Lamka ah GZA Khawmpi 2015 zat hiding
Global Zomi Alliance khawmpi 2veina zou uh
Lamka, Mar-17: Global Zomi Alliance (GZA) khawmpi 2veina March 13-17,2014 sung Tedim khawpi a Faith Baptist Bible College & Seminary Hall ah zat hi a, Myanmar gamsung a khua 75 apan makaite leh India, Singapore, USA, UK akipan palaite telin i 420vel paikhawm uhi. GZA makai paikhawmte’n kumthak 2015 sungin Lamka khawpi ah GZA Khawmpi 3veina zat dingin thupukna bawl uhi. March 13, 2014 nitakin Rev. Dr. S. Pau Khan En, President, GZA in Khawmpi ah amah tel theikei mahleh online tungtawn in khawmpi hong hi. Rev. Smith Ngul Za Thawng in GZA General Secretary dia telching a om mi 2- Dr. Go Cin Zam leh Rev. Dr. Do Suan Mung thumsak a, (late) Rev. Dr. Chin Do Kham (former General Secretary/GZA) suunna hun leng zang uhi.
India akipan GZA khawmpi atel Zomi Council (ZC) makaite’n (late) Rev. Dr. Chin Do Kham’ innkuante thuakpihna hunkhat zang in a innkuante puandum khat chiat pia uhi. Singapore apan GZA palai Pau Khan Khup, Leitungbup Zomi Innkuan Kiipawlna (LZI) in Zomi FM Radio Station tungtang pulak hi.Khawmpi hunsung a sepkhiak dinga thupukna a bawlte uh lakah Tedim khawpi naktak a puahphat ding, Zomi sunga siamsinna lam a haksatna tuakte khualna in ‘Scholarship Fund’ patkhiak ding, tukum sunga Myanmar Census om ding ah ‘914 – ZOMI’ a min khum chiat ding, GZA Day dingin kumteng a Nov 28 zat ding chih telin thupukna poimawh hunkhop bawl uhi.

YPA Gen HQ in PTC tungtawn in panpihna pia
Lamka, March-17: Young Paite Assn(YPA) Gen HQ a President S.Chin Ngaih Pau in tuni in Hiangtam Lamka a PTC Gen HQ office ah Savaipaih khua(Thanlon Sub-dvn) tunding thaknawnna dia zat ding PTC Hq President L.Tualkhanhau khut ah silpoline 12 pia a, L.Tualkhanhau in Savaipaih khua hausa V.Zamkhanmang’ khut ah pekhia hi.
L.Tualkhanhau in agenna ah kum 1997 a unau namkal buailai in Savaipaih khua a inn 20 haltum hi a, tukum January 2014 in Savaipaih’ hausa makaih in inn 12 te’ tenglut nawn uh hi’n kigen hi. Tulelin govt’ record dan in Savaipaih khua ah kuamah tenglou a, huai lakkhiat a, khawmite’ tengnawn ahihdan a chetna(proof) poimawh a, huai dingin PTC in panla touzel ding chi’n gen hi. Aman agenbehna ah PTC Gen HQ in YPA Gen HQ ah Savaipaih khua a tenglutte zatding a silpoline a nget YPA Gen HQ te’n buchinsakna tung uah kipahthu gen hi. Savaipaih khua a innkuan 12 khawsunga tenglut nawnte panpihna din PTC Gen HQ in antang ½ bag 5, dal (havai) kg 60, ankam thau(mustard oil) kg 12, chi (tata salt) kg 12 pia a, G.Vungkhum in chini kg 12, ban ah CMO/CCpur in medical kit 1 pia hi.

Sangaikot TD Block Chiefs’ Assn kum 7 chinna zang uh
Lamka, Mar-17: Sangaikot Community Hall ah tuni in ‘Sangaikot T.D. Block Chiefs’ Assn(SBCA) 7th Anniversary Celebration’ om a, Seminar leh thumkhawmna leng om hi. Pumtulthang Lienzo, Chairman, SBCA in vaidawnna thugen a, KSDC, KWU, KSO, KWHRO leh National Worker tuamtuamte’n thugen uhi. Pakhel @ T. Francis, Administrator, KNO/KNA’ Camp Salem in ‘Know thy responsibility’ thupi zangin Hausa leh Sahkhua, Hausa leh Politics tawh kisai gen hi.
Administrator, KNO/KNA’ Camp Salem in a genna ah KNO in tukum 2014 apan amau etkaina munteng ah ‘Environment Awareness(Green Revolution)’ paipih a, sing-le-gua kepbit ding, road-side plantation, village forest reserve leh gamhal louh ding chihte paipih in enkai gige chi hi. Education Policy leh mimal, hausa leh makaite pankhawm ding a tup pipen uh hi’n gen hi. KNO thupi ‘Na Puan-inn keklian in’ (Isaiah 54:2) dungzui in i tenna gam ah kikhentuam omlou in beh-le-phung leh chi-le-nam a kikhentuam lou in unau i hi uh chi a panlak ding hi’n gen hi. Govt. court a kihek lou in Kuki mite’n Village Authority Court, Area Chiefs Assn Court, TD Block Chiefs Assn Court, Kuki Inpi Court leh Nampi court ah buaina thil omte tunzaw dingin mipite theisak hi. MP election ah lungsim kibang a pankhawm ngai hi’n leng mipite ngen hi.
Dr. S. Chongloi, Semang, Kuki Inpi in agenna ah hausate adingin sahkhua leh politics a poimawhdan kibang a, khat omlou in akhatpen leng om theilou chi hi. Muntuam-gamtuam ah om mahlehang namkhat ihihdan mangngilhlouh poimawh a, i kibatlouhna uh zonkhiak sangin ikibatna uh naktak a zon ding hizaw ahihdan gen hi. Helen Kipgen, EPR(KNO) in Kukite maban khualna a KNO panlaknate pulak a, unau tuamtuamte tawh kitanauna dingin mun tuamtuam ah KNO kalsuan hi’n gen hi.

High Court ah Registrar len ding
Lamka, March-17: Muanhuaitak apan kizadan in Thang Lianmang Guite,MJS s/o (late) Thongkhotuan Guite of Red Cross Road,Lamka in Gauhati High Court - Aizawl Bench a Registrar len dingin appointment piakin om a, aman zanin joined hi’n thusuak kingah hi. Aman Shillong a Law College apan LLB zou in Aizawl ah kum 7 vel
Advocate(lawyer) a sepnung in Mizoram Judicial Services(MJS) Senior Grade a lutin kum 1 val zek Additional Session Judge asep nungin Member Secretary, Mizoram State Legal Services Authority len a, huai akipan Gauhati High Court-Aizawl Bench a Registrar ding in appointment piak in om hi.
Thang Lianmang Guite apa’n a ngaihnat mahmah Manipur Express a Special Patron hi a, apa (late) Thawngkhotuan Guite leng Manipur Express a Patron Member ahi hi. Manipur Express a Special Patron in hibang lawhchinna a ngahna tungah Manipur Express staff-te’n kipahpih thu hiai News tungtawn in ka puang uhi.

Suty ni in office 2 a semte kai uh
Lamka, March-17: Manipur govt nuaia Finance deptt in Treasury Officer teng kiangah govt deptt bangzah in February 2014 khalawh la nailou uhiam chih tuni sunnung dak 1:00 tana report din a theihsak ziakin Treasury office a semte tuni’n office kai in nasem uhi. Huailou in Election deptt te’n nitengin Lok Sabha Election ding tawh kisai Chief Electoral Officer kiangah report a piak uh poimawh ziakin tuni’n Election deptt staff-te leng office kai in nasem uhi.

Addl SP thak in hong join
Lamka, March-17: Moreh a SDPO lenlel H.Balram Singh, MPS in March 14, 2014 nitaklam in CCpur district a Addl SP lending in hong joined a, office kai in nasep pan hi.
Manipur govt nuaia Deptt of Personnel & Administrative Reforms in March 4, 2014 in H. Balram Singh,MPS, SDPO/Moreh in Addl SP/CCpur len dinga kisuan din order suah hi.

KTP Diamond Jubilee Gospel Concert
Lamka, March-17: IB Road a Lamka Presbyterian Church ah June 27, 2014 in KTP Diamond Jubilee lopna om ding a, huai panpihna ding(fund rising) in tuni sunnung dak 2:30 apan in IB Road a Lamka Presbyterian Church ah KTP Diamond Jubilee Gospel Concert 2014 om hi. Huai ah Gospel Artist 7 apan Pathian phatna la ngaihkhiak hi a, ‘Voice of Praise’ te’n music lam mawhpua uh a, mi tamtak tel uhi.

Teacher-te adin training om ding
Lamka, March-17:Chiengkon a ESC Secretariat Council Hall ah March 22 &23, 2014 in ESC nuai a Board of Christian Education (BCE) saina in Phaibiel Naupang Sunday School Union (PNSSU) Teachers Training om ding a, Upa Th.Mangngul, Chairman, ESC in training hong ding hi. Training sung in Rev Thangkhosiem, Executive Director, ESC; Evan. Paukhomang, Secy CKKP; Rev L.Sata, Board Member leh Pastor Khaitinthang, Director, BCE te’n sinsak ding uh a, Rev T.Kamgin, Chairman, BCE in thumna in training hun khak ding hi.

Lamka ah leng Vaite’n Holy zang
Lamka, March-17:Manipur a Vaishnavite Meitei community adia festival minthang leh thupipen Yaoshang zan akipan zang uh a, Lamka a Hindu sahkhua zui Vaite’n tuni’n Holy zangin rong chi tuamtuam kinuh in nuamsa mahmah uhi. New bazar area a Vaite’n colour chi tuamtuam kinuh banah music play kawm in lam(dance) in nuamtak in zang uhi. Kumlui in kol leh Vaite’n gari zangin loudspeaker tawh kituah in khawpi sung fangkual uh a, hileleng tukum inbel huai dan in zanglou uhi.

School Club Training om ding
Lamka, March-17: DSSS office, Holly Wood Street, New Bazar ah March 21, 2014 zinglam dak 10:00 apan in ‘School Club Training’ om ding a, school 6 apan student-te teld ing uhi. Training ah T.Lalboi, Co-ordinator, DSSS in sinsak ding a, student te’n school ah program tuamtuam neihhun a thil a show dingte uh sinsak hiding hi.

SUUNNA
Upa Pauzagin Simte (69) s/o Ginkhonem of Tuibuong Dist HQ, tuzing dak 8.00 velin District Hospital ah awmna in si a, tuni mah in Tuibuong hanmual ah kivui hi.

&&&&&&&&&&&&&&&&&&&&&&&&&&&
IMPHAL NEWS
Raj Bhavan ah Yaosang l kizang
Imphal, March-17: Manipur ah ni 5 sung daih ding Yaosang festival zan in kipan a, tuni’n Raj Bhavan ah Pichhkari Function dan in Yaosang festival zat in om hi. Huai hun ah Manipur Governor VK Duggal, Chief Minister O. Ibobi , Chief Secretary PC Lawmkunga, DGP Shahid Ahmad telin official tamtakin uap uhi. Huai hun ah mun tuamtuam akipan Holi Palas-te leng paikhawm in official-te ma ah lam(dance) leh performance tuamtuam lak uh a, tua zawhin Governor leh CM in kipahpihna thilpia uhi.

Expenditure Monitoring teamte meeting
Imphal, March-17: Outer Manipur Parliamentary Constituency a election om ding ah Expenditure Observer Shanker Sharma leh Outer Manipur Parliamentary Constituency adia Returning Officer T. Ranjit Singh,DC/Thoubal makaihna in tuni in Thoubal DC office a Conference Hall ah Election Expenditure Monitoring teamten meeting nei uhi. Huai ah Asst Returning Officer-te banah Election Committee, Associate Expenditure Observer- te, Video Surveyor team, Accounting team, Control Monitoring team, Complaint Monitoring team, Control room, flying scouts team leh Media certification committee-te tel uhi.

Shija Mission Myanmar-III flag-off in om

Imphal, March-17: Shija Hospital leh Manipur govt pangkhawm in ‘Mission Myanmar’ chih minvuah in Shija Hospital a doctor te’n Myanmar gam ah damlou ava etzel ban uah amun mahmah at(surgery) ngaite buaipih in surgery tanpha a bawlsek uhi. Huai sutzopna ding in tuni zingsangin Governor VK Duggal in Raj Bhavan ah ‘Mission Myanmar-III’ sawlkhiak(flag-off) hi. Mission Myanmar-III bel March 23 tan sutzop hiding a, huai team a makai in Shija Hospital a Managing Director Kh. Palin pang hi.
Tuni a team kuankhiate March 19 in Myanmar gam a Monywa tung ding uh a, huai mun ah Medical Camp nei pan ding uh a, March 23 in zou ding uhi. Monywa ah natna tuamtuam 100 cleft lip leh palate banah gall stone, appendicitis, hernias leh ovarian swelling nei mi 30 min gelhlut hi a, huaite amun mahmah ah va ending uh hi’n kigen hi.

Inn 2 mei in kangtum
Imphal, March-17 : Imphal East apan km. 20 vela gamla Tarer Khul mun ah zan nitak dak 8:30 velin inn 2 mei in kangtum hi’n thusuak in gen hi. Inn kang neitu Thounaojam Tompok leh atanu Thounaojam Ibempishak te’ inn hi a, Fire Brigade-te theihsak himahle uh amau amun atun ma un innteng kangtum man hi’n kigen hi. Huai tawh kisai in vengsung mipite’n tuni in a vengsung uah Fire Brigade station khat koih ding in govt ah ngen uhi. Huai inn 2 kangte akipan van lakkhiak man omlou chih ahi hi.

Election ding ziakin operation bawl
Imphal, March-17 : Imphal East Police Commando leh 7- Manipur Rifles kithuahten Lok Sabha election ding tawh kisai in tuni’n Imphal East District sung Hari Khabok leh Bhamon Leikai lak ah combing operation bawl uhi. Huai hun ah verification bawl dingin mi 10 kaikhawm uh a, Porompat police station ah pekhia uhi. Tua zawh in Lamding Laishram Leikai leh Lamding Tourangbam Leikai lak ah operation bawl uh a, huai mun akipan bel pikhiak neilou uhi. Huailou in Addl SP/Imphal West makaihna in Imphal West Police Commando leh 5-IRB ten tuni’n Little Flower kimlak Combing Operation bawl uh a,hileleng kuamah matkhiak neilou uh hi’n thutut kingah hi.

Army officer hunkhop kibehlap
Imphal, March-17: Chennai a Officers Training Academy ah zanhal in training zouthakte Passing Out Parade om a, tutan a kithei danin huai ah Lamka lam mi 5 telkha a, Army Officer thak hunkhop kibehlap hi’n kigen hi. Amau anuai ate hi uhi
1. Lt Paul Samte of Thingkangphai - 8 JAK Light Infantry
2. Lt Minthang Tunglut of Bungmual, New Lane- 6 DOGRARegt
3. Lt Kakai - 26 MADRAS Regt
4. Lt Roel Neihsial of Gangpimual - KUMAON Regt
5. Lt Michael Ngaihte – AAD