27-Sector A/R camp kiangah IED bomb 2 muhkhiak in om

Lamka, Feb-26: Tuni zingsang 5:40 velin 7-Assam Rifles a Road Opening Party (ROP) te'n Tuibuong a 27-Sector Assam Rifles’ camp kong a nullah kuak ah IED bomb hidia ginlelh 2 mukhia uh a, uisa siam zangin IED bomb ahihdan theihchian uhi. Tuibuong Peace Ground gei ah IED bomb om chihthu Police te’n zinglam dak 7:00 in report mu uh a, amun delh pah in Tedim Road khaktan uh a, gari suktai teng SP/CCpur Quarter lam ah taitousak uh a, Imphal apan Lamka zuan gari teng Khawmoi a heikoi(divert) sakin M.Songgel lam ah taisuak sak uhi.

IED bomb 2 om chih theihchet ahih phet in Leimakhong a 57- Mountain Division munpi theisak uh a, huai apan bomb expert 1 zinglam dak 11:00 in Lamka hongtung a, aman thil omdan enkhe masa phot in sun dak 12:04 in kg 3 vela gik IED hihsia(defused) a, huaizawh sun dak 12:08 in 8 kg vela gik khat pen ding hihsia a, bomb ging ngaih mahmah hi. 27-Sector A/R main gate (Tedim Road) apan metre 25 vel ah IED 1 kikoih a, adang khatpen A/R main gate apan metre 35 velah kikoih hi. Police leh Army te'n thil omdan suizui lel uh a, kuate koih hiding chiam chih tanpha suikhiak hinailou hi’n kigen hi.

S.Haopu Haokip, Organising Secy, Tuibuong Area Youth Club (TAYC) apan kizadan in Peace Ground kichi kuapeuh in kimawlna mun in zang a, singtangmite area ah minautang thahna dingin IED kikoih ngeilou himahleh A/R camp kiangnai a bomb koihte TAYC in mawhpaihna sangpen puankhum hi’n gen hi. KNO leh UPF te’n landmine zat mawhpaihna Geneva ah suaikai uh a, civil area ah mi nautang sihna ding deih ziaka bomb koih kuate hi uhiam chih leh aziak kipuang ding in theisak hi.

Mangpha khakna thugen: DC in mipite tungah kipahthu gen
Lamka, Feb-26: Ms Jacintha Lazarus, IAS in kum 4 val DC/CCpur alet nungin DC/Senapati len dia a kisuan ding ziakin tuni sunnung in a office chamber ah Media-te kimuhpih in mipite tunga kipahthu genkawm in mangpha khak hi. Aman a thugenna ah CCpur dist ah kum 4 val a om sunga kithuahpihna manphatak pia Minister/MLAs, MDC-te tung ah kipahthu gen a, dist level officer-te, orgn tuamtuam, philantrophic orgn-te, women organisation-te, tribe leader-te, student leader-te, hausate leh mipi akipan kithuahpihna a ngahte ziakin leng kipahthu gen hi.

DC/CCpur in ama' level tan ah theihtawp suahin nasem a, hileleng development scheme deihbanga sepkhiat theihlouhna khuate mipi'n theisiam dingin ngen hi. CCpur dist kichi a damsung in mangngilh ngeilou ding hi'n gen a, maban ah leng mipi'n thumna ah phawkzel ding in ngen hi.

Aman Ccpur district apan kisuan mahleh mangngilh lou in a home town banga ngai ding hi’n gen a, CCpur dist ah lungmuang leh khamuang taka kum 4 val om ahihdan gen a, CCpur mipi'n a tanu uh bang a etkol ziakun kipak petmah hi'n gen hi. Amah paikhe mahleh ahihtheih omte ah CCpur mipite adia sem touzel ding hi'n gen a, sepkhelh bawlkhelh a om leleng mipi'n ngaidam dingin ngen hi.

ADC office ah DC/CCpur khakna om
Lamka, Feb-26: Chairman, ADC/CCpur; MDC-te, DRDA staff leh CEO staff te’n tuni sunnung in Dist Council office a Conference Hall ah Ms Jacintha Lazarus, IAS, DC/CCpur leh S.Thienlaljoy Gangte, SDO/Thanlon khakna nei uhi. Council member te'n DC/CCpur leh SDO/Thanlon thilpiak(present) pia in singpi dawnpih uhi.Huai ah Langkhangpau Guite, Chairman ADC/CCpur in mangpha khakna thugen kawmin Officer 2te ading in Pathian kiang ah thumsak hi. ADC Chairman in a genna ah DC in CCpur dist pawtsan mahleh a thilhoih a sepkhiak tamtakte ziakin mipi in thei gige ding hi’n gen hi. ADC Vice Chairman Demmang Haokip in a genna ah DC kum 4 val a letsung in mipi tawh kituak taka om in tu’n kisuanthei dia a om mi vangpha mahmah hi'n gen hi.

DC/CCpur in agenna ah dist khenkhat ah MDC-te tawh DC in power deihna ziak in buaina tuak uh a, hileleng CCpur dist ah huai omlou in MDC-te tawh hoihtaka nasemkhawm thei uh ahih ziakin kipak mahmah hi'n gen hi. DC dangte tawh tehin mipi'n it in a ngaihnat ban uah a tanu bang ua koih in pasal a neih hun ah hoihtaka khakna om ahihdan leng kipah thu gen hi.

S.Thienlal Joy Gangte in kha 7 sung Thanlon a a sep sungin MDC te'n kithuahpihna hoihtak a piak ziakun kipahthu gen a, mundang a kisuan ding himahleh mipite adia thil hoih sep sunzom zel dingin makaite ngen hi.

Dr H.L Liensang,CMO telin mi 2 khakna om
Lamka, Feb-26: CMO office ah tuni in Dr. H.L Liensang,CMO/Ccpur leh Tuankhothang, Computer Operator khakna om hi. Dr. H.L Liensang in a genna ah kituahna ziakin thil tamtak sepkhiak a om in lawhchinna om hi’n gen a, a neulai in singtang khua a khangkhia himahleh Pathian vualzawlna tawh hiaitan tung ahihdan gen hi. Staff-te’ tawh kituaktak a nasepkhawm thil manpha hi’n gen a, amaute’n a kithuahpih ziak un kipahthu gen hi. Saikot PHC a M/O i/c asep sungin kuhkal taka nasep ziakin Manipur adia PHC hoihpen in Manipur govt. in puang hi’n gen a , tunitan in Saikot PHC pen Manipur adia performance hoihpen in om tou zel lai hi’n gen hi. Dr. H.L Liensang in kum 2011 akipan Feb 28, 2014 sung len hi.

Free Uniform hawmna om
Lamka, Feb-26: Vimala Raina H/S ah tuni zing dak 9:30 in student-te’ lakah free uniform hawmkhiak hi a, huai ah Langkhanpau Guite, Chairman ADC/CCpur khuallian a pang in hawmkhia hi. Aman a thugenna ah govt school apan IAS leh IPS telin officer tamtak piangkhia a, student te'n govt school akai chih ziaka kiniamkoih tuanlou dingn hasuan hi. Govt in Vimala Raina H/S ah a siampente ngen teacher koih hi'n gen hi. Student te'n tupna hoihtak nei kawm a laisim ding, hun awl neih ziakin khawlai pawtpawt loudin leng hasuan hi.

COPTAM bandh paitou zel
Lamka, Feb-26: COPTAM makaite’n Manipur govt ah thil tuamtuam a phut uh govt in a limsaklouh ziakin Feb 24, 2014 zankim akipan dakkal 72 sung singtanggam leh phaijang bial district kizopna khaktan in chaka bandh puang uh a, tuzing dak 9:30 velin Kangvai ah gari taituah thu ah kiselbuai in kinawkna tanpha piang manzek a, M.Pradip Singh, IPS, SDPO/CCpur makaih in Police, VDF leh IRB te'n Kangvai khua delh pah in zinglam dak 10:30 velin buaina hihvengthei uh hi'n kigen hi.COPTAM te’n media, medical, airport, sahkhua tawh kisai leh water supply khahkol uh a, Feb 27, 2014 beikuan zankim dak 12.00 in Chaka bandh bei ding hi.

DC in DLO-te mangpha khak
Lamka, Feb-26: Ms Jacintha Lazarus, IAS, DC/CCpur in tuni zinglam dak 11:00 in DC’s office a BRGF Resource Centre ah Dist Level Officer teng meeting neihpih a, mangpha khakna in singpi dawnpih hi. DC in kum 4 leh akim CCpur dist ah DC a om sungin DLO te’n hoihtaka kithuahpih ziak un kipahthu gen a, hihkhelh, bawlkhelh leh kampau kilawmlou kizatkhum khak a om leleng kuapeuh kingaidam tuah chiat dingin ngen hi.

DC in March 1 in charge pe ding
Lamka, Feb-26: Ms Jacintha Lazarus, IAS, DC/CCpur in amah thakhengtu ding Pradeep Jha, IAS tulela DC/Senapati kiangah March 1, 2014 in DC/CCpur hihna charge pe ding a, huaizawh in DC/Senapati lending in pai ding hi. Huailou in Laltanpuii Vanchhong, MCS, SDO/BDO CCpur in tuni in Dy Secy ( DP/AR) lending in Imphal ah pai a hi.

Numei khoihlai vuak in om
Lamka, Feb-26: Tuni sunnung in Tedim road a Aircel Office kiangah singtangmi hilou pasal khat in numei khat awm/ang khoihsak a, akiang a om mi tuamtuam kipunkhawm in mankhia in kivuak huan uhi. Numei khoihpa bangtan hiam soisak nung in paisak uh hi’n kigen hi.

SUUNNA:
Goihvum (85) f/o Dimkhanngai of Bungmual Hausa veng tuni nitaklam dak 6:00 velin awmna ziakin si a, Feb. 27, 2014 in Bungmual hanmual ah kivui ding hi.
T. Kamchinpau (35) s/o T. Khamthong of Hiangzou zan nitak dak 11:00 in sinna in si a, Feb. 27, 2014 in Hiangzou hanmual ah kivui ding hi. Kamchinpau bel BSF asem hi a, tulelin Koirengei a BSF post ah posting ahi hi. Aman azi leh a tapa 2 nusia hi.

&&&&&&&&&&&&&&&&&&&&&&&&&&&&&&&
IMPHAL NEWS
JAC in March 5 tan hungaih ding
Imphal, Feb-26: Joint Administrative Council(JAC) a kikhaikhawm AMTUC leh AMGEO pawlin Manipur govt kiang ah 6th pay commission tawh kibang lawh piak ding phutna in Feb 21 & 22, 2014 in ni 2 sung mass casual leave la uh a, maban ah March 5, 2014 tan govt in a thilphut uh a semkhia hiam chih hungaih ding uhi. Huaini tana govt in bangmah a sepkhiak tuankei leh March 6, 2014 akipan in JAC makaihna in hunchiam omlou ding cease work strike kipan ding uh chihthu om hi. JAC of AMTUC & AMGEO ah state govt employee teng, Manipur Secretariat Service Assn leh Manipur State Pensoners’ Union pawl tel uhi.

Mi 2 a sepna uapan kaisang
Imphal, Feb-26 : Manipur Secretariat Service (MSS) a Under Secretary (Category 4) apan Dy. Secretary (Category 3) ah mi 2 kaisang uhi. Amaute Ngurtumsang leh Smt G. Sanahanbi Kabui hi uh a, payscale PB-III Rs. Rs. 15600-39,100 + grade pay of Rs. 6600 hi’n kigen hi.

IGNTU VC in ATSUM leader-te chial
Imphal, Feb-26: Indira Gandhi National Tribal University (IGNTU) a Vice Chancellor Prof. TV Kattimani in tuni’n Imphal a IGNTU regional campus muh pha a, aman educational establishment a nawngkaina tuamtuam omte a fel theihna dinga kihouna neihpih dingin ATSUM leader-te chial chihthu om hi. VC in IGNTU campus ah masawnna leh khantouhna om theihna ding a panlakna kithuahpih ding in ATSUM makaite chial a, ATSUM makaite’n regional campus pichin semna dinga panla ding in leng chial hi’n kigen hi.

Police custody ah sisa in kimu
Imphal, Feb-26 : Imphal West district sung Wangoi police station ah tuni in mikhat sisa a muhkhiak hi a,amah Th Digvijay (37) s/o Nabakumar of Wangoi Makha Leikai hi a, Police custody a omlai sisa a muhkhiak hi’n kigen hi. Huai tawh kisai in mipi thangpaiten Wangoi police station buluh uhi. Thusuak in a gendan in Digvijay in azi tawh ta 3 nei mahleh Feb. 22, 2014 in H Laxmi Devi (34) d/o Thoibi tawh kitaipih uh a, tuatawh kisai a Police te’n amat uh ahi hi. Tuni zingsang in Wangoi Police te’n Digvijay innkuante kiangah police custody a kikhailum ahihdan va gen uh chih hi a, Digvijay pa Th. Nabakumar in Digvijay sihdan lungkimlou in ginlelh huai sakthu gen a, a sihdan hoihtaka suizui deihthu gen hi.

Walk in interview om ding
Imphal, Feb-26: Imphal Centre a Guest Faculty (Computer/ IT) 1, Guest Faculty Support Staff (Computer /IT) 1, Senapati Extension Centre ading guest Faculty (Electronics) 1 leh CCpur Extension Centre a Office Assistant 1 lakna ding in Feb 28, 2014 in Aampat,Imphal a NIELIT mun ah ‘walk in interview’ om ding hi. Guest faculty in a qualification, experience leh a sepna mun dungzui in kha 1 in Rs. 10000- 14000 piak hiding a, Support staff in kha 1 in Rs. 8000 lawh ding hi. Office Assistant in a qualification, experience leh posting mun dungzui in kha 1 in Rs. 6000- 8000 lawh ding hi. Appointment piaka omte kha 6 sung contract basis dana lak hiding uh a, ahun behlap touhzel theih ding hi’n thusuak in gen hi.

News hawker/agent ding 2 kideih
Langol area leh National Games village,Imphal ah Manipur Express hawker/agent ding mi 1 tuak kideih a, mi muanhuai, kuhkal leh lunglutna kichian neite’n March 1, 2014 tan in H. Kaphnun, i/c Manipur Express office,Imphal(mobile no. 9436081348/8732020635 )kimuhpih theih ding hi.
&&&&&&&&&&&&&&&&&&&&&&&&&

Assembly News
House ah paper tuamtuam 5 luikhia
Imphal, Feb-26: Chief Minister O. Ibobi in tuni’n Assembly session ah paper tuamtuam 4 luikhia a, huaite (i) Appropriation Accounts 2012-2013, (ii)Financ Accounts(volume-I) 2012-2013, (iii) Finance Accounts(volume-II)2012-2013 leh (iv)Accounts at a Glance for the year 2012-2013 hi uhi.Huaizawh in Dy Chief Minister(Home) Gaikhangam in State Vigilance Commission for the year 2013 luikhia hi.

Civil Service examna a upper age limit et thak hiding -CM
Imphal, Feb-26: Manipur Assembly session ah tuni’n Dr I. Ibohalbi,MLA in Manipur Civil Service Combined Competitive Examination ah upper age limit kum 30 akipan 35 tan hithei dinga enthak dingin ngetna a bawl Chief Minister in a dawnna ah General category-te kum 35 tan hithei ding leh ST/SC candidate-te kum 35 akipan kum 40 hiding banah OBC te kum 38 tan hithei ding in govt in ngaihtuah ding chi’n gen hi.

Manipur ah A/R Bn 26 om - Dy CM
Imphal, Feb-26 : Th. Shyamkumar,MLA in tuni’n Assembly session ah Manipur a om Assam Rifles battalion zah dotna a bawl Dy Cm Gaikhangam in a dawnna ah tulelin Assam Rifles battalion 26 om uh a, huaite Manipur a Central Paramilitary Force omsum hidan in gen hi. Assam Rifles-te Central govt nuai a om hi uh a, State Govt in control khalou hi’n gen hi. Amau Manipur ah Counter Insurgency tawh kisai a koih a om hi uh a, state govt in a duty utawh kisai thuneihna bangmah neilou hi’n leng Dy. CM in gen hi.