State tuamtuam 12 a LS seat 121 adin April 17 in election om ding
Inner Manipur ah April 15 nitaklam in campaign hun bei ding
Imphal, April-14:Inner Manipur Lok Sabha seat a candidate-te adingin April 15, 2014 nitaklam in campaign hun bei ding a,huai ding ziakin candidate-te leh political party tuamtuamte’n zan akipan in theihtawp suahin election campaign bawl kisan uhi. Inner Manipur Lok Sabha bialah Independent candidate numei 1 telin candidate 8 om uh a, voter 8,53,069 in Polling station tuamtuam 1261 ah April 17, 2014 zinglam dak 7.00 akipan nitaklam dak 4.00 kikal in vote khe ding uhi. Thusuak in a gendan in Manipur telin state tuamtuam 12 ah April 17, 2014 in Lok Sabha seat 121 ading in phase 5na election om ding chih ahi hi.
Inner Manipur Lok Sabha seat adia candidate 8te ahihleh 1) Dr Th. Meinya(Congress), 2) RK Ranjan(BJP), 3) Dr M. Nara(CPI), 4) S. Manaobi(AITC), 5) Dr Kh. Ibomcha(AAP), 6) Dr G. Tonsana Sharma(MPDF), 7)Oinam Jiten(JMP) leh (8) Oinam Indira(Independent) hi uhi. Polling Station 1261 om lakah Hyper Sensitive 75, Sensitive 826 leh Normal 314 om hi’n Election deptt thusuak in gen a, voter 8,53,069 omzah lakah pasal voter 4,14,314 leh numei voter 4,37,755 om a, pasal sangin numei voter 23,441 in tamzaw hi.
Joint Chief Electoral Officer N. Praveen Singh in tuni’n Press-te kiang a gendan in April 17, 2014 in Inner Manipur Lok Sabha biala election om hun ah Polling station tuamtuam 75 ah live-webcast a khahkhiak hiding in gen a,sms tungtawn in leng election tawh kisai thil omdan theihtheih hiding in gen hi.Live-webcast tungtawn a khahkhiakna ding polling station tuamtuamte bel Thoubal ah polling station(PS) 10, Imphal East ah PS 24, Imphal West ah PS 27 leh Bishnupur ah PS 14 hiding in gen hi.
Joint CEO in a genzelna ah April 9, 2014 in Outer Manipur Lok Sabha seat adia election omlai in singtanggam mun tamtak ah mobile phone coverage a ginatlouh ziakin nawngkaina lianpi om a, hileleng phaijang bial ah bel mobile phone coverage hoihtak a om suak ziakin sms tungtawn in election tawh sisai polling station tuamtuam a voting percentage leh information theihnop omte baihlam takin theihtheih ding hi’n gen a,huai dingin state election deptt in panlakna bangkim zou phialta hi’n leng gen hi.Inner Manipur Lok Sabha bialin a huamkhaknate bel Imphal West, Imphal East, Bishnupur banah Thoubal district a A/C 3 huamsung hi’n gen hi.
Thudang kizadan in April 17, 2014 a Inner Manipur Lok Sabha seat adia election om hun tawh kiton in state dang 11 a Lok Sabha seat 120 adin leng election om ding chih hi a, Karnataka ah seat 28, Rajasthan ah seat 20, Maharashtra ah seat 19,Madhya Pradesh ah seat 10, Bihar ah seat 7, Jharkhand ah seat 6, Uttar Pradesh ah seat 11, West Bengal ah seat 4, Chhattisgarh ah seat 3, Jammu & Kashmir ah seat 1 leh Odisha ah seat 11 adin election om ding hi. Odisha ah bel Assembly seat 77 ading election tawh kithuahkhawm ding hi.
Dist Level PMEGP exhibition zatna kipan
Lamka, April-14: Manipur Khadi & Village Industries Board saina in tuni in Hmuia Veng a YMA Hall ah District Level PMEGP exhibition honna program om a, John B.Tlangtinkhuma, IAS, Director( Commerce & Industries) khuallian apang in hong hi. Huai hun ah Guest of Honour in L.Biren Singh, Chief Executive Officer, Manipur Khadi & Village Industries Board pang a, Imphal apan official hunkhop in leng huai hun hong uap uhi.
Director in in agenna ah PMEGP 2013-14 ah CCpur dist adia target 88 himahleh CCpur district mi-le-sa ahihban ah amah panlakna ziakin mi 288 in loan ngah uh hi’n gen hi. PMEGP loan ngahte’n loan hoihtaka aditkik ualeh govt in sum tamsem loan piakbeh ding hi’n gen a, beneficiaries-te’n hoihtaka loan dinkik dingin ngen hi. PMEGP 2014-15 ading in govt in bank ah Rs.11 crore vel deposit khin hi’n genbeh hi. PMEGP loan tawh kisai mah in April 16, 2014 in Hmuia Veng a YMA Hall ah seminar om ding hi’n gen a, huai ah loan tawh kisai haksatna neite banah bank te’n loan lading a reject-te telin thil tuamtuam kisinsakna om din gen hi. Dist Level PMEGP exhibition bel April 16, 2014 nitaklam in zouding uhi.
Tukum adin Lamka a khawlum hunpen
Lamka, April-14: Tu 2014 kha akipan Lamka leh asehvel ah khawlumdan kikhek nasa mahmah a, tukum adia khawlum nipen, zan sunnung dak 2.00 velin 34.8 °C tung a, khawvot nipen bel April 3, 2014 hi’n kigen hi. Tuni sunnung dak 2.00 in leng zan tawh kibang phial in khawlumdan(temperature) 34.6 °C tung a, tuni adia khawvot hunpen zinglam dak 4.38 in 16.6 °C tung hi. Nitak dak 7.00 tan in leng khualum mahmah lai a, 26.9 °C tung hi’n kigen hi.
Sadhu Sunder Singh’ tunu in mun 2 ah Pathian thugen ding
Lamka, April-14: Sadhu Sunder Singh’ tunu(a sanggamnu’ tanu) Sis Santa Kaur in India gamsung mun tuamtuam a Pathian thugen a vak kualin tulelin Lamka hongpha a, April 15,2014(Tuesday) nitaklam dak 6.00 in Chiengkawnpang a ESC biakinn ah Pathian thu gen ding a, April 16, 2014(Wednesday) nitaklam dak 6.00 in Central Lamka EBC biakinn ah thugen ding hi’n thutut kingah hi.
Khanglai Day-cum-Seminar program
Lamka, April-14:Simveng a Lutheran Youth Fellowship saina in tuni’n Simveng a MELC Church ah ‘Khanglai Day 2014-cum-Seminar’ om hi. Huai ah George Munluo, Advocate in ‘Legal Awareness’ sinsak a, Nengkhanlun, Editor, Zogam Today in ‘society ah media poimawhna’ chih sinsak a, Kamlianlal in ‘choosing carrier’ chih pansan in sinsak hi.
Goerge Munluo in a genna ah govt in mipi phattuampih ding dan(law) bawl a, mipi’n dan (law) a om dungzui in Rights leng nei a, dan om ahihman in dan theilou kichi ngaihdam theihlouh hi’n gen hi. Dan(law) poimawh a, kuapeuhin theihchiat ngai hi’n gen hi. Indian Constitution ah Fundamental Rights poimawhpen a, huai lakah leng Rights to Constitutional Remedy poimawh diak hi’n gen hi. Dan kichi 2 in khentheih a, Crimimal law leh Civil law hi’n gen hi.
Dist Council Meeting omding
Lamka, April-14:Tuibuong a District Council Hall ah April 25, 2014 zinglam dak 11:30 in MDC tengin Council meeting nei ding uhi. Huai tawh kisai in meeting a agenda genkhawm ding deih member te’n April 19, 2014 tan in CEO/ADC kiang ah piak theih ding hi.
FPAI Player of the Year adi’n Boithang Haokip
Lamka, April-14: Football Players Association of India (FPAI) pawlin tukum sunga India a footballer tuamtuam ‘Player of the Year 2014’ piak dinga nominate a bawlte uh lakah Shillong Lajong FC player Boithang Haokip telkha hi. Huai Award bel April 29, 2014 in Kolkata ah hawmkhiak hiding a, tu in voting system in pailel chihthu om hi. Thutut kingah danin Shillong Lajong FC in amau club sunga player-te’ lakah huai award sang thei dingin Boithang Haokip kia nominate uh hi’n kigen hi.
ZFC Managing Board in hihfel
Lamka, April-14: V.Munhoih, New Lamka a Zomi FC office ah tuni in Zomi FC Managing Board te’n 2013-14 session a bei ziak in player-te’ tunga contract sum kibanglai teng hihfel uhi. 2013-14 adin ZFC in player 20 te contract in leikhia uh a , player 3 loan in la uhi. 2013-14 session sungin Zomi FC in lawhchinna hunkhop nei uh a, huaite- Bhutan ah Champion Trophy la uh a, Sikkim ah Quarter Final tan tungin State League ah position 6na tan tung uh a, CC Meet ah Quarter Final tan tungin Moirang ah Semi-final tan tung uhi.
HQ Veng ah nitak curfew puang uh
Lamka, April-14: HQ Veng huamsung(jurisdiction) ah Village Authority(V/A) te’n zan nitak apan thuthak om masiah adin nitak 7:00 apan zingsang dak 5:00 sung Curfew puang uh a, vengsung ah mi 2 sanga tamzaw kizuih phallouh ban ah hiamhei leh vanzat tuamtuam tawileng kham bikbek uhi. V/A in Curfew apuan zahtaklou leh buaina bawl a om a, duty te’n matkhiat a neih ualeh mi malin mawh kipuak ding a, V/A thusuak zuiloute tungah action lak ahih leleng kuaman nam thila la theilou dingin V/A in thusuah bawl uhi.
Manipur ah tuni’n Cheiraoba kizang
Imphal, April-14: Manipuri-te ading a kumthak ‘Cheiraoba’ kichi tuni in Manipur gamsung adiakin phaijang bial mun tuamtuam ah zat in om hi.Huai dungzui in pathian biakna hun leh annek khawmna zang uhi. Tuni a Cheiraoba zatna ah Thangmeiband Cheiraoching leh Singjamei Chinga mun ah numei-naupang telin mi tamtak tangtung(hill top) ah kal uh a, innkuan a tangtung a kal pawl leng om uh a,mipi pumdim uhi. Hiai ni bel Manipuri te’n pathian kianga nektheih chi tuamtuam a piakna hun un leng zang uhi.
Election a duty dingte theisak
Imphal, April-14: Imphal West district ah Lok Sabha election tawh kisai a Sectoral Officer leh Micro-observer teng April 15, 2014 nitaklam dak 3.00 in Lamphelpat a DC/Imphal West office ah ki-report chiat ding in Returning Officer-cum-DC/Imphal West in theisak hi. Huailou in Bishnupur district sung Assembly Constituency 6 a Polling personnel teng April 16, 2014 zinglam dak 8.00 a kipankhe dingin DC/Bishnupur in theisak a,mun tuamtuam akipan Bishnupur zot ngai govt employee-te ading in Keishampt leh Kumbi mun ah Bus kidawh ding chi’n thusuak in gen hi.
Monsoon ma a NH-2 zoudin phut
Imphal, April-14:Senapati District Students Assn(SDSA) te’n thusuah a bawlna uah Imphal-Dimapur lamlian(NH-2) bawlna tawh kisai state govt. nuai a akisaipih te’n tuktui luanma(monsoon season) in lampi bawlna nasep zousiang dinga panla din phut uh a, contractor leh deptt te’n lampi bawl a nelhsiah ziak un accident tamtak om hi’n leng gen uhi. SDSA te’n a genna uah lampi bawlna a mawhpaw te’n gin-om leh mipite’ duh thusam bang ta a lampi bawl din ngen uh a, huai ngetna limsak ahihkei leh kiphinna pan ding uh hi’n taklang uhi.Pawl tuamtuam in leng lampi bawlna hih buailou din ngen uhi.
Imphal News-te tuni suaklou ding
Imphal, April-14:Manipur ah tuni’n Cheiraoba festival a kizat ziakin Imphal a Newspaper office teng tuni kikhak a, huaiziakin April 15, 2014 in Imphal akipan Newspaper teng suaklou ding hi.Amau April 15, 2014 in nasep pan nawn ding uh a, issue masapen April 16, 2014 in suak ding hi.
Inner adin Surveillance team guang
Imphal, April-14 : Inner Manipur Lok Sabha seat adin April 17, 2014 a election ding tawh kisai in Returning Officer apang K. Radhakumar,DC/Imphal West in thusuah a bawlna ah candidate-te’ sum zatdan enkai ding leh huai tawh kisai thil omdan enkhe dingin Video Surveillance team 13 om a, Static Surveillance team 9, Flying squad team 1, Video viewing team 1, Accounting team 5 leh Media monitoring team 1 guan a om hi’n taklang hi. Huaite banah Assistant Expenditure Observers (AEO) dingin mi 5 guan a om hi’n leng taklang hi.
KSO te’n khahkhe dingin ngen
Imphal, April-14:Thangminlun Singsit, Gen. Secy/KSO, Imphal branch in tuni’n New Lambulane, Tribal Market a KSO Imphal Branch office ah media-te kimuhpih in Letsei pimangte’n a innkuante’ leh mipite’ khualna ziaka khahkhe dingin ngen hi.Aman a gen behna ah meltheihlouh pasal 2 in Sanjenthong a MLA inn khat a meeting ding chi’n Letsei Haokip (27) s/o Thangkholun of New Lambulane pikhia in pimang a om ahihdan a innkuante’ theisak uh a, amah pimangte’n sum bangzah ngen uhiam chih theihchet ahih nailouh banah hill based organizationte hidia gintak thu gen a, suntang lai security a khauh hunlai laitak in Imphal area apan Letsei Haokip pimang a omthei tungtang ah state police-te mawhsak huai sak thu gen hi..
Ni 5 sung Namphalong bazar kikhak ding
Imphal, April-14: Myanmar ah zan in ni 5 sung om ding Water Festival om ziakin Assam Rifles te’n ni 5 sung daih dingin Indo-Myanmar International border khaktan uh a, pass(phalna) late bel border kantan in lut in potkhe thei ding uh chih hi. Myanmar a Water Festival ziak mah in Moreh akipan gamlalou Myanmar gamsung a om Namphalong bazaar leng ni 5 sung kikhak ding chihthu om hi.