SoO atel cadres te’n vote a khethei ding uh- CEO
Manipur Inner bial a voter 8 lakh valte’n vote khe ding
Imphal, April-15:Manipur phaizang biala helpawl tuamtuam India govt leh Manipur govt tawh kihouna(tripartite talk) kitheihsiamna suaikai(SoO) a tel cadre 584 te’n amaute’ omna designated camp ah vote khe thei dinga Election Commission of India(ECI)a ngetna om lawhsam chihthu om nungin SoO nuaia om cadre te’n ballot paper tungtawn in vote khethei ding uh chi leuleu uhi. Tutung Lok Sabha election 2014 om ding ah Manipur phaizang bial apan voter 8,53,069 omte’n May 17, 2014(Thursday) in Inner Manipur Lok Sabha bial a election om ding ah vote khe ding uh chih ahi hi.
Suspension of Operation (SoO) nuai a om helpawl cadre te’n electoral roll ah a min uh a telkhak aleh amau min telna polling booth-te ah vote khethei ding uh chi’n Chief Electoral Officer(CEO) O. Nabakishore in tuni’n gen hi. CEO Nabakishore in News saite kiangah Inner Manipur Lok Sabha Constituency a election ding tawh kisai in kisakkholhna bangkim felvekta ahi chi a, constituency 32 a voter 8,53,069 te’n Polling station 1256 ah vote kheding uh chi hi. Zinglam dak 7 geihin EVM hon hiding a, huai apan vote khiak kipan in nitaklam dak 4 tan vote khiak theihding chi hi.
Tulela SoO nuaia om Manipur phaizang helpawlte ahihleh URP, KYKL, MDF, KCP-Lamphel, UPPK, UTLA, KCP-Nongdrenkhomba leh KCP-MC Lallumba hi uh a, electoral roll a min telkha cadre leh leader tengin ballot paper in vote khethei ding uh chi’n O Nabakishore in gen hi. Manipur’ CEO in ECI kiangah Manipur phaizang helpawl te’ laka SoO nuai a omte’n vote khethei ding uhiam chih dotna a bawlpe’n ECI in pomsaklou chih hi a, himahleh tuni’n CEO in Manipur DGP tawh thil omdan genkhawm in SoO atel cadre-te’n , vote khethei dinga ngetna a bawl Manipur’ DGP pomsak in arrangement bawl hiding in gern chi’n O. Nabakishore in gen hi. Inner Manipur Lok Sabha bial ah pasal voter 4,15,314 leh numei 4,37,755 om uhi.
Car in phutkhak taisan mahleh mipi’n mankhia
Lamka, April-15:New Lamka a College Road bulah tuni nitak dak 8.00 velin Maruti Car (No. MN05A/5100) hat tak a tai in Chinzalal (58) h/o Ngaita of Vengnuam innlam zuan a scooter a tailai phukha in taisan a, huai mun a omkhate kikouzakin mipi kipunkhawm uh a, Maruti Car nungdelh in Rayburn College kiangah mankhia uhi. Car in a phutkhak Scooter naktakin kisia a, scooter atuang Chinzalal aveilam khut mun tamkhop leh a awm liam a, hospital tunpih nungin akhut kehna munte Nurse-te’n khuisak uhi. Scooter ahihleh College Road a lutsuk ding kisalai College Road akipan hattak a hong taitou Maruti Car in phu hi’n scooter driver in gen hi. Mipi thangpaite’n Scooter phukhatu Car driver mankhia in vua uh a, a gari leng mipi thangpaite’n khensia uh hi’n kigen hi. Police-te’n Scooter phukhate banah Car leh scooter la in Police Station ah kem uh chihthu om hi.
Petrol man litre ah 70 paise in kiam nawn
New Delhi, April-15: Government in tuni’n gamsung pumpi ah thautui (petrol) man litre ah Re 70 paisa in kiamsak nawn hi. Tukha sungin petrol man 2vei a kiamna hita a, tuni (April 15, 2015) zankim apan zatpat hi’n kigen hi. Indian Oil Corp(IOC) thusuakin agendan in petrol man kiam mahleh, diesel man bel a ngeingei hilai phot ding a, United States dollar kikhen dan dungzui in Indian Rupees leng kikheng danglam toutou thei dinmun ah om chi uhi. Indian metropolitan cities tengah petrol man Re 70 paise a sukniamvek ahih ziakin thautui(petrol) man kibangkim veklou ding ahi chi uhi.
India adia thautui supply-tu lianpen Indian Oil Corporation (IOC) in niteng leh hunteng in international oil prices (rate) en gige uh a, huai tawh kizui mahin rupee-US dollar exchange rate leng enkak zel uh chih hi. Diesel man tawh kisai ahihleh kumlui 2013 in litre ah 50 paise in khangsak uh a, January 2013 apan tuni tan etin diesel man litre ah Rs 8.33 in khangta, kha 14 sungin litre ah Rs 8 val a khanmawk pe’n IOC mawh hilou ahi chi uhi. Litre ah Rs 8 valin khang mahleh IOC in tua hunsungin litre khat ah Rs 5.49 bang mangban veve ahi chi uhi. April 1, 2014 in petrol man litre ah Rs 0.75 in kiam a, national capital New Delhi ngial ah retail selling price Rs 0.90 per litre in kiamzou chi’n IOC official te’n gen uhi.
Sadhu Sunder Singh’ tunu in thugen
Lamka, April-15: Missionary minthang Sadhu Sunder Singh’ tunu(a sanggamnu’ tanu) Sis Santa Kaur in tuni nitak dak 6.00 in Chiengkawnpang a ESC biakinn ah Pathian thugen hi. Gospel for India(GFI) pawl saina a biakna kikhopna ah Sis Santa Kaur in amah tanchin leh tunitan a nasepna banah tangthupha gen hi. Aman April 16, 2014(Wednesday) nitaklam dak 6.00 in Central Lamka EBC biakinn ah thugen nawn ding hi.
Pherjawl khua ah inn 3 kangtum
Lamka, April-15:Tuni sun dak 12.00 velin Thanlon sub-division sunga om Pherzawl khua ah inn 3 kangtum chihthu kiza hi. Thiltun hun in khawsung mite’ nasem in kuankhia uh a, innsung vanzat bangmah lakkhiak man omlou hi’n kigen hi. Inn kang 3 neitute bel theihchet hi nailou hi.
‘Blood Moon’ en nuam mitam
Lamka, April-15:Tuni nitak in gam tuamtuam ah Blood Moon eclipse et-theih ding in kilang hi.Mun khenkhat ah April 14-15, 2014 kawmtuah in zankim lai in kilang a, dakkal 3 leh minute 30 vel om hi’n kigen hi. Lamka ah leng tuni nitak dak 6:40 in kilang pan a, a ennuam mipi tam mahmah hi. Blood Moon bel sekkhum rong(orange) tawh kibang in Lamka area ah kilang a, orange rong akipan asan(red/blood) rong in kilang nawn hi. Tukum adia lunar eclipse masapen leng tunitak hi a, NASA thusuakin a gendan in kum 500 sunga 3vei lel a kilatna din tuni nitakin kilang nawn hi.
Police constable 1 telin mi 2 kapliam in om
Lamka, April-15:Tuni nitak dak 7:30 velin T. Champhai khua ah pasal 7 vel inn khat ah zu dawn a omkhawmlai meltheihlouh pawlkhat in tukvelh akipan thau in kap uh a, huai ah mi 2 liam in hospital ah etkol in om uhi. Thu kizadan in liamna aliamte T. Alexander Haokip (24) s/o Ngampao of T. Champhai leh T. Thiankho Haokip (25) s/o Thangkhosei hi uh a, T. Alexander a gil lak thautang in hetliam kha a, Thiankho pen a pheipi taklam kapliam kha uhi. T. Thiankho ahihleh Henglep PS a Police constable hi a, amah tuni nitak mahin Imphal ah etkol dingin refer in om hi.
STC 58th Annual Assembly om ding
Lamka, April-15:Simveng a SYO Hall ah April 23, 2014 in Simte Tribe Council (STC) Annual Assembly 58veina om ding hi. H.Donglian Simte, First General Secretary, Simte National Council (SNC) in Assembly hong ding a, Speaker in L.Kamchinhau, Fin. Secretary, STC Gen Hqtr pang ding hi. Huai ah SYO Gen HQ nuaia Unit leh Block chih apan palaite kikhawm ding uhi. Huai hunah Audit Note 2013-14 luikhiakna leng om ding a, kum 2014-15 a Budget leng bikhiah ding uhi.
Police 10 val DC office ah duty ding
Lamka, April-15:DC/CCpur office a Strongroom ah EVM teng a kikoihziakin Loktak Project a om 54-Bn BSF ‘F’ company-te duty uhi. Duty-te khauh mahmah uh a, DC/CCpur office akipan card issue neiloute lut theilou uh a, vehicle pass neilou gari-te leng gate sung ah lutsaklou uhi. DC office a hihding poimawhnei mi tamtak in haksatna tuak uh a, huaite khualna ziakin DC/CCpur in Police personnel 10 val May 16, 2014 tan DC/CCpur office gate bul a duty din theisak a, tuni nitaklam in Police te’ DC office ah giaklut uhi. Amau DC office gate bul leh gate pawlam ah duty ding uhi.
Users Group leh SHG-te training
Lamka, April-15:DRDA/CCpur a IWMP saina in tuni’n Tuibuong a Dist Training Centre ah Users Group leh Self Help Group(SHG) pawlin ‘2 days training program on Capacity Building’ kipan hi. Huai ah Dr. RK Ibotomba Singh, PC, KVK/Bishnupur; Kh Brajamani Meitei, SMS, Fishery, KVK/Bishnupur; P.Bijaya Devi, SMS, Horticulture, KVK/Bishnupur leh Bandana Wingombam, SMS, Home Science, KVK/Bishnupur te’n thupi tuamtuam zang in sinsak uh a, April 16, 2014 tan sunzom ding uhi.
Biometric 2nd phase pai lel
Lamka, April-15: SDO/CCpur office ah April 7, 2014 akipan ‘2nd phase Biometric photo’ lakna paitou zel a, June 30, 2014 tan sunzom ding uh hi’n kigen hi. Kum 2011-2013 sung a Biometric kilakhin tunitan a Aadhar card muloute’n internet a www.uidai.govt.in tungtawn in check bawltheih a, feedback dungzui in kilakthak ngai leh ngailoute’ min, pian kum, address leh a dangdang bawldik theih ding hi’n gen uhi. SDO/CCpur office ah thuchian kantheih a, Biometric photo kilaloute’ leng kilaktheih hi’n kigen hi.
Computerisation Paybill training
Lamka, April-15: ZEO/CCpur leh Director of Education (S) saina in April 25, 2014 zinglam dak 11:00 in ZEO office kong a Synod House ah DDO tawh thuahkhawm Headmaster /Headmistress-te’ ading in Paybill Computerisation tawh kisai training om ding hi. Director of Education (S) office akipan official te’n training a telte sinsak ding uhi.
General Body meeting nei ding
Lamka, April-15: Civil Officer Pensioners’ Society (COPS) pawlin April 16, 2014 zinglam dak 10:30 akipan in Mission Road, Hiangtam Lamka a COPS office ah Annual General Body meeting 2014-15 nei ding uh a, huai ah amau pawl tawh kisai thil poimawh omte genkhawm ding uhi.
SUUNNA
Evan. Teacher T.Siamkhai (90) f/o T.Chinkamlian of Chiimtung Veng, New Lamka tuni sunnung dak 2:00 velin teknat in si a, April 16, 2014 in YPA Hanmual, New Lamka ah kivui ding hi.
IMPHAL NEWS
Fire Service Day zatin om
Imphal, April-15: Manipur ah tuni in Fire Service Day zatna om hi. Huai hunah thupi dingin ‘Fire Prevention is the Best Insurance’ zat hi a, Manipur Fire Service HQ a program zatna ah Chief Guest in Manipur Chief Secretary PC Lawmkunga pang hi. Huai hun ah Functional President in Director of Fire Service Chandramni pang a, Guest of Honour in Division Officer L Nabachandra pang hi. Chief Guest in agenna ah hutkhiakna nasep kichi poimawh mahmah a, Manipur state sung etin vangtahna tawh kisai in a sukkhakte deihbang in ahunhun in hutkhiak hikhalou sek a, tua ziakin state govt in State Fire Service a puahphat poimawh mahmah chi hi. Lok Sabha election zawhchiang in state govt official tuamtuamte tawh fire service puahphat ding thu genkhawm hidin gen hi. Manipur Fire Service bel State Police deptt nuaia om din kum 1957 in laklut hi a, kum 1999 akipanin department tuam danin om khia a, tuni chiangin meiphelh sepaih (fire fighters) 281 neilel uhi.
Dr. Th. Meinya inn kiangah bomb kimu
Imphal, April-15:Inner Manipur biala MP Dr. Th. Meinya tenna inn ah tuma in bomb khat muhkhiak in om a, tuni zinglam dak 11:05 in leng Dr. Th. Meinya tenna inn apan metre 1300 vela gamla khumbong Bazar ah IED bomb khat muhkhiak in om hi. Police ten a gendan un IED bomb bel Khumbong bazar a lampi kiangah ah Baba Zarda container in kikoih a, sawtlou nungin security force te’n huai IED bomb lakhia uhi.
Maoists ten General Strike puang
Imphal, April-15 : Maoists helpawlin Indian Union ah Manipur a lut(merger) pomlouh thu taklang kawm in huai pomlouh latsakna in April 16, 2014(Wednesday) zingsang dak 5:00 akipan nitaklam dak 5:00 tan dakkal 12 sung General Strike puang uhi. Maoists thusuak in a gendan in Manipur a Congress govt in mipite naktaka a gentheihsak ziakun general strike puang uh hi’n leng gen hi. Maoists te’n tuni’n Imphal khawpi mun tuamtuam 15 ah bomb koih uh hi a gen in mipi kuapeuh mahni innsung a om a pawtkhe lou ding in theisak uhi. Amau Inner Manipur Lok Sabha MP Dr. Th. Meinya in kum 10 sung MP in pang mahleh a MP Local Area Dev Fund a sakhau a lutsak vek hi’n leng ngawh uhi.
Inner Manipur ah campaign hun beita
Imphal, April-17: Inner Manipur Lok Sabha bial ah April 17, 2014 a election om ding tawh kisai in tuni nitaklam dak 4:00 in campaign hun bei hi. Tuni a vote campaign beima deuh in CPI candidate Dr. M. Nara makaih in a tenna inn apan in Manipur Press Club mun tan CPI pawl rally pai uhi. Inner Manipur Lok Sabha biala candidate mi 8te election a ching dingin kilam-en chiat uh a,amau Manipur dinmun bawlhoihna ding leh khantouhna dinga nasem khechiat dingin kigen uhi.
Trade & Chamber of Commerce office hong
Moreh, April-15: Moreh ah tuni’n Border Trade & Chamber of Commerce office building honkhiak hi a, 9-Assam Rifles a Commanding Officer Col AnadiAtreya in office thak honna nei hi.Aman a genna ah lemna leh muanna kichi michih adia poimawh hi a, tuabang in gamgi jul a tengte’ adingin a poimawhna uh liansem chi hi. Tuaziakin Chamber of Commerce office thak hon theih a om pe’n Moreh mipite’n lam tuamtuam ah a hamphatpih uh deihsak thu leng gen hi. Tua hunah Hill Tribal Council leh Meetei Council Moreh banah Lhunkhosei Zou, Chairman/ADC Chandel in huai uap uh a, mipi tamtak paikhawm uhi.
C PF companies 68 zat hiding - CEO
Imphal, April-15: Inner Manipur Lok Sabha bial ah April 17, 2014 a election om hun ah
Central Para-military Force(CPF)companies 68 zat hiding chi’n Chief Electoral Officer O. Nabakishore in gen a, CPF companies 68te banah state armed police galvantawi companies 136 leh galvan tawilou companies 47 leng zat hiding in gen hi.CEO in a genzeldan in Polling Station(PS) 1256 om lakah Hyper sensitive 78, Sensitive 843 leh Normal 346 om hi’n gen hi.
RK Dorendro in Congress zom
Imphal, April-15: Manipur Chief Minister-lui banah Congress makai poimawh hileleng kum tamkuantak Congress party nusia RK Dorendro in tuni’n Congress zom nawn a, Manipur Pradesh Congress Committee(MPCC) President Gaikhangam in RK Dorendro in Congress a zop pompih thu banah kipah thu genkawm in vaidawnna thupuan gen hi.
‘Mizo Phantom’ kichi mat in om
Aizawl, April-14: Mizoram Chief Minister Lal Thanhawla makaih Congress govt. in Assembly election masa ah EVM khoih( rigging) uh chi a thehzak ‘Mizo Phantom’ hi a kipuang K. Chhawnthuama leh a kithuahpih Journalist K. Lalhruaitluanga zan in Guwahati ah Commandant Zosangliana makaih IRB te’n mankhia uh chihthu om a, matkhiak ahihna ziak diktak bel puankhiak hilou hi’n kigen hi. K. Chhawnthuama in Mizoram Chief Minister kiangah SMS a thon ziakin matkhiak hi ngeita a, mat ahih nungin EVM tungtanga thil a muhkhiak puangkhia hi’n kigen hi.