Public Rally-cum-Public Meeting neih in om
Lamka, July-4: Kuki Inpi, Manipur(KIM) makaih in tuni’n Lamka, Moreh, Tengnoupal, Sugnu, Saikul, Kanggui (Kangpokpi), Kangchup, Chalwa/T.Waichong-IT Road, Phaitol/Jiri, Litan/Mongkot leh Imphal ah Public Rally-cum-Public Meeting om a,Lamka ah Kuki Inpi/CCpur(KIC) makaihna in Public Rally-cum-Public Meeting om hi. Public Rally ah Kuki sunga organization tuamtuam, hausa leh mipi 30,000 vel paikhawm uhi. Tuni zinglam dak 11:00 in Lamka Public Ground ah mipi kikhawm masa in meeting in zui a, huai zawh in Public Ground apan Tipaimukh Road zui in Thangjam Road apan Tedim Road tawn in DC/CCpur office tan mipi tamtak Rally pai uh a, buaina omkhak ding venna in mipi malam leh nung lamah security te’n veng(escort) uhi.

DC/CCpur’ office ah Thangjang Haokip, President, KIC leh Daniel Gangte, Gen. Secy KIC te’n DC/CCpur tungtawn in India Prime Minister Narendra Modi’ ading memorandum pia uh a, DC in India Prime Minister’ muh ding in fax tungtawna thon ding hi’n gen hi.

Memorandum ah kum 1990-1997 kikal inNSCN(IM) te’n Kuki mite 905 that in UNC in Quit Notice a piak ziakun khua 360 val ah mihing 1 lakh valin innlum nusia in Naga mite tawh kinaihna area pawtsan uh a, KIM in huai hunlai a India Prime Ministers Narasimha Rao, H.D Deva Gowda, Atal Bihari Vajpayee, I.K. Gujral leh Dr. Manmohan Singh banah India President-te leh Union Home Minister-te kiang ah memorandum pia in thudik leh thutak a vaihawm ding in ngen mahleh tuni dong lungtun huaitak pichin bangmah om nailou hi’n taklang hi. NSCN(IM) te’n Kukite tungah hehpihna bei a agamtatna uh Court of Law ah hoihtaka etkai ding in nget hi a, tulela Central vaihawmtute’n memorandum kipia hih buchin sak ding a muanna lianpi nei hi’n taklang uhi. Memorandum tawh kisai Thangjang Haokip, President, KIC in a genna ah central govt a memorandum kipia lungtun huaitak dawnna bangmah a omkei leh maban ah mipi’n naksem a panlak a, protest, public rally leh atuamtuam in zuilai ding hi’n gen hi.

NLUP thu ah Dist Level Consultative meeting
Lamka, July-4: DC/CCpur makaihna in Tuibuong a Dist Training Centre (DTC) ah tuni zinglam dak 11:00 akipan New Land Use Policy (NLUP) tawh kisai Dist Level Consultative meeting om a, Manipur govt ai-oh in J.C Ramthanga, IAS, Commisssioner (Hort & SC, RD & PRJ) leh Planning deptt akipan official khenkhat leng tel uhi. Huai hun ah CEO/ADC; SDO/BDOs; DFO (Forest); DAO(Agri); Dy Director,Vety; DO (Hort & SC); DFO (Fishery); GM/DIC; Dy Director, TD; EE/PWD; EE/IFCD &MI; EE/PHED; DSWO;PO, IWMP/DRDA; Sub Divn/Block Level Chiefs Assn akipan Chairman/Secy; Philantrophic Orgn tuamtuam a President/Secy-te ban ah organisation tuamtuam apan makai hunkhop tel uhi.
Huai hun ah Environment Friends makaite’n suggestion a piakna uah NLUP thu ah Imphal-Delhi kal buaipih sangin alawhchin taktakna ding hausa, farmers leh khaw mipite tungah kinga a, amaute’ kiangah innlusi a awareness campaign bawl poimawh a, amaute tungtawna lawhching ding hizaw in gen uhi. Singtanggam akipan piangkhia tamtak om bang hileh govt in a zuak khiatna lam ah bangtan hon panpih thei ding hiam? chih dotna leng bawl uhi.

Kha 1 sungin gari 176 kibehlap
Lamka, July-4: DTO/CCpur office ah June 2014 sungin gari 176 ki-register thak a, huaite medium truck 9, Ambulance gari 2, taxi jeep 11, maxi cab 3, van 8,car 16, auto richshaw 8 leh bike/active 119 hi a, huai hunsung mahin revenue Rs.13,75,420/- mukhia uhi. Huailou in DTO office te’n April-June 2014 sungin revenue Rs.37,80,174/-mukhia in govt ah challan in submit uhi. April-June 2014 sung in DTO office ah gari tuamtuam 554 register thak hi a, huaite lak ah medium truck 12, Ambulance gari 2, taxi jeep 25, maxi cab 8, van 20, car 47, auto richshaw 20 leh bike/active 415 tel hi.

New Bazar area ah lampi thanghuai
Lamka, July-4: Tuni a vuah tamlou a zuk ziakin New Bazar a Red Cross Road leh Tedim road kisuktuahna bul, New Bazar supermarket apan a saklam sautak thanghuai mahmah a, lampi lai a hawktui vungdim in a kiangnai a mehzuakte tanpha adingin nawngkai chihthu kiza hi. Vuah azuk zek chiangin akimnai a thilniin kipaite ziaka thanghuai in huai munlak lampi tanpha namse mahmah hi’n kigen hi.

Superviser apan Elec Officer in kaisang
Lamka, July-4: DC/CCpur office ah Election deptt a Superviser semlel Ngamkhothang Haokip tunai zekin Election Officer in kaisang a, aman July 1, 2014 akipan Dist Election Officer/CCpur len hi. Dist Election Officer/CCpur len L.M Lien Singsit in Porompat, Imphal East ah Election Officer lending in kisuan hi.

Income Tax piak thu ah meeting om
Lamka, July-4: Med Suptd/Dist Hospital saina in tuni’n Dist Hospital a Conference Hall ah Income Tax piak thu tawh kisai meeting om a, Dr. L.Arke Singh, Sr Physician in meeting makaih hi. Huai hun ah penalist in H.Joyo Singh, Insp (TDS) Income Tax deptt, Govt of India; L.Kunjakisore, Office Suptd (TDS), Income Tax deptt, Govt of India; W.Gokul Singh (Advocate), Tax consultant; Rosiemlien, Treasury Officer/CCpur; K.Prince Singh, ATO leh Niangkaihchiin, ATO, Treasury Officer/CCpur pang uhi.

OST hawmkhia agency ah LRRC tel khalou
Lamka, July-4: OST damdoi manbei a hawmkhiak ding himahleh Lamka khawpi mun tuamtuam ah a zuaksawn theipawl om ahihdan June 30, 2014 issue a kisuah ah OST hawmkhiakna tawh kisai govt in Lamka khawpi adia agency/NGO a piakkhiakte SHALOM leh LRRC/DAPCU hi’n kigen chi’n thu pesawntu akipan kizak ziakin suah ahi hi.Hileleng thil omdan ngentel zawsem a suizui nungin LRRC tel khalou ahihdan theihkhiak ahi a,huai thu laksawnna lamah pilvan lahna ziaka hihkhelh khak poi kisa hi.

‘Milpoi Hite’ chih Album hon hiding
Lamka, July-4: Tuibuong a Vengnom Community Hall ah July 5, 2014 nitaklam dak 5:30 in Thadou-Kuki Motion Picture ‘Milpoi Hite’ kichi Video Album honna program omd ing a, Helien Kipgen, PRS/KNO khuallian apang in hong ding hi. Huai ah Guests of Honour in D.Letkholal Haokip, President, CDCTA; T.Lalboi Haokip, Dist Coordinator, DSSS/CBDAP, CCpur; N. Thangchinhau, Treasurer, CDSA leh Paokholen Haokip, Social Worker pang ding uhi. Functional President in Lalminthang Vaiphei, Social Worker pang ding a, Special Guests in K.Haopu Gangte, Gen. Secy, KSDC; Ch.Lhunchon, Gen. Secy, CDSA leh T.Samuel Ngamkhopao Haokip, Chief of N.Zalenphai pang ding uhi.

Naupang Khawmpi tuni’n kipan
Lamka, July-4: Baptist Children deptt, EBC Lamka South Divn saina in tuni zinglam in EBCC Dorcas Veng, New Lamka ah Naupang Khawmpi 1veina kipan a, Rev Dr.S Langzakham, Divnl Suptd in khawmpi hong hi. Khawmpi sungin Beginner apan Senior kikal te’n thu & la a kitaitehna om ding a, Lianding Guite, Child Co-ordinator, EBC in Pathian thu gen hi. July 6, 2014 zing kikhop hun ah kidemna tuamtuam a kipahman hawmna om ding a, kikhop tawp in Upa T.Lamenthang, Chairman, DWC, Lamka South Divn. in Khawmpi khak ding hi.

Super Division League omding
Lamka, July-4: CCpur District Sports Assn(CDSA) saina in July 22, 2014 akipan Lamka Public Ground ah (late) T.Lianboi Simte Memorial District Super Division League 2014 kipan ding hi.District sunga Super Division Club tengin CDSA office ah July 10, 2014 tan in entry form lak theih ding a, thuchian leng huai mun ah kantheih ding hi.

AMFA referee exam om ding
Lamka, July-4: All Manipur Football Assn (AMFA) saina in July 12, 2014 zingsang dak 7:00 in Lamka Public Ground ah ‘Referee’s Annual Physical Fitness Test and Theoretical Examination 2014 ‘ om ding a, mimal leh club a lunglutte’n July 8, 2014 tan in CDSA office, Lamka Community Hall ah thuchian kantheih ding hi.

SUUNNA
Dongthang (87) f/o Lamminlun of P.Thangjom road, Chiengkawnpang hun sawttak damlou a om tuni zingsang dak 4:00 in si a, tuni mah in Chiengkawnpang hanmual ah kivui hi.
Master Mangbel Guite (3) s/o Pastor Kammuanlian Guite, Local Pastor, EBCC Tribal Colony Imphal, tuni nitaklam dak 4.00 velin Jaundice natna ziakin Imphal ah si a, aluang hong kipua a,July 5 in Tuithapi hanmual ah kivui ding hi.

IMPHAL NEWS:
Sonia Gandhi kigolh nuamlou
Imphal, July-4: AICC President Sonia Gandh in Manipur a Congress MLA hunkhop in Ministry reshuffle dia a nawhna tungtang uah kigolh sawm nailou hi’n kigen hi. Ministry reshuffle dia phu Congress MLA 27te tuni’n Ksh Biren,MLA(Lamlai A/C) inn ah kikhawm uh a, huai ah CM nawn ding in a genkhawm ban uah CM leh Sonia Gandhi kimuh hun ah bang thu om hiam chih theihsawm in CM muhsawm uh hi’n kigen hi. CM in Delhi apan Guwahati pha in Manipur Bhavan omdan enkhia leng tuni’n Imphal hongtung hi. Congress MLA pawlin CM kiangah a chiamsa bangin Assembly session om in Ministry reshuffle tungtang thil omdan kichiansak dingin nawh sawm uh a, huchi ahih keileh Assembly session ah tel sawmlou uh hi’n kigen hi.

Lamlai Mandal BJP te' lungkimlou in Th. Chaoba boycott sawm
Imphal, July-4 : BJP Manipur Pradesh President Th. Chaoba in Lamlai Mandal BJP worker-te theihpihna tellou in makai dinga mi tuamtuam amau a guan ziaka lungkimlou in Lamlai Mandal BJP te’ Th. Chaoba tunga lungkimlou in boycott sawm uh hidan in taklang uhi. Amau tuni’n Manipur Press Club ah Press-te kimuhpih uh a, tua ah Lamlai Mandal BJP Youth Wing a Vice-President Mongjam Poireihenba in a gendan in Th. Chaoba in amau theihpih louh in BJP Lamlai Mandal makai ding in NCP Manipur Unit leader C. Doungel, Trinamool Congress, Manipur Unit a spokesman RK Shivachandra leh ex-Trinamool Congress candidate Kh. Ibomcha guang hi’n gen hi. Huai tawh kisai Lamlai biala BJP worker-te lungkimlou in Th. Chaoba in President a hihna apan paihkhiak deih in tunung sawtlou in BJP National President tanpha muh sawm uhi.

Ministry reshuffle deih MLA 27 pha
Imphal, July-4:CM leh Dy CM chihlouh Minister 10te leh Assembly Speaker khenkhiak a, Minister hinailou MLA 10 in Minister len dinga Ministry reshuffle deih Congress MLA 25 hi a kigen leng 27 hi uh chihthu om hi. Huaite K. Meghachandra (Wangkhem AC); Amin Shah (Kshetrigao); M Prithviraj (Moirang); MK PreshawShimray (Chingai); N Biren (Heingang); uK Ranjit (Sugnu); Y Surchandra (Kakching); Fazur Rahim (Wabagai); T Mangibabu (Thanga); A Bira (Kumbi); L Nandakumar (Uripok); Dr Ng Bijoy (Khurai); RK Anand (NaoriyaPakhanglakpa); KshBiren (Lamlai); L Brajabidhu (Lamshang); Dr ChaltonlienAmo (Tipaimukh); YamthongHaokip (Saikul); Manga Vaiphei (Henglep); E Chand (Yaiskul); H Debendra (Sekmai); N Loken (Nambol); D Korungthang (Tengnoupal); A Victor Keishing (Phungyar); KikhonbouNewmai (Tamei); VungzaginValte (Thanlon);TN Haokip (Saikot) leh Ginsuanhao (Singngat) hi uhi.

Sangai Express Editor accident in liam
Imphal, July-4 : Sangai Express (English edition) a Editor Hijam Rajesh in zan nitak in office apan innlam zuanlai Raj Bhavan kong laka accident in naktak in liam a, Shija Hospital ah etkol hi a, gim mahleh hoihlam nawt hi’n kigen hi. Kh. Joykishan, MLA(Thangmeiband A/C) in tuni’n Shija hospital ah Hijam Rajesh va veh in a innkuante kiangah panpihna sum pia a, Shija Hospital a doctors ten hoihtak a enkol uh hi’n leng gen a, Hijam Rajesh dinmun in hoihlam nawt zel hi’n leng gen hi.

Rally paite Jiribam a lut phallou
Imphal, July-4 : Kuki Inpi,Manipur(KIM) saina in tuni’n Manipur state mun tuamtuam ah Peace Rally om a, Tamenglong district sunga Tousem Sub-division a Phaitol village ah Public Meeting neihzawh in Peace Rally kipan a, Jiribam lam zuan in Gularthon lei(bridge) a tun un police te’n ana khamkhawl uh a, Jiribam ah 144 Cr PC koih ahihdan gen in lut phallou uhi. Rally paite Jiribam ah lutsak hikei mahle uh India Prime Minister ading memorandum bel ADC Jiribam kiangah piaksak hi uhi.

TUNI THUPI:
“Pilna neilou namte ahi ua, amau ah theihsiamna a om kei.”
– Diuteronomi 32:28