingin Gaidon Kamei telching in om a, amah UNC President 11na hidin kigen hi.Gaidon in term beisa ah UNC General Secretary hihna len a, aman tuma a President L. Adani khengkhia hi.
Aman a thiltup thupipen leh masapen Naga political issue tungtang hihfel (settle) hiding chi’n gen hi. Gaidon Kamei in term 3 sung All Zeliangrong Students Union (Assam, Manipur, Nagaland) President hihna len a, All Tribal Students Union, Manipur (ATSUM) General Secretary-lui leh term 4 sung ATSUM Vice President hihna len hi’n kigen hi.
Imp-Moreh road ah indefinite bandh
Imphal, Nov-25: Tengnoupal Village Authority in Nov 28, 2014 zankim lai akipan in Imphal- Moreh road (National Highway-102) ah hunchiam omlou ding bandh pan ding uh chi’n puang uhi.
Tengnoupal Village Authority a Secretary Lunminthang Haokip in a gendan Nov 17, 2014 zingsang in Tengnoupal khawkiang Sita Lamkhaia Assam Rifles Check point a IED bomb koihte a kipuang a omlouh ziak un bandh bawl ding uh hi’n gen a, huai sungin media, medical, religious leh emergency services khahkol hiding in gen uhi.
TUNI THUPI:
“Kuapeuh thulimlouhna tuh in tuahsia ala ding: huchi’n a hehna chiang a lawhching kei ding.”
- Paunakte 22: 8
