ECI in Expenditure Observer dia aguan tuni’n Manipur hongtung
Outer Manipur bial ading Notification suak
Imphal, March-15:Lok Sabha election 2nd phase a telding Outer Manipur Parliamentary Constituency ah April 9, 2014 a election om ding chi’n Election Commission of India(ECI) in tuni’n official Notification suah a, Outer Manipur biala dia Returning Officer apang DC/Thoubal in leng hi.Huai dungzui in candidate dingte’n March 22, 2014 tan nomination paper file thei ding uh a, March 24, 2014 in scrutiny om ding hi. Candidate kizukkik nuamte March 26, 2014 tan kizukkik thei ding uhi. Thudang kizadan in ECI in Manipur a Lok Sabha election om ding ah Expenditure Observer dia aguan Shaker Sharma tuni in Imphal hongtung hi.
Outer Manipur Parliamentary Constituency ah April 9, 2014 a election om ni in zingsang dak 7.00 akipan nitaklam dak 4.00 tan vote khiak hiding a, huai ah Thoubal district a Assembly Constituency 8 telin Assembly constituencies 28 ah vote khiak hiding hi.
Outer Manipur biala election om ni April 9, 2014 in Arunachal Pradesh a seat 2, Meghalaya ah seat 2, Nagaland a seat 1 leh Mizoram a seat 1 ading in leng election om ding a,huai ding tawh kisai in ECI in tuni mah in Election Notification suah hi.
Vote simna ahihleh Inner Manipur bial tawh hun kibangin May 16, 2014 in kipan ding hi. Inner Manipur bial ah April 17, 2014 in election om ding a, huai ding ziakin March 19, 2014 in notification suak ding hi.candidate nuamte adin March 26 tan nomination file theih ding a, March 27 in scrutiny om ding hi. Candidate kizukkik nuamte adin March 29, 2014 tan in kizukkik theih ding hi. Election process bel May 28, 2014 tan in zawhsiang hiding hi.

Election thu DC in briefing bawl
Lamka, March-15: P.K Jha, IAS, DC/CCpur in April 9 a Lok Sabha election ding tawh kisai tuni nitaklam in a office chamber ah Press-te briefing bawl hi. Electoral roll a min omsa, kipai khekha leh vote nei thei electoral roll a min khumlutna Polling Station teng ah om a, huai ah Form 6 tampi kihawmkhia hi’n gen hi. Polling station khenkhat ah Form 6 kihawm khalou leh form kidaihlouhnate adingin March 16, 2014 in Special camp neih hidin gen hi. Electoral Roll a Special Summary Revision hun a min paihkhakte’n vote khetheilou ding hi’n gen a, mipi’n Special Summary Revision 2014 ah mahni min omkha hiam chih BLO te kiang leh DC office a Election office ah enchian dingin ngen hi.
Party teng Code of Conduct laibu piak hi’n gen a, party kuahiam in campaign nang, rally leh public meeting adia loudspeaker zang dingte’n DC ah permit lak ngai a, nitak dak 10:00 nung vote campaign ah loudspeaker zat theihlouh hi’n gen hi. Presiding Officer te’n chiklaipeuh a phone theihgige din Mobile ‘on’gige ding, Henglep/Vangai area a mobile signal omlouhnate ah Army/Police-te’ wireless tungtawna kithuzak ding, huaite zat-theihlouhna mun ah Satellite phone zat hidingen hi. Election Commission of India in Outer Manipur ah vote khiat hun zingsang dak 7:00 apan nitak dak 4:00 tan bikhiah a, huai hunsung a vote kheding mi kivual omlaite bel vote khiatsak hidin gen hi.
Election duty dingte’n koimun peuh a vote khiat theihna ding in Form 12-A fill-up ding uh a, huaizawh in Election Duty Certificate piak hiding uh a, amau munkhat peuh a duty na ua Polling Station ah vote khethei ding uh hi’n gen hi. Tutung Lok Sabha election ah Paramillitary Force company 20-25 zat hidin gen a, Election siangthou taka zawh theihna ding in mipi’n kithuahpih dingin ngen hi.

SP/CCpur in Press-te kimuhpih
Lamka, March-15: K.Kabib, IPS, SP/CCpur in tuni sunnung in a office chamber ah Press-te kimuhpih in Lok Sabha election thu genpih hi. Aman agenna ah Dist Magistrate in 16th Parliamentary Election 2014 siangthou leh buaina omlou a sai ding deihna in license nei thau teng Police station naipen a koih chiat din thupuan bawl a, huai dungzui in thau neite’n Police Station naipen ah thau deposit-na receipt la in election zawh chiangin receipt tawh mahni thau lakiknawn dingin theisak hi. Police Station a koihloute Dist Magistrate in licence cancel thei hi’n leng gen hi.
SP office campus a hotel 3 omte phelkhiat ding tawh kisai a neitute’ nekzonna ahihziak in zan in Treasury office ban ah Hotel neite tawh genkhawm in phelkhiat dinga thupukna kibawl hi’n gen hi. Hotel 3 te’n SP office campus ah hotel bawlna ding permit a neihte uleng hoihtaka enkhe laiding hi’n gen hi. Hotel omte phelkhiak ding ziak bel SP office a store room ah thau leh atang tamtak koih hi a, maban ah leng tamsem koih ding ziakin security point of view in civiliante huai kim ah lut leh pawt kichi Police dan tawh kituaklou hi’n gen hi. Election zawh chiangin SP office ah VDF personel 150 vel sun leh zan in om ding a, a poimawhna mun mun delh in kuankhe zelding uh hi’n gen hi. Election zawh in Treasury office leh SP/CCpur in SP/CCpur office campus ah bathroom 4 leh toilet 4 bawlthak ding in gen a, Treasury office a hawh, govt employee ban ah pensioner photo kila zelte tutnang bench hunkhop leng koih hidin gen hi.
Khawpi sunga law & order tawh kisai tulelin Police team 1 sun leh zan in patrolling paizel uh a, huai leng team 5 behlap hiding leh a poimawh banga behlap hiding in gen hi. Tulela poimawh ahihleh April 9, 2014 a Lok Sabha election ing buaina omlou a siangthoutak zawh ding chih hiphot a, huai awh in SP office ban ah Police station omte puahtheihteng puah hiding a, kikhekna omding hi’n gen hi.

Suangsibok ah inn khat kangtum: mi 1 liam
Lamka, Mar-15: Tuni nitak dak 9:15 velin Suangsibok a Emmanuel Khawpi ah akipatna theihlouh meikang in innsung a om Benjamin kangliam a, a taksa tung mun kangliam in hospital ah etkol in om a, innkang pen phelhmit manlouh in kangtum hi. Thu kizadan in huai inn neitu Jubilee Moi hi a, Amos Chinminlian leh a innkuante’n luah uhi. Tunitak in a tate kia inn ah a omlai un akipatna theihlouh in a inn uh kang a, khawsung mipi’n a theih phet un kidelhhuan in Fire Brigade-te leng theisak uh a, Fire Brigade te leng amun tung pah uh a, meikuang phelhmit theih in om hi. Hileleng innsunga van bangmah lakkhiak manlouh in kangtum vek a, Gas Cyclinder 3, Almirah, Blanket 5, Long box, lupna leh Old Age Pension Card chihte om chi’n innluahtu Amos Chinminlian in gen hi. Innkang zakphet in S. Khaikhopau Ngaihte, SDC, CT Lian Guite, Social Activist leh mi tuamtuam in amun delh uhi. Innkang ah inn telin van tuamtuam Rs. 2.5 lakhs vel man ding kangtum hi’n kigen hi.

Election tawh kisai DLO meeting
Lamka, March-15: DC/CCpur makaihna in DC’s office a BRGF Resource Centre ah tuni in Dist Level Officers(DLOs) meeting om a, April 9, 2014 a Outer Manipur biala Lok Sabha Election om ding tawh kisai genkhawm uhi. Election om hun ah Polling Station 296 ah siangthou leh hoihtaka election neih theihdan ding kikum uh a, security telin polling duty te kuan dingdan leng kikum uhi. EVM tawh kisai in Master Trainers’ te’n Presiding Officer telin EVM khoihkha ding teng election ma in 3vei training piakding, mobile signal omlouhna mun ah leng Army/Police te’ wireless tungtawn a kithuzak ding, wireless zat theihlouhna mun ah satellite phone zatding chihthu genkhawm uhi. CCpur dist a Polling Station 296 ah EVM 341 zat hiding a, Master Trainers’ te’n EVM 5% zang ding uh a, Reserve ah 10% om ding a, adangteng Polling Station ah zat hidin kigen hi.

Elizabeth Lamkhovah in Ph.D ngah
Lamka, Mar-15: Miss Elizabeth Lamkhovah Haokip d/o Dominic Thongpao Haokip of Molpibung village, Chandel in Assam University a deptt of Linguistics nuaiah Doctor of Philosophy (Ph.D) ngah hi. Aman ‘Word Formation in Thadou’ chih thesis agelh Prof. Ajit Kumar Baisya leh Dr. Pauthang Haokip, Ph.D etkaina nuaia zou in March 14, 2014 in Ph.D piakin om hi.

MBBS Crash Course kipan
Lamka, Mar-15: St. Pauls Institute, New Lamka tuni’n ‘One and Half Months MBBS/BDS Crash Course’ kipan a, Dr. Thangchinkhup Guite, CMO in Chief Guest apang in hong hi. Aman agenna ah Medical line ahoih banah Pathian nasepna hi’n gen hi. Kumteng in competition sangtak om gige a,huai a lawhchinna din laisim mah poimawhpen chi hi. May 5, 2014 a All India PMT Entrance Exam 2014 a tel ding student 50 velte thumsak hi. Dr. Liangoumuan Samte in a sai MBBS Crash Course ah kum masa in mi 18 lawhching uh a, tuni a kihong a telnuamte adin admission bawltheihlai hi’n gen hi.

Well sung ah tui lamdang om
Lamka, Mar-15: Tedim road a UCO Bank kianga well(tuikulh) sunga tui omte ngeina tawh kibanglou in bawngnoi bangin puang khelkhul a, inn kizom a omte well 2 huchibang in atui puang hi’n kigen uhi. Well neitu Ms. Pari gendanin nidang in tui siang mahmah a, ni 5 paisa akipan puang(brown) mahleh gim namsia bel hilou in lamdang mahmah chi hi.

India ai-oh in German ah kuan ding
Lamka, March-15: Sebastian Thangmuansang s/o Aloisys Nehkhojang of Thingkangphai in Indian Junior Team ai-oh in Germany a Bayer Munich Club World Final ah Indian Jr Football team (u-16yrs) atel ding in telkhiak hi a, tuni in Thingkangphai a a inn uah UZO/Thingkangphai Unit in kipahpihna programme neihpih uh a, huai hun ah Rev Hangpi in Thangmuansang adin vualzawlna ngetsak hi.

Kha 6 sung training ding kila ding
Lamka, March-15:Central Institute of Plastics Engineering & Technology(CIPET) in Ministry of DoNER, Gvt of India in a sponsored dingin kha 6 sung Machine Operator-Injection Moulding leh Machine Operator-Extrusion Plant zil ding hunkhop laksawm uh a,Class X passed, kum 18-30 kikal mi laksawm uhi. Candidate dinga lunglutte’n March 24, 2014 tan application submit theih ding a, Manipur Exprss office ah leng submit theih ding hi.

Ccpur Govt. College ah Metal Concert
Lamka, Mar-15: Zogam Metal Rods(Lamka) leh Finger of Scorns(Imphal) kipawl khawm in tuni nitaklam in Ccpur Govt. College ah Free Metal Concert nei uhi. ‘Be Symbolic’ chih thupi anei in ‘South Ensemble Metal Annihilation’ kichi Metal Concert ah Imphal akipan Metal Band 4 – Idyelics, War Machine, Argos, Yuthak War leh Lamka apan Rabbi Band, 16th Revolver, Hateblood, ATV, leh EROS(1st Girl Band/Ccpur) te’n stage ah perform uhi.

March 13 hilou in March 16 hizaw
Lamka, March-15; DC/DEO thusuak page 3na a kisuah ‘NOTICE’ line 2na akipan ‘2nd Special Camp for inclusion of persons eligible to be a voter will be held on 13th March,2014’ kichi pen 13th March, 2014 hilou in 16th March, 2014 chih ding hizaw hi.

UTLA in hilhchetna bawl
Lamka, March-15: S. Minlun Singson @ Franky, Dy Def Secy-cum-Secy(Info & Public Relations) akipan thusuak in a taklatdan in Jiribam Sub-divn a UTLA/KNO operational area akipan March 14, 2014 in Railway Supervisor pimang ahih tawh kisai in huchibang thilhihte ni 2 sunga a kipiakkhiak kei ua leh combing operation bawlkhum hidin puang hi. Mihing adia hihdia kilawmlou hibang thilhih t unung in kuaman chinglou ding in theisak hi.

IMPHAL NEWS
Governor leh CM akipan message
Imphal, March-15: Manipur ah March 16, 2014(Pathianni) akipan ni 5 sung Manipur ah Holi(Yaoshang) festival kizang ding tawh kisai in Manipur Governor VK Duggal leh Chief Minister O. Ibobi in Manipur mipite deihsakna thuchah puang uhi. Governor in Manipur adia festival minthang leh nuamtak Yaoshang(Holi) in kuapeuh kipahna tun hi’n gen a,tuni chiangin festival kia hilou in sports tawh thuahkhawm a om hi’n leng taklang hi.Hibang Yaoshang hun ah gamnuam leh hoihzaw hiding a Manipur bawl dingin kuapeuh hasuan hi.
Chief Minister in Yaoshang kichi festival of colour chih hi a,Manipur adia festival thupipen hi’n taklang hi.Yaoshang in Manipur a community tuamtuamte kalaj kipumkhatna leh ki-unauna lungsim tu’n hi’n gen hi.Hibang hun in Manipur mipite lakah lemna, kipahna leh nopna tun dinga deihthu puang hi.

Spl Enrolment campaign
Imphal, March-15: Vote neithei ding hileleng Electoral roll a telkhaloute guanlut theihna ding in March 9, 2014 in Polling Station tenga Special Camp om a lawhchin mahmah ziakin
CEO Manipur thusuak dungzui in March 16, 2014 in Special Enrolment campaign om nawn ding a, Booth Level Officer teng Polling Station ah zinglam dak 10.00 akipan in nitaklam dak 4.00 tan om ding a theihsak hi uh a, huai hunsung in electoral roll a min om khaloute leh bawldik ngaite akisaipih vote neitheite’n Form VI tungtawn in bawldik sak theih ding chihthu om hi.

Exam dia kuan 2 accident in si
Imphal, March-15 : Central Board of Secondary Education saina a Class XII exam ding a kuan student 2 tuni zinglam dak 10:00 in accident in si uhi. Thusuak in a gendan in students 2te Wangkhem Rocky of Ningombam Maning Leikai leh a lawmpa Karam Babicha Singh of Ningombam Maning Leikai tuni in Class XII exam dingin Access Bike (No. MN 01R-9391) a kuanlai Oil tanker (No. MN01-8331) tawh kiphukha ua, huai ah Wangkhem Rocky a mun ah si a, Karam Babicha Singh damdawi in zotpih himahleh tung manlou in lamkal ah si hi.

Journalists Sports Meet kipan
Imphal, March-15 : All Manipur Working Journalists’ Union (AMWJU) te saina in tuni in ‘The 4th Journalists Sports Meet-2014’ kichi Manipur Press Club ah patkhiak in om hi. Huai hun ah Manipur Olympic Assn President Bijoy Koijam khuallian apang in uap hi. Huaizawh in state tuamtuam akipan sports a tel ding journalist te’n Manipur Press Club akipan Khuman Lampak Main Stadium tan torch rally tawi kawmin taitung uhi.
Huai 4th Journalists Sports Meet bel ni 5 sung om ding a, Khuman Lampak Main Stadium ah kidemna tuamtuam- football, Table Tennis, Badminton, Chess leh Carrom kidemna om ding hi.

Commando te’n combing operation bawl
Imphal, March-15 : Congress Vice-President Rahul Gandhi in Manipur a hongphak sunga thiltung hoihlou om khak ding venna tuni’n Thoubal Police Commando te’n Thoubal district sung Wangjing Wangkhei Sanabam Leirak leh Moirang Mayum Leirak lak zing dak 8:30 in search operation nei uhi. Amau inn chih a lutin muanmawh mi omhiam chih enkhia uh a, himahleh mat a neih lam uh theih hilou hi. Rahul Gandhi in March 19, 2014 in Manipur hongpha ding a, Kodompokpi ground a public meeting ah thugen ding hi. Huai ding tawh kisai in SPG teamte March 16, 2014 in Manipur hongtung ding uhi.

Transfer/posting
1. Dr.Harmit Singh Pahuja MCS, Director (Institutional Finance ) Managing Director/Manipur State Co-op Bank & Deputy Secretary (Education-S) as Addl. Deputy Commissioner/ Jiribam.
2. Ranjan Yumnam MCS. Addl.Deputy Commissioner/ Jiribam as Deputy Secretary (CAF & PD), ex-offico Joint Director (CAF & PD) and Managing Director/Manipur State Co-op Bank in addition.
3. Ms.Mercina R Pamei. MCS. Deputy Secretary(Finance) as Deputy Secretary (Finance) and Direct or (Institutional Finance) in addition.