Tuni zingsangin mun tuamtuam ah Palm Sunday kizang
Lamka, April-13: Christian-te adia hun(event)  poimawh  mahmah Jesu leitunga hong omlai in vualzou a Jerusalem khawpi a lutna champha ‘Palm Sunday’ kichi  tuni’n muntuam tuam ah kizang a, Lamka ah leng saptuam pawl tuamtuam in zang uhi. Naupangte zingsang baihtakin  biakinn a kingak khawm in biakinn apan tumnah leh sawlbawk tawikam in lampi ahonhon in zui uh a, ‘Toupa’ min a hongpai  a hampha, tunungpen ah Hosanna’ chi’n ngaihtak kikou uhi. Tuni zingsang baihtak dak 1.00 vel akipan khawpi sungah naupangte kikou ging kiza a, lampi zui a kikoute lakah naupangte banah piching tamkhop leng muhtheih in om hi.  
     
Lamka area a Christian tamzawte’n tuni a Palm Sunday naupangte ading bikin ngaihsun uh ahi diam chihtheih din om a,  zing leh nitak kikhopna a thugente’n naupangte khalam hinkhua ding leh hasotna  thugen tangpi deuh uhi. Toupa Jesu vualzou a Jerusalem a lut theihgigena a Palm Sunday kizat zawh in April 18, 2014 in cross a Jesu khailup ahih phawk tawntungna ‘Good Friday’ zat hiding a,  April 20, 2014 in a thawhnawnni  ‘Easter Sunday’ zat hiding hi.

Tuni in mun tuamtuam ah bomb 2 puakzak
Imphal, April-13:Imphal East district sung Porompat Police station in a huamkhak Wangkhei Keithel Ashangbi mun ah tuni sunnung dak 2:20 velin IED bomb puakzak  a, hileleng kuamah asi leh liam omlou hi’n kigen hi. Thusuak kizadan in IED bomb puahzakna mun ahihleh Thangjam Angou dukan leh Thokchom Maipaksana inn kikal ah hi a, bomb puahzakna mun ah diameter feet 4 alian lei kuakzou a, Angou dukan leng kisevek in Maipaksana’ innhuang umna fencing leh a inntung kisezek hi’n kigen hi.
       
Bomb puah hun ahMaipaksana leng varandah a tulai bomb puakging a ngaihluat ziak n khaw phawklou a puk hi’n kigen hi. Vengsung  mite’n bomb puahma in huaikim lakah meltheilouh pasal khat in loupa vat mu uh hi’n leng gen uhi. Thiltung theihphet in W. Singhajit, Addl. SP(Ops)/Imphal East makaihna in police team in bomb puahna mun vadelh uh a,  Police a Bomb Disposal Squad-te’n bomb kisel dang omlai hiam chi’n akimlak mun tuamtuam zong uh a, hileleng bomb kiselgu dang muhkhiak neilou uh hi’n kigen hi.
     
Huailou in Moreh Police Station in a huamkhak Moreh Ward No. 2 a om Thangpao(60) s/o Chungkholun tenna in ah meltheihloute’n tuni zingsang baihtak dak 4:30 velin  handgrenade khat a paihlut  uh puakzak  hi’n kigen a, bomb puak ziakin  gari khat kisezek mahleh asi leh liam bel omlou hi’n kigen hi.

Mi 8 in Admn Officer  sepna mu
Lamka, April-13: National Insurance Company tuamtuam a Administrative Officer(AO) sem dingin singtangmi tamkhop lawhching uh a, tunitan a kitheipha dan in singtangmi 8 telkha uhi.  Amaute  Catherine Vungremmawi Guite(National Insurance Co Ltd); Siamthansang Guite(National Insurance Co Ltd) ;  T Ngamminthang Haokip(National Insurance Co Ltd); Hengouthang Lhouvum(New India Insurance Co Ltd) ; Taisangkim Gangte(United Insurance Co Ltd.); Lunminsang Sitlhou(Oriental Insurance ah (Generalist);  John Kennedy Sanate(New India); L David S(National Insurance Co. Ltd.) hi uhi.

Tedim Road lamlian bawlna nasep paizel
Lamka, March-24: North East Trading Corpn a Contractor in Lamka Police Station kong (zero point) akipan Lanva lei(bridge) tan ‘Paver machine’ zanga Tedim road abawl (black topping) nasepna paizel a, Lamka khawpi sung mun sauzaw ah nasepna zawh hita a,zawh nailouhna munte ah nasep sunzom uhi. Mun khenkhat sah huntawk in kilang mahleh mun khenkhat ah panlua hi a kilatna om zekzek a,nasepna quality leng detdoulou deuh dia a kilatna om hi’n kigen hi. Huai ziakin a sahdan kilual deuh leh lamlian kibawl leng kum 3/4 tan bek daih thei dinga detdou a bawl hileh chih lunggulh thu ahunkhop apan thutut kingah hi. Aziakbel Imphal Airport leh khawpi kal lamlian hoihtak akibawl contractor-pa  mah Lamka khawpi a Tedim Road lamlian bawlpa mah hidan a a kigen ziakin a theikha phot in muanhuaisa in Lamka khawpi a lamlian leng hoihtaka bawl hidin gintakna a neih ziak uh ahi hi.

Kum 1 sung in damdoi tamtak zangbei
Lamka, April-13: District Immunisation office in National Child Survival & Safe Motherhood Program nuai ah April 2013-March 2014 sungin damdoi tamtak zangbei uhi. Titenus (T.T) in nupi naupai (pregnant) 5399 kap uh a,TB dalna damdawi in naupang kum 1 nuailamte 4947 vel kap uhi. Polio(zengdalna) damdoi leng naupang 21595 dawnsak uh a, naupang 23522 vel leng khuhhip dalna(DTP) damdoi in kap uhi. Sensidalna (measles) damdoi in naupang 6503 kap uh a, Hepatitis (B0,B1,B2,B3) dalna in naupang13997 kap uhi. JE (Japanese Enphylitis) damdoi in naupang 15546 kap uh a, naupang 6030 vel Vitamin ‘A’ damdoi dawnsak uh a, Titenus (T.T) in naupang kum 10 mi 4846 leh kum 16 mi 5523 kap uhi.

UPC-NEI a Gen Suptd di’n Rev VL Dika

Lamka, April-13: Hmuia Veng a  YMA Hall ah April 10, 2014 nitak in UPC-NEI 46th General Conference kipan a, Rev Elllic Hnehzova, former General Secy,UPC-NEI in hong hi. Gen Conference sungin  kum 2014-15 sunga  makai ding tel uh a, Gen Suptd lenlel Rev. VL Dika Sailo mah Gen Suptd thak dingin telching uhi. General Secy din Rev Lalmalsawma Sailo tel uh a, Gen. Treasurer dingin Rev R.Lalrinsanga tel uhi. Gen Conference sungin  Rev. Zohmingthanzama, Gen.Missions Director UPC-NEI; Rev VL Dika Sailo,Gen Suptd, UPC-NEI; Rev Lalmalsawma Sailo, Gen Treasurer UPC-NEI; Rev R.Lalrinsanga,Gen Secy,UPC-NEI leh Rev Ellic Hnehzova in Pathian thugen uh a, tuni nitak in Gen.Conference zousiang uhi.

Election result zawh in laktheih  ding
Lamka, April-13: Outer Manipur Lok Sabha bial ah April 9, 2014 a election om buaina bangmah omlouh ding deihna ziakin District Magistrate/CCpur in  district a licence nei thau (gun) teng Police station naipen a koih ding in theihsakna bawl a, huai dungzui in Lamka PS ah licence nei thau 77 koih in om hi. Thau neite’n election result puan zawh in thau(gun) laktheih pan ding hi’n kigen hi.

Naupang kum 5 nuailam damlou tam
Lamka, April-13: Tulai nipi khawlum hun kipat ziakin  naupang kum 5 nuailamte lakah sungkhawh,chisa leh luak(vomitting) ziaka damlou tam chihthu om hi. Huai tawh kisai Dr V.C Pau, DFWO/CCpur in a gendan in naupang kum 5 nuailamte’n taksa  ah Gud Immunity taksap ziakin nek-le- dawn ziaka damlou tam uh hi’n gen hi. Naupang leh pichingte’n theigah chi tuamtuam mawk neklouh ding, bazar a nektheih kizuakte neklouh a, adiakin bazar leh lampi gei a meh minsa kizuakte ahithei tana neklouh ding, an(food) leh mehkhing neklouh ding hi’n gen hi. Naupang  sungkhawh, lua(vomitting) te luakkhamna damdoi piakpah a, ORS dawnsak ban ah ORS a omkei leleng chi (salt) tamlou chik leh chini (sugar) sikkeu (spoon)1 dim tui (water) tawh helkhawm a dawnsak ding a gen kawmin kuapeuh in tate siangthou taka kepchiat kivenna hoihpen hi’n gen hi.

SUUNNA
Zenzaniang (55) w/o Khamkhanlian Tombing of Thanlon tuni zinglam dak  4.30  in  District Hospital ah pneumonia natna ziakin si a, Thanlon a vui dingin tuni mahin kipua hi.

ECI in Observer thak guang
Imphal, April-13: Inner Manipur Lok Sabha biala General Observer Chandra Bhanoo,IAS zan nitaklam dak 3.00 velin Moreh apan Imphal zuanlai BP sang ziaka stroke in si a, huaiziakin  Election Commission of India(ECI) in ama mun luah  a General Observer dingin Saurath Bhauthuri,IFS (1985 batch: West Bengal cadre) guang hi. Aman Inner Manipur Lok Sabha biala Assembly constituency(A/C) tuamtuam 16 enkai ding chih hi a, huaite Khundrakpam, Heingang, Khurai, Kshetrigao, Thongju,Keirao, Andro, Lamlai, Thangmeiband ,Uripok,Sagolband, Keishamthong,Singjamei, Yaiskul, Wangkhei  leh Langthabal A/C enkai ding chihthu om hi. Chandra Bhanoo luang tuni zinglam in Uttar Pradesh ah a innkuante kianga puaktung a om hi’n kigen hi.

Tuni General Holiday hiding
Imphal, April-13: Sajibu ‘Cheiraoba’ festival ziakin Manipur govt nuaia office leh educational institution om teng April 14,2014(Monday) in suty ding (General Holiday)  hi a, huailou in Negotiable Instrument Act 1881 nuai ah Bank leh financial institution teng leng suti(Holiday) hiding chih ahi hi.

Inner ah election ding ni 5 in sam
Imphal, April-13: Inner Manipur Lok Sabha bial ah April 17, 2014 a election om ding ni 5 lelin samta a, huaiziakin candidate-te leh political party tuamtuamte vote campaign kisan chiat uhi. Candidate te’n mun tuamtuam ah campaign meeting bawlin thugen uh a,road show leh inn lusi a banlut in campaign bawl leng tam deuhdeuh uhi. Huailou in ni 2 paisa akipan loud speaker zanga lamlian leh veng tuamtuam a campaign bawlte leng kisan mahmah uhi.
     
Inner Manipur Lok Sabha bial ah voter 8,63,069 om a, numei 1 telin candidate 8 om uhi.Returning Officer apang DC/Imphal West in voter-te sum a leisawm hiam, vote muhna dia sum hawmsawm leh sum laksawmte IPC zatkhum in kum 1 sung jail tang thei ding uh hi’n puang a,sum zanga  dan bawhsiat sawm theikhate’n  phone No. 0385- 2411194 a theisak dingin kuapeuh ngen hi.

Gari in a phutkhak dam zoulou
Imphal, April-14: Canchipur ah zan nitaklam a nasem zou innlam zuan a pailai Tata Magic(No. MN04/7512) in Little Rose Hr Sec School gei ah Subroto Dey(36) of Saiton tulel in  Thangal Bazar a om phukha a, JNIMS ah etkol in om mahleh damzou lou in si hi’n kigen hi.Thiltung tawh kisai  Singjamei P/S ah case registered in om a, Tata Magic driver  leng matkhiak hi’n kigen hi.  

Excise te’n fine in Rs. 4 lakh val mukhia
Imphal, April-13:Manipur govt nuaia  Excise department  in Manipur state sung  mun tuamtuam ah dan kalh(illegal) a zu zuak mi 277 mankhia in huaite liausak uh a, fine tungtawn in Rs. 4,27,600 vel mukhia uh chi’n K. Joykumar, Excise Asst Commissioner in tuni’n Lamphel a Excise office ah media-te’ kiangah gen hi. Aman a genzelna ah Election Commission of India in Lok Sabha Election ding ziakin April 12, 2014 tan dan kalh a  zu zuakte mankhia dia drive bawl din  thu apiak dungzui in Excise deptt in mun 411 apan zu zuak mi 277 leh zu litre 7,384 mankhia uh a, zu kimankhiate’  sum a tuat in Rs. 10,45,600 vel man hihse vek uh hi’n gen a, Election code of conduct zat tawh kitawn in State Election Monitoring cell in drive a bawl leng hihkhauh sem hi’n leng gen  hi.

‘Battle of Nungsigum’ zatna om

Imphal, April-13 : ‘70th Anniversary of the World War II, Battle of Imphal’ te saina in tuni’n   Imphal ah ‘Battle of Nungsigum’ kichi zat in  om hi. Huai hun ah  mi bangzahhiamten Kidoupi 2na hunlai in  Imphal leh Kohima a site theihgigena dinga kibawl ah pak(wreath) pia uhi. Imphal khawpi apan km. 20 vela gamla Natum hill range ah zat in a, tua hun ah Chief Guest in  Convenor Dr. Th. Dhabali pang a, Functional President in Co-convenor Arambam Angamba Singh leh Guest of Honour in Keibi Khullen Development a Secretary A. Achoubi Singh pang uhi. Huai hun ah World War veteran innkuante banah New Delhi apan film maker Utpal Bordoloi tel uhi.

MSCP pawl kipuahthak uh
Imphal, April-13: Manipur State Congress Party(MSCP) President Y. Mani leh MSCP Working President Kh Debabrata makaihna in office bearer khenkhat leh MLA 5 in April 3, 2014 a Congress a zop(merged) nungun  N. Bihari Singh,ex-Minister makaihna in Sanjenthong a om MSCP Vice President Adim Pamei tenna inn ah zan in MSCP a Central Executive Committee member-te, party leader hunkhop leh MSCP ticket a MLA candidate tengin joint meeting nei uhi.Huai ah  President dingin Adim Pamei guang uh a,Working President dingin N. Bihari Singh banah General Secretaries dingin Bountia Keishing leh N. Asharani Devi guang uhi. MSCP thusuak in a gendan in makai masate’n Congress a zop ziakun vaipawthak ding guan ngai hi’n gen a,Inner Manipur Lok Sabha biala candidate kua support ding hiam chih leng genkhawm ding uh chih ahi hi.

Helpawl atel mi 6 mankhia
Imphal, April-13:Red Shield Divn apan thusuak in a gendan in ni 2 paisa sungin mun tuamtuam  search operation  bawlna ah helpawl atel mi 6 mankhiak hi’n kigen hi. April 11, 2014 in Army te’n CCpur leh Imphal kikal ah NSCN-K a Regional Council member apang Khubung Rongmei of Mukti Khullen, Tamenglong district  mankhia uh a, tuni’n Khumji II mun ah NSCN(K) a S/S Second Lt. Thuanjin Gangmei of Nungtek I, Tamenglong dist. leh S/S Pvt. Philip Phaomei of Guangram, Tamenglong dist mankhia in  amau apan 9mm pistol 1 leh tang 4 mukhia uh hi’n kigen hi.
     
Tuni zinglam in Awlmun leh Khubong area apan KNF(N) cadre S/S Pvt Angom Santa of Phaiyang Chingkhunnou leh S/S Cpl Angom Tomba Singh of Phaiyang Chingkabam mankhiak hi uh a, amau apan 9mm pistol 1, magazine 1, tang 2, 9mm SMC 1, magazine 1 leh tang 4 mukhia uh hi’n kigen hi. Imphal West district a operation bawlna ah KYKL cadre S/S Cpl Sorokhibam Boacha of Mayang Langjing Tening Makha Leikai matkhiak hi a, amah apan 9mm pistol 1, magazine 1 leh atang 3 muhkhiak hi a, mat a omte leh galvan muhkhiak te police te’ khutah piak  hi’n leng taklang uhi.

THUSUAH

Office of the
Village Authority: Headquarter veng
Lamka, CCpur, Manipur- 795 128
PRESS RELEASE
13th April, 2014
Headquarter veng huapsung (Jurisdiction) ah April 13, 2014(Sunday), nitak dak 7 akipan zinglam dak 5 tan Curfew puan ahi. Tua tawh kiton in, vengsung a mi 2(nih) sanga tamzaw kizuih phal hilou a, hiam hei hi’n vanzawt tuamtuam toi leng kham bikbek ahi. Hiai Curfew kipuang zahtak lou a, buaina bawl a om a, duty te’n mat a neih uleh amawh amau akipuak ding banah V/A thusuah zuiloute tung a action kila pen kuaman nam vai in ala theikei ding hi.

Sd/-(T. Vumzamang)    Sd/-(Liantinlal)
Chairman    Secretary