DC/CCpur tuni’n office kai in nasem
Lamka, March-4: Pradeep Kumar Jha @ P.K Jha, IAS in zan in DC/CCpur lending in charge la a, sunnung in Imphal vapha in nitak in Lamka hong giaklut hi. Aman tuni apan office kai in nasep pan mi tuamtuamte’n kimeltheihpihna nei uhi.

Pradeep Kumar Jha, IAS in kum 2006 in Civil Services examna ah 6th position a zou in IAS mu a, amah Bihar state a Darbhanga district akipan hi a, azi’ Dr Sweety Thakur tawh tapa 1 nei uhi. IAS ahih nunga a posting masakna Senapati district hi a, kha 3 sung SDO/Kamjong, Ukhrul len in huai zawh kum 2008-09 sung SDO/Tadubi, Senapati in posting hi. Kum 2009-11 sung Project Director, MACS len a, huai zawh 2001-14 sung DC/Senapati len a, March 3, 2014 akipan DC/CCpur hihna len hi.DC/CCpur ahih tawh kiton a a thiltup masa bel district sung omdan theihchet banah mipi tawh kizopna hoihtak neikawm a vanhawm ding tum hi’n gen hi.

Doctor 2 in ni tamlou sung Dist Hospital ah hongsem ding
Lamka, March-4: District Hospital a Maternity Ward a mawhpua Dr. Lalzuitluangi @ Dr Zuii, Gynaecologist in March 1, 2014 akipan Thyroid operation ziakin kha 1 earned leave la a, Maternity Ward asem mah Dr Th. Imochaobi, Gynaecologist in leng damlouh ziakin Feb 27, 2014 apan kal 2 sung earned leave la hi. Hospital a numei doctor (Gynaecologist) omlouh ziak in Dr P.Shyamsunder, Med Suptd/Dist Hospital in zan zinglam akipan in Director of Health Services a inn ah vangak a, nitaklam a tuak kha theipan in nitak khawmial nungin Dist Hospital a semding arrangement bawl uh a, huai zawhin Med Suptd in Lamka hongzuan hi’n kigen hi. Dist Hospital ah utilisation dana ni tamlou sem ding Dr A.Wangoleima, Gynaecologist, Dist Hospital/Bishnupur in March 1-10, 2014 sung hong sem ding a, Dr Wahengbam Indibar Singh, MDoctor(O& G), CMO pool Bishnupur in March 11-17, 2014 sung hongsem dingin Director in order suah hi.

Dr P.Shyamsunder Singh in a gendan in Dist Hospital ah numei naunei ding niteng in mi tamtak om a, Gynaecologist omlou in hi theilou a, Medicine Doctor omlou inleng Medicine ward a damloute hitheilou ahihziak a panla hi’n gen a, Imphal a a inn akipan Director of Health Services tenna inn kikal cycle in taitung a, khawmial nunga Lamka hong zot leng Director in lamdang sahial hi’n gen hi. Aman zan mah in Dr.A.Wangoleima kiang ah govt oder vapia hi’n leng gen hi.

DHS/NRHM te’n doctor 3 kha
Lamka, March-4: Dist Health Society/NRHM te’n tuni sunnung in Rengkai a Dr H.L Liensang tenna inn ah Feb 28, 2014 a pension Dr. H.L Liensang, CMO/CCpur; Dr. N. Paul Ginthang, Med Suptd, Dist Hospital leh Dr. Lalbieksang, MO, Saikot PHC khakna nei uhi. Huai ah Doctor 3 pensionte’ kiangah belpi, pakkhi leh mememto pia uh a, nitaklam in ankuang umkhawm uhi.

Zonu Training Centre hong ding
Lamka, March-4: S. Munhoi khua ah March 8, 2014 zinglam dak 10.00 in ZONU TRAINING Centre kichi puan-gat leh puankhui zilna ding honkhiakna om ding a, Pradeep Kumar Jha, IAS, DC/Ccpur in hong ding hi. Zonu Training Centre ahihleh huai bial a numeite economic dinmun khantouhna dia kibawl hi’n kigen hi.

DFO akipan in FO in kaisang
Lamka, March-4; Ms Huaikhanching w/o T. Nialkhanson in New Delhi a Ministry of Finance ah kum bangzahhiam Deputy Finance Officer(DFO) a sep nungin Feb 26, 2014 in Finance Officer(FO) payscale Rs. 19,000-Rs. 39,000+ grade pay Rs. 7,600 in kasang chih thutut kingah hi.

ZEO/CCpur ding om nailou
Lamka, March-4: Joseph Lalrothang,ZEO/CCpur apaisa Feb 28, 2014 in asepna apan retired a, kuamah kiangah charge a piaklouh banah govt in tuni tan in leng ZEO/CCpur lending order suahlou hi. ZEO/CCpur ding omlouh ziakin Leimakhong a Military Station ah March 4-6, 2014 sung Territorial Army lakna dinga telnuam tuailai tamtak buai mahmah uh a, ZEO omlouh ziakin DI of schools/CCpur in document poimawh tuamtuamte attested bawlsak mai hi’n kigen hi.

Guta-te’n Activa gari khat gu
Lamka, March-4: Thangmuonsang Gangte of Chienkonpang (Dalson’s Enterprise/Furniture) in a compound sung uah Activa gari (white colour) No. MN-02/7497, Chesis No. ME4JC448LC7681124, Engine No. JC44E5678609 a koihlai gutate’n zan nitak in gumang uhi. Gari’ neitu in Police ah report bawl a, Police te’n guta matkhiat sawm in suilel uh a, FIR No. 33 (3) 2014 CCP-PS U/S 379 IPC registered uhi.

Med Officer-te’n ngaihven ngai
Lamka, March-4: CCpur district a posting a om kum 5 tan semkhin Medical Officer, hileleng ACR, Degree/Diploma Certificate in PG course pending omkha tengin akinlam in CMO/CCpur kiangah document poimawh teng submit a kimuhpih dingin A.Bijoy Singh, Director of Health Services, Manipur in theisak hi.

1st phase ah 36 in ngah masa ding
Lamka, March-4: CCpur Dist a People Living in HIV (PLHIV) mi 320 te’n Dec 2013 tan in DAPCU leh World Vision-te’ kiangah panpihna ngahna din registration bawl uh a, huaite lak ah World Vision in PLHIV te amau leh amau khawsak theihna din 1st phase in CCpur Dist apan mi 36 in Petty Shop 11, Piggery 7, Poultry 5, Weaving Loom 6, Yarn for Weaving ngah din 7 telkhia uhi. Mi 36 te’ kiang ah March 2014 sung in panpihna piakvek hiding a, thuchian kimzaw leh beneficiaries list kimtak DAPCU office ah ettheih hi.

Evangelist teacher adin written test
Imphal, March-4: Evangelical Baptist Convention(EBC) nuaia Evangelist Teacher 3 lakna ding in March 5, 2014 zinglam dak 10.30 in Ebenezer Academy ah Written Test om ding a, huai ah applicant-te telkim chiat dingin Director of Instituttions/EBC in theisak hi.

Singtangmi khat vuaklup in om
Lamka, March-4: Thangminlun Kipgen h/o Nengpi Kipgen of Sharonphai village, Saikul sub-division zan nitak dak 11.15 velin Bangalore ah vuaklup in om hi. Thutut kingahdan in Hindranagar ah a innkuan un khawsa uh a,Bike atuang in office akipan innlam a zuanlai pasal 3 in atuanna bike khamkhawl in suang(stone) zangin khoih(attack) uh a, suang a khetna ma mun 3 kek hi. Thiltung tawh kisai KSO-Bangalore panlakna in Halasuru Police Station ah FIR NO.0061/2014 registered in om hi.

CT Lian in ZOPA 2013 sang ding
Lamka, March-4: Zogam.com in Zogam.com Person of the Year 2013 asai uh March 1, 2014 ni in result puangkhia ua, huai Award piakkhiakna leh Zogam.com kum 11 chinna lawpna March 8, 2014 (Kiginni) sunnung dak 12:30 in Mini Auditorium, EBC Dorcas Golden Jubilee House, Dorcas Hall, New Lamka ah om ding hi.

ZOPA Award simna apaisa March 1, 2014 ni in om a, huai ah ZOPA Jury member te, Independent Observer leh member bangzah hiam te'n vote ngen tel tak in simna nei ua, ZOPA 2013 vote pen 60% SMS votes leh 40% Jury votes ki gawm hi a, hiai teng akipan winner tel khiakna nei uhi. Huai ah C.T. Lian in vote 2173 laka 38.64% a muh ziakin ZOPA 2013 hihna la a, amah zom in Pauzagin Tonsing in vote 27.43% mu a, Thangboi Singto in 19.01% mu in Kamminthang Guite in 14.92% mu hi.

ZOPA Award hawm leh memento piakkhiakna LB Sona, Chairman Zomi Council leh ZRO Advisor K. Guite te'n nei ding uhi. Huai hun ah lasiam Muan Hangzou, B Muan Ngaihte, Kim Joycee Vaiphei leh Dony Guite te'n lasa ding uhi.

SUUNNA
Vungzaching @ Pivung (61) d/o (late) Zamkhogin of Vengsak, Pearsonmun tuzing dak 5:00 in cancer natna in si a, tuni mah in Pearsonmun hanmual ah kivui hi. Pivung ahihleh Paite mite laka lasiam a minthang masapawl ahi hi.
&&&&&&&&&&&&&&&&&&&&&&&&&&&&&
IMPHAL NEWS
Tourism Project 3 adin suangphum hong
Imphal, March-4 : Chief Minister O. Ibobi in tuni’n Sendra Hillock ah Tourist Resort bawlna ding foundation suang phum a, Takmu ah Water Sports Complex bawlna ding in foundation suangphum a, huaizawh in Loktak dil a ‘Integrated Cable Car and Landside Tourism Development Project’ bawlna dingin foundation suang phum hi. Huai nungin Union Ministry of Tourism a Secretary Parvez Dewan in Imphal East a Nongmaiching ah ‘Institute of Hotel Management, Catering Technology & Applied Nutrition’ bawlna ding in foundation suang phum hi. CM in a thugenna ah India govt in Manipur adin tourism budget plan akipan 9% a bikhiah kipahthu gen a,compensation piak ngai mipite leng a kilawm hunchiang piak hidinn gen hi.
Huai hun ah Parliamentary Secretary(Tourism) M. Prithviraj, T. Mangibabu,MLA(Thanga A/C), Chief Secretary PC Lawmkunga,IAS leh Addl Chief Secy(Finance/Planning) RR Rashmi,IAS leng tel uhi.

Labourer 2 pimang in om uh
Imphal, March-4 : Thoubal leh Kasom Khullen kikal Ukhrul district sunga nasem a om mi 2 meltheihlouhten March 2, 2014 in pimang uhi. Pimang a omte M/s BBC Infrastructure Pvt Ltd nuai a nasem hi uh a. tunitan in a omna uh theih hilou hi. Mi 2te bel Debashish Mandal s/o Shyamsunder Mandal of Suri, West Bengal leh Ch. Ajit Singha s/o Ch. Arun Singha of Rajbir Part-II, Cachar, Assam hi uhi. Huai kim a om helpawl a kipuang omlou uh a, tua ziakin kuate sulnung hihiam, chih theihkhiak haksa hi’n kigen hi.

Dy Chief Minister in hongkhia
Imphal, March-4 : Manipur Horse Riding & Polo Association-te saina in tuni in Imphal Polo Ground ah ‘24th Governor’s Cup Invitation Polo Tournament & 13th Governor’s Cup Women Polo Tournament kipan hi. Hiai hun ah Dy CM Gaikhangam khuallian a pang in Tournament hongkhia hi’n kigen hi.

ATSUM pawl Chandel ah kimukhawm
Imphal, Mar-4: Chandel khua a MACA Hall ah zan in ATSUM leh federating unit tuamtuam TKS Ukhrul, ZSUM Tamenglong, CDSU Churachandpur, TSA HQ banah NSUC Chandel leh a federating unit tuamtuam Anal, Maring, Monsang, Lamsang, Tarao, Chothe leh Mayon student leader-te’n zan in Chandel a MACA Hall ah kimukhawm in maban ah pangkhawm a panlak dingdan genkhawm uh chih thutut kingah hi.

BJP thiltup vaihawmna dik ahi- Th. Chaoba
Imphal March 4: BJP Manipur Pradesh president Th. Chaoba in tuni’n Press-te kimuhpih in a genna ah maban a Lok Sabha election ah BJP thiltup ahihleh vaihawmna dik, territorial integrity venbit leh AFSPA, 1956 lakkhiak ding chih hi’n gen hi. BJP in election ah Prof. RK. Ranjan Singh leh Prof. Gangumei Kamei-te Inner leh Outer Parliamentary constituency a candidate di’n puangkhin uhi. Chaoba in a genzelna ah,vaihawmna dik omna dingin nekguk-takgukna hihbei masak poimawh a, Manipur govt in sepna neilou tuailaite ngaihsaklou chi’n leng gen hi. Manipur ah khawpi lianlua omlou ahihziak in Loktak Hydro Project leng state in a zat poimawh a, singtanggam ahl eng solar lamp project patkhiak poimawh chi hi. hi.

India in NE helpawlte pekhe din Myanmar kiangah ngetsawm
Imphal, March-4: Prime Minister Dr Manmohan Singh in BIMSTEC Summit a tel dingin Myanmar khawpi Nay Pyi Taw ah zin a, aman Myanmar khawpi a a om sungin Northeast a helpawl tuamtuam tulela Myanmar a panmun neia omte adiakin ULFA a Paresh Barua leh helpawl tuamtuam omte India khut a pekhe dingin ngen ding hi’n kigen hi.Prime Minister in Myanmar, Bangladesh,Nepal leh Bhutan pansan Northeast bial a helpawl tuamtuam in Lok Sabha election om hun ah buaina bawl dia gintakna om ziakin helpawl omte camp hihse ding leh helpawl makaite mankhia a India khut pekhe vek ding in ngetsawm hi’n leng Union Home Ministry apan thuduak khat in taklang hi.