Police te’n pistol tawh alu sutuah
Lamka, April-17: Zan nitak in Old Bazar,Super Market a S.B Hotel ah galvantawi te’n Letkhotinthang Haokip s/o Thangsei Haokip of T.Champhai, CCpur kapliam uh a, Dist Hospital tut nungin doctor te’n RIMS ah refered uhi.Lamka Police te’ venbitna in Dist Hospital’ambulance gari in Imphal ah puak hi a, Police te’n Moirang Lamkhai tan escort uh a,huai akipan Moirang Police te’n Imphal tan escort uh hi’n kigen hi. Lamka Police-te’ nung Moirang khen a Imphal lampang ‘Welcome to Moirang’ kitakna mun ah Moirang Police te’n ambulance gari khawlsak in pistol tawh driver Nengkhanthang’ lu(head) sutuah in ngim uh hi’n kigen hi. Driver Nengkhanthang in govt ambulance driver khat hibang a Moirang Police te’n a bawl uh lungkimlouh thu gen hi.
State tuamtuam 12 ah Lok Sabha seat 121 ading election om
Inner Manipur LS bial ah voter 75% in vote khia
Imphal, April-17:Inner Manipur Parliamentary Constituency ah tuni zingsang dak 7.00 akipan nitaklam dak 4.00 tan election om a, voter 8,53,069 laka 75% velin vote khia uh chi’n Chief Electoral Officer(CEO) O. Nabakishore in tuni nitaklam in Press-te tawh a kihouna uah gen hi. Aman a gendan in Imphal West ah voter 70% vel in vote khia uh a,Imphal East ah 72%, Bishnupur ah 75% leh Thoubal ah 84% in vote khia uh hi’n gen hi.Kum 2009 a Lok Sabha election omlai in Inner Manipur bial ah voter omzah laka 70% lelin vote khia uhi. Tutung in hundang tawh kibanglou in Oinam Assembly Constituency sunga Polling Station 4 ah voter kuamah vote khia omlou hi. Hibang kalah tuni’n Manipur a Lok Sabha seat 1 telin India gamsung state tuamtuam 12 a Lok Sabha seat 121 adingin election om hi.
Chief Electoral Officer O. Nabakishore in tuni nitaklamin Secretariat North Block a om a office chamber ah a gendan in Leimaram leh Heinoubok mipite a lungkimlouh ziakun Oinam Assembly Constituency(A/C) bialsung a Polling Station 4 ah mipite’n vote khia omlou uh hi’n gen hi. Vote khia omlouhna Polling Station(PS) 4te 25/1-Leimaram (A) PS, 25/2-Leimaram (B) PS, 25/3-Leimaram MamangLeikai PS leh 25/4-Heinoubok PS hi’n gen hi. CEO in tuni mahin huai Polling Station mun 4te va enkhia a, mipite’n a gendan un OC/Nambol in local mi khenkhat a housiat ziakin Home deptt ah OC transfer dingin ngetna pia uh a, hileleng govt in huai limsaklouh ziakin mipite lungkimlou in vote khe utlou uh hi’n gen hi.Huai Polling station 4 a omkha tuni a Polling Duty omte’n bel vote khia uh chihthu om hi. CEO in huai PS 4 ah vote khiakthak ding tawh kisai bangmah thu omlou hi’n gen hi.
Huailou in Lamshang A/C huamkhak 17/29-Lambal PS a voters te’n poikhoihlou mi khat Assam Rifles ten zan in man uh chihthu om ziakin vote khe utlou uh a, hileleng thunitute tawh kihoulem theih ziakin tuni sunnung in vote khiak kipan uhi. Wangkhei A/C bialsung 17/4- Kabo Leikai Nongpok PS ah leng in Polling station muntuam ah kisuan chihthu zak ziakin vote khe utlou uh a, hileleng thil omdan hilhchet ahih nung in zinglam dak 10.30 akipa in vote khia uh chih ahi hi. CEO in a gendan in vote khiak hun kipatma in EVM hoihlou 15 vel a thaka khen a om hi’n gen hi.
Thudang kizadan in tuni’n Inner Manipur Lok Sabha seat adia election om tawh kiton in state dang 11 a Lok Sabha seat 120 adin leng election om hi a, Karnataka ah seat 28, Rajasthan ah seat 20, Maharashtra ah seat 19,Madhya Pradesh ah seat 10, Bihar ah seat 7, Jharkhand ah seat 6, Uttar Pradesh ah seat 11, West Bengal ah seat 4, Chhattisgarh ah seat 3, Jammu & Kashmir ah seat 1 leh Odisha ah seat 11 adin election om hi. Odisha ah Assembly seat 77 ading election tawh kithuahkhawm hi. Indian Football Captain lui Bhaichhung Bhutia in leng Darjeeling constituency ah Trinamool Congress Party ticket in LS election tuh a, a ching leng gintakhuai mahmah chih ahi.
Thusuak kingahdanin, tuni nitaklam dak 5 tanin Uttar Pradesh state ah 58 per cent polling om a, huai ah candidate 150 geih om hi. ECI thusuak danin, Nagina ah 61.98 per cent polling om a, Moradabad leh Rampur ah 61.22 per cent banah 69.32% vote khiakin om hi.
Sambhal ah 56.8 %, Amroha 52.12 %, Badaun %, Aonla 56.8 %, Bareilly %, Pilibhit 57.2 %, Shahjahanpur 55.5 % leh Kheri 61.64 % vote kikhia chih ahi.
Tualou in, tunitaklam dak 4 tanin Bengal a election omna teng ah 72% vote khia a, nitaklam dak 4 tanin Bihar ah vote 47.58% kikhe panlel chih ahi. Karnataka ngialah vote polled se mahmah a, suun dak 12 tanin 26 per cent polling lel om chih ahi. Nitaklam dak 4:30 pm tanin Odisha ah vote percentage 58 lel tung chi uhi.
Tuni a election a kituhte lakah, Central minister Jyotiraditya Scindia, Ananth Kumar (Bangalore South), Jaswant Singh (Barmer), Sachin Pilot (Ajmer), Ashok Chavan (Nanded), Misha Bharti (Pataliputra), Supriya Sule (Baramati), B.S. Yeddyurappa (Shimoga), Ghulam Nabi Azad (Udhampur), Maneka Gandhi (Pilibhit), Shatrughan Sinha (Patna Sahib), M. Veerappa Moily (Chikkaballapur), Nandan Nilekani (Bangalore South), Sushilkumar Shinde (Solapur), Gopinath Munde (Beed), V. Balakrishnan (Banglaore Central), S.S. Ahluwalia leh Bhaichung Bhutia (Darjeeling) te tel uhi.
Chhungi Tonsing suunna progam tuni’n mun 2 ah om
Lamka, April-17: YPA Tangnuam Unit inntekna in tuzing dak 7:00 apan in Tangnuam khua a Chhungi Memorial YPA Community Hall ah (late) Chhungi Tonsing sihnung kum 3 chinna leh amah’ suunna program om hi. Huailou in tuni sunnung dak 1:00 in Hebron Veng, New Lamka ah (late) Chhungi Tongsing’ kivuina hanmun ah Chhungi suunna om hi. Huai hun ah Rev L. Kham Kho Lun, Director of Missions, EBC in (late) Chhungi Tonsing’ innkuante- a pasal, atate leh atute adingin Pathian kiangah vualzawlna ngetsak banah khamuanna din thumsak hi.
Health Minister Phungzathang Tonsing in a genna ah azi (late) Chhungi Tonsing’ hinkhua apan zilding tampi nei hi’n gen a, program khenkhat ah thugen ding a theihlouh hun inleng azi’ in a thugending hilhzel a, ama hinkhua ah azi panpihtu taktak ahihna kilang hi’n gen hi. Azi’ beh-le-phung thu ah buai hetlou hi’n gen a, atangpi in azi’ in min agelh hun in Chhungi chih gelhzel hi’n gen hi. Azi (late) Chhungi Tonsing in adamlai in lawm leh vual ngaina mi ahihziak in lawm leh vual hau mahmah a, a sihnung tanpha inleng ittu ding tamtak neilai hi’n gen hi. Azi’ in adamlai in bilbah, khi leh lipstick nei mahleh huaite hah zatlou in a natural mel(mel ngeina) mah ngaina zaw hi’n gen a, huai mah a taksa ah kilangkhia hi’n gen hi. Azi (late) Chhungi Tonsing in adamlai in nu-pa si masa zaw omding mah hi a, tate, tute enkol dinga Pathian in mawhpuakna honpiak theih gige ding chih a deihthu gen hi’n taklang hi. Azi a damlouh hun apan asih nung tanpha inleng ittu tamtak nei a, a sihnung kum 3 chinna hun ah a zi ittu, ngainatu mi tamtakte tungah kipahthu gen hi.(late) Chhungi Tonsing suunna hun zat zawh in ahan(grave) tungah pak piakna om a, (late) Chhungi Tonsing theihgigena ding in ahan(grave) gei ah singnou hunkhop suanna leng om hi.
District Hospital a nau neite’n hamphatna tuamtuam ngah
Lamka, April-17: District Hospital a nau neite’n JSSK scheme tungtawn in hamphatna chi tuamtuam ngahthei uh a, tuate lakah naunei ding peuhmah a inn uapan Hospital tan JSSK Ambulance in vapi zel a, a kiknawn chiang unleng a inn uah vakha zel hi. Naupang kum 1 nuailamte damlou gim(serious) a om leleng hospital a admit a poimawh ualeh inn apan Hospital puaktung banah Hospital apan potkhiak hun ah inntan sum sen ngailou din ‘Free Pick & Drop’ hamphatna ngah ding uhi.
Huailou in Dist Hospital a naunei numeite’n ngeina (normal) a nau aneih ualeh ni 3 sung Hospital campus a Medical Canteen ah free diet ngah ding uh a, damdawi man a senna lamah Rs. 350 tan a thawn in ngah ding uhi. Huai hamphatna ngahthei dingin Dr LK Pharmacy, Immanuel Pharmacy, leh Emergency Pharmacy ah damdawi lak ngai hi’n kigen hi.
Hospital ah operation bawla nauneite’n ni 7 sung a thawn in hospital ah diet & supplement la thei ding uh a, naunei ding peuhmah in manbei in OPD/Casualty ah ticket a thawn a piak hiding uh a, huailou hamphatna dang chituam leng ngah uh hi’n kigen hi. Hospital a naunei dingte’n Ambulance service -te’ # 9615222348, 9612446037, 9862267416, 8974113721 ah hunchiam omlou in hunteng(24x7 ) in contact thei ding uh hi’n kigen hi.
Party 5 in strong room chabi kalhbeh
Lamka, April-17:Outer Manipur Lok Sabha bial a election omlai in CCpur dist a kizang EVM teng DC office a strong room 3 ah koih hi a, tuni in BJP palaite’n chabi kalhbeh uhi. Outer Manipur biala election zawh nung tunitan in DC office ah strong teng political party 5- INC, AITC, NPF, NCP leh BJP te’n chabi kalhbeh uhi.
ZYA General Assembly 2014
Lamka, April-17: Simveng a SYO Hall ah April 24, 2014 in Zomi Youth Association in ‘16th Annual General Assembly,2014’ nei ding uhi. Session khatna zinglam in ZYA Block tuamtuam apan report leh ZYA Gen HQ apan Secretary leh Finance report om ding hi. Session 2na sunnung dak 1.00 in kipan ding a, Speaker in V. Zenzathang pang ding hi. Huai ah Unit President & Secretary banah Regional HQ leh Gen HQ a CEC member-te’ tel ding uhi. Unit leh Block chih apan telthei dingzah Gen HQ Secy (8730818554) ah theisak dingin Gen HQ in ngetna bawl uhi.
KSO-H in theihsakna bawl
Lamka, April-17: KSO/Hyderabad Branch in thu asuah dan in kumteng in singtangmi Hyderabad a laizil leh nurse zil dingin Agent khenkhat in paipih sek uh a, huaite laka tamtakin buaina tuaksek uhi. Khenkhat College ginalou a kaisak hi uh a, khenkhatte a deihna mun uh piak hilou a, huaite panpih in KSO-H in panla sek uh chih hi.Tuban Hyderabad a laizil/nurse zil dia sawl dingte’n KSO-H theisak masa dingin ngen uh a, thuchian thei utte’n Lamkhothang Haokip (President KSO-H) contact no. 07799590050 /08790910988; Thankhopao Singson (V President KSO-H) contact no. 09160787021; Guni Khongsai (Gen Secy KSO-H) contact no. 09032314003 leh Khailianmang Zou (Culture Secy KSO-H) contact no. 09177972832 ah kantheih ding chi uhi.
Thiltung tawh kisai in kilemna om
Lamka, April-17: Manipur Express a Reporter khat in zan in Dist Hospital a lem alak lai in Siampu of Pearsonmun(Vengkhang) in a vau ziakin Manipur Express staff-te lungkimlou in mawhpaih thu puang uh a,huai thu ah tuni’n Manipur Express office ah Siampu telin a tanaute leh Manipur Express staff-te kihouna om a, huai ah thiltung poisakthu leh ngaihdam ngetna pomsak ahih dungzui in kihoulemna om hi.
CDSU leh KSO in mawhpaih
Lamka, April-17: CDSU thusuakin Old Bazar ah zan nitaka thau kapte naktakin mawhpaih uhi. Huchihlai in tua thiltung ah Letkhotinthang Haokip s/o Thangsei Haokip of T.Champhai kapliam a om in Dist. hospital apan Imphal ah referred himahleh, akipuakna Ambulance gari Moirang ah Police te’n dakkal 1 val hentang uh hi’n taklang uhi. Huaikia hilou in Ambulance driver leng SDPO in khoih(thrashed) hi’n CDSU in gen a, SDPO/Ccpur panlakna ziakin paisuak thei mahle uh hibang sih-le-hin hun a SDPO gamtatdan mawhpaih thu puang uhi.
Tuabang kalah KSO/Ccpur in tuni mah in thusuah bawl a, Sushil Singh, DSP(Bishenpur) leh Surjaboro(Insp) Officer-in-Charge, Moirang makaih Police te’n thautang a liam Letkhotinthang in Imphal zuan a Ccpur Police te theihpihna tawh Ambulance gari a kipua hentang uh a, a innkuante muntuam tuak ah a thudot ban uah soisa uh chi’n KSO in mawhpaih thu puang hi. Police te’n dakkal 1 val bangziak a khawlsak uhiam chi’n dotna bawl uh a, mihing damna poimawh masapen hilou hiam chikawm in helpawlte tawh kizopna nei uh hizaw hiam chi’n KSO/Ccpur dist in dotna bawl hi.
APWC makai ding mi 15 telkhia
Lamka, April-17: All Pensioners’ Welfare Council (APWC) pawlin tuni’n Hiangtam Lamka a EBC Sunday School Hall ah Annual General Body meeting 8veina nei uh a, kum 2014-15 sunga budget dingin Rs.2 lakh bikhiah uhi. Kum 2014-16 sunga makai dingin mi 15 telkhia uh a, huaite Dr Th.Lamboi Vaiphei, LT Juan Tonsing, H.Nengsong, Dr S.Ngulzadal, S.Sanglian, K.Lianvel, T.Singneng, Ginvum Ngaihte, H.Haukung, HL Hminga, S.Thangkhochin, L.Thanngul, HC Kamchinpau Simte, K.Songkhotuan leh Tuankhogin Tombing hi uhi.Amau tengin tunung in Office bearer bawl ding uhi.APWC President H.Nengsong’ makaih in member sisa 58 te’ suunna leng nei uhi.
Gangte Photo Contest ah 1na la
Lamka, April-17:Huihchim Media Foundation saina in Gangte Traditional Photo Contest 2014 ah Miss Sophia Bailong teltu a tampen ziakin aman 1na la hi. Miss Sophia Bailong bel Delhi a model hi a, Photo Contest hung April 2-15, 2014 sungin contestant 25 om a, amau nampuan tawh kizem uhi. Miss Sophia in 1na alak ziakin cash award Rs 2222 leh Citations ngah ding hi. Topper Award banah consolation prize 10 leng hawmkhiak hiding hi. 16th
Singngat PHC a damdawi kisia
Lamka, April-17:Singngat line ah ni 5 paisa akipan electric pailouh ziakin Singngat PHC ah damdawi tamtak kisia chih hi. Thutut kingah dan in electric pailouh ziakin Singngat PHC a immunization damdawi teng kisia a, nupi gailai leh naungek kap ngaite leng thawnkik zel uhi. Immunisation damdawi himhim khawlum apan kepbit hi a, electric pailouh ziakin damdawi koihna bawm sunga tuikhal(ice) omte leng tui(melt) vek hi’n kigen hi.
Manipur Express office suti ding
Good Friday ziakin April 18, 2014 in Manipur Express office kikhak(suti) ding a, huaiziakin April 19, 2014 issue hong suaklou ding hi.Lamka pansan MHJU-member Newspaper teng April 19, 2014 in suaklou vek ding hi.
Suunna
T.Thangdong (70) h/o Zamngaihniang of Zion Veng, New Lamka zan nitak dak 10:00 vel in cancer in si a, tuni’n YPA Hanmual, New Lamka ah kivui hi.
IMPHAL NEWS:
Governor leh CM akipan message
Imphal, April-17: Manipur Governor VK Duggal leh Chief Minister O. Ibobi in Good Friday ding tawh kisai in Manipur mipite adiakin Christiante deihsakna thuchah puang uhi. Governor in hibang hun poimawh in Manipur mipite lak ah lemna leh muanna banah ki-it tuahna hoihsem hong tut deih thu puang hi. Chief Minister O Ibobi in leng mipite deihsakthu puangkawm in Jesu Christ in mihingte tatna dia a hinna a piak bangin mipite lakah leng gitlouhna leh sualna himhim hoihna leh thudik a zawh ahih deihthu taklang hi.
May 16, 2014 in vote sim kipan ding
Imphal, April-17: Outer Manipur Lok Sabha bial ah April 9, 2014 a election om leh Inner Manipur Lok Sabha bial ah April 17, 2014 a election om ding a vote kikhia teng May 16, 2014 zinglam dak 8.00 akipan in district HQ tuamtuam ah vote sim kipan ding hi. Tutan a kitheidan in Imphal West district ah Counting Hall 4 om ding a,Imphal East district ah Counting Hall 3 om ding a, Thoubal district ah Counting Hall 2 om ding chih hi.District dang akipan Counting Hall omzah ding puankhiak ahihlam zak hinailou hi.
Chandel ah inn 5 kangtum
Imphal, April-17:Chandel district a Mitong Rashankhur ah zan in gamkang in a peh khak ziakin inn 5 kangtum a, van kangtum teng suma tuat in Rs. 9.5 lakhs vel hi’n kigen hi. Thiltung tawh kisai a Bujuur Aanchung Puh(BAP), Bujuur Sanuw Ruwrkhek (BSR), Kapaam Village Women Organisation, Naga Women Union Chandel (NWUC), Naga Peoples Movements for Human Rights (NPMHR) leh Chandel Naga People’s Organisation (CNPO) te’n Joint enquiry team a bawlkhia uh a, panpihna van tuamtuam(relief material) tawh tuni’n thiltunna mun va enkhia uhi. Rashankhu khaw hausa Ng. Angningam in media-te’ ma ah a gendan in tenna inn a sunga van omte sum a tuat in Rs. 2.5 lakhs vel ding kang tum a, W. Rungam kichi godown a buhhum tin 100 kikoih kangtum vek hi’n leng gen hi.
DI driver mat ziakin vote khelou
Imphal, April-17 : 10-Assam Rifles te’n zan nitakin DI Tata driver Khaidem Deven (38) a mat ziakun Lamshang A/C in a huamkhak 17/29-Lambal Polling Station a voter 504 omte’n tuni vote khelou uhi. Thusuak in a gendan in vote khiakna mun ah mipi tamtak paikhawm mahle uh vote khia omlou ua, mat a om Khaidem Deven khahkhiak ahih keileh vote khelou ding chi’n pang uhi. Assam Rifles ten Lamsang Police ah Khaidem Deven pekhia uhi. Huai tawh kisai in local meira paibi te’n huai tungtang ah kuaman panlak pihlou uh hi’n gen uhi.
Army te’n accident tuakte panpih
Imphal, April-17:Tamenglong apan Imphal zuan atai DI Tata 407 khat April 14, 2014 in Awangkhul ah accident a, Red Shield Divisions(army) ten gari a tuang a accident mi 4 te panpih uhi. Huai mi 4te liam uh a, Noney a om Red Shield Division te’n a theih phet un a mun zuan uh a, aliam mi 4 te panpih uh a, medical aid piak zawh in Imphal a RIMS tun uh hi’n thusuak in gen hi.
Irom Sharmila Chanu in vote a khiak ding phallou
Imphal, April-17: Manipur apan AFSPA lakkhiak deihna ziaka kum 13 paisa apan an ngawl a kiphin Irom Sharmila Chanu in tuni’n Inner Manipyur Lok Sabha election ah vote khiak sawm mahleh nan in om chih hi. Thusuak in a gendan in Representation of the People Act, 1951 a section 62(5) dungzui in Sharmila in vote a khiak ding phal hilou chih hi a, Election Commission official te’n tunitakin hilhchetna bawl in, hibang Act nuaia mat a om leh jail a tanglel te’n vote a khethei keiding uh chi uhi. ECI thusuak danin tuma zekin Sharmila in vote khe ut hi’n ngen mahleh dan in a phallouh ziakin angetna nawlkhin ahi chi hi.
Helpawl atel mi 5 mankhia
Imphal, April-17: PRO, IGAR(S) thusuak in a gendan in NH-102 ah hepawl om chih intelligence report tungtawn in 26-Sector Assam Rifles nuai a 24-A/R te’n tuni’n gari neu zang a Moreh zuan UPPK cadre Th Ravi(35) of Kongba Uchekon leh Prepak (PRO) cadre A Pol Singh (35) of Singjamei mankhia uh a, amau apan Kinetic Honda Scooter 1 leh Aadhar Card mukhia uh a, mi 2te banah a thil muhkhiakte uh Imphal West Police ah pekhia uh hi’n kigen hi.
Huai lou in Red Shield Div te’n tuni zingsang in Lambal area a inn khat va um uh a, huai ah PLA hardcore militant SS Pvt Khaidem Deven Singh of Lambal Mayai Leikai man khia uh a, amah apan 9mm pistol 1, magazine 1 leh tang 2 mukhia uh chih hi a, amah kipuanna apan Lamlangai area a operation bawlin PLA hardcore 2 matkhiak a om hi’n kigen hi. Mat a om SS Pvt Huidrom Bhuben leh SS Cpl Telem Inaobi Singh te’ Mana Ingkhol Mamang Leikai apan hi uh a, amau apan 9mm pistol 2, magazine 2, tang 5 leh Chinese hand grenade 2 muhkhiak hi a, Lamsang Police station ah galvan mukhiak teng tawh pekhia uh chi’n PIB(Defence Wing) thusuak in taklang hi.