Lok Sabha election 1st phase ading notification suak
Outer Manipur adin tuni’n Notification suak ding
Imphal, March-14: Lok Sabha seat 543 adingin phase 9 a kikhen in April 7,9,10,12,17,24, 30 May 7 & 12, 2014 in election om ding chi’n Election Commission of India(ECI) in March 5, 20-14 a a puan dungzui in Outer Manipur Lok Sabha seat ading in April 9, 2014 in election om ding a, Inner Manipur Lok Sabha seat adin April 17, 2014 in election om ding hi. April 9, 2014 a phase 2na Lok Sabha election a telding Outer Manipur bial adingin March 15, 2014 in Election Commission in notification suah ding hi.Phase masa April 7, 2014 in Assam a Lok Sabha seat 5(Tezpur, Kaliabor,Jorhat,Dibrugarh,Lakhimpur) leh Tripura west Lok Sabha bial a seat 1 adingin tuni’n ECI in notification suah hi.
ECI in thupuan a bawlsa dungzui in March 15, 2014 in Outer Manipur Lok Sabha seat ading notification a suah tawh kiton in candidate dingte’n March 22, 2014 tan nomination paper file thei ding uh a, March 24, 2014 in scrutiny om ding hi. Candidate kizukkik nuamte March 26, 2014 tan kizukkik thei ding uh a, vote simna bel Inner Manipur bial a tawh kiton in May 16, 2014 in kipan ding hi. Inner Manipur bial dingin March 19, 2014 in notification suak ding a, candidate nuamte adin March 26 tan nomination file theih ding a, March 27 in scrutiny om ding hi. Candidate kizukkik nuamte adin March 29, 2014 tan in kizukkik theih ding hi.
Assam a Lok Sabha seat 5 lerh Tripura west biala seat 1 ading election tawh kisai tuni notification suak dungzui in candidate nuamte’n March 21, 2014 tan nomination file thei ding uh a, March 22, 2014 in scrutiny om ding hi.Candidate kizukkik nuamte adingin March 24, 2014 tan in kizukkik theih ding hi.

Goa Dy CM Francis D’Souza in Lamka hongpha
Lamka , March-14: Goa Deputy Chief Minsiter Francis D’Souza in tuni nitaklam in Lamka hongpha in Rengkai Community Hall ah Outer Manipur Lok Sabha seat a BJP candidate ding Prof Gangmumei Kamei ading in vote campaign bawl hi. Huai ah Goa Dy CM khuallian hi a, Functional President in Th. Chaoba Singh, ex-Union Minister & President, BJP Manipur Pradesh pang hi. Guests of Honour in Prof Gangmumei Kamei; M.Chungkhosei Haokip, Vice President, State Core Committee Member BJP Manipur Pradesh leh Tongmang Haokip, IRS (retd) BJP State Executive Member pang uhi. Chief Host in T.Hangkhanpau, Vice President, BJP Manipur Pradesh i/c CCpur dist pang a, Premananda Sharma, Gen Secy Orgaisation BJP Manipur Pradesh ban ah BJP makai tamtak tel uhi.
Goa Dy CM in Media-te a houlimpihna ah Delhi a NE mite bawlsiatna tawh kisai in NE mite bitna ding law & order etkol a mawhpuakna hi’n gen a, KNO/UPF tawh govt in political dialogue a neihna ding lampi leng AB Vajpayee in Prime Minister alet hun a kipan khin hi’n gen a, UG te tawh kihouna neih ding govt mawhpuak hi’n gen hi. BJP te’ Christian doudal hi uhiam chih a dawnna ah Goa state a MLA 21 lakah Catholic member 7 om a, BJP MLA-te tawh vaihawm khawm in sahkhua ah kideidanna omlou hi’n gen hi.
Mipi kikhopna a a genna ah Manipur mipi leh Goa mipi kala kibatna mahmah om hi’n gen a, football ngaina tuak hi’n gen hi. Manipur in tulelin kikawmtuahna lampi hoih poimawh mahmah a, water supply, electricity, education leh health sectors ah taksap lianpi om hi’n gen hi. Tuni’n Ukhrul dist apan CCpur dist hongpai na ah tuilou (paddy field) liantak omte amuh in Manipur in nek-le-tak ah kitoudelh kia hilou in state dangah buh-le-bal piangkhiate thonkhe thei gige ahihdan thei hi’n gen hi. Central govt khen hunta hi’n gen a, huai ding in mipi’n April 2014 khasung in central govt khekkhiat theihna nei hi’n gen a, Central govt khenkhiak hileh manipur leng awla kikhek ding hi’n gen a, Manipur kia hilou in central ah kikhekna poimawh chi’n gen hi.

Bukpi ah Class-X tan omthei ding hi’n kilang
SSPP Gen HQ in Thanlon Block a mun tuamtuam pha uh
Lamka, Mar-14 SSPP Gen HQ makaite’n SSPP Thanlon Block tawh pangkhawm in singtang biala education puahphatna nasep enzui kawm in Thanlon bial pha uh a, Thanlon atun un Rev N. Tuanglang, DS/Thanlon(EBC) in thumsak a, Thanlon bial ah siamsinna lam keniam mahmah hi a gen in panlak poimawh ahihdan gen hi. Aman a genzelna ah saptuam-in leng ahithei tan in siamsinna lam ah panla a, SSPP pahtak thu leng gen hi. Bukpi khua ah March 11 nitakin Block makaite tawh Bukpi H/S tungtang genkhawm uh a, March 12 zingsang in Bukpi Community Hall ah V/A, ZYA, Pastor, Saptuamte, SSPP leh khawsung makaite’n Bukpi khua a siamsinna puahphat ding thu genkhawm uhi. Bukpi ah High School om ahih dungzui in Class-X tan sinsakna dinga deihthu khawsung makaite’n gen uh a, lemlouhna dang omkei leh tukum 2014 apan Class-X omthei ding hi’n President SSPP in gen hi.
Bukpi H/S ah Textbook, Uniform leh Study material hawmkhiak hi a Bukpi hausa N. Liantungnung student-te’ lakah hawmkhia hi. Bukpi Hausa in Govt school mah puahphat a poimawhdan gen a, govt school ah fee omlou in nu-le-pate don zangkhai hi’n gen a, SSPP in kuhkal taka nasem uh hi’n gen hi. Tulai a govt school teacher-te a omna ua pai utlou in sepna muhni apan seplouh ding sawm i bang ua, kou hunlai in kum 20 sung bang kithalawp tak a kikai ahi chi hi.. SSPP Thanlon Block President din March 12 in tuhtu omlou in Charles Haulian telching nawn hi a, Gen HQ President in kichiamsak hi.

OC makaih in ni 3 sung social work
Lamka, March-14: Inspector M.A Salam, OC/CCpur PS makaih in Police,VDF banah Executive Officer (Town) leh a staff-te’ kithuah in March 12, 2014 apan ni 3 sung zing dak 7:00 apan Tedim Road zula Police Station kimlak ah social work nei uh a, Sanitary Truck zang in niin nawnkhia uhi. OC/CCpur gendan in sianthouna tawh kisai in ni 3 sung mass social work neih hi a, tuni apan dawr/dukan te’n niin paithanglou ding leh footpath tungah leng niin hal nawnlou din theisak hi. Khawpi sunga niin kihal in pollution a behlap ban ah khawpi thanghuaisak a, dukan neite ban ah mipi’n mahni niinte sanitary truck pawkhe sak zelding in ngen hi.

JSSK Transportation thu final uh
Lamka , March-14: Dist Hospital a Med Suptd room ah tuni’n Hospital a JSSK/JSY tawh kisai Transportation thu ah meeting uh a, NRHM makaite leh JSSK a kizang gari’ neite’n kilemna bawl in MoU sign uhi. Huai dungzui in 1st layer @ Rs.300/- per trip (to & rro) in Dist Hospital apan Gangpimual, Pangzawl, Tangnuam ta’n, Dist Hospital apan Rengkai lei tan, Tuibuang/K.Salbung khua tan cover ding hi. 2nd layer @ Rs.400/- per trip (to & tro) in Dist Hospital apan Mata, Muolvaiphei/ Khopuibung, Monlenphai/Tollen Bridge ban ah Mission Compound/S.Molhoih khua tan cover ding hi. 3rd layer@ Rs 500/- per trip (to & tro) in Dist Hospital apan Khuga Dam lei apan Kullian khua tan; Tuaitengphai khua apan Thenmual/Ngurte, Leisang apan Kangvai, Gangpizang khua apan Mata Lambulane tan cover ding chih hi.

Interl Day of Action for Rivers zat in om
Lamka , March-14: Centre for Orgnl Research & Education(CORE), North East Peoples’ Alliance (NEPA) leh North East India Outlook (NEIO) saina in tuni zinglam in Saidan lei ah‘Save the Khuga River-Save CCpur’chih thupi a nei in ‘International Day of Action for Rivers’zat hi a, S.Nengkhanlun, Secy MHJU khuallian in pang hi.
Aman agenna ah hunsawttak paisa in gam 20 val paikhawm te’n Brazil a dam kibawl doudal khawm uh a, huai hun apan International day of Action for Rivers omkhia hi’n gen hi. Khuga River, life-line of NGO-te akia hilou in CCpur dist ateng mipite’ a hizaw a, organiser te’n maban ah awareness program tamsem bawldin ngen hi. Tui a tuite aluankhiat ding banga aluankhiat louh chiangin thanghuai a, mihingte adingin zong lauhuai in economy tanpha hihse thei hi’n gen hi. Nidang luidung ah sing-le-suang kichingtak in om a, tuni chiangin huai teng beisiang a, tuinakte leng kang thei hi’n gen hi.

DSO(CAF & PD)/CCpur in bikhiah
Lamka, March-14: CCpur distict ah tulai in petrol leh diesel haksatna(scarcity) om ziakin DSO(CAF & PD)/CCpur in Oil pump te’n mipi(consumer) laka a zuakkhiak zah ding uh bikhiah hi.Huai dungzui in Truck/Bus adin diesel litre 40 tan ahih ding, Light vehicle tractor/LV 4 wheeler adin diesel litre 20 tan, 3-wheeler adin petrol/diesel litre 5,LV 4 wheeler adin petrol/diesel litre 10 leh LV 2 wheeler din petrol litre 5 tan hiding in bikhiah hi.

BSF trainee-te adia firing hun bikhiah
Lamka, March-14: STC BSF CCpur a BSF training te’n March 1, 2014 akipan Firing Range (thau leh bomb kapna mun) ah zingsang baihtak akipan nitak zansawt tanpha thau chi tuamtuam leh bomb a kap uh March 15, 2014 tan ding himahleh DC/CCpur apan phalna om ziakin March 16-31, 2014 sung sunzom lai ding uh uhi.Huai hunsung in Firing Range ah huaia kima omte kuamah valut lou dia theisak kawmin ganvulh leng kuama’n khahzan lou ding in DIG,STC BSF in theisak hi.

Missionary lakna ding hun kisuan
Lamka, March-14: EBC in Missionary 10 lak a sawm tawh kisai March 19, 2014 in written test om ding chih himahleh lwmtanlouhna khenkhat om ziakin March 26,2014 adin kisuan a,kingetna(application) piaktheih hun ding leng March 25, 2014 nitaklam dak 3.00 tan hithei ding chi’n Director of Missions/EBC apan thusuak in gen hi.

KP Thinghijang ah inn 1 kangtum
Lamka, March-14: Henglep Sub-divn sung(Samulamlan block) sunga KP Thinghijang khua a Khaisei(50) s/o Khaipao tenna inn March 13, 2014 in kang a, sunhun mi’ omlouh laitak ahihkhak ziakin innsung a van lakkhiak man omlou in inn tawh kangtum chihthu kiza hi.

Khanglai Day-cum-Cup celebration
Lamka, March-14: Jolzam Community Hall ah March 15, 2014 nitaklam dak 5.00 akipan in ‘57th Jolzam Khanglai Day-cum-Cup Celebration’ zang ding uh a, Chief Guest in D. Shonkholun Haokip, Special Contractor,Manipur Dev Society pang ding a, Rev Shangboi, Gen Secy MHD in Cup lan(dedicate) ding hi.Huai hun ah Functional President in GK Siema,NHPC Loktak Project pang ding a,Guest of Honour in Neovy Mangboi, Field Co-ordinator,ICDP pang ding a, Guest of Honour in D. Seimunlun Haokip, Gen Secy YA(MHD)-cum-Chief of Teiseng pang ding hi.

Marwari dukan teng kikhak ding
Lamka, March-14: Holi(Yaoshang festival) ziakin March 17, 2014(Monday) in Lamka khua a Marwari dukan(business establishment) teng kikhak hiding chi’n Marwari Society thusuak in gen hi.

DLCC hilou in DLO ding hizaw
Lamka, March-14: P.K Jha,IAS,DC/CCpur makaihna in DC’s office a BRGF Resource Centre ah March 15, 2014 zinglam dak 11:00 in Dist Level Co-ordination Committee (DLCC) meeting om ding chi’n DC’s office akipan DLO teng ading meeting notice hawmkhe mahle uh DLO’s meeting ding pen DLCC chia kigelhkha hizaw chi’n BO/HQ,DC’s office apan kiza hi.

IRB-te mun ah Police leh VDF om phot ding
Lamka , March-14: Tunung a Lok Sabha Election ding ziakin UBI/CCpur branch leh SBI/CCpur branch a duty 1st IRB te paikhe phot ding uh a, Police leh VDF te duty ding uhi. Bank 2 a Police omsate behlap dingin VDF 7 tuak duty ding uh a, Khuga Dam a outpost ah VDF 15 leh 1st IRB te duty khawm ding uh hi’n kigen hi.

Accident in liam uh
Lamka, Mar-14: Tuni zinglam dak 10.00 velin Tedim road zui atai Pulsar Bike (No. MN01L/8668) tuahsia in Koite khua ah lampi nawl a mi huansung ah tailut kha a, gari hektu Chochon (27) s/o Lamthang of Zanglenphai akhut veilam liam in hospital a etkol in om hi. Huailou in Thangsuanlal (12) s/o M. Thangkhansiam of Bungmual a school ua football peklai kipuk in a liangguh hihtan kha a, Donglenhao (24) s/o Kaplal of Electric veng, Tuibuong, tuni’n gari dang tawh kiphukha in pucca road ki-denna in a mai tatkha a, amaute hospital a etkol in om uhi.

Class-X examna zousiang uh
Lamka, Mar-14: Board of Secondary Education Manipur (BSEM) saina in Class X/ HSLC examination ,2014 om tuni a Maths subject exam in examna zousiang uhi. Langkhanpau Guite, Chairman, ADC/Ccpur in Centre A & B (Rayburn H/S leh Ebenezer Academy) va pha in enkhia hi .

SUUNNA
Liankholal Thangsing(23) s/o Th. Pauchinthang, Chief of Joutung village(Thanlon sub-division) zan zingsang in Simveng a inn uah ihmu lum a muhkhiak hi a, Joutung ah zan a puaktung a om in tuni’n kivui hi.

IMPHAL NEWS
Congress in majority lak a ngim-Gaikhangam
Imphal March -14: Manipur Pradesh Congress Seva Dal inntekna in tuni’n BT Road a Congress Bhavan ah ‘State level Political Awareness’ om a, huai ah MPCC President Gaikhangam khuallian a pang in a thugenna ah Congress in 16th Lok Sabha election om ding ah chin(winning) kia hilou in majority hithei ding in panlak kipan hi’n gen hi. Huaiziak mahin Congress in pan alakna zousiang phialta hi’n gen a, Manipur mipite’n Congress ah muanna a koih bangun Congress govt in leng gamsung mipite khantouhna ding leh masawnna ding nasep tuamtuam pankhia in lawhching touzel hi’n gen hi. Congress in Lok Sabha ah numeite adin seat 33% bikhiah sawm mahleh opposition-te ziakin huai dinga panlakna zawhsiang hilou a, huai poisakthu gen hi.

HSLC flying squad-te attack in om

Imphal, March-14 : Tuni HSLC examination, 2014 tawpni in Flying squad ten zinglam dak 10:30 a Lilong Hr Sec Madrassa a phak un student khat in chindan kilawm a zat ziakin expelled in om hi. Huaitak in expelled a om student in khaw phawklou in kipuk a, tua phet in mipi in Lilong Hr. Sec. Madrassa kidelhhuan in flying squad-te attack uh a, a zat gari uh hihsia uhi. Gari hihsiat a omte bel Maruti Van (No. MN 01K/5773); Maruti Alto (No. MN 07D/0651) Chevrolet Beat leh Honda Activa (No. MN 04B/6022) ahi hi. Chevrolet Beat bel huai mun a Examination OC a hi a, police te’n delh in mipi hawlzakna dingin teargas leh blank fire bawl uh a, tuazawh in Police leh 40-Assam Rifles pangkhawmten flying squad te hunkhia uhi. HSLC exam om sungin flying squad te 2vei attack in om uhi. Buaina ziakin huai centre a examna leng sutzop theihlouh in dinkhawl hi.

MLA chinnung kum 2 chinna zang
Imphal, March-14 : CCpur district sunga Thanlon A/C akipan MLA ching Vungzagin Valte leh Singngat A/C akipan MLA ching Ginsuanhao in MLA dia telching ahih uh kum 2 chin tawh kiton in tuni’n Hotel Imphal ah Pathian kianga kipahthu genna hun zang uhi. Huai hun in MLA 2te banah a worker- te uh leng tel uh a, Rev. Chinzathang in MLA 2te a dingin hasotna thugen in Pathian kianga thumsakna hun zang hi.

CEO in local clubs, NGOs leh CSO-te tawh genkhawm
Imphal, March-14: Tunung zeka Lok Sabha election om ding feltak leh siangthou taka a om
deihna ziakin Chief Electoral Officer (CEO) O. Nabakishore in tuni’n Manipur Secretariat a CEO’ office room ah local club tuamtuam, NGOs leh Civil Society Organisation tuamtuam apan makaite kimuhpih in thil omdan genkhawmpih hi. Huai hun ah local clubs, NGOs pawl tuamtuam akipan mi 100 val tel uh a, CEO in election hun ah voter te kithalop taka vote a khiak chiat theihna ding ua panlakdan ding bangbang om hiam chih genpih hi. Election a vote khiak poimawhdan mipi in a theihsiam semna ding un Yaoshang sports ahun ah slogan tuamtuam gelhna t-shirt leh calendar hawmkhiak hiding in gen hi. Club tuamtuamte lakah T-shirt 50, Banner 2 leh sports material tamlou chiat hawmkhiak hidin leng CEO in gen hi.

Class X examna ah 12 nawhkhia
Imphal, March-14 : BSEM saina a HSLC exam tawpni tuni’n Mathematics subject exam in om a, centre tuamtuam apan candidate 12 nawhkhiak hi uhi. Thu kizadan in nawhkhiak a omte bel Pallel Centre ah Roll No. 5269, 5304 leh 5372, Chandel Centre ah Roll No. 5559, Khundrakpam Centre ah Roll No. 14592, Bishnupur Centre ah Roll No. 16780, Khangabok Centre ah Roll No. 21149, Wabagai Centre ah Roll No. 25250, Lilong ‘B’ Centre ah Roll No. 22081 & 22324, Imphal Centre ah Roll No. 34270 leh Imphal Centre ah Private candidate Roll No. 1995 hi uhi.

Imphal West & East ah operation bawl
Imphal, March-14 :Addl SP K. Meghachandra makaihna in tuni in Imphal West District Police Commando leh 4th IRB kithuahte’n Uripok, Thangmeiband Haobam Dewan Leikai leh Thangmeiband Sinam Leikai lak combing operation bawl uhi. Uripok Bachaspati Leikai ground ah mipi tamtak kaikhawm uhi.Imphal West District Police Commando te mahin tuni’n Chassad Avenue leh Pureiromba Khongnang Khong area lak operation bawl uhi.

Railway tunnel supervisor pimang
Imphal, March-14 : Jiribam-Tupul railway lampi bawlna mun a tunnel Supervisor zan nitak dak 11:15 velin meltheihlouh helpawl hidia gintakte’n Tamenglong District sung Kulnung Khunou mun akipan pimang uhi. Huai tawh kisai in security force te’n mun tuamtuam search operation nei mahle uh hutkhiak hi nailou hi.

CIPET ah ki-report din theisak
Anuai a kitaklang waiting list a om mi 6 te March 20,2014 in CIPET,Imphal ah ki-report dingin CIPET akipan theihsak hi uhi.
1. H. Khammuansong
2. ZS Manga
3. Ginbiaksang
4. Thangminlian
5. Khualianmang
6. Lianminlal Singson