DC in Free Textbook enkhia
Lamka, March-5: P.K Jha, IAS, DC/CCpur & Chairman, SSA/CCpur in tuni zinglam dak 10:45 in Vimala Raina H/S campus ah govt school-te’lakah academic session 2014-15 a hawmkhiat ding free Textbook enkhia a, DI of schools-te kiang ah textbook sample pekhia hi. ZEO leh ADC nuai a school 440 te adin March 6-8, 2014 sung Vimala H/S ah class I-VIII student-te lakah free Textbook avekaki gawm in 1,41,342 hawmkhiat hiding hi. March 6, 2014 zinglam dak 11.00 in CCpur block a schoolte lakah hawm hiding a, sun dak 12.00 in Henglep block, sunnung dak 2:00 in Samulamlan block adin hawmkhiat hiding hi. March 7, 2014 zinglam in Singngat block, sun in Thanlon block leh sunnung dak 1:00 in Tipaimukh block adin hawm hiding a, March 8, 2014 apan in ADC nuai a school te’ ading hawmkhiat hiding hi.

SP in Officer-te meeting pih
Lamka, March-5: K.Kabib, IPS, SP/CCpur in Feb 21, 2014 in SP/CCpur dia hong joined nunga masapen dingin tuni sunnung dak 1:00 in a office chamber ah Police Officer teng Crime meeting neihpih hi. Huai ah SP in maban paiding dan, nasep dingdan leh Police officer-te thuhilhna nei hi’n kigen hi.

Staff te’n CMO vaidawnna nei
Lamka, March-5: CMO/CCpur administrative control-na nuaia om staff tengin tuni’n CMO thak Dr Thangchinkhup Guite vaidawnna nei uh a, pakkhi oksak in vaidawnna singpi dawnpih uhi. CMO in agenna ah Pathian leh Health Minister deihsakna ziaka CMO lenthei hi’n gen a, govt in lawh hongpiak dungzui in nasep dingte ahibang a sepchiat poimawh hi’n gen hi. Staff-te kuapeuh pangkhawm a, mipi adia hihtheih bangbang kuhkal leh chitaka nasem chiat dingin ngen hi.

Officer 2 in CCpur dist ah sem ding
Lamka, March-5: Angam Karung Kom, MCS tulela BDO/Kakching CD Block sem in AC to DC/CCpur & SDO/Vangai Range len ding in hongpai ding a, H. Balram Singh, MPS tulela SDPO/Moreh in Addl. SP/CCpur len dinga hong kisuan ding in order suak hi.
Huailou in N. Thuamkhansuan, MCS tulela SDC to SDO/CCpur in AC to DC/ Senapati len dingin kisuan ding a, B. Goulianmang, MPS tulela Addl. SP/Chandel in i/c SP/Jail len ding hi.

Foreign Service Institute ah Dean in pang
Lamka, Mar-5: India gam a Indian Foreign Services (IFS) officer ten in training a neihna uh Delhi a Foreign Services Institute ah Dean/Head dingin Ms. Nengcha Lhouvum guan in om a, amah Indian Foreign Service(1980 batch) hi’n kigen hi. Amah a Diplomatic career sungin Mexico City, Dhaka, Havana leh New York a Indian Missions tuamtuam ah semkha a, New Delhi a Ministry of External Affairs ah leng deptt of West Europe, Americas leh South East Asia & the Pacific semkha hi. Amah kum 2010-13 sungin Ambassador of India to Serbia banah huaima kum 2005-2009 sungin Ambassador of India to Lebanon in pang hi. Aman a sephoih ziakin Prime Minister's Award for Excellence in Public Administration, 2007-08 kipahman piakin om hi.

ZEO meeting ah DI/Thanlon tel
Lamka, March-5: Directorate of Education (S) Conference Hall ah tuni’n Manipur a ZEO teng meeting om a, CCpur dist ah ZEO a omlouh ziakin Pumsong Hangshing, DI of Thanlon in ZEO sikin meeting ah tel hi. Addl Director of Edn(S) Hills len W.Chandra Kumar, MCS pen Valley ah kisuan ziakin mangpha khakna in DI of Thanlon in Puandum 1 silhsak a, Addl Director of Edn (S) Hills lenthak Mangte Lelte Kom, MCS kipahpihna in Puandum 1 mah silhsak hi.

Evangelist teacher adin mi 110 tel
Lamka, March-5: EBC nuaia Evangelist Teacher 3 lakna dingin tuni zinglam dak 10.30 akipan Ebenezer Academy ah written test om a,huai ah candidate 110 tel uhi. Tuni’n written test zou uh a, March 6, 2014 zinglam dak 10:00 apan in Dorcas Hall ah personal interview om ding hi.

DC/CCpur in SDO/BDO release
Lamka, March 5: Tulela SDO/BDO Tipaimukh len Joel G.Haokip, MCS in SDO/BDO Thanlon lending in order suak a, posting-na mun a join theihna dingin DC/CCpur in release hi. Huai lou in K.Shyamchandra Sharma, MCS in ADC Pherzawl & SDO/BDO Tipaimukh lending in tuni’n join hi.

Community Coaches Training Program
Lamka, March-5: Ministry of Youth Affairs & Sports huhna zangin Special Olympics Bharat, Manipur Chapter te’ saina in March 6, 2014 zinglam in CCpur college kianga Youth Hostel ah ‘Scheme of Sports and Games for Persons with Disability’ te adin Community Coaches Training Program Level-I honna om ding hi. Huai ah Maniram Sharma, IAS, Addl DC/CCpur khuallian apang in hong ding a, Functional President in S.Khaikhopau Ngaihte, BO HQ, DC’s office pang ding hi.

&&&&&&&&&&&&&&&&&&&&&&&&&&&&&&&&&&&&&
IMPHAL NEWS
March 9, 2014 tan ki-enroll theih
Imphal, March-5 :O. Nabakishore Singh,IAS, Chief Electoral Officer(CEO) Manipur in tuni’n Manipur Secretariat North Block a a office chamber ah Press-te kimuhpih in a genna ah Outer Manipur Parliamentary Constituency ah April 9, 2014 in election om ding a, huai dingin March 15, 2014 in election notification suak ding a, candidate ut-te adin March 22 tan nomination file theih ding a, March 24 in scrutiny om ding hi. Candidate kizukkik nuamte March 26 in kizukkik thei ding chi’n Press Note a suah taklang hi.
CEO in a genzelna ah Inner Manipur Lok Sabha constituency adin April 17 in election om ding a, huai dingin March 19 in notification suak ding hi.Candidate utte adin March 26 tan nomination file theih ding a, March 27 in scrutinby om ding a, kizukkik nuamte March 29 in kizukkik thei dfing uhi. Lok Sabha seat 2 adingin May 16, 2014 in vote sim hiding a, election tawh kisai thilte May 28 tana zawhsiang hiding chi hi. Inner Manipur Lok Sabha constituency a Returning Officer in DC/Imphal West pang ding a, Outer Manipur Lok Sabha constituency a election om ding ah Returning Officer in DC/Thoubal pang ding hi.
Kum 18 a upa tutan Electoral roll a min tuang nailoute’ adingin March 9, 2014 in Polling Station teng ah Booth Level Officer’s camp omsungin min khumlut theih hidingin CEO in gen hi. Lok Sabha election tawh kisai in State Election deptt in Control Room hong a,telephone No. 0385-2443711, 0385-2443712 & 0385-244373 contract theih ding a, Fax No. 0385-2452979 leng service ding chih ahi hi.

Ceasework strike hunsuan
Imphal, March-5: Joint Administrative Council(JAC) a kikhaikhawm All Manipur Trade Unions Council(AMTUC) leh All Manipur Govt Employees Orgn(AMGEO pawlin 6th pay ahi bangbang a piak dinga govt a phut uh lawhchinlouh ziakin March 6, 2014 akipan hunchiam omlou din ceasework strike patsawm mahle uh Election Commission of India(ECI) in Lok Sabha election hun ding tuni’n a puankhiak banah Election tawh kisai Model Code of Conduct tuni apan zat ahih ziakin ceasework strike kipat hun ding suan uh a, ECI in Model Code of Condcut a lakkhiak masiah khawlphot ding uh hi’n JAC makaite’n puang uhi.

Grievances on Tribal Languages
Imphal, March-5 : Council of Tribal Languages and Literature Societies, Manipur- te saina in tuni in Manipur Press Club ah ‘Grievances of Tribal Languages of Manipur’ tawh kisai in press meet om hi. Huai ah Chairman Ranongning Gangmei in Manipur ah tribal dialects akigawm in 35 om a, ahihziakin state govt in tribal-te pau kepbit sawmlou uh a, school a textbooks te Englsih, Hindi, Manipuri leh Meitei Mayek khawng in print khia uh a, tribal mite pau in khatvei mah leng print nailou uh, chi hi. Huaiziakin maban ah state govt in tribal pau a textbook a print khiak uh hunta a, huai dinga phutzui hiding in gen uhi.

Manipur ah NOTA option zat hiding
Imphal, March-5 : Manipur ah 16th Lok Sabha election om chiangin NOTA (none of the above) option zat dingin Supreme Court in lemsa hi. Hibang NOTA kichi Manipur a zat masaknapen ding hi a, voters te’n candidate deih a neih kei ua leh EVM a NOTA button mek le uh kuamah vote pelou chih hiding hi. Huailou in EVM ah VVPAT( Voter Verified Paper Audit Trail) tawh leng kithuah ding hi. Tuma in Mizoram leh Nagaland a VVPAT zat in om a, tutung in Manipur ah zat hi hiding hi. VVPAT tungtawn in voters te’n candidate a vote-te uh enkik thei ding ua, midangten tamper theilou ding uh chihna suak hi. Ahihziakin, VVPAT machines bangzah zat hiding hiam, chih bel theih hilou hi.

Commando te’n operation bawl
Imphal, March-5 : Thoubal – Kasom Khullen kikal a lampi bawl a om non-Manipuri 2 pimang tawh kisai in tuni in Manipur Police Commando te’n Senapati District sung mun tuamtuam operation bawl uhi. Amau tuni zingkal baihtak in pan uh a, sunnung dak 2:30 in zou uhi. Pimang a om non-Manipuri -te bel KNF-N te pimang hiding in gintakthu kigen a, operation hun ah kuamah mat omlou hi.

Physics exam thak din phut
Imphal, March-5: CBSE saina Hr Sec Examination ah Physics subject a leak ziakin Democratic Students Alliance of Manipur (DESAM) ten exam thak dingin tuni in thuneite phut uhi. DESAM Secretary General P. Premchandra in press statement a suah ah Physics subject exam zawhsiang in om mahleh Imphal a local paper-ten leaked ahihdan suah uh a, tua ziakin akisaipihten ngaikhawk a exam thaksak dingin ngen hi. Bangchidan a Physics subject leak thei hiam, chih leh a kigolh khate mankhe dingin leng ngenhi.