B.Sc student Lamminlal Vaiphei in ‘Hydraulic Robot Arm’ bawlkhia
Lamka, April-19: Lamminlal Vaiphei (20) s/o Hauthianlun & Ms. Lamneilhing of Pengjang village, CCpur district in ‘Hydraulic Robot Arm’ bawlkhia a, Class-XI (Science) Physics subject a ‘Pascal Law’ nuaia ‘Hydraulic Lift & Hydraulic Brake’ azil tungtawn a bawlkhia hi’n gen hi. Aman tulelin Imphal a DM College of Science ah B.Sc 1st Semester zil hi.
Lamminlal Vaiphei in a thil bawlkhiak Robot taktak bangin gamtang thei a, JCB leh van-gik dopna(Crane) tawh a apaidan(function) kineh mahmah hi. Aman a gendanin kum 2011 in VK Tawna College ah Class-XI zil a, Physics teacher Sir Thangmuanlal s/o (late) Dr. Goukhanthang in hoihtak a ‘Pascal Law’ a sinsak ziakin theory a azil pen practical a bawlkhia hi’n gen hi. Class-XI a zillai in tuabang thil experiment dana bawlkhe dingin theihna leh siamna(knowledge) nei nailou a, Class-XII azil sung in hoihtakin suichian a, practical in khatvei bawlkhe masa hi. Huaipen a teacher uh hilh a, huchi’n College ah student dangte kianga hilhchian dinga sap in om a, Class-XI(Science) student -te lakah aman hilhchian(demonstrate) hi’n gen a, huaizawh in College apan thupiak om bangin student dangte’ et dingin College office ah koih in om hi.
College a a zilkhiakte tungtawn in baihlam taka bawlkhiak theih hilou ahihdan genkawm in, paper ah a paidan dingte gelh masa a, paper a a gelh pen practical a bawlna dingin tamveitak try a, abawl dek tengin thumna nei masa in lunglut taka bawlzel hi’n gen hi. Kha 1 vel a buaipih nungin akhatveina dingin bawlkhe thei a, abawl masakpen' khuam(stand) dingin gua(bamboo) zang a , akingakna(bottom) dingin Lamp plate zang hi.
Huainung February 2014 vel apan ‘Hydraulic Robot Arm’ bawlkhiak sawm in kisa nawn a, kha 3 vel a buaipih nungin tunai chin in zousiang hi. Huai Robot Arm ahihleh Multi-Function hi a, a gamtat theihna Degree of Freedom(DOF) mun 3 ah om a, tua munte ah Robot in a khut tangsak(move)in hihsau thei a, gamtatna in zang thei hi. Cylinder dingin syringe bawm zang a, piston dingin syringe kapna, cylinder khat apan adang zopsawnna dingin syringe gui zang in Hydraulic Liquid dingin tui(water) zang hi. Robot vanzat(part) dingin sing(wood) zang a, robot pumpi(body) Joint Connector leh mechanical arm banah design tengteng aman a ngaihtuah khiak hi a, Meghalaya a Class-VI a zilsung in Science tawh kisai a District Level leh Block Level a 1st prize-te alak tungtawn in Science ah lunglutna liantak nei hi’n gen hi.
Eilak ah student lama siamna sangpipi nei tam mahleh amaute adia hunhoih(opportunity) tamlou in kitaitehna leng tamlou a, tua ziakin siamna a neihte uh taklatna ding hun lemtang neilou uh hi’n gen a, siamsinna lam ah student-te’n maban hoihzaw a neihna ding un thuneitute’n kidemna chi tuamtuam leh kitaitehna chituamtuam sai poimawh hi’n gen hi. Competition ziakin mite thanuam uh a, student-te’ leng competitive minded uh hi’n gen hi. Class-XI a siampen hikei mahleh tupguhna a neih ziakin Hydraulic Robot Arm’ bawl khethei hi’n gen a, student tamzaw in i zilte practical a sepkhiak kisawm lou in, percent sangtak a zawhkhiak nung inleng theihna giltak tawh ki-omlou chi hi. Christian hihna ah mahni mimal adia lamzanna dingin Pathian phawk a, student-te’n leng kuhkalna leh theihna hoihtak tawh laizil a poimawhdan gen hi. Nu-le-pate’n leng siamsinna lam ah kalsang zawsem dinga tate’n lunglutna a neihte uh poimawh ngaih a, hun zatbeina mai dan a ngaihtuahlou dingin a deihthu gen a, tuabang thilte bawlkhiakna dingin hun tamtak bei mahleh, siamna lam a khantouhna dingin nu-le-pate’n theisiamzaw dingin a deihthu gen hi.
State tuamtuam 7 a LS seat 64 adin nomination file hun bei
Narendra Modi in Varanasi ah nomination file ding
Lucknow, April-19: BJP' Prime Ministerial candidate Narendra Modi in April 24, 2014 in Utter Pradesh state a Vanarasi Lok Sabha biala candidate dingin nomination paper file ding hi. Modi adia mi poimawh Amit Shah in tuni’n a gendan in Election Commission (EC) in Modi tungah ‘hate speeches’ tuamtuam tungtawna gakna a bawlte lakhia a, tuaziakin Modi in zalentakin campaign a nei a, a neilel a, a neisem lai ding chi hi. April 24, 2014 chiang in zalentakin nomination a file laiding chi’n Amit Shah in gen hi. Varanasi bial ah May 12, 2014 in vote khiak hiding hi.Thudang kizadan in state tuamtuam 7 a Lok Sabha seat 64 ading in tuni’n nomination paper file theih hun beita a, huaite laka Andhra Pradesh ah Assembly seat 165 ading election tawh kithuahkhawm ding hi.
ECI thusuak in a gendan in Bihar a Lok Sabha seat 7, Himachal Pradesh a seat 4, Jammu & Kashmir a seat 2, Uttar Pradesh a seat 15,Uttarakhand seat 5, West Bengal a seat 6 leh Andhra Pradesh ah Lok Sabha seat 25 banah Assembly seat 165 adingin May 7, 2014 in a kiton in election om ding a, huaia candidate nuamte adingin tuni in nomination paper file theih hun bei hi’n kigen hi.
BJP General Secretary Amit Shah in a gendan in Uttar Pradesh ah BJP hat mahmah ding a, phase 2 adia election omsate ah leng BJP mahin seat omsa tamzaw a luahding chih chiang a, seat 21 laka seat 18 te BJP ading ahi chi hi. Congress government ziakin India ah gamdang mi honglut tam semsem a, nitengin vanman khang hulhul a, nekguk-takgukna leng nasa deuhdeuh in gamsung ah muanna detdou loulua chi hi. Hiai issue tuamtuamte ah tuni dong Congress apan dawnna muhtheih ahihlouh manin India mipite vangtah mahmah chi hi.
Kum 10 paisa in Congress makaih UPA government kichi Centre ah ding a, ahihziakin, a taktak in mipite’ adingin phattuamna ding bangmah a om kei chi’n Gujarat Home Minister lui Amit Shah in gen hi.
CCpur dist. a govt teacher-te suankhiak SSPP GHQ in dal ding
Lamka, April-19: CCpur dist.a govt. school tuamtuam ah teacher tamtak alompi a suankhiak dingin govt. order om a, suankhiak hileh school function hoih deuhteng leng function thei nawnlou in student 10,000 val buai ding chih ziakin SSPP Gen HQ in tuni in Bungmual a SSPP complex ah govt. school a headmaster/headmistress- te sawmkhawm in thil omdan genkhawm uhi.
SSPP Gen HQ thusuak kizadan in CCpur district a govt. school minthang teng pukse thei din om a, teacher-te tamtak mundanga suankhiak ding chih kia hilou in, teacher kisuan dingte a post tawh suankhiak hiding a, huai student-te adia manna lian tawpkhok hidin gen uhi. Khawsakna haksat ziaka govt. school akai student tamtakte maban bing dingin kilang a, huai ziakin govt order paisuak theilou ding chikawm in student leh orgn tuamtuam tawh pan lakhawm a doudal hiding chi uhi.Govt. in teacher alompi a suankhiak sangin teacher kidaihlouhna munte a koihbeh dinga lam-et ahihlai in session laklawh laitaka hibang policy om pen singtangmite muhsitna hi’n gen uhi.
MS (Orthopedic) sinding
Lamka, April-19: Dr. Pausiam Tunglut s/o Upa T Tunkhansong of Bungmual, New Lane in All India PG Entrance Test a lawhching in MS (Orthopedic) sin dingin April 21, 2014 in Assam zuan in zinkhe ding ahi. Aman Assam a Silchar Medical College ah kum 3 sung MS (Orthopedic) sinding hi. Dr Siam in St’s Paul’s Institute, New Lamka apan class X zou a, tuazawh in Rayburn College ah Class XII (Sc) zou a,kum 2006 akipan RIMS ah MBBS sin a, kum 2012 in zou hi.
Dr Siam’ pa Pastor (late) Damkhothang tapa Upa Tunkhansong innkuan lawhching mahmah hi a, tapa 2 leh tanu 1 nei a, a tapa upape’n Thangginlian Tunglut BE (h/o Dr. Chingnunsiam) in tulelin Assam a National Thermal Power Corpn (NTPC) ah Engineer semlel a, a zomin Dr Siam Tunglut hi a, aneupen Lalparmawi @Moinu in New Delhi Govt nuaia LNJP Hospital ah Staff Nurse sem hi.
Guta-te’n Activa gari 2 gumang
Lamka, April-19: Lamka khawpi ah gutate gamtatna dai tuanlou in masawn zel a, nitak hun kia hilou in sun hunlai in leng gari guk mang a om khenkhat zak hi a, kuapeuh adin pilvan poimawh hi. April 17, 2014 nitak in Chiengkonpang a om Nengnou Gangte’ in verandah a akoih Activa (white) MN 05B-3310, Chesis No. ME4 JC446M98055119, Engine No. JC44E0384705 gukmang hi a, Chiengkonpang a om mah Ginkhotinthang te’n inn kong a Activa MN02A-9267 a koih uh tuni zinglam dak 9:00 velin gutate’n gumang uhi.
Awarness Program om ding
Lamka, April-19: Manipur Alliance for Children Rights (MACR), CCpur Chapter saina in M.Ramthar khua ah April 24, 2014 zinglam dak 11:00 in ‘One day awareness program on Integrated Child Development Scheme and Juvenile Rights’ kichi omding hi. Huai hun ah PK Jha, IAS, DC/CCpur, K.Kabib, IPS, SP/CCpur telin official hunkhop in sinsak ding uhi.
Thautang leng in kapliam kha
Lamka, April-19:Tuni sunnung dak 1.00 velin Sangaikot area a G. Suonggel gamlak ah mi 5 sabeng a kuante’n sakhi khat kap kha uh a, sakhi a kapna thautang uh pailet in leng paisuak a, a lehlam a tangpang a om Awnkhomang (32) s/o Thanglun of G.Suonggel kapkha a, a serious ziakin district hospital a casualty tut himahleh RIMS a etkol din referred in om hi. Thautang leng in Awnkhomang’ biang taklam kapkha a, thautang in thuk bunlou in abiang ah tang hi’n kigen hi.
Accident ziakin liam uh
Lamka, April-19: Thangchinhau (8) s/o Paukhothang of Lajangphai tuni’n akimawlna ah a pheipi guh hihtan kha a, H. Zamkholal (43) h/o Kimngaihching of Beaulahlane in a nasepna ah machine khoihkhial kha in a veilam khutngawng hihliam hi. Thawngminlian (29) s/o Jangsei of Luikhai tuni’n singkung akia in liam a, tractor a tuang N. Thoiba(40) h/o Sanjita of Kumbi Jangsoibi Mapal tuahsia in a veilam khut liam a, accident a liamte district Hospital ah etkol hi uhi.
Doctorate degree muthak
Lamka, April-19: Jamkhogin Lhungdim@Hegin s/o Ngulkhosei Lhungdim of M. Songgel, CCpur in April 17, 2014 in Varanasi a Banaras Hindu University, UP apan Course Work tungtawn in Doctorate degree mu hi. A thesis min “Integrated weed management in Lentil(Lens culinaris, Medikus)”, Prof. Yashwant Singh in a guide na nuai ah Dept. of Agronomy, Institute of Agricultural Sciences ah Doctorate degree mu ahi hi. Aman tulel in Imphal a Central Agricultural University a Dept. of Agronomy a Asst. Prof. sem lel ahi.
Lamka ah Good Friday kizang
Lamka, April-19:Jesu’n mihingte tatna ding a cross a hong sih theihgigena dingin kum tenga ‘Good Friday’ kizang zan in Lamka khawpi biakinn tamzaw tham ah zat hi a, biakinn a khenkhat a kikhawmte’n suunna puan a vom ngen in kichei uhi. Biakinn khenkhat mah ah Toupa’ nitak ankuang kichi(sacrament) ‘The last supper’ leng om hi. Lamka khawpi a Catholic saptuamte’n Ningani(April 17) nitak akipan Good Friday zat kipan uh a, lungkhoih huaitak leh thuk(solemna) takin Good Friday ni zang uhi. Good Friday akichi Manipur telin India gam kia hilou in leitung pumpi a Christian tamzaw in zang uhi.
Computerisation Paybill training
Lamka, April-19: ZEO/CCpur leh Director of Education (S) saina in April 25,2014 zinglam dak 11:00 in ZEO office kong a Synod House ah DDO tawh thuahkhawm Headmaster /Headmistress-te’ading in Paybill Computerisation tawh kisai training om ding himahleh April 26, 2014 a dingin kisuan hi. Director of Education (S) office akipan official te’n training a telte sinsak ding uhi.
Departmental Joint Seminar om
Lamka, April-19:New Lamka a EBC Pethuel biakinn ah tuni in Departmental Joint Seminar 2014 om a, Pastor H.Ginkhochin, Local Pastor in hong hi. Seminar ah ‘Local Church Administration’, ‘Pathian saantak biakna & biakna paidan’ leh ‘Worship order’ chih pansan in Rev L.Kham Kho Lun, Director of Missions in sinsak a, sharing ah TBMC, BYF, TBSUC, TBDF, BCD leh Building Committee apan thugen ngaikhia uhi.
Tuni in leng OFC kitan zel
Lamka, April-19: BSNL/CCpur ah mi 2,000 valin BSNL landline zangin Internet broadband la uh a, himahleh kha 1 sunga ni 30/31 omlak ah ni 5 sung bang Internet broadband zat theihlouh in omsek hi. Tuni’n leng Kwakta leh Moirang kikal ah Optic Fibre Cable (OFC) kitan hi’n gen uh a, internet zang adiakin Press-te adin buaina thupitak tunsek uh a, tuni nitak dak 7.30 velin hoihnawn vanglak hi.
Suunna
Mrs Thenkholam Haokip (70) w/o Otkhojang of Chiengkawnpang zan nitak dak 7.00 in Dist. hospital ah zunkhum(Diabetes) ziakin si a, tuni sunnung in Chiengkawnpang hanmual ah kivui hi.
Chingngaihman (63) sister of T. Haukhanthang of Dorcas Veng, New Lamka zan nitaklam dak 3.00 velin kalna in si a, inntekte deihna bangin zan mah in YPA Hanmual New Lamka ah kivui hi.
H. Ginsuanmang @ Mamang (43) b/o Hauthang of New Bazar tuni zinglam dak 11.30 velin JN Hospital, Imphal ah sungna in si a, April 20, 2014 in Lamka Hanmual ah kivui ding hi. Mamang ahihleh CDSA leh pawl tuamtuam in phatuam taka a zatsek hi’n kigen hi.
Moijing(A) PS ah repoll om ding
Imphal, April-19: Thoubal district a om 31/1-Moijing(A) Polling station(PS) ah zanhal(April 17) a Inner Manipur Lok Sabha election a vote khiakni in voter 771 om mahleh vote kikhia tamzaw in 773 pha a, huaiziakin Dist Election Officer/DC Thoubal in huai PS a Presiding Officer E. Khogen Singh, Asstistant Arts Graduate Teacher/Wabagai High School suspend a, Election Commission akipan thupiak dungzui in huai PS ah April 22, 2014 in vote khiakthak(repoll)in om ding a, zingsang dak 7.00 akipan nitaklam dak 4.00 sung vote khiak hiding hi.
Jiribam ah dakkal 48 sung gen strike
Imphal, April-19 : Addl SP/Jiribam makaihna in security pawlin Jiribam a relief camp a om mi 4 kilawmloutaka a soisak uh mawhpaih in zan nitak zankim apan in Ngamkhei Kanba Lup pawlin dakkal 48 sung general strike puang uhi. Huai ziakin tuni in Jiribam bial ah hindan ngeina naktak in hihbuai hi. Bandh supporter te’n Crusher gari No. AS11C/6057 a hihsiat ban uah Imphal zuan ding gari tamtak koltang(stranded) uhi. Jiribam sub-division sung Hilghat GP Ward No. 1 a omte mi tamtak galtai in Jiribam Government Hr Sec School a relief camp ah om uh a, huaite lak a om mi 4 te kilawmloutak a soisak hi uhi.
Numei kum chinglou sual mawhpaih
Imphal, April-19: S Ngoupuni of Poumai Colony, Chingmeirong in April 17, 2014 in Heingan PS a Koirengei tangtung(hillock) ah numei naupang kum 13 lela upa khat khem in a sual(rape) ziakin Poumai Naga Union in mawhpaihthu puankhum in amah tungah a kituahpih bang gawtna piak ahih deihthu puang uhi. Police te’n zan(April 18, 2014) nitakin S Ngoupuni mankhia in tuni’n Sessions Judge Manipur East court ah dingsak uh a, Court in April 24, 2014 tan police custody a om dingin Police khut ah pekhia uhi. Thu kizadan in Ngoupuni in a April 17 nitaklam in atanu tulela Delhi a om sika vote khe dingin numei naupang kum 13 khem in kizuisak a, hileleng Polling station lama paipihlou in Koirengei tang tung lam ah paipih in huaimun ah sual(rape) hi’n kigen hi.
PS 13 a vote simlouh din panla ding
Imphal, April-19 : BJP Manipur Pradesh te’n Inner Manipur Lok Sabha bial ah April 17, 2014 a election om ni in Andro A/C, Khundrakpam A/C leh Thoubal A/C ah akigawm in Polling 13 ah dikloutak a vote khiak ahihziakin Election Commission of India (ECI) ah complaint piaklut hi’n Th. Chaoba, President BJP Manipur State Unit in tuni’n Nityaipat a BJP office ah gen hi. Chief Electoral Officer(CEO) Manipur kiangah complaint bawl himahleh repoll ding thu bangmah omlou a, hileleng vote sim hun ah PS 13 a te vpte somlouh ding in a poimawh leh case tanpha file hiding in gen hi.
Huai huna om Inner Manipur a BJP candidate RK Ranjan in a gendan in Polling station 13 ah vote khia mihing tamkei mahleh vote polled zah percent tamtak hidan a puankhiak ahihman in voter khiakdan siangthou deklou mah hidan in gen hi.
Remuneration bikhiahzah pelou
Imphal, April-19:Outer Manipur Lok Sabha seat adin April 9, 2014 a election omlai in Outer Manipur Lok Sabha bial in a huamkhak sunga poll duty atel Thoubal District Outer Parliamentary Election Officials Teams’ Asson pawlin poll duty ziaka remuneration a muhzah uh tawmzaw hi’n gen uhi. Amau tuni’n Manipur Press Club ah Press-te kimuhpih in a genna uah ECI guideline dungzui in polling station tenga official duty-te’n remuneration Rs. 7,220 zel a muh ding uh chih himahleh Rs 4,450 kia piak a om uh hi’n gen uh a, huchih lai in Inner bial a duty te’n Rs 6,200 zel mu uh hi’n puang uhi. Huai dungzui in Outer Manipur biala Returning Officer in a piaklouh teng kigawm Rs 7,23,240 hi a, Inner Manipur biala Returning Officer in a piaklouh teng kigawm Rs 1,16,280 hi’n puang uhi.
Red Shield Division in kithuahpih
Imphal, April-19: Red Shield Division(Army) te’n tuni’n Loukoipat leh Loktak lake e ah community tuamtuam a numeite leh Self Help Group(SHG)tea din picnic programme bawl uh a, huai ah numei mi 120 vel tel uhi. Tuni a picnic ah ‘Ladies of Hope Care Women Network, New Checkon; Tabitha Compassion on Care Centre (a project of MBC Women department); Door of Hope, Koirengei; Grace Centre, Namdunlong leh Imphal akipan SHG tuamtuam leng tel uhi. Numei pawl tuamtuamte Loukoipat atun un breakfast ne masa uh a, huaizawh in musical chair leh tug-of-war kidemna om a, huaikhit in Sendra ah sun-an(lunch) ne uhi.Red Shield Divn pawlin kiphal taka numei pawlte picnic dia a panpihna tung uah kipahthu numei pawlin puang uhi.
Police-te thaukhah ziakin mikhat si
Imphal, April-19 : Kanglatongbi a Tisbari mun ah zan nitak nunga police-te’n thau a khah ziakun mikhat si hi. Thusuak kizadan in Tilak Poudel s/o Prem Singh Poudel kichi zan nitak a Kanglatongbi mun a police leh mipi kal buaina ziaka police ten thau a khahna uah si hi. Huai ah Hemant Thapa leh Bhim Bahadur leng liam uhi. Kanglatongbi bel Imphal akipan km. 25 vela gamla hi a, Nepali khua ahi hi. Numei kum 13 ding khat pasal kum 65 vel in a sualluihna tawh kisai in mipi kiphin ahi uhi. Sualluih a om numei bel class VI simlel hi’n kigen hi.
Lungnila papi in statement pia
Imphal, April-19: Baby Lungnila Elizabeth pimang ahih banah Nov 12, 2003 a aluang kimukhia tawh kisai in prosecution witness dingin a papi(uncle) in Lungnila sihna tawh kisai statement a piak BK Sharma, Session Judge Manipur West in tuni’n enkhia(examine) nei hi’n kigen hi. Police te’ apan CBI ina case lasawn in Lungnila sihna a kigawlh mi 4 -Nando, James Kuki, N Roman Meetei leh (late) Arnold @Devan tmatkhiak hi a,huai thiltung a kigolh Laishram Sureh@ Biren@ Nabakishore of Pukhao Naharup tulel a Nongmaikhong a om leh Heisnam Prem Devi @ Yaima leng matkhiak beh hi uhi. Arnold@Devan ahihleh kum bangzah hiam paita in JN Hospital Security ward a a omna ah si hi’n kigen hi.
Police OC suspend in om
Imphal, April-19: Numei naupang kum 13 a upa April 17, 2014 a sualluih a om tungtang ah mi sualtu matkhiak ding phutna a Kanglatonbi mun a kiphinte’ hawldalhna din Sekmai police te’n thau a khahna uah Tilak Paudel (26) kaplum kha uh a, huai ziakin Sekmai Police station a Officer in Charge(OC) Geetchandra suspend in om hi.