“Mi chitakloute’n Jail bang(wall) a zutding uh”- V. Valte
Bialtu MLA leh official team te’n ni 5 sung Thanlon bial pha uh
Assembly constituency 3 in a tehtuah Thanlon A/C a MLA Vungzagin Valte, Parliamentary Secretary; DC/CCpur Lunminthang Haokip, IAS leh District Level Officer (DLO) tuamtuam te’n Nov 13, 2014 akipan Thanlon A/C sunga khaw tuamtuam veh uh a, Nov 17, 2014 nitakin Lamka hongtung kiknawn uhi. MLA leh official-te’n Henglep A/C tawh kigamgitna C Zalen, Tipaimukh A/C tawh kigamgitna Damdiei leh Singngat A/C tawh kigamgitna Thuangtam khua pha uhi. MLA Valte in a thugenna tamzaw ah development scheme tuamtuam tungtawn a sum hongpaite ahi bangbang a zatding, i nasepkhiak peuhmah quality a om ding, mahni posting na mun a om in mipite khamuan ahihthute taklang kawmin, “Mi chitakloute’n Jail baang zutding” ahi chi hi.
MLA leh DC banah a teamte un Joutung khua ah tuikholna munpi dia kibawl ‘Water shed’ hongkhia uh a, Dialkhai khua a ‘Rest House’ kibawl leng hongkhia uhi. Official team in tunung sawtlou a kibawl ding Tuivai Hydro-Electric project zotna ding lampi(approach road) leng enkhia uhi. Tuivai Dam bawltu ding NEEPCO in Dam tawh kisai a Social Obligatory Services apiak ding tampite lakah Entry Point Activities (EPA) masa di’n School tuamtuam 6 ah toilet leh latrine bawlsak ding uh hi’n kigen hi. Mualpheng khua a EBC biakinn khanga menchim thupitak om thei ding dinmun a om pe’n retaining wall poimawhtak om a, huai adingin bialtu MLA in sum hunkhoptak pia hi.
Sumtuh khua ah mipi tamtakin MLA leh a team-te ana vaidawn ua, MLA pu in agenna ah, Sumtuh khuate mi chitak leh gin-om mahmah ahihdan uh puang hi. DC in Phaitong khua a a genna ah kum1914 a Pathian thu lutna Phaitong khua “The beginning of Christianity & Education among the Paite’s” mun ka khe mahmah a ka siikkhakna tungah ka kipak petmah chi a, Pathian thu i awi banah education lam i awlmawh ziaka eite khangtou ihi chi hi. DC in agenbehna ah, tunungin i gam ah Gospel honglut nung kum 125/150/200 chihte i lawmtou ding a, tua hunchiang in eite i dam nawnkei maithei! Tua ziakin khangthakte’n hiai hun bangchi bangin i lawm ding hiam chih ngaihsut hun mahmah ahi chi a, huai dingin kuapeuh kisakhol ni chi hi. MLA in mi masa mahmah Upa Pausing Hauzel thumna mual kichi puahna dinga Rs 5 lakhs sanction a omta ahihdan leng gen hi.
Sinzawl khua ah power sub station mun enkhia uh a, public meeting in zui a, bialtu MLA, M Ginzapau Guite MDC leh DC/CCpur te’n thugen uhi. Songtal Government High School te’n Annual Prize Distribution a neihna hun uah, Vungzagin Valte khuallian in pang a, DC/CCpur banah ZRO President Thanglianpau Guite te’n uap uhi. Tualou in, DC in Computer Training Center kibawlthak hongkhia a, Mualnuam ah Tuivai hydro electric project approach road leh PHSC building mun ding enkhia uh a, 33/11-KV power sub-station mun ding leh marketing shed mun ding leng enkhia uhi. DC in mipi leh student te’ kiang a gendanin, technology khawvel ahita a, khang sawnsawnte khualna ziaka kuapeuhin i khuak uh i zat poimawh mahmahta a, siamna leh pilna kichi sanglaw mahmahta ahihdan taklang hi.
Lehkhasiamna kichi poimawh a, ahihziakin mihing te’n i tempaina (talent) bang hihiam chih i zonsiam kisam mahmah chi hi. Kimawlna (sports) kichi leng tuni chiangin nekzonna dingin kingakna thamching a, MC Mary Kom in boxing tungtawnin Manipur ahihkeileh, India hih minthang a, footballer David Ngaihte ahihkeileh mi tuamtuam te’n leng kimawlna kichi nekzonna dinga azat ban uah Manipur leh India malsuahbial hih minthang mahmah uh chi’n DC/CCpur Lunminthang Haokip in gen hi. Bialtu MLA in agenna ah, mipite a itna ziak liauliau a bank apan mipite’ nasem dia kipekhia ahihthu taklang a, Thanlon bialsung ah sepding tamlaw mahmah a, na bangmah semkhe nailoutuk a kingai ahihdan gen hi. Thanlon A/C apan hih ding poimawh lua nei hilou a, Lamka leh asehvel a pemkhia mi 50% tan bekin loihsa a om Thanlon A/C a zotkik chiangun, a nasep pe’n gahsuah panlel a ngaihsun ding ahihthu gen hi. ZRO President Thanglianpau Guite in agenna ah, government nasem hingal a, kum khat a khatvei bek amau service-na mun phapeih loute’n ‘Pathian thu leh Nam vaithu gen nawnkei uhen’ chi hi. I minam in kikhekna (change) poimawh mahmah a, public meeting om hunteng a sum zonna dan a zat pe’n mipi lam i kikham uh poimawh mahmah a, khuallian ahihkeileh thugenna nei official tuamtuamte’n eite adingin bang thu manpha hong puak uhiam chihte i ngaihtuah zawk uh kul in poimawh petmah chi hi. Khamtheih-guihtheih hihte peuhmah a khawsuak omlou a, tua ziakin khangthakte’n hi bang gamtatna leh chindante i khawlsan uh hun mahmahta chi hi.
Langkhanpau Guite, Chairman, ADC/CCpur in a thugenna ah, sinlai naupangte’ adingin kuhkalna mahmah poimawh a, singtang khua a school lianlou apan khangkhia himahl ehang, sinlaite’ adingin kingaihsiatna ding bangmah omlou a, chihtakna, kuhkalna leh ginomna i neih phot leh mihing khat kisuak ngeingei ding ahi chi hi. Kumpi (Govt) te’ deihsakna in tu in library hoihtak banah computer centre tanpha i neita ua, sinlaite’n hamphatpih sawm teitei ni chi a, Songtal khua apan IAS/IPS ahihkeileh officer tuamtuam a hongpiang khelai ding chi hi.
Mualnuam khaw ah mipite’n MLA leh akaihzatamte vaidawn uh a, community hall ah public meeting om hi. Tua hunah, Mualnuam khua a om school tuamtuam Grace English School, Tualkhohau Govt H/S leh MWS student te’n official teamte ana vaidawn uhi. Hiai hunah Vungzagin Valte, Langkhanpau Guite, Lunminthang Haokip, Thanglianpau Guite leh Mualnuam hausapu in thugen uhi. Thuangtam khua ah mipi leh student te’n MLA team-te vaidawnna nei uh a, MLA pu banah Henlianthang Vaiphei Addl CEO te’n thugen in, student te hanthawn mahmah uh hi’n kigen hi.
Thanlon bialtu MLA in a constituency a vehna hunah CCpur district a departmental head (DLO) tengin a zuihban uah Bank, NEEPCO leh NGO tuamtuam apan top leader tamtakte’n leng zui uhi. Tualou in Thanlon A/C kipatna C Zalen khua apan khawchih in MLA leh DC teamte ana vaidawn in pak, puandum leh thilpiak tuamtuam pia uh a, MLA leh DC in leng khawteng a development work tuamtuam a sepkhiakte uh a mun mahmah ah enkhia ua, mun tamzawte ahihleh gari tunlouhna ahih ziakin a khe mahmah ua pai in mun gamla taktak va siik uhi. Community hall, waiting shed, school building, V/A house leh development works kibawl thak tamtak honna leng om hi. Mi tamtakin lamdang asak mahmah uh khat ahihleh DC/CCpur in a thugen hun chiangin Laisiangthou abung-achang khat le nih gentel kha teitei chih ahi hi. MLA leh a teamte’ lakah ADCC Chaiman telin MDC hunkhop leng tel uh a, govt scheme tuamtuamte hoihtaka sepkhiak dingdan telin thu poimawh tamtak kikupna leng om hi. Tuabanah, khua tamtak ah mi kiphal tamtakte banah Village Authority te’n MLA leh a teamte sial, bawng, vok, kel leh gan chituamtuam ana gawh ua, khua hunkhop ah MLA leh DC vaidawnna kawmin a khaw lutna bul uapan mipi’n zawng hial uhi. Mipi’n a zawndek chiangun MLA pu in ‘hon zawng dah mai un, noute hon zawngtu ding kei ka hizaw’ chisek hi.
Manipur Express November 19, 2014