Manipur economy in hoihlam nawt – Governor VK Duggal; Manipur Assembly session 7veina tuni’n kipan
Imphal, Feb-24: Manipur Assembly term10na hun adia session 7veina tuni zinglam dak 11.00 in Chingmeirong a Assembly Hall thak ah kipan a, session honna kawm in Manipur Governor VK Duggal in thugen hi. Governor in Manipur economy in hoihlam nawt ahihdan genkawm in issue tuamtuam leh state govt nuaia department tuamtuamte nasepkhiakdan tangpi gen hi.(Manipur Governor thugen tangpi page 2na ah kisuah a, abanban in hong kisuah toulai ding hi). Governor in dakkal 1 sung thu a gen khit in T. Mangibabu,MLA in Governor thugen kipahpihna(motion of thanks) thusun bawl a, Y. Surchandra,MLA in thuap(seconded) hi.

Huaizawh in Assembly ah MLA banah ex-Minister T. Goukhenpau leh Paoneikhai Suantak suunna hun om a,Chief Minister in ex-Minister 2te tanchin leh a nasepkhiakte uh taklang kawmin House in suun ahihdan gen hi. T.N. Haokip,MLA; Health & Family Welfare Minister PhungzathangTonsing leh Chairman/MTDC T. Manga Vaiphei in leng makai 2te’n mipi adia na tamtak semkhia ahihdan leh amau omlouh manna lianpi ahihdan gen uhi. Huaizawh in Assembly Speaker Th. Lokeshwor makaihna in minute 2 sung dai dide in suunna hun zang uhi.

Chief Minister O. Ibobi in ‘Supplementary demands for Grants 2013-14’ adin Demand tuamtuam 35 leh Appropriation 2 kigawm Rs. 541.36 crore luikhia huaite lakah state consolidated fund akipan Rs 9.14 crore hiding a, house in a vote ding in Rs. 532.22 crore bikhiah hi’n gen hi.Huai sumte govt employee-te kha lawh ding leh Central Sponsored Schemes tuamtuam sepkhiakna dia sum zat ding hi’n gen hi. Chief Minister in April 1, 2014 akipan July 31, 2014 tan kha 4 sung state govt in a sum zat ding Vote on Accounts,2014-2015 nuai ah Rs. 2476.80 crores leng House in a lemsakpih ding in luikhia hi.

Finance leng lenkhawm Chief Minister in Budget estimate, 2014-15 leng tuni’n Assembly ah luikhia a, tunung sawtlou a Lok Sabha election ding ziakin kumthak 2014 sunga Manipur in Plan sum a ngah ding zah bikhiah hi nailou a, bikhiah ahih hun ah full budget ding luikhiak theih hipan ding in gen hi. Huai ziakin state govt in April 1, 2014 akipan kha 4 sung a sum zat ding Vote on Account tungtawn a pass dingin luikhia ahihdan gen hi.

Huaizawh in Chief Minister O. Ibobi in House ah ‘Manipur Lokayukta Bill, 2014’ banah ‘The Manipur Public Service Commission (Additional Functions) Bill, 2014’ leh ‘Manipur Municipalities (Seventh Amendment) Bill, 2014’ pawlut(introduced) a, Revenue Minister Th. Devendra Singh in leng ‘the Manipur Land Revenue and Land Reforms (Sixth Amendment) Bill, 2014’ pawlut hi. Feb 25, 2014 zinglam dak 11.00 in Assembly session sunzom ding uhi.

National Rural Drinking Water Awareness & Mass Rally om
Lamka, Feb-24: Autonomous District Council(ADC)/CCpur, District Administration leh PHED/CCpur division saina in Feb 20, 2014 akipan tuni tan ‘National Rural Drinking Water Awareness Week 2014’ zat hi a, tuni zinglam dak 10:00 in Lamka Public Ground mipi kingak khawm in mass procession pai uhi. Langkhanpau Guite, Chairman ADC/CCpur in mass procession paite khakhia (flag-off) a, Public Ground akipan Tipaimukh road-Central road, Tedim road zui in IB a Synod Hall tan procession pai uhi. Zinglam dak 11:00 in Synod Hall ah mipi kikhopna om a,huai ah Th.Baite, EE/PHED in vaidawn thugen a, huaizawh in Langkhanpau Guite, Chairman ADC/CCpur; K.S Tawmbing,IFS, DFO/CCpur; L.Ibomcha Singh, SE, Rural Circle-I, PHED; Dr F.Thienkhogin, DACO leh L.Swamikanta Singh, Director CCDU/Manipur in thugen uhi.

Langkhanpau Guite in mihingte’ taksa seh 3 suah seh 2 tui ahihziak in mihingte' adin tui poimawh gige hi'n gen hi. Tui source i neihte kep siangthou leh kepbit poimawh a, catchment area ah singnou tamptheipen suan(plant) poimawh hi'n gen hi. Singkung pichingsa 1 i phuk leh huai thakheng dingin singnou 10 zel suan dingin mipi chial a, sing(tree)te a poimawhna omloupi a mawk sat leh phuklouding in leng mipite ngen hi.

KS Tawmbing,IFS in agenna ah forest omlou in tui om theilou a, i gam uah tui kiningching om theihna dingin sing-le-gua tamtheipen a om poimawh chi'n gen hi.1940s vel in Lamka khawpi sing-le-gua ngen in dim a, hileleng tuchiang in mihingte tengdim vek in tuisiang dawnding kiningching nawnlou hi'n gen hi. Igam ah sing-le-lou banah gua omlou hileh vuah azuk chiangin leihoih (fertile soil) teng vuahtui in tuahmang ding a, soil erosion omzel ding hi'n gen hi. Tu dinmun bangzel in igam ah sing leh gua i phuk ualeh gamkeu (desert) kichi leng ongtung thei gige a, huai hongtun louhna dingin sing leh guate kepbit poimawh chi’n gen hi.

ZEO/CCpur makaih in Feb 21, 2014 a Essay writing competition a kipahmante tuni’n hawmkhiat hi a, Tinneilhing, class VIII of G.M. H/S in 1st la in Rs. 5,000 leh certificate piak hi a, Neihoihting, class VIII of Vungzagen H/S in 2nd position la in Rs. 3,000 leh certificate piak in om hi. Paokhomang, class VIII of Phungkhothang govt H/S in 3rd position a lak ziakin Rs. 2,000 leh certificate piak in om hi. Midang 10 te’n consolation prize Rs. 500 leh certificare 1 chiat ngah uhi.

‘27th KNO Raising Day’ tuni in zat in om
Lamka, Feb-24: Kuki National Organisation(KNO) kiphuhkhiak kum 27 chinna ‘The 27th KNO Raising Day’ tuni zinglam akipan Kholmun Playground ah zat in om a, huai ah PS Haokip, President, KNO in Nam puanlap khaipalh a, Zale’n-Gam Choir in zui hi. Huaizawh in KNO a PRS Helen Kipgen makaihna in pasalpha sisate suunna om hi. President, KNO in a thugen kawmin tuma zeka beisan KNO makai Moson, UMLA; Marvin, KLO/KLA; Ngamthang, Chaplain KNA; Maj Chungkholun, KNA; Jangthong, Antone Haokip, Secy-Home(KNO) te zahna pia hi. Huailou in Thangkholun Haokip, 1st Commander-in-Chief KNA, Brig Vipin Haokip, Chief of Army Staff/KNA zahna in salam pia hi.

KNO President in “Na puan-inn keklian in” (Isai 54:2) chih thupi a zangin a genna ah Nov 6, 2012 in Dorcas Hall,New Lamka ah KNO leh UPF makaite kimukhawm in huaizawh in Thingkangphai ah KNO leh ZORO Northern Zone kimuhkhawmna om nawn a, kimuh khawmnate ah ki-unauna ding tup-le-ngim in nei uh chi hi. KNO leh ZORO in kalsuan khawm touzelin ZORO leh KNO palaite’n Feb 12-14,2014 in Arunachal Pradesh state sung Changlang dist a Bordumsa ah Kachin mite tawh ki-unauna dinga kimuhkhawmna ah vatel nawn uh chi’n gen hi. Tripura, Assam, Manipur,Mizoram,Sagaing Division(Kachin State), Chin state leh Chittagong Hill Tracts(Bangladesh) a khenzak a omte Zo-suante tu in Zo Re-Unification Orgn(ZORO) panlakna tungtawn in kinaihsemna omta chi hi. KNO President in UN level a panla ZORO makaite tungah kipahthu gen a, maban a kalsuanna dingte leng kipahpihthu gen hi.

KNO Spokesman Dr Seilen Haokip in News saite kiang a gendanin SoO suaikaih nung Govt. in ground-rules tamveipi bawhse mahleh KNO in bel zui a, camp 17 a om KNO cadres te’n govt. thuchiamte ngak mahle uh tunitan kihouna omnailou ahihman in lungkimlouh thu gen hi. Aman agenzelna ah KNO in nam tuamtuamte kala kitheihsiamna a om deih in, namdangte’ thilnget(demand) te leng Kuki mite hihbuai ding ahihkei phot leh dal lou a, himahleh Colonial rule omma a kivaipuakna banga khawsak kiknawn ding KNO in lunggulh in kalsuanpih chi hi. Govt sangin Kuki mipite KNO in poimawhzaw a, huchih kawm in maban a election ah govt hoihtak a dinkhiak KNO in lunggulh chi hi. Aman agenzelna ah Manipur ah community tengin kituak taka amau rights a neihna ding uh KNO in deih hi’n leng gen hi.

Tuni a KNO Raising Day zatna ah Chandel akipan Lamkang cultural troupe, The Holigans, Zou cultural troupe leh namlam tuamtuam lahna om a, ZORO Northern Zone makaite, MDC tuamtuam, JDU, KIC . Nu Parchi, COPTAM, KWHRO, KSO telin Kuki Frontal organisation tuamtuam apan makaite leh mipi paikhawmte’n uap uh a, ZORO Northern Zone a President George Guite in ZORO President R Thangmawia apan Presidential message simkhia hi. Tuni nitakin KNO kiphuhkhiak kum 27 chin lopna in Concert om a, lasiam tuamtuam in lasa in MDC tuamtuam in uap uhi.

54-Bn BSF te’n panpihna pia
Lamka, Feb-24: Loktak Project a om 54-Bn BSF te’n tuni zinglam dak 11:40 in Tollen khua a Janglal Memorial English school te Civic Action Programme tungtawn in panpihna tuamtuam pia uh a, D.K Gurjar, Commandant, 54-Bn. BSF in school thuneitute kiang ah pekhia hi. BSF te’n blanket 16; volleyball 3, volleyball net 1, football 3, basket ball 2, cricket ball & bat 11; stamps pair 1 leh glove 3 pia uhi. JM English school ah class X tan om a, tukum in student 300 val om uh a, hostel ah student hunkhop om uhi.

COPTAM in ‘chakka bandh’ pan
Lamka, Feb-24: COPTAM makaite’n singtanggam tawh kisai a govt thilhih dikloute bawldik dinga thutawp a piak hun uh beitanin leng bangmah sepkhiak ahih ziaka lungkimlou in COPTAM makaite’n tuni zankim akipan Feb 27, 2014 zankim tan daih dingin Manipur singtanggam pumpi ah ‘chaka bandh’ puang uhi. Letpu Haokip, Chairman COPTAM apan thusuak kingah dan in student exam laite khualna in bandh in singtanggam leh phaijang bial district kizopna(inter-district connenction road) kia huamsak hiding a, chaka band in media, medical,airport, sahkhua tawh kisai leh water supply huam khalou ding chi hi.

CIPET adin interview om
Lamka, Feb-24: Ministry of DONER in a sponsored dingin Imphal a Central Institute of Plastic Engineering Technology (CIPET) in kha 6 sung Machine Operator zil ding lakna ding in tuni zinglam dak 10.30 akipan in Hiangtam Lamka a PTC office ah S.Khaikhopau Ngaihte,Jr MCS, BO/HQ, DC's office leh Lian Jacob, Technical Officer, CIPET in candidate 56 val interview neihpih uh a, mi tamtheipen select sawm uh hi'n kigen hi.

Accident ziakin liam uh
Lamka, Feb-24: Tuzing dak 8.00 velin Molnom khua ah cycle a kipua school naupang 2 leh bike kiphukha uh a, cycle atuang Ngamminlal (15) s/o Letkam of K. Salbung a liangguh lliam in, anung atuang Ngamlenthang(13) s/o Nehsat of K. Salbung alu(head) liam a, hospital ah etkol hi uhi. Bike hektu Lelpau (45) s/o Paojangam of Mongjang leng alu kek in dist. hospital akipan RIMS ah referred in om hi.

Exposer Visit in kuan uh
Lamka, Feb-24: Hort & Soil Conservation/CCpur panpihna in tuni’n Imphal a mun tuamtuam phading in mi hunkhop in kuankhia uh a, Addl DC/CCpur in PTC Gen HQ office ah khakhia (flag off) hi. Hort & SC officialte makaih in a hunkhop in Mualtam leh Buallian khua leng exposer visit in pha uh a, Pomegranate Plantation, Drip Irrigation, Steel water Tank leh Poly House en uh a, Mualkoi khua ah Hi-Tech Poly House leng en uhi. Hort & SC official-te apan kizadan in govt apan panpihna zanga thil tuamtuam kibawlkhiate hoihthei mahmah hi’n gen uhi.

Buaina neite’n ngaihven theih
Lamka, Feb-24: Tutung 2013-2014 a PMEGP loan mudia select a om abikin KVIB tang khate’n a saidan ding buaina aneih uleh Feb 25 zinglam dak 8-11 kikalin LATSEA representative S. Gougin Gangte (9613734010) & CT Lian Guite (8974225922) contact theih ding hi’n thutut kingah hi.

A tuanna uh Tractor kilep
Lamka, Feb-25: Paulalmoi(25) s/o (late) Tonglienmang of Thingkangphai leh a lawmpa tusun dak 12.30 velin Tractor zanga leingoi pawdinga kuanlai atuanna gari uh kilep in tuahsia uh a, a lawmpa tawmkhe man mahleh gari in amah delhkhum in a kawng guh liam hi’n kigen hi.

Kangvai ah assessment Camp
Lamka, Feb-24: District Disability Rehabilitation Centre (DDRC/PASS), ALIMCO, Kanpur leh ONGC, New Delhi pangkhawm in Feb 28, 2014 zinglam dak 10:00 in Kangvai hausapa’ inn ah 'Assessment Camp of Persons with Disabilities (PwDs) for Aided Materials' omding hi. Huai a teldingte’n passport copy 2 leh residential certificate tawi ngai ding chi'n thusuak kingah hi. March 14, 2014 in Saikot banah March 28, 2014 in Singngat ah leng Assessment Camp om ding hi.

&&&&&&&&&&&&&&&&&&&&&&&&&&&&&&&&&&&&&
IMPHAL NEWS
Manipur State Commission for ST bill
Imphal, Feb-24: CM Secretariat a Cabinet Hall ah tuni nitaklam dak 3.30 in Chief Minister O. Ibobi makaihna in Cabinet meeting om a, huai ah tulela Assembly session sung in House ah Manipur State Commission for Schedule Tribe tawh kisai Bill puaklut ding tungtang genkhawm uhi. Manipur state commission for ST in singtangmite khantouhna ding a govt in
welfare programme tuamtuam a bawlte sepkhiakdan enzui ding hi’n gen uhi. Hileleng huai Commission bawlkhiakna ding in Assembly ah bill dan a puaklut banah House a pom masak ngai ding hi’n kigen hi. Tuni a Cabinet meeting in “Constitution of Manipur State Commission for Schedule Tribes” tawh kisai draft bill ngentel takin genkhawm uh a, Assembly ah Bill khat dana puaklut dingin thukim uhi.

Manipur ah May kha in Regional Passport office hon hiding –Home Secy
Imphsl, Feb-24: Dr J. Suresh Babu,IAS, Principal Secretary(Home) in tuni’n Imphal a 1st M/R Banquet Hall ah Feb 25, 2014 tan om ding Regional Passport Camp hong kawm in a genna ah Manipur ah May,2014 kal nanung nungin Regional Passport office hon hiding chi’n gen a, huai ding in Ministry of External Affairs in leng lemsa ahihdan gen hi. Aman a gendan in Manipur mipite’n May, 2014 kha akipan passport ngaihtuah in Guwahati ah sum tampi sen banah ni 2/3 tan hun zatbei ngai nawnlou ding hi’n gen hi.Huaiziakin Union Ministry of External Affairs in Manipur govt kiang ah huai dingin office a sem ding staff khenkhat sinsakna pe ding leh officer khenkhat leng deputation a posting sak thei dingin phalsak chi’n gen hi. Regional passport office ding kichian om mateng Manipur Assembly complex lui mun zat dingin Govt in lemsa ahihdan Chief Minister o. Ibobi in leng gen hi. Tuni a Passport camp ah Ministry of External Affairs a Chief Passport Office Muktesh K Pardesi leng tel hi.

ASO akipan SO in kaisang
Imphal, Feb-24: Manipur Secretariat a sem GS Max Guite in kum bangzah hiam Asst. Section Officer a sepnung in Category-5 Section Officer payscale PB-II Rs. 9300-34800+Grade pay Rs. 4400 per month in kaisang hi.

Election tawh kisai 1-day Workshop
Imphal, Feb-24: Chief Electoral Officer(CEO),Manipur saina in tuni sunnung dak 1.30 akipan in Hotel Classic ah Political party tuamtuam a representative-te leh Media-te ading in ‘One day Workshop in Election Expenditure Monitoring and Role of Media in Election’kichi om a, huai workshop ah political party tuamtuam akipan makai leh representative tamtak tel uh a, printed & electronic media akipan leng mi tamkhop tel uh a, workshop lawhching mahmah hi’n kigen hi.

HSLC examna ah mi 20 nawhkhia
Imphal, Feb-24 : Board of Secondary Education, Manipur nuai a HSLC examination, 2014 pailel ah tuni in Centre tuamtuam akipan candidate 20 nawhkhiak in om uhi. Ukhrul ‘A’ centre ah Roll No. 1863 leh 2279; Yainganpokpi Centre ah Roll. Nos. 15026, 15165, 15179, Moirang Centre ‘A’ ah Roll. Nos. 15808, 16040, Nambol ‘B’ Centre ah Roll. Nos. 18018, 18116, 18171, Langmeidong centre ah Roll Nos. 19145, 19162, Senapati Centre ‘A’ ah Roll No. 551, Imphal Centre ah Roll No. 29986, Mayang Imphal Centre ‘B’ ah Roll No. 24930, Imphal Private Centre ah Roll Nos. 1357, 1648, 1665, 1843 leh 1923 hi uhi.

Transfer and Posting:
1. Dr. Rajesh Kumar, IAS, Principal Secretary(AR/IFCD/IP/Tourism) & Director General (State Academy of Training ) as Principal Secretary (IFCD/IP/Tourism)
2. Y. Thamkishore Singh, IAS, Commissioner (CAF & PD/GAD) as Commissioner (CAF & PD)
3. Norbert Disinang, IAS, Member-Secretary, MPSC as Commissioner( GAD)
4. Shyam Lal Poonia, IAS, Director (Tourism) & Under Secretary (Home) in addition as Secretary, MPSC & Director (Tourism) in addition
5. Ms. Rachel N. Guite, MCS, Deputy Director (State Academy of Training) & Deputy Secretary (AR/IFCD/Sc & Tech) in addition as Deputy Director(Tourism) & Deputy Secretary (IFCD/Sc & Tech) in addition
6. Ngangom Uttam Singh, MCS, Executive Officer/Imphal Municipal Council as Deputy Director (State Academy of Training) & Executive Officer/Imphal Municipal Council in addition
7. Smt. A. Romita Devi, MCS, Under Secretary (Transport/Relief & Disaster Management) as Under Secretary( Transport)
8. Joel G. Haokip, MCS, SDO/BDO, Parbung as SDO/BDO, Thanlon
9. Ramrei Shinglai, MSS, Under Secretary (Agri/Hort/Relief & Disaster Management) as Under Secretary (Agri/Hort.)
10. Hmangte Lerte Kom, MCS, SDO/BDO, Chakpikarong as Additional Director (Education-S/Hills)