Imphal ah Super Speciality Hospital honkhiak hiding –Chief Minister; Assembly in Appropriation Bill 2 tuni’n pass
Imphal, Feb-28: Manipur Assembly session ah apaisa Feb 25, 2014 in deptt tuamtuam 33 in March 31, 2014 tana a sum zat ding uh kigawm Rs. 532.21 crore val ‘Supplementary Demands for Grants, 2013-2014’ nuaia passed a om a sum zat theihna ding in tuni’n Assembly in ‘The Manipur Appropriation(No. 1) Bill, 2014’ pass uh a,Feb 25, 2014 ni maha passed a om state govt in April 2014 akipan July 31, 2014 tan kha 4 sung a sum zat ding ‘Vote on Accounts, 2014’ nuai ah akigawm in Rs. 2746.79 crore val leng asum azat theihna ding in tuni’n Assembly in ‘The Manipur Appropriation(No. 1) Bill, 2014’ pass uhi. Approapriation Bill 2te genkhawm ahih lai in Chief Minister in Imphal ah Super Speciality Hospital khat a om theihna dingin govt in panla hi’n gen hi.

Chief Minister O. Ibobi in tuni’n Assembly session ah a gendan in Manipur govt in Health leh Education lam ngai poimawh mahmah hi’n gen a,Porompat a JNIMS ah vanzat kiching koihsawm a panlak ahihdan leng gen hi. RIMS leh JNIMS ah Super Speciality treatment om thei hileh major heart operation leh natna tuamtuam etkolna tawh kisai in damlou tamtak in Manipur pua a Hospital tuamtuam a naih uh ngailou in Manipur mah ah treatment piak leh etkol theih hiding uh a,state pua a ki-etkol ziaka sum-le-pai tamtak senate banah nawngkaina leh haksatna tuakte’n leng huchong haksatna pumpelh ding uh hi’n gen hi.

Chief Minister in a genzelna ah Senapati ah Indian Institute of Technology(IIT) khat honkhiak hiding a, huai dinga nasep kipat theihna ding in Election Commission of India in Lok Sabha election ding a puankhiakma in foundation suang phum hiding chi’n gen h.Approriation Bill 2te passed ahih khit in Dy Chief Minister(Tribal Affairs & Hills) Gaikhangam in ‘Manipur State Commission for Scheduled Tribes, 2014’ pawlut(introduced) a, huaizawh in Education Minister M. Okendro in ‘Rajiv Gandhi National University,Manipur Bill, 2014’ pawlut hi.

Deptt tuamtuam 5 in DC kha uh
Lamka, Feb-28: DC/CCpur office a deptt tuamtuam 6- Revenue, DRDA, Civil Supply, Election, Planning & NIC staff te’n tuni sunnung Dist Training Centre ah Ms Jacintha Lazarus, IAS, DC/CCpur khakna program nei uhi. Huai ah Mani Ram Sharma, IAS, Addl DC/CCpur in welcome address gen a, deptt 6 apan mi 1 zelin thugenna ban ah DC khakna in thilpiak pechiat uhi.

DC in a genna ah staff-te tawh haksatna tuamtuam tuak mahle uh Pathian in hihvengsak zel in tuni a staff-te’ tawh farewell program a neitheih ziakin Pathian leh staff-te tung ah kipahthu gen hi. CCpur district ah a om sungin staff-te lak apan thilhoih tamtak zilkhia hi’n gen a, staff te’n innkuanpih banga koihziak un kipahthu gen hi. Staff-te tawh pang in mipi adia thilhoih tamtak sem khethei hi’n gen a, staff-te it leh khelah mahmah hi’n gen a, Senapati ah mithak ahihding ziakin staff-te a ngaihnatna liansem ding hi’n gen hi.

Program zawhin deptt 6 a staff teng in DC tawh nitak ankuang umkhawm uhi.

DIC staff te’n GM telin mi 6 kha

Lamka, Feb-28: DIC/CCpur staff te’n tuni sunnung a office uah General Manager, DIC tel in a seppih uh mi 6 khakna nei in Rs.2000/- chiat pia uhi. Tuni a pensionte- G.Hanghal, Gen Manager, DIC/CCpur; Khamzadong Samte, Functional Manager (Credit); Daikhum, Superviser, KVI; S.Khamsiam, Superviser, Economics Investigation (EI); Zokhuma, Superviser, EI leh Nemhat, SA (T&C) hi uhi. G.Hanghal in agenna ah kum 32 sung service nung tuni a pension thei a a om ziakin kipahthu gen a, staff te’n a kithuahpihna tung ah kipahthu gen hi. Service hun sunga genkhelh leh bawlkhelh omte staff te’n ngaidam ding in leng ngen hi.

February kha in positive omlou
Lamka, Feb-28: Dist Malaria deptt/CCpur te’n February 2014 khasung in damlou tuamtuam 571 sisan test uh a, hileleng malaria positive mulou uh hi’n official thusuak kingah hi.

CCpur dist apan 1 lawhching
Lamka, Feb-28: Education (S) saina in Nov 24, 2013 in class VI zillel leh class IX zillelte ading in State Level Competitive Scholarship Examination 2013 om a, CCpur ah leng Phungkhothang govt H/S leh Rengkai Hr Sec School ah examna om hi. Manipur pumpi ah class VI zil 25 leh class IX zil 25 select hi uh a, CCpur Dist akipan class IX zil Thangbiaksang of St Marys’ school, Tuibuong lawhching a, aman kha tengin Rs.500/-ngah ding hi.

Paukam Tonsing kaisang
Lamka, Feb-28: ZEO/CCpur office ah Head Clerk a pension ziakin hun sawttak Paukam Tonsing in i/c Head Clerk len a, tuma zekin Head Clerk in kaisang hi. Amah Head Clerk ahih tawh kiton in payscale Rs.9,300-34,800 + grade pay Rs. 4,200) lawh ding hi.

Mental Health Training om ding 180
Lamka, Feb-28: Dist Mental Health Committee/CCpur saina in March 3-26, 2014 sung CMO office a Mini-Conference Hall ah Dist Mental Heatlh Training om ding a, huai ah mi 180 tel ding uhi. March 3-5, 2014 sungin nurse 40 training ding uh a, March 6-8, 2014 sung Town Area ASHA mi 40 training ding uhi. March 10-14, 2014 sung Doctor 20 training ding uh a, March 20-22, 2014 sungin Anganwadi Worker 40 training ding uh a, March 24-26, 2014 sung Teacher leh NGO 40 training ding uhi.

DC thakin March 3 in join ding
Lamka, Feb-28: Ms Jacintha Lazarus, IAS, DC/CCpur in March 1, 2014 in Senapati Dist phading a, huai ah Pradeep Kumar Jha, IAS, DC/Senapati akipan charge lading hi. March 3, 2014 in DC 2te’n Lamka pha ding uh a, Jacintha Lazarus, IAS in Pradeep Kumar Jha, IAS kiangah DC/CCpur charge peding hi.

Employees tamtak tuni’n pension
Lamka, Feb-28: Tuni Feb 28 in govt employee leh officer hunkhop pension uh a, office tuamtuam ah khakna program om hi. Tuni a pension kitheiphate education deptt ah Joseph Lalrothang, ZEO/CCpur; D.T Haokip, DI of Schools/Henglep; Lalbiakthuami, Headmistress, Vungzagen Hr Sec.School; Lhingnu Touthang, Headmistress Gandhi Memorial H/S hi uhi.

Medical deptt apan Dr H.L Liensang,CMO; Dr N.Paul Ginthang, Med Suptd, Dist Hospital; Dr Lalbieksang, MO, PHC/Saikot; Dr Dinamani Singh, Anaesthetist; H.Nengvung, Staff Nurse; Hauzavung, Staff Nurse; Lianzakim, ANM; Darneimawi, ANM; Manzaniang, ANM (Dist Council) leh Thangngaihhau, ANM (Dist Council) hi uhi.

DIC/CCpur apan G.Hanghal, Gen Manager, DIC/CCpur; Khamzadong Samte, Functional Manager (Credit); Daikhum, Superviser, KVI; S.Khamsiam, Superviser, Economics Investigation (EI); Zokhuma, Superviser, EI leh Nemhat, SA (T&C) hi uhi.

S.Kaikhankap, Dist Co-op Officer; T.Ngulkhenthang, Extension Officer, BDO/Vangai, Police deptt apan T.Tualngai, ASI (Traffic Police); PWD apan Paukhankhup, Head Clerk; Zamkhoching, Draft Women leh Pumkhenlian, Peon hi uhi. Deptt bangzah hiam a pension leng omlai a, tutan a kitheikhateng ahi hi hi.

Medical Suptd,ZEO leh CMO banah mi tuamtuam khakna om
Lamka, Feb-28: Dr. N. Paul Ginthang, Medical Suptd/Dist Hospital tuni’n khakna om a, Ccpur dist. sunga Officer sem singtangmi 2 khakna ah mi tuamtuam tel . Sunnung in Dist. hospital OPD Hall ah Dr. N.Paul Ginthang, Med Supdt, Dist Hospital; Dr Dinamani Singh, Anaesthetist , Dist Hospital leh H. Nengvung, Staff Nurse, sister i/c Children Ward khakna (farewell) program om a, Dr. N. Paul Ginthang in amah khakna bawlte tungah kipahthu gen hi. Dr. Kim Simte, Dy Med Supt in a genna ah Dr Paul hunsung in thil tamtak sepkhiak ahihdan gen a, ettontham ching mahmah chi hi.

ZEO office konga Synod House ah tuni in Joseph Lalrothang, ZEO/Ccpur khakna om a, ZEO in a genna ah amah hunsung in ZEO tawh kisai a thubuai(scam) bangmah omlou in lamzang takin paitou a, ZEO nuaia School 10 val ah student minkhum 700 val hi’n gen a, khawpi sung leh dist sungah Education lam lhihhat a om hi’n gen hi. Staff te’n office zahtak touzel dinga ngenkawm in Govt. nuaia deptt teng lakah Edn poimawhpen hi’n gen hi.

CMO Office ah zan in Feb 26 in CMO Dr. H.L Liensang khakna a om banah tuni in aman a staff-te’ mangpha khakna in singpi dawnna leh programme zatpih hi.

Gar’i phutkhak RIMS ah refered

Lamka, Feb-28: Kaprang kiangah tuni’n DI Tata(Pick-up) in School kaitawp innlam zuanlai student bangzahhiam omte laka Lienlapson (9) s/o Khupmang of Monglenphai phukha in a mailak naktakin liam hi. Tunitaklam dak 3.00 vel a thiltun zawh in a phukha-te’ mah in enkai uh a, hospital puaktung a om in dressing kibawl a, himahleh dak 4.36 in RIMS adia referred in om hi. Akigendanin student bangzah hiam lampi a pailaite tawh DI Tata a kipelhna lam in Lienlapson phukha a, amai ah sisan tamtak luangkhia in a taklam maivun leng sautak lengkhia hi.

Tuahsiat ziakin mi 2 si
Lamka, Feb-28: Kaziranga’s Bagori Range a tuahsiatna ah zan(Feb 27) in Lamka mi 2 si uh a, huaite Haulallian Thomte (33) s/o Laltanpui Thomte of ZMA Road Vengnuam, New Lamka leh S. Vungsuanlian (38) s/o Soiluai of Zenhang Lamka hi un kigen hi.

Lanva-lui a poison zangte vau
Lamka, Feb-28: YPA Pearsonmun Unit in Lanva-lui dunga gu(poison) zanga ngabeng omte vau kawm in maban ah hibang thilchin hoihlou tawpsan dingin theisak uh a, tui haksat ding kuan a mipi kingakna Lanva lui kuapeuh in hihbuah lou dingin ngetna leh theihsakna leng bawl uhi.

Teacher-te vanzat ding hawmkia
Lamka, Feb-28: ADC/CCpur nuai a Diploma in Elementary Teachers Training (D.El.Ed)1st Phase a teldia select a om mi 200 te lakah tuni zinglam in Rengkai Hr Sec School ah trainee I-Card leh study materials hawmkhiat in om hi. Huai ah Dr S.Dilan Singh, Regional Director, IGNOU in training paidan ding teacher te hilh hi.

Kangvai ah assessment Camp
Lamka, Feb-28: District Disability Rehabilitation Centre (DDRC/PASS), ALIMCO, Kanpur leh ONGC, New Delhi pangkhawm in tuni in Kangvai hausapa’inn ah 'Assessment Camp of Persons with Disabilities (PwDs) for Aided Materials' om hi. Huai ah mi 38 hearing aids ngahding in select uh a, artificial limbs ngah dingin mi 1 select uhi. March 14, 2014 in Saikot leh March 28, 2014 in Singngat ah Assessment Camp om ding hi.

&&&&&&&&&&&&&&&&&&&&&&&&&
IMPHAL NEWS
Manipur Oxygen Plant honna om
Imphal, Feb-28: CAF & PD Minister M. Okendro in tuni’n Chief Guest a pang in Bishunpur a Joypur Khunou ah Manipur Oxygen Plant hongkhia a, Manipur hibang thil poimawh tuamtuam bawlkhiak a kibehlap ziakin pawlam leh state dangte a kingakna(dependence) kiam thei hi’n gen hi. Tuni a Manipur Oxygen Plant kihongkhia bel United Bank of India apan huhna zang a patkhiak hi’n kigen hi. Huai Oxygen Plant a Managing Director Khagemba in a gendan in huai Plant in kha tengin Oxygen a D type cylinder 2000 bawlkhiak hiding in gen a,Manipur a Hospital leh industries tuamtuamte poimawh zah sanga tamzaw bawlkhiak ahih ding ziakin state dangah leng thonkhiak zawh hiding chi’n gen hi.

Chandel ah dakkal 48 sung bandh
Imphal, Feb-28: Chandel District Naga Kuki Joint Committee (CDNKJC) in tuni a kipan dakkal 48 sung Chandel district ah bandh a puan ziakun hindan ngeina nasatakin hihbuai chihthu om hi. Thusuak kizadan in govt in phaijang helpawlte omna ding in Pallel kiang ah gam acres 600 vel lak(acquire) sawm a, Chandel District Naga Kuki Joint Committee in phaijang helpawlte muntuam a suankhe ding leh amaute omna ding gam lalou ding in govt nawh mahle uh govt in a limsaklouh ziakin tuni akipan bandh dakkal 48 sung bandh puang uh hi’n kigen hi. Tuni in numei pawlin St Paul's School, Liwachangning, Pallel, H Kotlenphai, Thamnapokpi leh Saivom Village ah lamlian khaktan in Gari paisaklou uh a, himahleh emergency tawh kisai, sahkhua tawh kisai leh examna atel student-te bel bandh huamsaklou uhi.

BA(Gen) 5th Semester result
Imphal, Feb-28: Manipur University nuaia BA(General) 5th Semester examination tuni’n a result suak a, candidate 1000 vel om lakah 970 in pass uh a,pass zah 82.8% hi’n kigen hi. Huailou thudang kizadan in Council of Hr Sec Education Manipur saina in Feb 17, 2014 akipan Class XII/Hr Sec Examination,2014 ah zan tannin chindan hoihlou zang student 29 nawhkhiak(expelled) hi uhi.

ATSUM pawlin ROTO 3rd phase pan ding
Imphal Feb 28: Muan Tombing makaihna ATSUM pawlin state govt vauna bawlin service extension policy a zat uh March 15, 2014 tana a tawpsan kei ua leh ATSUM in Reckoning to the Others(ROTO) kichi kiphinna pannawn ding uh hi’n puang uhi.Tuni’n Manpur Press Club ah Press-te kimuhpih in Muan Tombing in a genna ah state govt in service extension policy aneih ATSUM in deihlou hi’n puang a, Chief Minister kiang ah Feb 22, 2014 in memorandum piak hi a, Manipur govt nuaia deptt tuamtuam adiakin Manipur Health Service leh Agriculture deptt ah govt in service extension policy zang nawnlou ding a theisak uh ahihdan gen hi.

Assembly News
Vanmang khang thu ah dotna bawl
Imphal, Feb-28: Th. Shyamkumar,MLA in tuni’n Assembly ah bandh leh blockade om ding tenga niteng vanzat leh thautui man khang thu dotna a bawl CAF & PD Minister M. Okendro in a dawnna ah mipite’n patauh ziaka van poimawhte tampipi leikholh tup ziaka vanmang khang hideuh in gen hi.Hileleng govt in bandh leh blockade om huna aman khang deuh hi a kigen thautui kiching omsak sawm in hahtakin panla a, Malom kianga IOC in Oil Depot as bawl zawhsiang hun ah thautui kha 2/3 tan daih ding tanpha koihkholh hiding chi’n gen hi. Huailou in govt in Feb 1, 2014 akipan antang, atta leh maidan tunga Value Added Tax(VAT) 5% a laksek hihbei a, huaiziakin leng bangtan hiam van- mang kiam ban ding hi’n gen hi.

Manipur a Anganwadi Centre
Imphal, Feb-28: Tuni’n Manipur Assembly ash Kh. Joykisan Singh,MLA in Anganwadi Centre tawh kisai dotna a bawl Social Welfare Minister in a dawnna ah Manipur a district 9 lakah district 6-Chandel, Tamenglong,CCpur, Ukhrul,Bishnupur leh Senapati ah Anganwadi Centre building bawlkhiak ding zah zawh hi’n gen a, Imphal West a kibawl ding 318 lakah 304 zawh hi a,Imphal East a kibawl ding 329 lakah 319 zawh hi a, Thoubal ah 274 bawl ding lakah 219 zawh hipan chi’n gen hi.

Assembly session ni 2 khawl ding
Imphal, Feb-28: Manipur Assembly session pailel lai March 1(Kiginni) leh March 2(Pathianni) in khawl ding a, March 3(Seppatni) zinglam dak 11.00 in sunzom nawn ding uhi. Assembly a Business Advisory Committee in a bikhiahdan in March 3, 2014 tan Assembly session om ding hi.