DC thak tawh meeting om ding
Lamka, March-1: PK Jha,IAS in tuni’n Senepati a DC office ah Ms Jacintha Lazarus,IAS khut ah DC/Senapati charge pekhia a, March 3, 2013 in PK Jha in Jacintha Lazarus akipan DC/CCpur hihna charge la ding hi.March 3, 2014 zinglam dak 10.30 in DC/CCpur thak vaidawnna kawmin officer(DLO) tengin DC/CCpur office a BRGF Resource Centre ah kimeltheih tuahna din DLCC meeting nei ding uh a,huaizawh zinglam dak 11.00 in DC thak leh tribe leader banah student leader te’n kimeltheih tuahna dingin meeting neikhawm ding uhi.

Japan gallai a bomb hidia gintak toukhia
Lamka, March-1 : New Lamka Canan veng a om Thangneihching w/o Siamlun in tuni nitaklam dak 5:00 velin huansung a lei a tawhna ah bomb hidia gintak khat toukhia hi. Aman a gendan in bomb hidia siktum bel kg. 1 val dinga gintak hi a, Canan veng a SSPP Residential School khang a huan a bawlna mun uah toukhia a, aman lamdangsa in a et aleh sik hi a, a inn uah tawi hi. Apa Nengzading in huai pen Japan gal lai a bomb hiding in gintakthu gen hi. Huai thil tui- ek gawpta a, sik leng bang nawnlou in lei(soil) in tuambing hi. Manipur Express staff-te’n amun ah va enkhia uh a, tuahun in a dop ualeh gik mahmah a kg. 1 val ding hi’n gen uhi.

Traffic Police te’n Bike 1 kem
Lamka, March-1: Tedim Road-IB Road junction lakah zan nitak apan Apache bike (white) khat a No. omlou ban ah A/F leng kigelhlou 1 aneitu kitheilou nutsiat in om a, Traffic Police te’n kem uhi. Gari’ neitu in gari document kimtak tawi in Traffic Police- te kimuhpih ngai ding hi. Huailou in Traffic Police, VDF leh Police te’n Feb 24- March 1, 2014 sung in traffic rule bawhsia gari 24 mankhia in gari 1 ah Rs 100/- zel liausak uhi.

Dr Shyamsunder in Med Supdt len
Lamka, March-1: Dr N.Paul Ginthang,Med Supdt/District Hospital a sepnaa akipan zan in pension a, Dr Shyamsunder Singh(Ortho Surgeon) in tuni akipan Med Suptd hihna len in nasem hi. Dr Shyamsunder Singh in June 1988 kipan in Manipur Health Services ah sem hi. Amah CCpur dist ah kum hunkuamtak semta a, April 2014 chiang in CCpur dist ah kum 12 sung omta ding hi’n gen hi.

Zu tamtak mukhia in bua
Lamka, March-1: Hebron Veng, New Lamka a Village Authority, YPA, PTC leh numei thumkhawm pawl kithuah in tuni zinglam dak 11:00 in Hebron Veng a om L.Suanzachin’ inn ah zu omhiam chi’n check uh a, innsung apan zusan bottle 21 mukhia uhi. Huaizawh in L.Suanzachin tenna innkhanglam kipehsawn a bang(wall) hihsiatsak uh a, mundang ah zu a sel uh tamtak mukhia uh a, Lanva-lui dungah zu bottle 80 val bawkhia uhi.

Special Handloom Expo hongkhia
Lamka, March-1: Mani Ram Sharma, IAS, Addl DC/CCpur in tuni nitaklam dak 4:00 in Hmuia Veng a YMA Hall ah ‘Special Handloom Expo 2013-14’ kichi hongkhia hi. Huai bel Manipur Handloom & Handicraft Development Corpn Ltd, Imphal in Development Commissioner (Handloom), Ministry of Textile, Govt of India, New Delhi apan kithuahpihna zanga asai uh hi’n kigen hi. Special Handloom Expo ah handloom product tuamtuam leitheih ding hi’n kigen hi.

1-Day Awareness programme
Lamka, March-1: CCpur District Disabled Union (CDDU) in LiLiane Foundation (LF) akipan huhna zangin tuni’n Dorcas Hall, New Lamka a EBC Mini-Auditorium ah ‘1-day Awareness Programme for Persons with Disability (PwDs) and Parents/guardians of PwDs-cum-CDDU General Assembly’ nei uhi. Chief Guest in Langkhanpau Guite, Chairman, ADC in Imphal a programme aneih ziak a tel theilou in ama’ sikin N.T.Sanga Hangshing in hongkhia a, Rev V.Thangkhangin, Director (I)/EBC in thumna in lan hi.

Staff te’n DCO/CCpur khakna nei
Lamka, March-1: Dist Co-operative staff te’n tuni sunnung in a office mun uah a sepna apan retired S.Kaikhankap, Dist Co-op Officer kha in belpi 1 pia uhi. S.Kaikhankap in a genna ah kum 35 sung service a pension a omthei kipahhuai sakthu thu gen a, staff te kithuahpihna tung ah leng kipahthu gen hi. India gam ah tuailai tamtakte’n govt a sepna mu zoulou uh a, hileleng staff te’n govt a sepna nei in khalawh hoihtak a muhziak un duty nelhsiah loudin vaikhak, govt in pension nung tanpha kum 40 tan scrutiny bawl thei ahihziak in adiakin account lamte pilvang dingin hasuan hi. Aman agenbehna ah ama’ hunsung in chowkidar quarter kilam a, zawhsiang hikei mah leh zawhsiang hunin MDCte hiam Dist Co-operative Officer thak hongsak ding in vaikhak hi.

SDO in Minor Bridge hong ding
Lamka, March-1: Singngat ah BRGF 2013-14 fund zanga kibawl Minor Bridge kichi March 4, 2014 sunnung dak 1:00 in Lal Robul Fimate, SDO/BDO Singngat in hong ding hi.

Tuitha ah pasal khat kelum
Lamka, Mar-1: Hmangneikhum(16) s/o Fela of Rawvakawt (Tipaimukh sub-divn) tuni sunnung dak 2.00 in Rengkai a Tuithalui a kisil lai tuahsia in si hi. Hmangneikhum bel Lungthulien PMS school a kipan Class-X candidate ahihbanah Rawvakawt akipan BSEM nuaia Class-X exam dinga hongzin hi a, exam hunsung Rengkai Thailand veng ah a lawmte tawh innluah a om tuni’n alawmpa tawh Tuitha lui a kisil lai tuahsia hi’n kigen hi. A innkuante gendanin Class-X a zawh chiangin Bible zil ding a,Missionary a kuan lunggulh hi hi’n gen uhi.

SUUNNA
Nemngaihlian (36) d/o T. Nengzalam of Thangjam road tuni sunnung dak 1.00 velin Imphal a RIMS hospital ah TB natna ziakin si a, March 2, 2014 in Lamka hanmual ah kivui ding hi.
Chintin Baite m/o Jamsei Baite of New Lambulane, Imphal tuni sunnung dak 2.00 velin si a, March 2 in Imphal ah kivui ding hi.
&&&&&&&&&&&&&&&&&&&&&&&&&&&&

IMPHAL NEWS
RIMS thuneite’n Health Ministry’ thusuak kalh in Med Supdt guang
Imphal,March-1: Ministry of Health & Family Welfare (North East section) regular post a Medical Superintendent len dingin Dr Amuba guan dingin thusuah bawl mahleh RIMS a thuneitute’n huai bawhsia in Medical Superintendent incharge dingin Dr H Lakhichandra tuni’n guang uh chihthu om hi. RIMS a Med Supdt Dr Arunkumar zan in a sepna apan retired a, RIMS Director in tuni’n Med Supdt incharge din Dr H Lakhichandra guang hi. Dr H Lakhichandra bel junior professor hi a, amah sanga senior zawm taktak om hizenpi RIMS Director in amah tanau naite deihsak tuam chi’n RIMS a senior professors hunkhop in nuamlou sakthu gen uh chih ahi hi.Thusuak in a gendan in Ministry of Health & Family Welfare in January 23, 2014 in RIMS Director kiang ah Med Supdt dingin Biochemist Dr M Amuba guang dingin theisak chihthu om hi

O Joy in party kip leh hat mitsuan
Imphal, March-1: O. Joy in Manipur a regional party om sun Manipur People’s Party(MPP) ah kum tamtak a tel ziakin opposition leader chih tanpha a minvuah in om mahleh aman zanlam zeka MPP a nutsiat akipan in party hat leh detdou banah govt bawlthei ding a suanhuai party mitsua hidan in thusuak kingah hi.Aman a political carrer ah regionalism a ngaihsan mahmah ziakin kum tamtak MPP atel hi’n gen a, kum tamkuamtak leng MPP a President hihna len hi. Kum kumtak election ah a telsung a 2vei a lawhsapna hiding in kum 2012 a Assembly election ah kia hi. Huaiziak mahin aman kibulphuhhn kiptak nei leh govt tanpha bawlthei dinga muanhuai party a telnuam ahihdan gen a, regional hiam national, bang Party zom ding hiam chih bel genchian nailou hi.

Manipur govt in VAT khansak sawm
Imphal, March-1: Manipur govt in schedule-1 atel anuai abang item tuamtuam tawh kisai Value Added Tax(VAT) khansak hiding in thupuan bawl hi.Huai dungzui in petrol banah aviation turbine fuel,aviation spirit leh aviation gasoline telin motor spirit ah VAT tulela 20% akipan 22% hiding a, diesel oil a VAT leng 13.5% akipan 15.5% hiding hi. Tobacco leh tobacco products tunga VAT tulela 13.5% leng 30% hitou ding hi.Cranes, Bull dozers, Road rollers, Dumpers, Dippers, Excavators, Earthmovers leh attachment/accesories tuamtuam tunga VAT 13.5 kila kiam in 5% hiding hi. Flour, atta,moida,suji, besan leh foodgrain i.e. buh,antang ,wheat leh pulses tungah tulela VAT 5% kila Feb 1, 2014 akipan beisak hita hi.

Manipur apan unau 2 soisak in om
Imphal, March-1: Manipur akipan unau 2 –pasal khat leh numei khat Delhi University, North campus a Vijay Nagar ah zukham mi 4 in soisa in vuah uh a, mi vua 4te laka khat bel Police in mankhia uh hi’n kigen hi. Northeast mi tamtakin mi soisate matkhiak ding phutna in Vijay Nagar ah kiphin uh a, Model Town police station leng gheraoed bawlkhum uh chihthu om hi. Thusuak in a gendan in zan nitak dak 10.30 velin unau 2te Delhi University’s North Campus kianga Vijay Nagar double-storey kianga paying guest accommodation kong a park a tulai zukham pasal 4 amau kiangnai a vapai in zun a thak ban uah paukam kilawmpi zatkhum uh a, numei lam ah a zunthakna tanpha uh langsak uh hi’n kigen hi. Numei in a lungkimlouhdan a gen phet in zukham mi 4 te’n unau 2te soisa in a numei pen sual(rape) tanpha sawm uhi.Numei pen patau in a kikouzak ziakin huaikin laka om Northeast mi student omte’n kidelh huan uh a, Police te’n leng delh mahle uh Vai mi 4te gupbawl uh hi’n kigen hi. Police te’n ahun taka pan alaklouh ziakun mi 4te laka 3 kihemkhe man uh hi’n kigen a, tuni zingsang in FIR gelhlut pan uh hi’n thusuak in gen hi.

Employment News
Manipur govt nuai a Election deptt in anuai abang sem ding lading hi.
1. Computer Operator: 1 (Unreserved)
Qualification: Graduate in Science/ Engineering with one year post Graduate- Diploma Computer application
2. Assistant Election Supervisor: 12
(Reservation: ST-3/OBC(M-1/MP-1)
Qualification: Graduate form a recognized Univeristy
3. LDC: 1 (Unreserved)
Qualification: HSLC with typing speed in English 30 words per minute
4. Grade-IV: 8
(Reservation:ST 2/ SC-1)
Qualification: Class VIII passed
Candididate hithei dinga chitna leh siamna neia lunglut CCpur district ate’n March 5-7, 2014 sungin District Employment Exchange/CCpur contact theih ding chihthu om hi. ,