Manipur government in election ding ziakin suti puang
Inner Manipur Lok Sabha bial ah tuni’n election om ding
Imphal, April-8: Inner Manipur Lok Sabha seat ading in April 17, 2014 (Ningani) in election om ding a, State Election deptt thusuak in a gendan in huai tawh kisai kisakkholhna bangkim zouta uh a, Polling duty dingte leng amau duty-na ding Polling Station tungkim chiat uhi. Zingsang dak 7.00 akipan nitaklam dak 4.00 tan vote khiak hiding a, Independent candidate numei 1 telin candidate 8 om hi. Voter 8,53,069 in Polling station tuamtuam 1256 ah vote khe ding uh a, huai dingin polling personnel 6,388 vel duty ding uh a, amau Gari 854 vel zang ding uh chih hi. Buaina omlou a election zawh ahih theihna ding in Central Para-military force company 68 leh state force company 68 banah galvan tawilou(un-armed) company 47 duty ding uh chih ahi hi. Manipur govt in Lok Sabha election ding ziakin April 17, 2014 in Inner Manipur biala govt office leh bank teng suti hiding in puang hi.
Inner Manipur Lok Sabha bialin a huamkhak District 4 a Assembly Constituency 32 a Polling Station 1256 om lakah Hyper sensitive 76, Sensitive 832 leh Normal 346 ah election siangthou taka om ahih latsakna dingin Election Commission in Live webcast a khakkhiak hiding in puang a, huaite Thoubal district ah Polling Station(PS) 10, Imphal West ah PS 27, Imphal East ah PS 24 leh Bishnupur district ah PS 14 telkhiak hi uhi
April 17, 2014 a Lok Sabha election om ding ah Independent candidate numei Oinam Indira telin candidate 8 om uh a, midangte bel 1) Dr Th. Meinya(Congress), 2) RK Ranjan(BJP), 3) Dr M. Nara(CPI), 4) S. Manaobi(AITC), 5) Dr Kh. Ibomcha(AAP), 6) Dr G. Tonsana Sharma(MPDF) leh 7)Oinam Jiten(JMP) hi uhi. Inner Manipur Lok Sabha biala voter 8,53,069 om lakah pasal 4,15,314 leh numei voter 4,37,755 om uh a, vote nei pasal sangin numei 23,441 in tamzaw hi. Huailou in mun tuama omkhia sepna nei leh defence personnel kigawm voter teng 2,290 om hi’n kigen hi.
Manipur govt in election hun ah voter tengin vote a khiak uh deih ziakin Inner Manipur Lok Sabha bial ah April 17, 2014 in govt office leh educational institution teng suti puang a, Negotiable Instruments Act,1881 dungzui in bank, financial institution leh public sector undertakings teng leng suti hiding hi. Huailou in election ni in constituency dang ah sepna neih ziaka omkhiate’n leng vote khiak theihna ding in Casual Leave laktheih chi’n puang hi.
Inner Manipur leh Outer Manipur biala Lok Sabha election bel May 16, 2014 in vote sim kipan ding a, state tuamtuam a election result-te leng May 16, 2014 akipan mah in vote sim hiding hi.
Huailou in Manipur a Private Sector establishment tuamtuam dukan (shop), hotel, restaurant, workshop, educational institution, hospital, clinic, cinema hall, printing/press, newspaper establishment, training institute, financial institution, contractor-te nuaia nasemte leh adangdang a semte’n a vote chiat uh khethei dinga suti pechiat ding in Manipur govt a Dy Labour Commissioner in theihsakna leh ngetna kithuah bawl hi.
PMEGP thu ah tuni’n Awareness Camp om
Lamka, April-16: Directorate of Commerce & Industries, Govt of Manipur saina in tuni zinglam dak 11:00 in Hmuia Veng a YMA Hall ah PMEGP tawh kisai Awareness Camp om a, John B.Tlangtinkhuma, IAS, Director (Commerce & Industries) banah CCpur dist a Lead bank (SBI, UBI, Axis bank, HDFC, ICICI) a Manager-te’ tel uhi.
Director in a genna ah PMEGP loan late’n hoihtaka aditkik ualeh bank-te loan pe ding a mansa hi uh chi’n gen a, PMEGP loan kichi govt in grant dan in athawn(free) a pelou in beneficiaries te’ mahni kitoudelhna dingin loan dana pezaw hi’n gen hi.
S.Kaikhanthang, Chief Manager, SBI/CCpur in agenna ah loan kichi a thawn in govt in kuamah pe ngeilou ahihdan beneficiaries te’n a theih ngai hi’n gen hi. Tumalam in loan late’n amau puakkhiat ding sum om ahihlam theihsiamlou uh a, loan a kipia sum teng govt in a piakvek ding sak ziakin deihbang a loan pai hoihtheilou hi’n gen hi. Loan apply-te’n project hoihtak bawl in huai sepsuah a kitoudelh zawh sawmchiat poimawh chi’n gen hi. Govt in PMEGP loan tawh kisai guideline a bawl hoihtaka zuih hidin leng gen hi.
Old Bazar ah meltheihlouhte’n mi 1 kapliam
Lamka, April-16:Old Bazar, Super Market a om S.B Hotel sung ah tuni nitak dak 6:20 velin galvantawi meltheihlouhte’n pasal 1 kapliam uh a, kapliam a om pen taikhia in Zenhang Lamka mipi’n ana buai pih uh a, Police-te’n a theih un va pikhia in Dist Hospital ah pawlut uhi. Thu kizadan in SB Hotel sunga mi 1 omlai meltheihlouh mi 2/3 vel in kapliam uh hi’n kigen a, ahihna bangmah kitheilou hi. Amah Casualty ah Letkhotinthang Haokip s/o Thangsei Haokip of T.Champhai, Ccpur hi’n kigen a, a gim mahmah ziakin Doctor te’n RIMS ah referred uhi. SB Hotel a thiltung tawh kisai in Police te’n FIR No. 52 (4) 2014 CCP-PS U/S 307/326/34 IPC & 25(1-C) Arms Act registered uhi. Gogou Vaiphei, Secretary, Info & Public Relations, KNF(N) apan kizadan in kapliam a om Letkhotin pen KNF(N) in a suspend hi a, huai zukkik(revoke)na dingin HQ a sap himahleh limsaklou in ‘gang’ phutkhia in hausate leh dept tuamtuam lakah sum a don ziakin KNF(N) in capital punishment pia uh hi’n gen a, maban ah KNF(N) min zanga mipi hihbuai leh gentheisak a om leh KNF(N) ideology tawh kituaklou a nasemte tungah action lak hiding chi uhi.
Kapliamsa in Hospital kitun
Lamka, April-16: Thudang khat ah tuni nitak dak 6:30 in Boipu (30) of Zangnomphai, a veilam khuknuai thau a kapliamsa Dist Hospital a casualty ah mi bangzah hiam in pawlut uh a, Doctor leh nurse te’n dressing bawlzawh sawtlou in casualty nuse ngal uh hi’n kigen hi.
ADC/CCpur sik-le-tang in ADC Chairman in inn kangte enkhia
Lamka, April-16:Thanlon sub-divn sunga om Pherzawl khua ah zan sun in akipatna theihlouh meikuang apan inn 3 kantum dimdem a, innkang ah Lalhmangpui, MDC tenna inn leng telkha hi. Tuni zinglam in ADC/CCpur sik-le-tang in Langkhanpau Guite, Chairman ADC/CCpur leh Lal Hosan, EM/ADC te’n Pherzawl khua pha in inn kangte enkhia uhi. Inn kang kha'te Lalhmangpui, MDC; Zawlsawnlien leh Lalthlamuong ading in Pathian kiang ah thumsak uh a, maban ah bialtu MDC leh MLA tawh pangkhawm in panpihna bang omthei ding hiam chihleng enkhia uh hi’n kigen hi. Huailou in bialtu MLA Vungzagin Valte in ama’ worker mi bangzah hiam sawl in tuni’n Pherzawl khua pha uh a, panpihna tuamtuam leng pia uh hi’n thusuak kingah hi.
COPS makai ding mi 9 telkhia
Lamka, April-16: Civil Officer Pensioners’ Society (COPS) pawlin tuni in Mission Road, Hiangtam Lamka a COPS office ah 22nd Annual General Body meeting nei uh a, kum 2014-15 sung budget dingin Rs.7 lakh bikhiah uh a, 2014-16 sung COPS makai dingin mi 9 telkhia uh a, huaite’n tunung sawtlou in Office Bearer ki form ding uh hi’n kigen hi. COPS makai thakte- Nengsong Hangzo, Lianvel Khuptong, Vungsing Sona, LT Juan Tonsing, Chinkhokam Hangshing, L.Thanngur, Ginvum Ngaihte, Lalhmachhuana leh Ginkhozam Leivang hi uhi.
Manipur Express staff te’n ngaisiamlou
Lamka, April-16:New Lamka a Tuikulh(well) nasemlai akia om chihthu zak ziakin Manipur Express a Reporter khat in Dist Hospital vadelh in lem alak laiin Siampu of Pearsonmun(Vengkhang) in lemlak phallou chikawm in vau a,a ut leh inn apan leng pikhe thei a chih banah Editor-te leng laulou hidan in genkhum hi. Lemlak phallouh hiam a thu suah ding lemsalou ahih leleng kamsiam a gentheih hizenpi hibanga kivau leh muhsitna kampau kizatkhum Manipur Express staff te’n ngaisiamlou in Press-te zalenna bangmahlou suahsak sawm ahihna ah mawhpaihna sangpen puankhum hi a, thil omdan ki-ngai serious mahmah hi.
Lt.Gen Himalaya in Army White Knight command ding
Imphal, April-16: Thoubal district sung Charangpat a om Lieutenant General Konsam Himalaya Singh in Jammu & Kashmir a Army White Knight Corps (16 Corps) command ding a guan in om hi. Lt General Konsam Himalaya Singh bel Lt. Gen. KH Singh chih a om hi. Amah Assam a Sainik School a khanglian ahih banah National Defence Academy tungtawn in 2nd Bn Rajput Regiment joined hi. Aman Counter Insrugency (CI) Operations tawh kisai in Jammu & Kashmir (J&K) ah experience hau mahmah a, kum 5 a om nungin Northeast ah kum 4 om a, tuanung in J & K ah kisuan nawn hi. Aman 1998-2000 sungin Siachen Glacier ah 27th Rajput-te ana command a, tulelin Chief of Staff of Strike Corps ah posting a, tuanung a Army White Knight Command ding a suan in om ahi.
RIMS Hosital in masawn pah ding - Med Supdt
Imphal, April 16: RIMS a Medical Supdt hihna lenthak Professor Amuba Singh in damlouh ziaka RIMS Hospital zuante’n kingakna thamching leh muanhuai a sak ding un tuban hun sawtlou sungin RIMS Hospital masawn leh khangtou dia puah taktak hiding chi’n gen hi. Med Supdt in tuni’n a office ah Media-te kimuhpih kawmin a genna ah RIMS kichi ki-etkolna mun kia hilou in doctor leh nurse tamtakte zilna mun educational institute hi’n leng gen hi. Aman a genzelna ah Hospital a damlou omte’n nuamsa a, a khiaklah theih ding uh Hospital nuam hidia puah a tup thu leng gen hi.
General Strike in nawngkaisak
Imphal, April-16: Maoists helpawlin tuni zingsang dak 5.00 akipan nitaklam dak 5.00 tan dakkal 12 sung General Strike a puan ziakun Manipur pumpi ah hindan ngeina hihbuai a, Imphal khawpi leh mun tuamtuam ah dukan, bazar leh school/college a kikhak banah lampi ah gari tai leng muh ding tawm mahmah hi.
Preliminary exam om ding
Imphal, April-16: Manipur Public Service Commission(MPSC) saina in April 23, 2014(Wednesday) zinglam dak 11.00 akipan sunnung dak 2.00 tan ‘Manipur Civil Services Combined Competitive (Preliminary) Examination, 2014’ om ding hi. MPSC thusuak in a gendan in Examination Centre 24 ah candidate 11,983 vel exam ding uhi.
Meikang thuakzoulou in mi khat si
Imphal, April-16: Imphal West district a Tera Khuraijam Leirak ah zan nitak dak 9:00 velin fuel Godown(thautui koihkhawmna) a meikang om a, huaiziakin care taker sem Oinam Sanayaima (42) s/o Biramani of Ninghoukhong a taksa pumpi 80% kangin Shija Hospital a etkol in om mahleh tuni zingsang dak 7:10 velin dam zoulou in si hi. Akigendan in fuel go down neitu Binamadhop Sharma in diesel zuakin sumdawng a, thiltung tawh kisai in Tera Khuraijam Leikai a local club te’n meeting nei in amau Leikai sungah black a thautui zuak kham dingin thupukna bawl uh hi’n kigen hi.
Treasury in MGNREGS fund release ding
Imphal, April-16:State govt(Treasury) in MGNREGS fund diklou taka azat louhna dingin Ministry of Rural Development tungtawn in tu financial year 2014-15 akipan Expenditure-based Fund Release System zang a, huai tungtang state govt leng theisak chihthu om hi. Huai dungzui in Central govt akipan fund leh state share leng tuban ni 3 sungin State Employment Guarantee Fund tungtawn in State Treasury in fund a release ngai ding a, state Treasury in hun bikhiah sunga a release kei leh Centre in fund piak tawpsak mailou in state in a zekaisak hunsung 12% interest la ding hi’n thusuak in gen hi.
Thusuak in a gendan in innkuan 5,08,500 vel job-card piak hi uh a, huai lakah Senapati, Thoubal, CCpur, Imphal West, Ukhrul, Bishnupur, Chandel leh Tamenglong district in job-card ngah tampen uh chih ahi hi. State govt in financial year 2013-14 sungin Rs. 276.44 crore leh state share Rs. 47 crore vel released a,huchibang fund-te leng District Programme Co-ordinator/DC tungtawn a piakkhiak hi’n taklang hi. Tunung in fund himhim Gram panchayats/ village authority (50%) banah Zilla Parishad/ ADC (25%) tawn in pai ding a, adang concerned line department (25%) tawn in pai ding hi.