Rahul in March 19 in Wangjing ah election campaign neiding
Mipite’n ‘Manipur thak’ lam-en photni -Francis De Souza:
Imphal, March-13: Goa Deputy Chief Minsiter Francis De Souza in tuni’n Manipur hongpha in Noney khua ah Outer Manipur Lok Sabha biala BJP candidate Prof Gangmumei Kamei adin vote campaign bawlin thugen a, centre a vaihawm kikhek ding ahihtak ziakin mipite’n ‘ Manipur thak’ lamen uhen chi hi. BJP senior leader banah Goa state Dy Chief Minister Francis De Souza makaihin in Tamenglong district sung Noney, Longmai III Common Ground ah tuni a mipi kikhopna thupitak om ah BJP adia campaign kawm in thugen hi. Hibangkalah March 19, 2014 in AICC Vice President Rahul Gandhi in Manipur hongpha ding a, Thoubal district sunga Wangjing mun a mipi kikhopna ah Congress adia campaign bawlin thugen ding hi.
Francis De Souza in tuni’n mipi kikhopna a a gendan in Manipur mi adiakin student tamtak India gamsung mun tuamtuam ah ah kithehdalh uh a, aman tuni’n Manipur hong muh leh kiguih ahihdan gen hi. Manipur in tu-le-tu in kikawmtuahna lampi hoih poimawh mahmah a, phetlou in water supply, electricity, education leh health sectors ah taksap lianpi om ahihdan mu chian mahmah hi’n gen hi. Imphal’ Tulihal Airport apan Noney tan gari in a tai sungin lampi siatdan lungkhamhuai sa mahmah a, lamdang chih kanlouh gending hi’n gen a, centre govt bawldik nung chiangin state govt tanpha tungding thak poimawh sakthu gen hial hi. Manipur state et in Congress in kum 12 bang govt a letnung un kikhenna bangmah om tuanlou a, tudan a Manipur a paitouh zel leh bang tuak ding hiam chih gen ngamlou in mipite a hehpihhuai a sakthu gen hi.
Centre apan state khantouhna dingin sum le pai tamtak pailak ah mipite’n 15% lel hamphatpih kha ahihman in state mipite awlmawh huai mahmah chi’n Francis De Souza in gen hi. BJP in Outer Manipur a candidate dingin National Vice President of ST Morcha, BJP, Prof Gangmumei Kamei guang a, kuapeuhin centre leh state ah kikhenna omna dinga vote chiat dingin ngen hi. India mipi 78% velin kikhekna om ding deih ziakin BJP gum uh a, hun paisa ah BJP hihkhelh a om leleng mipite’n ngaihdamna bawm a khe dingin Souza in ngen a, huai kawm in BJP candidate peuhmah vote chiat dingin thum hi. Souza ahihleh Christian kulmut mahmah hi’n kigen hi.
Tuni’n Noney a public meeting om hunah, Manipur Pradesh BJP Chief Th Chaoba; Minister lui Danny Shaiza; Chairman of Intellectual Cell, BJP Manipur, Prof N joykumar Singh; Spokesperson of BJP A Sharada Devi; BJP Manipur Pradesh Vice President T. Hangkhanpao; BJP Manipur Pradesh General Secretary M Ashini Kumar; MLA-lui banah BJP State Committee Henry Paotei; General Secretary(Orgn) Premananda Sharma; State Secretary M Rameshwar Singh leh State Secretary Michael Dangmei e telin heutu hunkhop paikhawm uhi.
Hibangkalah MPCC President Gaikhangam in tuni’n News saite kimuhpih in AICC Vice President Rahul Gandhi in March 19, 2014 in Manipur hongpha ding a, sunnung dak 1:00 in Thoubal District sunga Wangjing Kodompokpi Ground a mipi kikhopna ah Lok Sabha election a Congress candidate-te adin campaign bawl in thugen hi. March 19, 2014 leh Yaoshang festival hun kituakkha a, tuaziakin MPCC nuaia Congress Legislature Party te’n tuni in Chief Minister O Ibobi makaihin emergency meeting nei uhi. Member tamtakte’n Rahul in Yaoshang ma ahihkeileh a nungin Manipur hong phazaw leh chih ngaihdan nei ua, ahihziakin CM leh MPCC President Gaikhangam te’n bel Rahul program bawlsa hih danglam louh deihthu taklang kawm in Inner Manipur adingin Hapta Kangjeibung hi henla, Outer Manipur ading in Wangjing Kodompokpi Ground ah meeting om zawhen chih ngaihdan aneih nungun a kigawmin Wanging Kodompokpi Ground ah Inner leh Outer adinga public rally neihkhawm hoihpen ding chi’n thupuk uh chihthu kiza hi.
March 15, 2014 in Rahul in Wangjing a campaign a neihna ding tawh kisai in meeting poimawhtak omlai ding hi. Rahul in Manipur a vote campaign a neih ding tawh kisai in Chief Minister O Ibobi in Chairman hihna len a, ex MP Rishang Keishing in Co-Chairman hihna len hi. Member in Congress MLAs, Ministers, MPs, MPCC Office Bearerte leh Congress’ frontals leh cells teng tel uh a, MPCC Vice President T. Manga Vaiphei in committee ah convenor hihna len a, MPCC Secretary (Admn) S Jiten in co-convenor hihna len hi.
Governor in laibu thak hong.
Manipur Governor VK Duggal in tuni’n Raj Bhavan ah Tamil lehkhabu Tirukkural kichi Manipuri pau a kilet hongkhia hi:
Inner ah Dr M. Nara support ding uh; NCP in candidate din C Doungel puang
Imphal, March-13: Nationalist Congress Party(NCP) April 7,2014 in Outer Manipur Parliamentary biala 16th Lok Sabha election om ding ah NCP ticket a candidate dingin tuni’n Minister-lui C Doungel puang uh a, Inner Manipur Parliamentary constituency CPI candidate Dr M. Nara support ding uh chi’n NCP Manipur Pradesh a President Laishom Ibomcha,MLA in puang hi.
Tuni’n News Checkon a C Doungel inn ah Laishram Ibomcha,MLA in Press Conference sam a, huai ah thugenna ah National leader-te lemsakpihna telin Outer Manipur biala NCP candidate ding in C Doungel puan ahihbanah Inner Manipur bial ah Dr Nara support ding uh hi’n puang hi. Aman a genzelna ah CPI in leng Outer Manipur Parliamentary constituency ah NCP candidate mah a support uh lam-en ahihdan gen hi. NCP in chikmah chiangin BJP tawh kitheisiam leh pangkhawm ngeilou ding hi’n leng L. Ibomcha in gen hi. Tuni a Press Conference ah NCP Vice President N Biren, Vice President AH Khan, Women’s President A Bimola, Youth Wing President O Jugeshwar leh General Secretary Y Iboyaima leng tel uhi.
Food Safety registration hun hihsau:
Lamka, March-13: Lamka khawpi ah nek-le-dawn zuak ‘Food Business Operator’ teng in CMO/CCpur office a Food Safety Officer kiangah Feb 4,2014 tan in registration bawlsak ding leh license neichiat dinga theihsak hi uh a, Supreme Court thusuak dungzui in August 5,2011 akipan India gamsung pumpi ah Food Safety and Standards Act 2006 kichi kizang hi. Himahleh Manipur a Food Business Operator tamtak in Food Safety tawh kisai in registration bawl manlou in licence leng neilou uh a, huaiziakin Principal Secy (Health & FW) and Food Safety Commissioner, Manipur in Food Business Operator te’n Aug 4, 2014 tan in registration bawl a licence neivek dingin ahun hihsau(extend) hi.
CCpur Dist ah Food Safety Officer Sunil Kumar kia om a, a poimawh hun in Principal Secy (Health &FW) and Food Safety Commissioner in District 9 a Food Safety Officer-te’ Imphal a sam in nasem sak zel a, Food Safety Officer te’n amau sepna district ah nasepna ding hun neitawm mahmah uh a, huaiziakin registration bawl leh licence piak zekai mahmah hi’n kigen hi.
Electric post 7 lamnawl ah suankhia:
Lamka , March-13: Lamka Police Station kong(zero point) apan Lanva lei (bridge) tan Tedim Road lampi bawl hoihna din repairing pailel lai a, repairing leh leveling zawh chiang in machine zangin lampi bawlhoih hiding chi’n Health Minister Phungzathang Tonsing in a gensa bangin nasemtute’n sunzom zel uhi. Huai ding ziak mahin zan zinglam dak 9:30 akipan in electricity deptt te’n lampi nehlua a om electric post 4 suankhia uh a, tuni’n leng electric post 3 lamnawl ah suan uhi. March 14, 2014 zingsang dak 6:30 akipan in Electricity deptt te’n Police station kong akipan New Lamka lam manawh kawmin lampi nehlua a om electric post omte abanban in lampi apan gamlazaw ah suan khe ding uhi.
Huailou in zan akipan New Lamka(G) a Unity street akipan Damkam Bazar kikal lamlian JCB zangin ketletna kipan a, Damkam bazar lam ah protection wall nasepna pailel a, huia ah mi tamtakin nasem uhi. Truck bangzah hiam in leisai nawnkhia uh a, nasep hunsung in Tedim road khaktan in om a, Lanva lam zuanding gari te’ Unity Street leh St Pauls’ road ah taitou uh a, Lanva apan bazar lam zuanding teng College road lam ah taisuk uhi.
DLCC meeting om ding:
Lamka, March-13: P.K Jha, IAS, DC/CCpur makaihna in DC’s office a BRGF Resource Centre ah March 15, 2014 zinglam dak 11:00 in Dist Level Co-ordination Committee (DLCC) meeting om ding a,huai ah Outer Manipur ah April 9, 2014 a Lok Sabha Election 2014 ding tawh kisai genkhawm ding uhi. Huai hun ah Dist Level Officer teng telkim chiat ding in BO/HQ, DC’s office in theisak hi. P.K Jha , IAS, DC/CCpur in March 3, 2014 in DC/CCpur hihna charge la a, huai nung DLO te’ tawh DLCC meeting a neih masakna pen hiding hi.
GZA khawmpi a teldin mi 7 zinkhia
Lamka, March-13 : Myanmar gama Tedim khawpi ah tuni akipan Global Zomi Alliance (GZA) khawmpi 2veina kipan a, March 17, 2014 sutzop hiding hi. Huai khawmpi a tel dingin tuni in Rev Dr Luaichinthang, Chairman, Zomi Language & Literature Society(ZOLLS) makaihna in mi 7 in Lamka nusia in zinkhia uh a, tuni in Tedim tungsuak uhi. Hiai Global Zomi Alliance(GZA) khawmpi ah Burma census,2014 tawh kisai telin thu poimawh tuamtuam genkhawm ding uh hi’n kigen hi.
Mental Health Training om:
Lamka, March-13: Dist Mental Health Committee/CCpur saina in tuni in Dist Hospital a Med Suptd’ Conference Hall ah Mental Health Training om a, ZEO nuai a school 18 apan teacher leh NGO 18 apan mi hunkhop tel uhi. Training hun ah Dr. N. Gyaneshwar Singh, Psychiatrist, Dist Hospital leh Dr. H. Angoumacha Singh, Psychiatrist, Dist Hospital te’n sinsak uhi. Dr N.Gyaneshwar Singh in agenna ah nidang akipan tunitan in lungsim natna neite’n dawi leh kau banah magic siamte(maiba) naih masa uh a Doctor-te a naihhun un zekai lua a, a tamzaw damzoulou hi’n gen hi. Tulai a lungsim natna neite damdoi nekawm a treatment hoihtak piak ahih ua leh dam uh hi’n gen hi. Lutang natna ziaka Dist Hospital a ki-ensakte leng a tamzaw thil tuamtuam lawhsap nunga Hospital naihpan uh hi’n gen a, taksa in damtheihna a poimawh bang in mihingte’n lungsim damna leh lungsim nopna poimawh hi’n gen hi.
SBI ading sum hongtung:
Lamka, March-13: SBI/CCpur branch ading sum tamkhop tuni zinglam dak 11:30 velin Imphal apan security khauhtak venbitna nuai ah hongtung hi. SBI ah sum hongtunlouh ziakin ni tamkuamtak sum kidaihlou phialin zan in leng sum lakhiate’n Rs.20/- note tamtak toi teltul uh a, bank customer-te’n haksatna tuakman phial uhi.
International Day of Action for Rivers:
Lamka , March-13: Centre for Organisatonal Research & Education (CORE), North East Peoples’ Alliance (NEPA) leh North East India Outlook (NEIO) saina in March 14, 2014 zinglam dak 9:00 apan Saidan lei(bridge) ah ‘Save the Khuga River-Save CCpur’ chih thupi a nei in ‘International Day of Action for Rivers’ zat hiding hi. Huai ah Pastor Thangdaivel in thumna in hun hong ding a, Timothy Z.Zote, President NEIO in vaidawnna thu gending hi. Huchi’n Ram Wangheirakpam, Co-ordinator, NEPA in keynote address gen ding a, huaizawh in Chief Guest S.Nengkhanlun, Secy MHJU in thugen ding hi. Thugenna hun zawh in mipi’n Khuga lui hahsiang ding uhi. Huaikhit in Dr. Immanuel Zarzosang Varte makaih in mipi tawh houlimna om ding a, Rev Dr Lalkhawlien Pulamte in thumna in hunkhak ding hi.
Civil Services (Main) Exam, 2013 result:
Union Public Service Commission(UPSC) saina in Dec, 2013,
Civil Service(Main) Examination, 2013 om result puankhiak hi a, huaia lawhchingte ading in
April 7, 2014 akipan in Personality Tests om ding chih hi. Main examna a lawhching candidate-te Roll No. kia taklat hi a, huaiziakin theihchet haksa mahmah hi. Tutan a kitheipha danin singtangmi anuai ate lawhching uh hi a theih ahi hi.
1. Samuel S. Vaiphei, s/o Rev. S Prim Vaiphei
2. Densil Ginsuanlal Samte s/o (late) Rev. David K. Samte
3. Benjamin D. Samte,
4. G. Joel Haokip s/o LK Haokip
5. Miss Lhinglulkim Kipgen of Haipi Vill, Sadar Hills
6. Samuel Lhungdim
(Hihkhelh a om leh hong theisak un: next issue ah bawldik ahi ding).
SUUNNA:
Neikholhing (65) w/o Lutthang Haokip of Dist HQ, Tuibuang tuni zingsang dak 4:00 vel in Dist Hospital ah zunkhum leh kalna kithuah ziakin si a, tuni’n Dist HQ hanmual ah kivui hi.
G. Thangkhopau (76) h/o Niangkhojam of Lamphelpat tuni sun dak 12:00 vel in RIMS hospital ah awmna(asthma) ziakin si a, March 14, 2014 in Chingmeirong Christian Cemetery ah kivui ding hi.
****************************************
IMPHAL NEWS
Imphal East leh Thoubal ah earthquake mock drill om:
Imphal, March-13 : National Disaster Management Authority apan huhna zangin Disaster Management Institute, Relief & Disaster Management Dept., Govt. of Manipur te saina in Imphal East District leh Thoubal district ah tuni in zinling apan kiven ding dan sinsakna ‘Multi State Mock Exercise on Earthquake’ om hi. Imphal East District sungah tuni in DC/Imphal East office, Kusum Oil Pump, City Convention Centre, JNIMS, PCTC Oil Pump, Relief Camp, Panchayat Bhavan ah om a, Thoubal District ah Mini Secretariat, District Hospital, Thoubal Market, Wangjing Bazar leh Thoubal College ah om hi.
Tunnel 17na a leivuh zousiang uh:
Imphal, March-13: Jiribam-Tupul Raiway line a nasem construction companies te’n tuni in tunnel 17na a leivuh zousiang uh a, huai project a nasem pawlin tuni nitaklam dak 5.00 in tunnel 5 tan ah nasep zousiang uh chihthu om hi. Tuni a leivuh kizousiang tunnel 17na pen Tamenglong district sung Awangkhul khua a om hi a, a saulam meter 1061.8 hi’n kigen hi.
Election ah CAPF company 40 zat hiding:
Imphal, March-13 : Ministry of Home Affairs in Manipur ah April 9 & 17, 2014 a Lok Sabha election a duty din Central Armed Police Force (CAPF) company 40 zat hiding in state govt theisak a, state dang akipan hong kuan dingte March 20, 2014 akipan hongtung ding uh hi’n kigen hi. Manipur ah tulela omsate tawh sim in companies 79 zat hiding chihthu om hi. Manipur in Lok Sabha election ah CRPF companies 27, BSF companies 12 leh Railway Protection Force companies 1 banah State Armed police forces companies 10 zat sawm uhi. State sunga Central Armed Police force omte enkai dingin IG (Ops) CRPF Zulfiquor Hasan guan a om hi’n leng kigen hi.
IED bomb khat kimukhia:
Imphal, March-13: Imphal-Moirang lampi Keirenphabi Maning Leikai ah zan nitaklam in Keirenphabi khaw miten IED bomb khat mukhia uhi. Huai phet in Moirang Police- te theisak uh a, Moirang police te’n amun vadelh pah uh a, police bomb expert te’n tuni zingkal in hihsia(defussed) uhi. Huai IED bomb bel kg. 3 vel a gik hi’n kigen hi.
BSEM office chabi in kalh uh:
Imphal, March-13 : Board of Secondary Education, Manipur (BSEM) a Chairman L. Rajmohon apaisa Feb. 28, 2014 in retired a, state govt in tuni tanpha amun luah ding guanglou uhi. Huai tawh kisai in DESAM volunteers te’n tuni’n BSEM office vapha main gate chabi in kalh uhi. Huai hun ah security personnel duty te’n kham mahle uh amau mi atamluat ziakun thagum a lutin a sunglam ah chabi in kalh uh a, tuazawh in Diesel auto in taikhia uhi.Thiltung police te’n a theihphet un delh uh a, diesel auto a tai DESAM volunteers te BJP office konga Nityapat Chuthek mun ah delhpha in man uhi.
KCP-MC 14 in galvan koihkhia:
Imphal, March-13 : KCP-MC (Nongdrenkhomba group) apan cadres 14 in tuni’n SoO nuai a om dingin galvan koihkhia uhi. Tua tawh kiton in amaute laklutna tuni in Bishnupur district sunga 6th Assam Rifles post ah om hi. Amau Commander Prithvi kichi in makaih a, galvan tuamtuam 12 koihkhia uhi. Tuate AK-23 rifles 1, AK-47 rifles 1, AK-21 rifles 1, AK-22 rifles 1, AK-56 rifles 1, Chinese OG gun 1, Lethod gun 1, .32 pistol 6 leh a tang 6, 9mm pistol 1, handgrenade 4, detonators 3 leh thautang hunkhop pekhia uhi.
Huai hun ah Chief Minister O. Ibobi leh Dy. CM Gaikhangam in leng uap uhi. Tuni a galvan koihkhia pawlte designated camp 3 koih in om uhi. Sept 9, 2013 in KCP-MC (Nongdrenkhomba) C-in-Chief Ningthoujam Nongdrenkhomba @ Romen, Chief of Army Laishram Guni @ Gunamani te’n govt tawh kalah MoU suaikai uhi.
Transfer/posting:
1.PC Lawmkunga, IAS, Chief Secretary & Secretary (Cabinet & Confidential/Forest &
Environment); Chief Vigilance Officer as Chief Secretary & Secretary (Cabinet &
Confidential/Forest & Environment/ MOBC & SC); Chief Vigilance Officer, Govt. of
Manipur & Member Secretary (State Commission for OBC).
2. RK Dinesh Singh, IAS, Secretary (MOBC/Revenue) & Project Director(MACS) in
addition as Secretary(MAHUD/Revenue) & Project Director (MACS) in addition
3. M. Harekrishna, IAS, Addl. Secretary (Labour & Employment) & Director (Printing &
Stationery) as Addl. Director (State Academy of Training) and Addl. Secretary (Admn
Reforms) and Director (Printing & Stationery) in addition
4. L. Nabakishware Singh, IAS, Addl. Director (State Academy of Training) & Joint
Secretary (Admn Reforms) in addition as Joint Secretary (MAHUD) & District Co-
ordinator (MAHUD & UBS) in addition & Joint Director (MAHUD)
5. W. Bhaktaraj Singh, MCS, Addl. Secretary (MAHUD) & District Co-ordinator (MAHUD
& UBS) in addition & Joint Director (MAHUD) as Addl Secretary (Labour &
Employment) and attached to Election Control Room
6. L. Nandakumar Singh, MCS, Deputy Secretary (Edn-S) ex-officio ASTD (RMSA) and
attached to Election Control Room as Deputy Secretary (Edn-S) ex-officio ASTD (RMSA)
7. Ranjan Yumnam, MCS, Deputy Secretary (CAF & PD) & ex- officio Jt. Director (CAF &
PD) as Addl. Deputy Commissioner/Jiribam .