LM Khaute,IPS in nasep hoih ziakin Award sang
Imphal, March-11: LM Khaute,IPS, Addl DGP in a nasep hoih ziakin International Confederation of NGOs te’n New Delhi ah Feb 28, 2014 in Award minthang leh sang(high & prestigious) mahmah ‘KARMAVEER CHAKRA-HOPE ALIVE AWARD 2013-2014’ piak in om a, citation leh medal in huai award zui hi. .
LM Khaute in Shillong a St Anthony’s College akipan BA(Hons) degree in English Literature a zawh nungin New Delhi a Jawaharlal Nehru University akipan MA degree in International Politics zou a,kum 1985 in Indian Police Service(IPS) zom hi. Aman khawtang hoihna dingin lunglut leh chitak kawmin panla a, SP/CCpur ahih lai akipan a kaisang zel kawmin DIG, IG, ADG, etc dinmun tanpha ah leng a nasephoih sunzom in AIDS leh damdoi khamtheih doudalna lam ah hahtakin panla a,mipi tawh kithutuaka pangkhawm in khawtang hoihna ding leh lemna leh muanna omna dingin kuhkal tak a pan alak ziakin thilhoih tamtak semkhia hi.
A nasep hoih ziakin India President in Police Medal for Meritorious Service a piak banah President’s Police Medal for Distinguished Service piak in om hi. LM Khaute,IPS in tulelin Addl DGP(Law & Order) len hi.

Tuibuong-Henglep Rd nasep patna din flag-off program
Lamka, March-11: Socio-Economic Dev Orgn (SEDO) pawlin Tuibuang-Henglep HQ kikal lampi bawlna nasep patna dingin tuni zing dak 9:00 in Tuibuang bazar a Sumkong Kaimun ah khahkhiakna (flag-off) program zang uhi. Huai ah Thangjang Haokip, President, Kuki Inpi/CCpur in SEDO website www.sedomanipur.com hong a, Rev D.Jangkholam, Executive Director, ECA in thumna in lan hi. Thangkhosei Haokip, President/KIM inTuibuang-Henglep lampi a nasemding mipi leh nasepna a kizang ding JCB flag-off hi.
Thangjang Haokip in a thugenna ah SEDO te’n gam khantouhna dia nasep a patdek uh mipi’n kithuahpih chiat ding in ngen hi. Thangkhosei Haokip, Kuki Inpi Manipur (KIM) in a genna ah SEDO te’n Henglep lampi a bawldek uh kipahpih mahmah ahihdan gen in maban ah nasep ding tuamtuam a neihte uh lawhching taka semkhedia deihsakthu gen hi.
SEDO te’n Tuibuang-Henglep HQ tan lampi abawl zawh chiangun dakkal 6-7 sung in Tuibuang apan Henglep tan gari in kitaitung ding hi’n kigen hi. Lampi kibawlthak km 36 in sau ding a, huai in khua 16 tawnkha ding a, lei (bridge) 2, culvert 28, protection works km. 13 ban ah drainage km. 24.56 hidin kigen hi. Huai lampi bawlna din in Thangjang Haokip, President, KIC; Demmang Haokip, Vice Chairman ADC/CCpur leh Letkhohen Haokip, Chief of Jalenmun te’n JCB thawh uh a, JCB khat in kalkhat sung sem in kikhel zelding uhi.

Kim Gangte in Press-te kimuuhpih
Lamka, March-11: Ms Kim Gangte,ex-MP tulela Manipur Pradesh Trinamool Congress President in tuni’n M.Songgel khua a Trinamool Congress/CCpur office hongpha in Press-te kimuhpih a Outer Manipur a MP election ding tungtang genkhawm uhi. Aman a genna ah khualna ziak leh gam itna ziakin lecturer semlai kitawp in kha 11 sung MP in pangkha a, kum 10 nungin Lok Sabha election ah AITC ticket in MP candidate nawn ding hi’n gen hi. MP ahih sunga nasep khitlouh tamtak omte sunzom nawn dia kisa hi’n gen hi. Telching ahihleh singtanggam kikawmtuahna dingin lampi, education, health care puahthak banah Manipur akipan Armed Forces Spl Power Act lakkhiatn dia panla ding hi’n gen hi.
Manipur ah Tribal dev deptt apan singtangmite’n hamphatna tamtak muding himahleh kimulou hi’n gen a, kum 5 sung Congress MDC, MLA, MP te’n mipi adia bang semkhia uh hiam? chi’n dotna bawl hi. Gamsung ah numeite a changkan masiah gam khangtoulou ding hi’n gen hi. Trinamool Congress in govt a bawl leh Manipur singtanggam ah kikhekna omding hi’n gen hi. ‘Election kuan in sumhau party-te’n sum a hawmkhiak ua leh mipi’n sum la dingin hasuan a, kum 5 sung mipi adia sum a khawlkhawmte uh election ding kuana hong homkhia lel ahihziak un, interest leng ngen un chi hi’. Manipur a Congress govt in Right to Equisation of Land Act azatsawm ziak ua thil tampi kiselgu om hi’n gen a, huai Act zat hileh phaizang sangin singtanggam ah gam(land) man feet sqare in tamzawtham ding a, sum leh pai etlahna ziakin igam uh zuak hileng Company leh phaizang a sum haute’n hong leikhia in hong tenkhum ding uh hi’n gen hi. NE state 7 ah state 4 vel ah AITC in MP election ah tuhding hi’n gen a, AITC chief Mamata Benarjee leng singtangmi leh gam leitang it hi’n gen a, AITC MP tamtak tawh pangkhawm in Manipur singtanggam bawl hidin gen hi. Maban a MP election ah kuapeuh in amah (Kim Gangte) vote chiat din ngen hi.

Mun 2 a accident ah mi 3 liam
Lamka, March-11: Tuni nitak dak 8:45 velin New Lamka Hebron veng a Tedim Road lamlian ah Bike (No. MN-02A/2257) in Tata Sumo (No. AS 21D/3108) a nunglam ah phukha a, huai ah Bike hektu Pauzalun(27) s/o Zamkholam of Phailien a lu keh in a khuak khawng lengkhia hi. Kintak in damdawi inn puaktung hi a, himahleh Imphal a dingin doctor te’n refered uhi.
Tua banah tuni nitak dak 9:15 velin ZEO office kongah bike 2 kiphukha ua, huai ah mi 2 liam uhi. Aliamte Kailalmuan s/o Lalneihkhup of Thangzam Road leh Newson of Neihsial vengte hi uhi. Newson leh a lawmpa’n ahihleh Phailian lam manawh a tailai ZEO Office kong ah Kailalmuon tawh kipelkhial kha in kiphukha ua, aliam 2te bel serious law lou uh hi’n kigen hi.

MLA leh MDC in innkang panpihna pia
Lamka, March-11: Henglep sub-divn a S.Molnom khua ah zan sunnung dak 1:30 vel in gamkang apan meikuang paisuak in khawsung a inn 19 banah catholic biakinn 1 leh school building 1 leng kangtum hi. T.Manga Vaiphei, MLA (Henglep A/C) in tuni’n S.Molnom khua a inn kangte panpihna din antang bag 12, puan, bel leh adangdang carton 7 dim pia a, Red Cross Road a atenna inn apan sunnung dak 2:00 in Shaktiman Gari in S.Molnom khua ah pawlut hi. Huailou in Henglep MDC Paolal in leng S.Molnom khua a innkang panpihna dingin blanket 6 pia hi.

Khaipao in V/A house hongkhia
Lamka, March-11: Khawmawi ah tuni sunnung in Khaipao Haokip, MDC(Kholmun) in Village Authority House thak hongkhia hi .Aman agenna ah MGNREGS a MDC’te share 25% tungtawn a V/A kibawl hi’n gen a, mipi leh khawsung adia a poimawh ziakin khua tamtak ah V/A house kibawl hi’n gen hi. NGNREGS tungtawna sum leh pai zatna sawt daihpen ding in V/A house kibawl hi’n gen a, maban ah khua tengah V/A house bawl sawm hi’n gen hi. Hausa-te’n mi poimawh tuamtuam tawh kithuahkhawmna din V/A house poimawh a, huai dingin amanpha theipen a zang din deihthu gen hi.Maban ah development works sepding tamtak om a, kuapeuh pangkhawm a semkhawm din ngen hi.

Thanlon bial veh din kipankhia
Lamka, March-11: SSPP Gen HQ leh Jt HQ, Lamka te’n March 11-13,2014 sung Thanlon bial veh dingin tuzing in kuankhia uhi. Bungmual a SSPP complex ah tuzing in Pastor Ginzatun in khualzin dingte thumsak in khakhia hi. SSPP team in school tuamtuam ah textbook leh uniform hawm ding uh a, SSPP Thanlon Block, V/A, PTC, ZYA, SSPP Bukpi Unit makaite tawh meeting nei in education dinmun genkhawm ding uhi. March 12, 2014 nitak in SSPP Thanlon Block Presidential election leh seminar hun ah tel ding uh a, March 13, 2014 zinglam in Bukpi khua ah Teacher orientation neihpih ding uh a, sunnung in Bukpi apan Lamka hongzuan ding uhi.

Damdoi hunbeisa hunkhop hawmkhia
Lamka, March-11:CMO/CCpur office campus ah Feb 27, 2014 zingsang in CCpur dist a block 6 a govt school 60 te zatding Instrument Health Check-up hawmkhiat hi a, huai lak ah Povidone-Iodine Oilment (Zenith Drugs Private Ltd ) manufacturing date 12/2011, expired date 11/13 hunkhop telkha hi. Huai tawh kisai CMO office lam apan kizadan in damdoi nekthawh hilou, oilment-te ahun bei leleng mihing adia lauhuailou in kum 1 sung bang hoih lai hi’n gen uh a, expired dekkuan in govt apan supply hongtung pan hi’n gen uhi.

Project thak honkhiat in om
Lamka, March-11: KIC office, Tuibuang ah tuni zinglam “Improving access to information of public schemes in remote & backward districts of NE India” kichi Rev. L.B Angam, General Director, ECCI in hong hi. Huai hun ah project tawh kisai H.Nongyai, Program Co-ordinator, ACTED in hilhchian hi. Project thak kihongkhia in govt scheme tuamtuam- NRHM; IAY; MGNREGS; RKVY; Mid Day Meal; TSC; NSP; PDS; ICDS leh RGGVY te mipi in a theihsiamna din awareness neih banah beneficiaries tamtheipen guanlut ding chih hi’n kigen hi Assam state a dist 2, Meghalaya a dist 1 leh Mizoram a dist 1 ah leng project honkhiat hiding a, March 13 in Chandel dist ah leng hon hidin kigen hi.

DIET centre ah joint meeting om ding
Lamka, March-11: DIET Centre/CCpur a Diploma in Elementary Teachers Training (D.EI.Ed) a tel ding untrained teacher-te leh DIET Centre/CCpur a Counsellors tengin March 15, 2014 zinglam dak 10:30 in DIET Centre a Teaching Hall ah joint meeting nei ding uhi. Huai ah untrained teacher-te class neih hunding leh Counsellor-te duty roster ding kikumding uh a, untrained teacher training ding teng leh Counsellor te telkim ngai ding hi.

Mi 8 in joining report pia
Lamka, March-11: State Health Society/Manipur nuai a Doctor telin post tuamtuam a contract basis a semding tamtak kila a, huaite lakah CCpur dist a semding mi 8 te’n tuni’n CMO/CCpur office ah joining report pia uhi.
&&&&&&&&&&&&&&&&&&&&&&&&&&&&&&
IMPHAL NEWS
Vice President in Manipur hongpha ding
Imphal, March-11: India Vice-President Hamid Ansari in April 2, 2014 in Manipur hongpha ding a, aman JN Dance Academy complex leng phak a sawm ziakin Manipur Chief Secretary PC Lawmkunga,IAS in tuni’n JN Dance Academy mun enkhia hi. Huai hun a Manipur DGP Shahid Ahmad,IPS; IG(Intelligence), Chief Engineer/PWD leh high ranking official tamtakin Chief Secy zui uhi. India Vice-President in ni 3 sung Manipur hongphak sung in JN Dance Academy Diamond Jubilee lopna hun uap ding a,huailou in Jiribam-Tupul railway line a railway bridge sangpen bawl patna din foundation suang phum ding chih ahi hi. Huai railway lei(bridge) bel metre 241 in sang ding hi.

Mega Mock drill team flagged off

Imphal, March-11:Manipur Chief Secretary PC Lawmkunga,IAS in tuni’n DC/Imphal East office ah Imphal East leh Thoubal district akipan Mega Mock Drill a telding teamte khakhia(flagged off) hi. Huai Mega Mock Drill bel Disaster Management Institute Relief Management Department in National Disaster Management akipan huhna tungtawn a panla uh hi’n kigen hi. .
Manipur leng leitung a zinling(earthquake) hanta mun Zone-V na(earthquake zone V of the earthquake prone) a om hi’n kigen a, tukum dungin Northeast region ah zinling om dinga gintakna om ziakin Centre in leng ngai poimawh in hibang thiltung om hun ah mihing tamtheipente hinna humbitna ding in mock drill leh kisinsakna tuamtuam adin lanla hi’n kigen hi.

Helpawlte’ ambush ah A/R 2 si
Imphal, March-11:Chandel district sung Tengnoupal biala Leibi post a om 24th Assam Rifles pawl tuni sunnung dak 1.30 velin convoy a pailai galvan hoihtak tawi helpawlin ambush in a, hun sawtkuamtak kikaptuah uhi. Helpawlin IED bomb ana hihpuak khum khit un lam nawl akipan in galvan hoihtak zangin kap uh a, huai ah Assam Rifles Jawan 2 si in midang 2 mah liam uhi. Thusuak in gendan in 24-Assam Rifles Commandant Col. Goshwami in Leibi post a om 24-Assam Rifles-te inspection bawl a hawh a kiknawn lam in helpawl in IED bomb 2 puaksakzak uh a,huai tawh kiton in A/R convoy-te kap uh a, huai ah JCO khat Warrant Officer Murli leh a driver rifleman MT Santosh si uh a, Gari dang khat atuang Rifleman Ngamei Abhi leh Rifleman Pramod Kalai liam uh a, helicopter in Leimakhong a Military Hospital tun hi. Aliam mi 2te laka khat gim mahmah hi’n kigen hi.

CEO in pawl tuamtuam kimuhpih ding
Imphal, March-11: Chief Electoral Officer(CEO) Manipur O. Nabakishore Singh,IAS in March 14, 2014 zinglam dak 11.00 akipan Old Secretariat a Conference Hall ah Mainpur a Civil society tuamtuam, NGOs leh Local Club tuamtuam akipan makaite kimuhpih ding a, ‘systemic voter education tawh kisai leh tunung a Lok Sabha election om hun ah voter tengin vote a khiak chiat uh deihna ziakin houlimkhawmna leh thil omdan genkhawmna neihpih ding chihthu om hi.

Mi khat akipan sumlem mukhia
Imphal, March-11 : Thoubal Police Commando-ten za’n in Thoubal Bazar mun ah pasal khat akipan in sumlem Rs. 1000/- note ngen pek 15 mukhia in amah leng man uhi. Mat a om bel Md. Rakigur Rahman(34) of Moijing Village, Thoubal disctrict hi a, police te’n a custody a koih ngal in thil omdan suizui zel uh hi’n kigen hi.

Pangolin shell tawh mi 2 man
Imphal, March-11: 24-Assam Rifles ten tuni’n Tengnoupal a PVC Check Post mun ah mi 2 akipan in Pangolin Shells kg. 2 vel mukhia uhi. Mat a om mi 2te bel Shinam Shanti leh S. Hemam hi uh a, amau Maruti Van (No. ML-05G/5284) a tuangkawm in Pangollin shell aguk in pua uh a, A/R te’n mukhe veve uh hi’n kigen hi. Mat a om mi 2te a vante uh Assam Rifles te’n Forest department ah pekhia uhi.