Sangai Festival ah DLO teng telkim din theisak
Lamka, Nov-23: Sangai Festival apaisa Nov 21, 214 akipan kizang paizel a, Nov 25, 2014 nitaklam dak 4:30 in ‘CCpur District Day’ zat hiding hi. Huai hun ah Dist. Level Officer teng telvek ding in DC/CCpur in theisak hi. Huai a hawh ding teng Nov 25 zinglam dak 11:00 in Lamka Public Ground ah DC/CCpur makaihna in kuankhe ding uhi. CCpur Dist Day zat hun ah Kom Cultural Troupe ( Koirentak); Hmar Youth Assn; Young Mizo Assn (Lamka Branch); Thadou Kuki Cultural Troupe(M.Songgel); Zou Cultural Troupe; TKSU, CCpur College leh Zomi Cultural Society te’n Cultural show ding uhi.
Musical Band/Artist ah Six String Musical Band and Artist, ICI Central Choir, Muan Hangzo, Jenet Varte, Benny Khongsai, Eimi Achievers Song, Naemy Haokip leh Joicee Vaiphei hiding hi. Program hun ah traditional show omding a, Paite, Thadou-Kuki, Simte, Vaiphei, Zou, Hmar, Mizo, Chin, Gangte leh Kom tel ding uhi. DC/CCpur in welcome address gen ding a, CCpur dist. sik-le-tang in Health Minister Phungzathang Tonsing in thugen ding a, Dr Chaltonlien Amo, Chairman, Hill Areas Committee in vote of thanks gen ding hi.

Zomi Nam Ni Budget tungtang genkhawm uh
Lamka, Nov-24: 67th Zomi Nam Ni Celebration-cum-Mithun Festival 2015 a Organizing Committee te’n tuni zingsang dak 7:00 in Nehru Marg a Zomi Council office ah joint meeting 5veina nei uhi. Huai ah Zomi Nam Ni lopna dinga zat ding sum-le-pai kaihkhawm ding dan leh Sub-Committee tuamtuamte budget ding genkhawm uhi.Huai joint meeting ah 67th Zomi Nam Ni zatna ding tawh kisai a sum muhkhiak ding leh senzah ding a tangpi in Rs. 32 lakh vel hiding in panlak sawm uh hi’n kigen hi.

Zomi Nam Ni lopna a Souvenir copy 1500 sanga tamzaw bawlkhiakna ding in Rs.3 lakh bikhiah uh a, senna ding kimkhat advertisement tungtawn a muhkik ding in ngaihtuah uhi. Football Tournament ading in Rs. 5 lakh bei ding in koih uh a, Committee in Rs. 3.5 lakh sanction ding a, Sub-Committee in Rs. 1.5 lakh a muhkhiak ding in bikhiah uhi. Football kidemna a champion team in cash prize Rs. 1 lakh banah sial (mithun) 1 mu ding uh a, Runners up team in cash prize Rs. 50,000 + sial ngah ding uh a, 3rd place in a muh ding Rs. 20,000 + sial hiding hi.
Tuni a joint meeting in Hospitality & Transports adin budget Rs.3 lakh guang uh a, Competition tuamtuam a zat dngin Rs. 3 lakh bikhiah uhi. Sketch competition ah 1st prize Rs. 7,000; 2nd prize Rs. 5,000 leh 3rd prize Rs 3,000 hiding hi. Essay competition ah 1st prize Rs. 15,000; ,2nd prize Rs. 10,000 leh 3rd prize Rs. 7,000/- hiding a, la kidemna (song competition) ah Zangtala/Sannem la leh Tulai la chi 2 in kikhen ding a, 1st prize Rs. 30,000; 2nd prize Rs. 20,000 leh 3rd Rs. 10,000/-tuak hiding hi.

67th Zomi Nam Ni Celebration –cum- Mithun Festival 2015 ading letter head leh receipt book bawl dingin thupuk uh a, huaisai dingin General Secretary mawhpuakna pia uhi. Construction & Physical Arrangement ading in Rs. 5 lakh guang uh a, Information & Publicity ading in Rs. 2 lakh banah Refreshment ading in Rs. 2 lakh bikhiah uhi. Huailou in Sub-Committee te’n committee keklian thei ding uh a, member thakte approval piak dingin HQ ah akinlam a petou zel dingin thupuk uhi.

Phaipheng ah Free Medical Camp
Lamka, Nov-24: ADC/CCpur leh Lions Club of CCpur Greater (Dist 322-D) saina in Nov 26, 2014 in Thanlon sub- divn a Phaipheng khua ah ‘1-day Free Medical Camp’ om ding a bialtu MDC Langkhanpau Guite, Chairman ADC/CCpur & President Lions Club of CCpur Greater (Dist 322-D) in hong ding hi. Free Medical camp hun ah CMO/CCpur nuai apan Dr Liangoumuan Samte, Dr Ginthianmung ban ah ADC/CCpur nuai a Dr Thangkholet Haokip, MO leh ADC/CCpur nuai a Pharmacist leh Nurses te’n doctor-te panpih ding uhi. Free Medical Camp a telding teng Nov 25, 2014 in Chairman ADC/CCpur makaih in Lamka apan kuankhe ding uhi.

Vehicle Tracking System Device
Lamka, Nov-24: Dist. Transport Office/CCpur ah tuni zinglam in M/s RA Agency pawlin ‘Vehicle Tracking System Device’ hongkhia uhi. Alethea Technosoft Pvt. Ltd. (technology partner G4 Global Tech. Inc. Texas USA) in a bawlkhiak vanzat (device) tungtawn in gari gukmang a omte leng a kikoihna mun theihtheih ding hi’n kigen hi.
Vehicle Tracking System Device thuahna ding in Rs. 9000/- la uh a, launching discount in 10% banah kumkhat sung subscription manbei ding hisak uhi.

FMPB Area Leader Fellowship
Lamka, Nov-24: Beulahlane a FMPB CCpur office ah Nov 26, 2014 zinglam dak 10:30 in FMBP CCpur Area Leader meeting/fellowship om ding a, huai ah Pastor S. Thangchinlun in Area Leader thak Kamchinhang thumsakna leh calender thak latna (dedication) nei ding hi. Huai ah kikhopna ah calender hawmdan ding leh Christmas Gift tungtang genkhawm ding uhi.

Paukhankham tuahsia in si
Lamka, Nov-24: K. Paukhankham (44) s/o K.Thuamzathang of Gangpimuol in zan zinglam dak 11.00 velin Tipaimukh sub-divn sung Leisen khawkiang Serhmun gam ah sing-at ding phuklai singkung kipuk in a delhkhak ziakin si a,aluang tuni’n hong kipua a, nitak dak 6.00 a hongtung in suunna zatzawh tuni nitak in Gangpimuol hanmual ah kivui hi. K.Paukhankham ahihleh Serhmun ah hun bangtan pisa akipan a lawmpa tawh sing-at in gam giak hi’n kigen hi. Singkung in amah a delhkhak banah singkung dang tawh khohbelh kha a, alawmpa’n khawsung mite vasam in, amun a tun tan un damlai mahleh a b\kawnbom lak kisegawp a lakkhiak zawh nung sawtlou in si hi’n gen uhi.

Class VIII te adin competitive examna
Lamka, Nov-24: EBC HQ, Dorcas Hall, New Lamka ah tuni zinglam dak 10.30 in Nov 28, 2014 tan daihding EBC schooltuamtuam a a Class VIII student te'n External Competitive Examination pan uh a, Sinzawl Convention English H/S, Bukpi Convention English Jr H/S, Grace English Jr H/S, Mualnuam leh Songtal Convention English Jr H/S apan student 41 tel uhi.
External Competitive a 1st in EBC HQ apan kipahman Rs. 3,000; 2nd in Rs. 2500 leh 3rd in Rs.2000 ngah ding uh a, EBC Bangalore BYF te'n scholarship peding uh hi'n kigen hi. EBC Bangalore BYF te'n mi 6 chawmta uh a, final exam ah mark 60% tunglam mute’n Class XII tan chawmna ngah ding uh chih ahi hi.

SSPP leh NFI in MoU ah suaikai
Lamka, Nov-24: National Foundation for India (NFI) makaite tawh kimu dia Nov. 18, 2014 a Delhi a zin Lianzapau Samte, President, SSPP Gen HQ makaih SSPP teamte hongtung kik uh a, NFI tawh ‘I Have A Dream Project’ tawh kisai kum 1 sung partnership ding in MOU suaikai uhi.SSPP sikin Lianzapau Samte in kai a, NFI sik in Amitab Behar, Executive Director leh Dr Monica Banerjee, Director Programmes te’n suaikai uhi. Huai project tungtawn in singtang biala Primary Education System phuahphat ding chih hi a, School 10 ah sem ding uh hi’n kigen hi. NFI in teaching material, teacher & student-te adi’n exposure visit, RTE Training leh Health & Environment Awareness chihte in panpih ding uhi.

Guta te’n SaS Godown luh
Lamka, Nov-24: Police apan kizadan in meltheilouh gutate’n Nov 22, 2014 nitak in Lailam Veng a M/s Sialngenthang and Sons (SaS) Godown luh uh a, Gas Agency te' zat gari MN04-2496 apan Gas cylinder zat naihlouh 12 gumang uh chihthu om hi. Police te'n gutate suizui lai uh a, Gown luh tawh kisai in FIR No.112 (11) 2014 CCP-PS U/S 379 IPC registered uhi.

CT Lian Guite tawh hun zangkhawm
Lamka, Nov-24: JNU, New Delhi zan nitaklam dak 6.00 in Zogam.com in Social Worker CT Lian Guite vaidawnna in nei uh a, huai hunah CT Lian in Lamka a awlmawh thu, puahhoih a lunggulhdan leh panlak dingdan lampite tuamtuam gen chihthu muanhuaitak apan kiza hi.

IMPHAL NEWS:
Th. Chaoba in Cabinet Secretary mu
Imphal, Nov-24: BJP Manipur Pradesh President Th.Chaoba in tuni’n Rashtrapati Bhavan ah Union Cabinet Secretary Ajit Seth kimuhpih in Manipur tawh kisai issue tuamtuam genpih chihthu om hi. Chaoba in Cabinet Secretary a muh hun ah BJP Manipur Pradesh a General Secretary M Ashwinikumar leng tel a, Chaoba in Manipur a lawmlian tawh kisai kikawmtuahna, education leh natural resources tawh kisai minute 20 sung Cabinet Secretary tawh thil omdan genkhawm uh chih ahi hi.

Imphal-Moreh line bandh khawlsak
Imphal, Nov-24: Pallel Police Commando te’n Tongkhohao Mate a pimang uh lungkimlouh ziaka JAC kibawlkhiate’n Imphal -Moreh lampi National Highway 102 ah zan nitak zankim akipan hunhciam omlou dia bandh a puan uh tuni nitaklam akipan Nov 30, 2014 tan khawlsak uh chihthu om hi. Tuni’n Molnoi village ah govt sikin IFCD Minister Ngamthang Haokip, D. Korungthang, MLA 42 Tengnoupal; Lhukhosei Zou, Chairman ADC/Chandel; Addl. DGP (Police) LM Khaute; Chanthoi Aimol, Member ADC Chandel, SP Thoubal in JAC palaite tawh kihou in kilem thei uh chih ahi hi.

Manipur ah sualna pung mahmah
Imphal, Nov-24: Manipur ah sualna (crime) pung deuhdeuh chi’n police ah case om mahleh gawtna piak a om tawm mahmah hi’n kigen hi. Manipur ah inmate 970 om theihna jail 2 ah kumlui in mi 660 khum hi a, pasal 625 leh numei 35 hi uhi. Kum 2013 tan a Jail tangte lakah 67.6% vel in tunitan trial nei uh a, midang 31.5 % vel gawtna/thukhen tatna (conviction) bawlkhum hi uhi. Jail tangte 60% vel tualthahna ziakin Indian IPC nuaia section tuamtuam tawh mat hi uh a, midang 7% te bel rape case ahi hi. Under Trial conviction ah 538 om mahleh 79 lel thukhenna in om uhi.

PM hongzin ding ziakin general strike
Imphal, Nov-24: Prime Minister Narendra Modi in ni 2 sung Manipur hong phak ding deihlouh latsakna in Maoist Communist Party Manipur pawlin dakkal 17 sung general strike puang uh a, Sangai Festival nitawp November 30 in strike om ding hi. Thusuak in a gendan in November 29 zankim akipan November 30 nitaklam dak 5.00 kikal general strike hiding chihthu om hi.

Sangai Festival 2nd hand stall
Imphal, Nov-24: Sangai Festival ah local visitor pawlkhat in Second Hand stall mukhia uh a, cultural heritage leh state sunga piangte lahna ding a stall tuamtuam kibawl dia lam-et ahihlai in 2nd hand stall kibawl in mipi lungsim nuamlou sak hi’n kigen hi. Thusuakin agendan in Sangai Festival ah Standard IV stall group omna ah 2nd Hand Stall kibawl gu hi a, Lady’s bag & Winter Item chih minvuah in second hand moja, Jacket, Puanza leh Bag chituamtuam kikoih hi.

Sports Univ. adia gam phallou in kiphin
Imphal, Nov-24: Manipur Cabinet in Sports University bawlna dia thupukna a bawlna gam neite’n phallou in tuni zinglam dak 10.30 in Sura bial ah lampi zui uh a, Police te’n Lousikhongjal Mapal ah dal sawm in kinawktuah uhi. Huai ah Police te’n mipi hawldalhna ding in tear gas tanpha zang uh a, mipi sousang semsem in Sura High School kiang a Police Outpost kibawlthak mei a hal in om hi.
Buaisung in Pulsar Bike 1, Pleasure 1, leh Honda Activa 1 mei a hal in om a, mipite’n Police OC telin personnel 5 mantang uh a, Police personnel midang 2 Thoubal Khekman khawmi tuak - Maibam Santa leh Maibam Nilankanta liam uh a, Shija Hospital ah etkol hi uhi.

TUNI THUPI:
“Nangah Pathian’ kha a om a, vakna leh theihtheihna leh pilna hoihpen nanga muhin a om chih na tanchin ka za a.”
– Daniel 5:14