DPWWA te’n zu hunkhop mankhia
Lamka, June-23: D.Phailian Women Welfare Assn(DPWWA) pawlin Sept 2013 apan D.Phailian khawsung ah khamtheih doudalna pan in sunzawm zel uh a, tuzing dak 8:00 vel in inn luah a om Mrs.Naotombi of D.Phailian Compound Veng tenna inn apan local zu polythine akitun 40 mukhia in Phailian bazar ah hihse vek uhi. DPWWA leh V/A te’n Naotombi thuhilhna hoihtak nei in tuni mah in D.Phailian khua pawtsan ding in Mrs Naotombi in suaikai hi. Tunung in Phailian khua ah kuama’n khamtheih leh zu zuaklou ding in DPWWA te’n ngen uh a, khamtheih zuak teitei matkhiat te khawsung apan nawhkhiat zel hidin gen uhi.

CJM in bail in khahkhia
Lamka, June-23: College road (New Lamka) ah June 18, 2014 sunnung in Dynamo rechargeable battery khat kikoih a, bomb hi maithei chi a mipi patausak Thangthianmuang of Colony Veng, Bungmual leh Kamkhankhup Thomte of Zoar Veng matkhiak hi uh a, tuni’n Police te’n CJM court ah dingsak uh a, CJM in bail in khah hi.

Lamlian nawla Nala hahsiang uh
Lamka, June-23: Thangzam road-Tedim road junction leh Red Cross road-Tedim road junction kikal Tedim road lamlian jula nala(drainage system) ah niin kikholkhawm a pumdim ziakin vuahzuk chiangin nala bing(blocked) a, lamlian lai ah hawktui luangdim gige in mipi adin nawngkaina lianpi tunsek hi.Tuni’n govt officer phatuam ngaite huhna tungtawn in LATSEA te’n nasem in hahsiang uh a, vuahzuk hun ah azia om mahmahta ding hi’n kigen hi. CT Lian, Social activist in a gendan in hibang thil om hun ah kuapeuh in phatuam ngaihna neia panlak poimawh ahihdan gen hi.

KKL in Silver Jubilee lawm ding
Lamka, June-23: Kuki Khanglai Lawmpi (KKL) Gen HQ kiphuhkhiat nung kum 25 chin(Silver Jubilee) lopna June 25, 2014 zinglam dak 11:00 in M.Songgel Community Hall ah omding a, T.N Haokip, MLA(Saikot) khuallian in pang ding a,aman Jubilee suang hong ding hi.. Huai ah Functional President in Langkhanpau Guite, Chairman, ADC/CCpur, Guest of Honour in Hatlhing, MDC/Tamenglong pang ding hi. Special Guests in Demang Haokip, Vice Chairman ADC/CCpur leh MDC mi 7, Special invitees in KIM, KIC, KSO, KWHRU, KWU, ZYA,HYA,YMA leh Meitei Society makaite tel ding uhi.

SHG leader-te sinsakna om ding
Lamka, June-23: Tuibuong Block DRDA Hall ah June 24, 2014 zinglam dak 9.00 akipan in NABARD leh NGO banah Bank-te pangkhawm in Self-Help Group(SHG) makaite’n group etkoldan leh manage-dan tawh kisai sinsakna( one day training programme for leaders of SHG) om ding hi. Huai ah a tawmpen in SHG 10 akipan makai tuamtuam 30 sanga tamzaw tel ding uh hi’n thutut kingah hi.Huai ah NABARD, DRDA/Ccpur, SBI/Tuibuong, LDM/CCpur, RAS, Anchor NGO leh SBI makaite’n sinsak ding uh chihthu om hi.

DC/CCpur in ‘Pradip Barrack’ hongkhia
Lamka, June-23: PK Jha, IAS, DC/CCpur in tuni zinglam in Tuibuong a Dist Police HQ complex ah M.Pradip Singh, IPS, SDPO/CCpur etkaina nuai a VDF te’ ading barrack kibawlthak ‘Pradip Barrack’ kichi hong hi. Huai hun ah Kabib K.IPS, SP/CCpur, H.Balram Singh, MPS, Addl SP leh Police officer hunkhop in uap uhi. Tunia barrack kihong thak feet 100 x 28 alian hi a, SP office, Reserve Line a VDF te’ giahna ding hi a, M.Pradip Singh, IPS in ADC to Governor lending a kisuankhiat nung SP/CCpur in Pradip Barrack tor VDF min pia hi’n kigen hi. DC/CCpur in SP telin Police officer te tawh SP office campus ah security-te adia kibawlthak anhuan-inn(kitchen) leng enkhia hi.

Jerusalem Clinic kum 2 chinna lawm uh
Lamka, June-23: EBC Auditorium, New Lamka ah tuni’n Salem Veng a om Jerusalem Clinic kum 2 chinna ‘2nd Anniversary’ lopna om a, Dr. Th.Dhabali Singh, MD Pathology, Managing Director, Babina Diagnostic, Imphal banah Dr. L.F. Tusing, MD Physician, (retd) Med Supt, Dist. Hospital te’n Special Guests hihna tawh uap uh a, Dr. Zuii Hauzel, Dr. Kim Simte leh Dr. Lalzarzou telin mi poimawh tuamtuam in uap uhi. Huai hunah S.Malsawm, Proprietor, Jerusalem Clinic in a genna ah dist. sunga mipite damtheihna lam hoihsem a enkaitute laka khat hidingin June 22, 2012 in Clinic pankhia ahihdan gen a, tuni chiang in lam chi tuamtuam ah lawhching touzel hi’n gen hi. Aman a genzelna ah Shija Hospital akipan specialist doctor-te’ tawh pangkhawm in nasem a, khatengin free medical camp neithei zel in, Laborator test, X-ray, Ultrasound, Blood test machine tawh kithuah Clinic enkai tou hi’n gen hi.
Dr. Th.Dhabali Singh in Manipur leh dist. tenga mipi atamna diakte ah Diagnostic Centre(Clinic) poimawhna liansem hi’n gen a, Dist. Hospital a doctor-te’ adingin leng Diagnostic Centre poimawh in amaute nasep dawn zangtu hi’n gen hi. Dr. L.F. Tusing in dist. sunga Clinic centre bangzah hiam a omte’ nasep thilhoih leh poimawh hi’n gen a, damlou etkolna tawh kisai a sih-le-hin kal nasem ahihman un pilvang taka panla dingin ngen hi. Pauchungnung Vaiphei in Jerusalem Clinic kipatkhiakdan leh tulel dinmun pulak hi. S.Malsawm in tuni a guests tuamtuamte memento pia hi.

SBI kongah accident in mi 3 liam
Lamka, June-23: Zan nitak dak 9.40 velin SBI Ccpur Branch kong Tedim road ah Pulsar(No. MN04B/8719) a tuangte’n lampi nawl a pailai Philip D. Hangsing (19) s/o H. Nengkhanmang of Mission Road, Hiangtam Lamka a nunglam apan phukha uh a, mun tuamtuam liam in hospital ah puaktung in om hi. Pulsar Bike atuang mi 2-te’ leng liam uh a, Pulsar driver Kapkhantun (22) s/o Kapsuanmang of Manniang Veng a mit tunglam, akhut-leh khe liam in amah leng Dist. Hospital ah admit hi a, anunga tuang Ginlamtuang (17) s/o Kamchinpau of Suangphuh bel a khut leh nungzang liam a first-aid piak zawh in paisak in om hi.

Tunkhopum Baite’ luang Panglian ah vui hiding
Lamka, June-23: CCpur district a om ex-Chin Libration Army Society member te’ panlakna ziakin June 17, 2014 in Mizoram a Tuichanglui gei ah CLA Chief (late) Tunkhopum Baite’ hanmun toukhia uh a, a sam (hair) leh akivuina mun leitang bangzah hiam la uhi. Tuni’n Sinzawl apan Lamka hong zotpih uhi. June 24, nitaklam in Lamka hongtung ding uh a, June 25, 2014 in Panglian khua ah CLA Chief (late) Tunkhopum’ luang vui hiding hi. ZYA Gen HQ leh ex-Chin Liberation Army Society makaihna in siluang dawnna in omding a, (late) Tunkhopum’ innsung mite leh VPC makaihin vuina program omding hi.

Farmers Awareness Program om
Lamka, June-23: Dist Agri Officer (DAO) makaih in Thingkangphai ah tuni’n Agri.deptt saina in Farmers’ Awareness Program om a, RK Daranchand, DAO in hong hi. Aman a gendan in khawvel ah lou neihdan kikhektou zelin technology kikhek ziakin loubawlmi te’n leng buh chiinna ah kikhektouh zel poimawh a, tuilou a piangkhia tamsem theihna ding in techonology tungtawn in buhchi hoih kibawlkhiate’ loubawlmite’n chiin poimawh hi’n gen hi. Aman CCpur dist a loubawlte’ adin govt ah fertilizer(uria) matric tone 140 ngen a, amasa pen dingin tukal sungin fertilizer Truck 2 hongtung ding a, govt rate in loubawlmite lak ah piak hidin gen hi. Awareness program ah K.Ranju , EO (Agri) leh Ajit Singh, Plan Pathologist te’n sinsak uh a, loubawlmi e kiang ah buhchi RMC-7 leh Hybrid hunkhop hawmkhia uhi.

Malaria positive mukhe lou
Lamka, June-23: Behiang PHC bial sunga Suangphuh khawmi damlou 4 apan Malaria PF muhkhiat ziakin June 20, 2014 in CMO/CCpur in Rapid Response Team sawlkhia a, amau Suangphuh, Tonjang, Jangnuam, L.Kanan leh Behiang khawmi 140 sisan test mahleh uh Malaria positive mu khelou uhi.

Information Centre hongkhia
Lamka, June-23: Rev. Henjalen Doungel, KBC Pastor in tuzing in KSO Gen HQ Complex, Sumkong Kaimun, Tuibuong ah Zo Re-Unification Organisation (ZoRO) Northern Zone, Information Centre for Victims of MNF Regime kichi hongkhia in Pathian kiang ah thumna in lan hi. ZoRO, Norther Zone, Sub-Committee on Victims of MNF Regime a Chairman, Goulal Tungnung in agendan in Inf Centre tungtawn in MNF movement (1966-1986) hunlai a liam leh athuak adiak in Security Force te'n inn-le-lou, khua-le-tui a haltumsak, volunteer (ex-Mizo National Front) apangte'n form la in July 30, 2014 a submit theih din gen hi. Form ah category 5-cadre (death/alive), Rape, Molestation/Tourture, Burnt leh Death in kikhen hi’n gen hi. Aman agenna ah victim-te’n govt aspan sum-le-pai muh leh muhlouh ding gen theih hinailou a, himahleh Sept-Oct sungin Mizoram leh Myanmar border a Ricodar mun ah ZoRO khawmpi om ding a, huai ah UN Team hongtelte kiangah form kikaikhawm teng submit hidin gen hi.

IMPHAL NEWS:
ATCFM makaite’n Governor mu
Imphal, June-23: All Tribal Chiefs’ Forum, Manipur (ATCFM) makaihna in District Chiefs’ Association pawlin June 20, 2014 in Raj Bhavan ah Manipur Governor VK Duggal vamu uh a,Manipur Assembly a Hill Areas Committee(HAC) lupen(guardian) ahihna ah Maniur singtanggam ah Village Development Committee(VDC) bawlkhiak ding order suak zukkik dingin Governor ngen uhi.Hausa(village chiefs) leh Village Authorities theihpihlouh a Village Development Committee bawlkhiak in singtanggam a customary law leh khawsung kivaihawmna buaisak ding ahihman in VDC bawlkhiakna ding Order zukkik ahih kei leh nawngkaina piang ding hi a taklang kawmin order zukkik ahihkei leh kiphinna tuamtuam in zui ding hi’n gen uh a,Governer in leng huai thu state govt tawh genkhawm hiding in theisak hi’n thutut kingah hi.

Imphal-Mandalay flight kipat hun ding chianglou
Imphal, June-23: Imphal leh Mandalay kal ah June 27, 2014 in lenna zanga kikawmna(flight) kipan ding a, July 3, 2014 in flight 2veina om ding chih himahleh India govt a Ministry of Civil Aviation leh Ministry of Home Affairs in lemsakpihna a piak nailouh ziakun a kipat hun taktak ding chiang nailou chihthu om nawn hi. Huailou thudang kingah dan in Tulihal airport ah International flight adia ground work poimawh teng zawhsiang ahih nailouh ziak leng hithei chih ahi hi. Hibang kalah mi 20 vel in Imphal-Mandalay flight ading in ticket booking bawlkhin uh hi’n leng kigen hi. KB enterprise te’n Nov 2013 in Sangai Festival tawh kizawi ton in Imphal-Mandalay chartered flight masapen ana sai uh ahi hi.

Recovery Van in mi 1 phulum
Imphal, June-24: Keishampat junction ah tuni zinglam dak 9:30 velin 30th A/R te’ Recovery Van in Honda Activa (No. MN01M/1538) atuang mi 1 phukha hi. A kigendan in IFCD a UDC sem K. Jayanta Kumar (54) of Haobam Marak Chingtham Leikai in Khoyathong a amau office zuanlai Keishampat junction ah A/R te recovery Van in phupuk a, RIMS hospital zotpih ahihlai a lamkal ah si hi’n kigen a, Imphal Police station ah thiltung tawh kisai case registered in om hi.

‘Go Green Drive’ paizom zel
Imphal, June-23: PIB Defence Wing thusuak in a gendan in Red Shield Division in ‘Go Green Drive’ a pat uh sunzom zelin Ccpur district ah singnou suan tawh kisai campaign hongkhia uh a, gammang a singkung beiding dalna apat hi a, Red Shield Division in hiai dan a drive dang khatah sing, theikung, medicinal kung banah sing chituamtuam asang asim CCpur a mun tuamtuam ah suan uh hi’n leng thusuak in gen hi.

Training din teacher 1073 sehkhia
Imphal, June-23:Directorate of Education(S) nuaia Primary Teacher/Elementary Teacher 1073 te’n Distance Mode in ‘2-years Diploma in Elementary Education(D.El.Ed) course’ zil(training) dinga telkhiak hi uh a, June 30 akipan July 5,2014 sungin Directorate of Education(S), Lamphelpat,Imphal ah Rs. 400 pia in students’ handbook leh admission form a lak uh ngai ding hi.Huai kimtaka fill-up khit in July 5,2014 tan in Directorate of Education(S) ah submit ngai ding hi.Training a teldia seh a om teacher-te’ min deptt official website www.manipureducation.gov.in ah et-theih ding hi.

Helpawl atel mi 2 mankhia
Imphal, June-23: PRO(Defence Wing) thusuakin a gendan in Red Shield Division nuai a Assam Rifles te’n Loktak colony ah helpawl om chih thuguk a zak ziakun operation a neihna uah PLA cadre Pvt. Subhash @ Rocky (28) of Loktak Colony, Bishnupur mat hi a, amah apan 5.56mm tang 5 leh 7.62mm tang 5 mukhia in Bishnupur Police ah pekhia uh hi’n kigen hi. Huailou in Red Shield Division nuai a Assam Rifles-te’ mah in Noney IV ah operation bawl uh a, huai ah ZUF Capt. Benjamin(37) of Noney IV, Tamenglong mankhia uh a, amah apan AK-47 rifle 1 leh magazine 1, AK tang 15, Rs. 2,000 leh extortion note 28 mukhia uh a, galvan teng tawh Patsoi Police ah pekhia uh chihthu om hi.

Rickshaw driver sisa in kimu
Imphal, June-23 : Rickshaw driver Keisham Rame (55) s/o (late) Sajou of Kyamgei Maning Leikai zan nitaklam akipan a omna theihlouh a mang tuni zingkal in Irilbung PS huamsung Leishang Hiden mun ah sisa a muhkhiak in om hi. Keisham Rame bel Kyamgei Maning Leikai a vengsung mipiten tuikulh apan a muhkhiak uh hi a, police ah report ua, police ten siluang vala uhi.

Transfer/posting
(IAS Probationers)
1. Ms Jaspreet Kaur,IAS as Assistant Commissioner
to DC/Imphal West.
2. Krishna Kumar,IAS as Assistant Commissioner
to DC/CCpur
3. Neilenthang Telien,IAS as Assistant
Commissioner to DC/Ukhrul.