Tuibuong Service Station(Oil pump) kihal
Lamka, July-8: Tuibuong khawpi veng a Oil pump ‘Tuibuong Service Station’ kichi tuni nitak dak 9.30 velin meltheihlouh pawl khat in mei in hal uh a, patau dak kikhen ging in Tuibuong Youth Club leh Police telin mipi a theikha tengin kidelh huan uh a, sawtlou nungin meikuang phelhmit thei phelhmit thei uhi. Huai thil tunhun laitakin Oil pump enkoltu Chowkidar in damlou buaipih a potkhial laitak ahihman in thil omdan chiantakin theilou a, a innkuante om mahle uh thiltung theipahlou uh hi’n gen hi.

Meltheihlouhte’n oil pump ah Diesel omna mun petrol in buak uh a, meikuang in apeh theihna dingin akhanglam tan sausim ah thautui buak in petrol a puahte uh lampi akipan gamlalou ah hal uh a, huchi’n a saklam a Diesel pump pen meikuang in peh zuingal hi’n kigen hi. Thiltung mu masate gendan in meikuang nasa mahmah a, oil pump katna mun Diesel pump ahihlam atheih un khoih ngam pan uh a, Petrol pump hileh nasa zawsem meikuang ding hi a gen in kangse ding chi uhi. Diesel pump sawtlou sung mei in kat sungin a sunglam leng meikuang in hihkha hi.

Tuibuong Youth Club in oil pump halte mawhpaih kawm in mimal(private property) himahleh mipi thil ahihman in tunung in hibang gamtatna hoihlou tawpsan ding leh mipi lungphawng sakthei dinga kuamah gamtang nawnlou dingin ngen uhi. Tuibuong Service Station neitu Lalrobul Pudaite s/o (late) Daineikung Pudaite hi a, amau tuni nitak a thiltung aziak ding theilou uh hi’n gen uhi.

ZoRO Northern Zone Sub-Commtt pawlin tuni’n Press-te kimuhpih
Lamka, July-8: Tuibuong a KSO Gen HQ complex, Sumkong Kaimun a ZoRO Northern Zone, Information Centre for Victims of MNF (1966-1986) ah tuni in ZoRO Northern Zone a Sub-Committee makaite’n Press-te kimuhpih uhi.Sub-Committee Chairman Goulal in a gendan in MNF movement tawh kisai in June 23 23, 2014 akipan form chi 5- Inn-le-lou kangtum, torture, cadre si/hinglai, rape/molestation leh civil mi asite’ ading hawmkhia uh a, July 31 tan hawmkhiak hidin gen hi.Tunitan form 200 hawmkhiak lah ah 150 val in submit khin uh chi hi.
Victim-te’n govt apan sum-le-pai muh leh muhlouh ding gen chet theih hinailou a, Oct 2014 sungin Mizoram leh Myanmar border a Ricodar mun ah ZoRO khawmpi om ding a, huai ah UN team hong uapte kiangah form teng submit hidin gen hi. Aman agenbehna ah Aug 9, 2014 in Mizoram a Lunglei Dist HQ ah MZP HQ Lunglei leh ZoRO Southern Zone saina in World Indigenous Day zat hiding a, huai ah Romawi, Minister (Arts & Culture) govt of Mizoram khuallian hiding a, R.Thangmawi, President ZoRO HQ in leng uap ding hi. Chittagong Hill Tracts, Saiha leh Lawngtlai dist apan cultural dance om ding hi’n leng gen hi.

Free Animal Health Campaign
Lamka, July-8: Director of Vety & AH Services, Manipur inntekna in Synod Hall, IB road,Lamka ah July 10, 2014 zinglam dak 11.30 in ‘Free Animal Health Campaign’ kipatna dinga honna om ding a, Chief Guest in Health Minister Phungzathang Tonsing pang ding hi.Huai ah Functional President in Vety & AH Minister Govindas Konthoujam pang ding a,Guests of Honour in Agri Minister Md Abdul Nasir leh L. Lakher,IAS, Commissioner(Vety & AH) pang ding uhi. Honna programme zawh in ganvulh chituamtuamte etna banah akul leh poimawhdan dungzui damdoi piak banah kap(vaccinate) poimwhte leng kap ding uhi.Huai ah ganvulh nei kuapeuh in a ganvulhte uh ensak dingin Vety deptt in chial hi.

Ph.D.degree muthak om
Lamka, July-8: Lhungdim Bulchong Hemkhomang s/o (late) Upa Thenjakai Lhungdim of Molnom village/Ccpur in a thesis ‘Electoral Politics in Manipur: A Study of 2007 Assembly elections in CCpur district’ chih tungtawn in NEHU a Political Science akipan Doctor of Philosophy(Ph.D) degree mu hi. Dr LS Gassah,Professor of Political Science & Honorary Director,ICSSR-NERC in a guide-na nuai ah Lhungdim Bulchong Hemkhomang in Ph.D. degree mu hi’n thutut kingah hi.

World Population Day honna(kick-off)
Lamka, July-8: DFWO/CCpur saina in July 11, 2014 zinglam IB Road a Synod Hall ah World Population Day 2014 forthnight (July 11-24, 2014) honna (kick-off) omding a,P.K Jha, IAS, DC/CCpur khuallian apang in hong ding hi. Huai hun ah Functional President in Dr Thangchinkhup Guite, CMO/CCpur pang ding a, Special ASHA Group leh DAPCU apan demonstration om ding hi. Sunnung a 2nd session ah Strengthening of Immunisation in CCpur kichi Doctor, Nurse, ASHA Facilitator leh ASHA te’n nei ding uh a, DFWO/CCpur in thugen ding hi.

Accident ziakin mi 3 liam uh
Lamka, July-8: Siamkhankhual(10) s/o Thongzapau of Suangbem zanhal in alawmte tawh gamlak a khuai(bee) tou a kuan, alawmte’n heipi(axe) in satkha uh a, a veilam khutbom kitan a, Lamka tut nungin hospital ah admit in om hi. Akigendan in a khutpi chihlouh khutbom teng kitan khia a, operation ding ngak in om hi. Doukhankhai (44) s/o Ngulzam of Behiang zan nitaklam in a lou bawlna ah loukaihna machine in a pheipi gawiliam a, hospital puaktun himahleh RIMS a etkol dingin referred in om hi. Boby (27) s/o Itoaha of Bishenpur tuni’n Bike a tailai Boljol village ah tuahsia in a ban taklam liam a, hospital ah etkol in om hi.

July 12 in Mass Social Work
Lamka, July-8:Young Paite Assn.(YPA) Gen HQ makaih in July 12, 2014 zing dak 6:30 akipan Lamka khawpi sungah Mass Social Work om ding a, YPA New Lamka block leh YPA Lamka Block Unit-te akipan member tamtheipen telding uhi. YPA New Lamka block te’n Lanva Lui apan sukpat ding uh a, YPA Lamka block te’n Light House apan toupat ding uhi. Mass social work ah road marking bawl hiding a, lampi hahsiangna dingin kongmunphiah(bloom) leh cement bag awngsa tawingai ding hi. Unit te’n mahni vengsung kepsiangna nasep August khasung a neichiat dingin Jt Secy YPA Gen HQ in theisak hi

JSSK Program thu review meeting
Lamka, July-8: Dr P.Shyamsunder, Med Suptd/Dist Hospital office chamber ah July 10, 2014 sunnung in Hospital a JSSK Program tawh kisai stakeholders- Pharmacy 3, Diet Supplier 1 leh Transporter 3 tawh MoU a sign uh ahun beita a, huai thu review meeting om ding hi. Huai hun ah stakeholder-te’ nasepdan lungtunhuai a sak ualeh MoU hun behlap hidin kigen hi.

YPA Hall ah ‘Thutak Crusade’ kipan
Lamka, July-8: Truth Mission Evangelical Fellowship (TMEF)-te’ saina in zan nitak akipan Hiangtam Lamka a YPA Gen HQ Hall ah ‘Thutak Crusade’ kichi Gospel Crusade kipan a, Thangkhosuanmung, Chief of Hiangtam Lamka in hong a, Rev K.Kamzakham, EELC in Pathian kiangah thumna in lan hi. Crusade ah Rev. Dr. Rohmingliana in Pathian thugen hi. Nitak in Crusade hun zang zel uh a, zinglam dak 11:30 zelin Councelling om sek hi. Crusade bel July 12, 2014 nitak in zou ding uhi.

JAC on Khuga Dam Project
Lamka, July-8: Khuga Dam Project tawh kisai a Joint Action Committee(JAC) pawl tuni in kipuahthak uh a,Chairman-Lalpu Hangshing, Vice Chairman-Thongkholen Chongthu, Secretary-KL Thanga Vaiphei,Joint Secretary-Sawmpi banah Active members-JL Robert leh Matea hi uhi. Finance Committee mi 5 guang uh a,huaite Pauboi Haokip,TK Suan,Goulal, Dama leh N. Sanga Paite hi uhi.

Agent/Hawker ding kideih
Manipur Express hawmtu(agent/hawker) khat muntuam ah a pemkhiak ding ziakin amah mun a News hawmtu ding agent/hawker khat a kideih a,huai dia lunglut kuapeuh in July 11, 2014 tan apply theih ding hi.News hawmna ding cycle nei banah mi gin-om, taima, chitak leh khawtang thila soiselna ding omlou mi ahih ngai ding hi. Thuchian kimzaw office incharge kiang ah kantheih ding hi.

SUUNNA
Songkhanmang(42) s/o (late) Soikhopau of Ngathal zan nitak dak 6.30 velin sungna in si a, tuni’n Ngathal hanmual ah kivui hi.

IMPHAL NEWS:
Dy CM thugen in MLA-te’ thangpaisak
Imphal, July-8: Dy CM banah MPCC President Gaikhangam in zan in Congress sung adiakin CLP sungah buaina bangmah omlou hidan a genkawm in CM in Assembly term pailel akim khat ahih hun in Ministry lepthakna om ding a. Minister len khalou MLA te’ kiangah Minister hihna piak hiding chih a chiam tungtang theikhalou ahihdan a gen in MLA 27 te’ thangpaisak hi’n kigen hi. Dy CM thugen in MLA-te’n thuneihna deihlua bangsak a, amah minsiat louhna dinga gen hi’n taklang uhi. Dy CM in reshuffle ding theilou ahihleh CM dong hen chi uh a, CM’ thugen leh amah thugen kikalh hi’n taklang uhi. A genzelna uah Congress party te’n ‘One man one post’ policy a zuihlai in Dy. CM in a Ministerial post ahihkeileh MPCC President hihna apan kitawp utlou chihsan uhi. MPCC President in party hihhatna ding lam ngaihtuah henla, CM in Congress govt. a tel leh tellou ding buaipih zaw hen chi’n leng gen uhi.

Bus owner te’n kiphinna patsawm
Imphal, July-8: Tiddim Road Bus Owners Assn(TRBOA) te’n tuni’n Kwakeithel Thounaojam Leikai Community Hall ah press conference nei uh a, huai ah TRBOA President Babu in Transport department kiangah kum 6 paisa apan Wahengbam Leikai a Contract permit holder-te’n Motor Vehicle Act 1998 a section 74 pansan in parking space a etkai uh lakkhiak ding leh Societies banah assn-te’ carriage permit cancel sak ding a demand a bawl uh govt. in July 10, 2014 tan a a pichinsak keileh July 11, 2014 apan kiphinna pan ding uh hi’n gen a, huai tawh kisai in Transport Minister Dr. Kh. Ratankumar kiangah July 1, 2014 in memorandum piak himahleh tuni tan in panlak hilou chi’n taklang hi.

A/R te’ camp gei ah bomb puak, 2 liam
Imphal, July-8: Ukhrul district a Kasom Khullen sub-divison a Assam Rifle-te’ camp gei ah tuni zinglam dak 9:00 velin a kizom in bomb 3vei puak a, huai ah mi nautang 2 liam uhi. Akigendan in Kasom Khullen sub-division a Bungdung village a 44-A/R ‘A’ company te’ check point/gate gei a Border Area Fraternity Assn te’ Community hall kiangah bomb puak a, huaizawh in Community hall apan metre 10 vela gamla ah bomb khat puak nawn in, sawtlou nungin metre 20 vela gamla ah bomb dang khat puak nawn a, huai ah SP Kened (41) s/o SP Nagthingkhui of Kasom Khullen Kangkum village leh Laishram Kiran (45) s/o Ningthempishak of Yairipok Bishnunaha liam in A/R te’n a camp uah first aid a piak zawh nungun Kened pen JNIMS Hospital tut hi a, Kiran bel RIMS hospital tut in om hi. Bomb puahna munte’ ah feet 3 alian leikuak a, police-te’n bomb puahna kiangah adhesive tape leh ball-bearing mukhia uh hi’n kigen hi.

Numei 1 kikhai lumsa in kimukhia
Imphal, July-8: Usham Dibya(14) d/o Sandhyarani tuni’n Langjing CRPF camp a Gate. No. 2 kianga a tenna inn ua toilet sungah a gawl ah khau a kikhailum in a sanggampa’n mukhia a, RIMS Hospital zotpih himahleh amun tunma in lamkal ah si hi. Amah leh amah kithah sawm hidia gintak hi a, aluang RIMS morgue ah post mortem bawl hi’n kigen hi.

BJP akipan mi 4 expel in om uh
Imphal, July-8 : BJP Manipur Pradesh sung thubuai tawh kisai in tuni’n BJP ten a office uh Nityapat Chuthek mun ah press-te kimuhpih uh a, BJP Spokesperson Salam Ibohal in President Th. Chaoba in BJP a member 4 nawhkhia(expelled) hi’n gen hi. Aman a genbehna ah expelled a omte Salam Rajen, ex-Minister, ex- VP; Yumbam Khemchand of Lamshang A/C; Naoroibam Ratan, ex-VP BJP Manipur Pradesh (Singjamei A/C) leh Mongjam Poireihenba, active member of BJP Manipur Pradesh (Heingang A/C) hi uhi. Amau bel Article 25C & D of Party RR tungtawn a expelled a om uh hi’n gen hi. Huai tawh kisai in Mongjam Poireihenba in BJP National President kiangah complaint bawl hidin gen hi.

Joint Students ten Govt mawhsa
Imphal, July-8 : Jiribam a students’ union 4 kigawmte’n kiphinna a neih utawh kiton in tuni in Joint Students’ Co-ordinating Committee ten Kangleipak Students’ Assn te office ah press-te kimuhpih uh a, tua hun in Jiribam buaina tawh kisai govt mawhna hi’n gen uhi. Amau a genna uah Jiribam a Lower Primary, Upper Primary, Jr High School leh High School ah teachers akigawm in 197 vel sawtpiakipan taksap hi a, Students’ Union 4 kigawmte kiphinna thildik mah hi a, govt in a ngaihsaklouh ziak hizaw in gen uhi. Huai tawh kisai in govt in tamveitak thuchiam a, himahleh a taktak in tangtung ngeilou a, Oct. 25, 2013 in Students Union-te leh Education Minister, Director of Education, Under Secretary(Education) leh Addl Director of Education(S) tawh MoU suaikai ua, ahihziakin tunitan bangmah sepkhiak omlou hi’n gen uhi.

Meltheihlouhte’n mun 2ah bomb koih
Imphal, July-8 : Meltheihlouh pawlkhat in tuni in Imphal West leh Bishnupur district ah handgrenade khat tuak vakoih uh hidan in kigen hi. Thusuak in a gendan in Imphal West district sung Naoremthong Laishram Leikai a om Laishram Shantikumar (45) s/o (late) Gourahari tenna inn ah tuni zingkal baihtak dak 5:30 velin paper a kitun handgrenade khat muhkhiak hi a,paper ah KCP-MC chih kigelh hi. Shantikumar bel Manipur Universitry campus sunga canteen bawl ahi hi.
Tualou in Bishnupur district sunga Nachu Mayai Leikai a om Laishram Nirmala Devi (40) d/o Laishram Heramot tenna inn ah handgrenade khat tuni zinglam dak 8:30 in muhkhiak in om hi. Nirmala bel huai vengsung a heutu khat hi a, police ten bomb 2te vala in mun thoveng ah hihsia uhi.

TUNI THUPI:
“Huchi tela kisathei in thu gen nawn kei unla; na kam ua kipan in pau uang himhim pawt kei leh; TOUPA lah pilna Pathian ahi ngal a, aman thilhihte hoihtakin a buk zel hi.”
- I Samuel 2:3