Polling Station 6 ah April 12, 2014 in repoll om ding
Outer Manipur biala vote kikhia 84.56 % tung 
Imphal, April-11: Outer Manipur Lok Sabha bial ah April 9, 2014 a election ah voter 9,11,699 lakah voter 7,72,406 in vote khia uh a, voting percentage 84.56 % tung chi’n Chief Electoral Officer(CEO) O. Nabakishore in gen hi.Kum 2009 Lok Sabha election a vote kikhia 83.15% hi a, huaima kum 2004 a vote kikhia zah 77.82% ahi hi.CEO Manipur in tuni nitaklam dak 3.00 in Manipur Secretariat building a a office ah Press Conference sam a, Outer Manipur biala Returning Officer leh district tenga ERO te akipan report kimu dungzui in Election Commission of India(ECI) a report piak nungin ECI thusuak dungzui in Polling station 6 ah April 12, 2014 zingsang dak 7.00 akipan nitaklam dak 4.00 tan re-poll om ding chi’n puang hi.
CEO in ECI apan thusuak a gendan in repoll omna ding Polling station(PS) 6te Chandel district sung a PS 2, Ukhrul district a PS 1 leh Senapati district a PS 3 hi a, huaite
1)41-Chandel Assembly constitutency(A/C) a 41/21-Lambung PS ah EVM siat ziak hi a,
2)Chandel district sung mah 42-Tengnoupal A/C a 42/26-Molnoi PS ah vote omzah sangin vote kikhia tamzaw chih hi.
3)44-Ukhrul A/C a 44/2-Sana Keithel PS ah leng vote omzah sanga tamzaw kikhia chih hi.
4)Senapati sung 46-Saikul A/C a 46/45-Keirao Tangkhul PS ah leng vote omzah sanga tamzaw kikhia chih hi a,
5)Senapati district sung mah 47-Karao A/C a 47/5- Kapao PS leh
6) Senapati district a 47/19-Phaibung Khunou PS ah leng vote omzah sanga tamzaw kikhia chih ahi hi.
Atunga kitaklang PS 6 ah repoll om dinga ECI thusuak om dungzui in Outer Manipur Lok Sabha biala Returning Officer in tuni mah in Notification suah hi’n CEO in gen a, repoll omna ding Polling Station tengah security personnel 80 zel duty ding uh hi’n gen hi.
CEO in a genzeldan in Outer Manipur Lok Sabha bial a voter omzah pasal 4,48,631 leh numei 4,63,068 lakah vote khia pasal 3,78,893 leh numei 3, 93,513 hi’n gen a, huai dungzui in voter 9, 11, 699 omzah laka 7,72,406 in vote a khiak ziakun vote kikhezah 84.56 % tung hi’n gen hi.District tuamtuam apan ERO-te akipan thutut kingah dungzui in vote kikhezah percentage anuai bang hi’n CEO in gen hi.
1)Thoubal district a vote 1, 92, 894 omzah laka vote kikhia 1,52, 135 hi a, 78.87% tung hi.
2)Jiribam A/C a vote 25, 953 omzah laka 15,873 in vote khia uh a, 61.16% tung hi.
3)Chandel district a vote 84, 931 omzah laka vote kikhia 78, 062 hi a, 91.91% tung hi.
4)Ukhrul district a vote 97, 769 om laka vote kikhia 86, 597 hi a, 88.57% tung hi.
5)Senapati district a vote 2, 49, 554 om laka vote kikhia 2, 24,16 hi a, 89.83% tung hi
6)Tamenglong district a vote 83, 423 om lakah vote khia 72, 246 hi a, 84.87% tung hi
7)CCpur district a vote 1,77,175 om lakah a kikhia 1,43 329hi a, 80.95% tung hi’n CEO in gen hi.
Tuitha-lui ah naupang kum 5 mi kelum
Lamka, April-11: Tuni nitaklam dak 3.00 velin Tuithapi khawgei a Saikul khua a Tuitha(Khuga) lui ah naupang kum 5 a upa Mangtungnung Sektak (5) s/o Lawma Sektak kelum hi. Thu kizadan in tuni a school suty ziakin Mangtungnung a sanggamte mi 3 tawh Tuitha ah kisil in vahawh uh a, feet 10 a thuk Tuitha-lui a akisil lai un amah buaisia in kia hi’n kigen hi. Huchih lai in Mangtungnung’ pa Lawma Sektak a nasepna Tonglon khua ah sing-at in om chih hi. Mangtungnung in sanggam pasal 6 leh numei khat nei a, aneulam apan a 3na hi’n kigen hi. Amah a buaisiat phetin Ginjamang of Siloijang in vadelh in minute 5 vel in siluang lakhe thei hi’n kigen hi.
Mangtunnung’ luang Tollen, Monglenphai, Vajing leh Moldannom mipite’n nam puandum a tuam in Saikul khua tan ah vakha uhi. Amah Tollen J.B. School a Class-A zil hi’n kigen a, Tollen nehlam Saikul lei(bridge) laka kisil lai tuahsia hi’n gen uhi. Tuahsiat hun in a sanggamte leng naupang ngen ahihman un hunkhe zoulou uh hi’n kigen hi. Siluang tuni nitakin zanhah pih ding uh a, April 12, 2014 in Saikul hanmual ah kivui ding hi. Tollen, Monglenphai, Vajing leh Moldannom mipite’n tuahsiatna mun vadelh uh a, hileleng naupang a sihkhit ziakin hospital tunlou in a khua ua paipih uh hi’n kigen hi.
UBI-te’ VSAT vanzat kigumang
Lamka, April-11: UBI/CCpur Branch te’n a zat uh VSAT kichi UBI/CCpur building rooftop/terrace a kikoih tuni sunnung dak 2:00 velin VSAT a kizang Low Noise Block (LNB) leh Out Door Unit (ODU) kichi guta kuahiamte’n gumang uhi. Tuni’n UBI staff te’n Computer hoihlou chi’n VSAT koihna mun a etkhiat ua leh LNB leh ODU kigumang ahihlam theikhia uh hi’n gen uhi. Tuni mah in Police ah report uh a, Police te’n gutate suizui uh a, FIR No. 49(4) 2014 CCP-PS U/S 379/34 IPC registered uhi.
AC Passing- out parade ah 7 tel
Lamka, April-11: CRPF Academy Kadarpur,Gurgaon ah CRPF Asst. Commandant(AC) training zoute’n Passing-out Parade(POP) nei uh a, huaite lakah singtangmi 7 tel uhi. Huaite Nengsuanlal Mangte, Seiboi Baite, Thawnglianlal Zou, Tongkholun Haokip. T L Robert Haokip, Rex Kom leh Joseph Paotinthang Suantak hi uhi.
Strong room ah koih in om
Lamka, April-11: Outer Manipur Lok Sabha seat ah April 9, 2014 in election om a, CCpur dist a Polling Station 296 a kizang EVM teng zan nitak dak 11:00 in DC’s office tungkimta a, seal bawlpah uhi. Huai hun ah INC, AITC, NCP leh NPF party apan pailaite leng om uh a, seal zawh in Strong room ah koihlut in om hi. DC’s office a strong room ah EVM omziak in Loktak Project a om 54-Bn BSF a ‘F’ company te DC’ office ah duty uhi.
Malaria damdoi hongtung
Lamka, April-11: State Malaria Office, Imphal apan tunai zek in CCpur dist ading malaria damdoi strip 120 hongtung a, huai damdawite damlou gikdan zila nekthawh hiding chih ahi hi.
Guta e’n Activa gumang
Lamka, April-11: Zomi Colony a om Hangchinpau s/o Mangzalian in varendah a a koih Honda Activa (red) No. MN 02A-4886 tu zingsang dak 2:00 velin meltheihlouh guta kuate hiam in gumang uhi. Tulai gutate pil thei mahmah uh a, gate locked ,2-wheeler gari locked sa a omleng gu thei uh a, kuapeuh pilvang a, 2-wheeler gari tanpha innsung mah a koih hoihpen hi’n kigen hi.
A/C 6 a vote khiakzah percent
Lamka, April-11: Outer Manipur Lok Sabha seat ah zanhal in election om a, CCpur dist a Assembly Constituency(A/C) 6 ah vote 177175 om lakah vote 143430 kikhia a, 80.95% tung hi’n kigen hi. Assembly Constituency wise a vote khiakdan percentage tangpi Tipaimukh A/C ah 78.20%; Thanlon A/C ah 88.55%; Henglep A/C ah 85.87%; CCpur A/C ah 70.70%; Saikot A/C ah 84.65% leh Singngat A/C ah 85.56% ahi hi.
Guta khat kimankhia
Lamka, April-11: Tuni nitak dak 9:00 velin Red Cross Road ah pasal khat meihol guksawm lai veng mipi’n mankhia uh a, Police khut ah pekhia uhi.Amin Dongkholun (23) s/o late Ginchinthang of Santing (tulel a New Bazar a om) hi’n kigen a, ama’n bel, sik leh van tuamtuam gusek hi’n kipuang hi.
Naupang khat operation zawh in si
Lamka, April-11: Apaisa April 8, 2014 nitaklam dak 3-4 kikal in Molvom leh Tuining kikal a Tuining lei (bridge) ah bike (Yamaha FZ) a accident ziakin Lalminjoy (11) s/o Paukhogin Singson of Sangaikot (tulela Sangaikot JB School a Class V sinlel) a khe veilam guh kitan a, tuni sunnung dak 2 velin Dist Hospital ah operation kibawl mahleh nitaklam dak 6:30 velin si hi. A sihdan thuchian theih hikei mahleh a khe tanna mun a sik kikilh in a sisan paina dal (block) kha hi’n kigen hi.Naupang sihna ziak doctor te’ limsaklouh ziak hi a ngawh in misi innkuante’n nitak zan sawtnung tan in leng siluang lalou uh a, KSO Gen HQ in leng huai thu ngai serious in delhpah uh a, KKL makaih in kihoulem ding dan ngaihtuah uh chithu kiza hi.
Ni 3 sung akizom in suti ding
Lamka, April-11: April 12 (2nd Saturday), April 13 (Sunday) leh April 14 (Cheiraoba) ziak in Manipur a govt office leh institution teng akizom in ni 3 sung suti ding a, Bank-te leng April 14, 2014 in suti ding uhi.
Tuni in leng OFC kitan zel
Lamka, April-11: BSNL/CCpur ah mi 2,000 velin BSNL landline zangin Internet broadband leng zang uh a,himahleh kha 1 sunga ni 30/31 omlak ah ni 5 sung bang Internet broadband zat theihlouh in om sek hi. Tuni’n leng Bishnupur area ah Optic Fibre Cable (OFC) kitan hi’n gen uh a, internet zang adiakin Press-te adin buaina thupitak tunsek hi.Bangchichi hiamin zan sawtnung dak 12.00 madeuh in internet painawn vanglak hi. BSLN kichi privatise himahleh private company dang tawh tehkak theihlouh khopin BSNL a kizang OFC kitan munlua hi.
Pawl khatin mi 2 soisa uh
Lamka, April-11;Tuni nitaklam dak 6.20 velin muntuam apan hong zin mi 2 pawlkhat in Tedim Road lamlian ah soisa uh a, khatpen JK Springdale Stationary ah tailut thei a,dukan neitu in chimawh a inn a tailut hial ahihna ah khoihlou dia a nget ziakin khamzou a,hibang namdang honglutte identity card neihdan amau pawl(LATSEA) te’n suizui lel hi’n leng gen chih ahi hi.Thil omdan theikhate gendan in Kerala mi 1 leh Israel mi 1 Sikkim a kimutuah in huai apan Manipur hongzin uh a, tuni nitakin giahna ding buaipih kawmin mi a tuahkhak khenkhatte kiangah numei poimawh dan in kan uh a, a tuakkha te’n kuate hi uhiam chih chetna identity card nei uhiam chih a dot ua leh neilou achih ziakun iplah in soisa uh hidan in kigen hi. JK Springdale a tailut khalou Israel mi pen tuni nitakin Hospital ah admit a om hi’n kigen a, hileleng gimsia bel hilou dan in thutut kingah hi.
YAS asem mi 9 in promotion mu
Lamka, April-11: Youth Affaris & Sports Deptt asem Youth Officer 5, Suptd 1 leh Coach 3 in Dist Youth Affairs & Sports Officer ding in promotion mu uh a, Commissioner( YAS) in a posting mun ding uh bikhiah hi.Huaite Lunkhosei Haokip (Youth Officer) in DYASO/CCpur len ding a, L.Muhindro Singh (YO) in DYASO/Tamenglong; Ms. Kimneichong Shoute @ Kim Shoute (YO) in DYASO/Chandel; A.Jugol Singh (YO) in DYASO/Bishnupur; Kollin K.Hungyo (YO) in DYASO/Senapati lending hi. Ms. S. Nirmalata Devi, Suptd in DYASO/Imphal East; Ms.T.Purnimashi Devi (coach) in DYASO/Thoubal; Ng. Motilal Singh (coach) in DYASO/Imphal West leh Nganaomi Kashung (coach) in DYASO/Ukhrul lending hi.
Inner bial ah campaign kisan uh
Imphal, April-11:Inner Manipur Lok Sabha bial ah election om hun ding ni 7 lel a omlai ziakin Independent candidate Indira Oinam telin candidate 8te campaign kisan mahmah uhi.Mun tuamtuam leh veng tuamtuam ah election campaign meeting a om banah candidate-te leh party tuamtuam in loudspeaker zangin khawlai leh lamlian julah campaign pawl uhi.
Indira Oinam(Ind) in tuni’n Thoubal Wangmataba a a inn mun uah campaign nasasem a patna dingin flag hoisting programme zang a,mipi kikhomte mah ah a gendan in Manipur a numeite dinmun bawlna ding in Lok Sabha(MP) dingin numei mah telching hileh veng theiu phet ding hi a genkawm in Inner Manipur bial ah kum 1951 akipan numei himhim telching a omlou hi’n gen hi.
Maharaj Nara Singh sih kum 164na
Imphal, April-11: Maharaj Nara Singh sihnung kum 164 chinna tuni’n Deptt of Arts & Culture, Govt of Manipur saina in Kangla ah zat hi a, huai ah Maharaj Nara Singh zahna in a lem(statue) pak(wreath) pia uhi.Manipur Rifles contingent khat in Guard of Honour pia in Gun salute leng om hi. RK Nimai Singh,IAS,Commissioner(Art & Culture) in a genna ah mihangsante zahna piak kia hunlou in amau deihdan zui in om lehang khantouhna leh Manipur adia nopna hizaw ding chi’n gen hi.
General Observer in Bishnupur pha
Imphal, April-11: Inner Lok Sabha biala General Observer DP Yadav in tuni’n DC/Bishnupur office vapha a, Political party tuamtuam a palaite tel in Bishnupur district a A/C 6 bialsung a Polling Station tuamtuam ading 2nd & last EVM randomisation neihpih hi.
Polling station tuamtuam a Polling personnel-te adia randomisation nanungpen April 15, 2014 in om ding chih ahi hi.
Meltheihlouhte’n bomb vakoih uh
Imphal, April-11: PWD a Executive Engineer M. Vabhani s/o late) Ibotombi of Kwakeithel Moirang Purel tenna inn huangsung ah tuni zingkal in meltheihlouhte’n bomb khat a koih uh muhkhiak hi a, thil omdan police ah kintaka a a theihsak ziakun police a bomb expert teamte’n va lakhia in muntuam ah hihsia uh chihthu om hi.
Vote khiakdan leh EVM training
Imphal, April-11: DC/Imphal East office complex ah April 13, 2014 in vote khiakdan sinsakna leh EVM zatdan training om ding a, huai hun ah Sectoral Magistrate leh Micro-observer te telkim chiat ding in DC/Imphal East in theisak hi.Huailou in Imphal East a Polling personnel-te ading in training nanungpen leng April 13, 2014 a om ding in DC/Imphal East in theisak hi.
Pasal khat sisa in aluang kimu
Imphal, April-11: Imphal East district sung Wangkhei Ningthem Pukhri Mapal Makha Leikai ah tuni zingsang in pasal khat sisa in kimukhia hi. Amah Athampam Tanbir Singh (50) hi’n kigen a, a innkuante gendan in zan nitak in a veng ua om T. Loken kichi in va pikhia a, tuanung inn tungkiklou a, tuni zingsang in sisa a muhkhiak a om hi’n gen uhi. Huai thiltun nungin T. Loken a omna theihlouh in kibu a, police te’n zong lel uhi.
Suti ni a office kai dingin theisak
Imphal, April-11: DC/Imphal East in April 12,2014 (2nd Saturday) ahihban ah April 13, 2014 (Sunday) leng suti himahleh Inner Lok Sabha biala election ding tawh kisai nasep ding poimawh tuamtuam atam ziakin Imphal East district govt employee-te adiakin DC office a staff-te office kai a nasem dingin tuni’n theihsakna thupuan poimawhtak bawl hi.