Sialkal bial ading in Development Council piak in om; Mizoram a Mimbung khua ah Zomi Nam Ni 2014 lopna om
Lamka, Feb-23: Mizoram state Champhai district a Mimbung khua ah February 20-21, 2014 in “The 64th Zomi Nam Ni –cum- Sialkal Range Development Council Celebration, 2014’ zang uhi. Zomi Nam Ni 2014 zatna ah Chief Guest in Vungzagin Valte, Parliamentary Secy(Manipur) pang a, Functional President in Khamkhokam Guite, Chief Engineer(P & E) Mizoram) pang a; Guest of Honour in K. Chinkhansuan, General Secy, PTC Gen HQ leh Chief Host in K. Guite, Adviser, ZRO pang hi. Minister Phungzathang Tonsing telthei kei mahleh Rs 50000 khak a, Guest tuamtuamte’n leng Zomi Nam Ni leh Sialkal(SRDC) panpihna in sum pechiat uhi.

February 21, 2014 in Sialkal Range Development Council(SRDC) lopna om a, Mizoram govt. in Board dan a apiak pen Oct 2013 in Council dingin suantou(upgrade) a, tu in implement ding lelin samta hi’n gen uhi. i SRDC huamsung ah govt. apan development hongpaite amau mah in ki etkai theita ding uh a, himahleh Sialkal tangdung a ADC thak dinkhiakna dingin govt. kiangah memorandum 13 vei peta uhi. SRDC lopna zinglam in Cultural Festival dan a zat in om a, namlam tuamtuam lahna om hi. Nitak programme ah Chief Guest in Langkhanpau Guite, Chairman, ADC/Ccpur pang a, Chief host in H. Dalkhenkhai, President, PTC Mizoram; Functional President in M. Gouzamang Guite, EM/ADCC leh Guest of Honour in Suanchinpau Guite, MDC pang uhi.

Zomi Nam Ni lopna Feb 20, 2014 a Chief Guest in a genna ah Mizoram Zomite laka IAS masate kipatna khua ah Zomi Nam Ni zat theih ahih kipahhuai mahmah chi hi. Development tawh kisai ah gamsung hoihna dingin Manipur leh Mizoram apan Zomi elected representative teng kimuhkhawm hoih sakthu gen a, huailou in Mizo leh Zomi nomenclature tawh kisai a buaina kinei sekpen leng kitheihsiam louhna ding omlou hi’n gen hi. Tuma zeka Mizoram election tawh kisai in mipi’n elected-te telkhial chih kigenpen election ah telkhelh chih omlou in election peuhmah ah mipite’n i deihpen kitel hizaw in gen a, telching a omte’n leng mipite telkhiak ahihdan i theihchet chiangin thildik hong om ding chi hi.

Chief Host a pang K. Guite, Adviser, ZRO in Mizoram ah Zomi Nam Ni kizat masakna Mimbung hi’n gen a, Mizoram ah Zomite’ inntek mahmah in khangthu sautak nei uh chi hi. Hibang thilte ziakin leng Teikhang a kidouna galmatawng inleng ana pang uh chi hi. Mizo leh Zomi min kikal theihsiamlouhna ding omlou in kibang chi hi. Theihchet semna dingin La(songs) lunglutte i hihman in lapau ah Mizo hi a, peotry lou in Zomi hi a, Zomi leh Mizo akibang helhel ahihmanin kuamah akimudah ding omlou chi hi. Etsakna dingin aksi pen Lushei pau in Arsi hi a, Lapau in Si-ar chizel uhi. Tulelin Zomi pen khawvel ah khangtou hat mahmah in khawvel huap a kivaipuakna Global Zomi Alliance in leng March 2014 in Tedim khawpi ah khawmpi nei ding uh a, Mizoram apan Zomite’n va uap dingin leng ZRO Advisor in chial hi. I theihna hong let(zau) hiaihiai tawh kiton in nam tuamtuamte kal a kigamlatna pen hongbei ding chi hi. Mizoram a om Zomite phat-huai asak banah mahni omna munpeuh eimah gam ahihdan theithak dingin chial hi. Govt in hong piak gam leh leitang i zuun leh gamsung khangtou ding chi hi. Koilai hiam ah khenkhat in govt office leh buildingte bang haltum ua, govt. thilte bang leng amau a ahihdan theilou uh chi hi. Manipur hi in Burma leh Mizoram Zomite hitaleh i omna chiat ah sense of ownership i neih chiang in gam khangtou ding chi hi.

Functional President in Zomiten thil neuchik a ngaihtuah i chingsek ua, huaiziakin i state pumpi bawlhoih ding i chihleh i hihna chiat ah a gam zazaw bawlhoih lehang ei omna mun leng hoihmai ding ahi chi hi. Zomite hi creative community i hih ding, miten hon huchih ding uh chihlam a pang zawlou in chi hi.Guest of Honour in Mizoram a PTC omlouhna ah unit thak tunding dinga ngen kawm in Mizoram dinmun ah nampi paidan hatsak ahihchiang in Zomi leng honghat mai ding chi hi.

SRDC lopna hun ah Chief Guest in gam khantouhna dingin kituahna poimawh a, pankhawm hatna ahihdungzui in Sialkal Range a khawsate’n kituahlouhna a om leleng koihkhia a gam masawnna dinga kithutuak dingin ngen hi. ADC leng Mizoram ah kimuthei hi’n gen a, huai hunchiangin govt. office-te a nasemtu ding laisiamte mah poimawh ahihman in tulela student-te’n laisim hahpih hun mahmahta chi hi. Politics leh Election vai ah kideidanna tawpsan dinga mipite chialkawm in ankhing-tuibuk kikawmlou a omte’n leng maban hoihzawkna dinga kithutuak dingin chial hi.

Chief Host in SRDC leh PTC dinmun taklang kawm in thugen a, PTC order(gazetted) suakin, implement hi nailou deuh a, implement ahihtheihna dingin theihtawp a malak dingin thupuk uh chi hi. Mizoram ah PTC puahphat sem a Unit Defunct te hinthak(revive) sak ding,kum 2016 pen Mizoram PTC adia Silver jubilee( 25 yrs) ding tawh kiton in thupitaka lopna neih ding in thupukna om hi’n gen hi.
Sialkal Range Development Council(SRDC) lopna ah sial 3 leh vok 6 gawh in om a, Mimbung a Zomi Nam Ni 2014 zang dingin khawkim-le-kiang tuamtuam akipan mipi tamtak vatel uh a, Lamka lam akipan Zomi frontal orgn tuamtuamte leh PTC Gen HQ makaite vatel uhi.

COPTAM makaite’n Media-te kimuhpih
Lamka, Feb-22: COPTAM makaite’n tuni’n Tuibuong a KSO complex ah Media-te kimuhpih uh a, singtanggam tawh kisai govt ah thil tuamtuam a nget uh govt in tunitan a sepkhiak tuanlouh ziakin Feb 24, 2014 zankim akipan Manipur singtanggam teng dakkal 72 sung chakka bandh hiding in gen uhi. Dakkal 72 sung chakka bandh sung in Manipur singtanggam apan Imphal (valley) lutna lampi teng bandh in huamvek din gen uhi.

COPTAM makaite’n agenna uah Manipur singtanggam ah Khas land kichi omlou in govt in gam a deih leh land acquisition a bawl ngai hi’n gen uhi. Amau district gamgi tuamtuam leng a original mah zat ding, singtanggam(land records) phaijang bial district a omkhate singtanggam district mah a piakkhiak ding, Police boundary leh Autonomous Dist Council/ Hill Area nuai ah Panchayati Raj election om theilou ding, govt in Zairon gam a Police training centre bawlkhia in training centre kim ah non-tribal mi tamtak a tensak lungkimlouh banah Jiribam sub-divn teng fullfledged dist ahih theihna ding in govt in Tamenglong distrct a om khua 22 leh CCpur dist apan khua 14 a laklut sawm deihlou thu telin thil tuamtuam govt ah phut uh hi’n gen uhi.

KSO/Tamenglong leh Kuki Women Union (KWU) kigawm in Jiribam bial ah Tamenglong gam lut theilou ding chih phutna in zan nitak zankim akipan dakkal 72 sung bandh a puan uh leng COPTAM demand laka tel ahihziak in COPTAM in full support puang hi’n gen uhi. COPTAM thil phutte January 2014 tana govt in ahihbuchin kei leh February 2014 apat kiphinnaa (agitation) patding chih himahleh Jiribam a buaina banah Feb 24, 2014 a Assembly session omding leh Class X, XI & XII examna omziak in kiphinna zekai hi'n gen uhi. COPTAM in demand tuamtuam a neihte govt in limsak tuankei leh March 2014 apan khauhzasem a kiphinna pat hiding in gen uhi.

COPTAM in Feb 24, 2014 zankim apan Manipur singtanggam bandh a puan hun ah student-te pua gari(school van) tuamtuam, educational institution, electricity, water supply, medical leh Press/Media-te khahkawl hidin gen uh a, khawpi sungah dukan, business establishment teng ngeina bangin kihong ding a, Manipur singtanggam apan Imphal lutna lampi teng chaka bandh in huamvek ding chi’n gen uhi.

Zomi Council te’n SP thak vaidawn uh
Lamka, Feb-22: Zomi Council(ZC) Chairman i/c MC Chin Min Thang makaih in tuni sunnung in ZC makaite'n Tuibuong a SP’ office ah SP/CCpur thak K.Kabib, IPS kipahpihna leh singpi dawnpihna nei uhi. ZC makaite'n SP/CCpur kiangah puandum leh ‘Prism of the Zo People’ kichi laibu pia uh a, SDPO/CCpur thak M.Pradip Singh, IPS kiang ah leng ‘3rd World Zomi Convention Souvenir’ pia uhi.

Bank Adalat om ding
Lamka, Feb-22: State Bank of India/CCpur saina in Feb 25,2014, March 11 & 18, 2014 in Bank Adalat om ding a,hun paisa a loan la, hileleng ahun taka din khaloute adin phattuampih theih ding relief offer hoihtak IRAC status tawh kituak SBI in pethei ding hi’n kigen hi. Relief offer ah loan batzah laka 15% tanpha hithei ding hi’n thutut kingah a, loan din hoihloute’n relief offer phattuampih theihna ding hun lemtang khahsuah(miss) lou dingin S. Kaikhanthang, Chief Manager, SBI/CCpur Branch in akisaipih kuapeuh theisak hi.

EPIC apan in PVC EPIC ah khentheih
Lamka, Feb-22: Election deptt/CCpur apan kizadan in CCpur dist a Electoral Photo Identity Card (EPIC) lui neite’n Form ID fill-up in PVC EPIC in khektheih ding a, Form ID ahihleh DC’s office a Election deptt leh SDO/AERO teng kiangah manbei in muhtheih ding hi. EPIC akipan PVC a khekding e’n Form ID fill-up hunah colour photo 3.2cm x 2.4cm alian ban ah Old EPIC tawh Rs 30/-pia in submit theihding hi. DC’s office ah PVC EPIC hunkhop hongtung a, alui tawh tehin smart in etlawm mahmah chih hi.

Alice Suantak in Ph.D. muthak
Lamka, Feb-22: Alice Khawlsonkim Suantak d/o Rev. ST Khuppa of Hill Town in NEHU nuai a Linguistic ah ‘Doctor of Philosophy (PhD)’ title piakin om hi. Amah Prof S.K.Singh, Linguistics Department in a guide hi a, a thesis ahihleh "Vaiphei Phonetics, Phonology and Morphology: A Descriptive Study" ahi hi. Ama’n tulela a sepna IIT Guwahati nusia in NEHU ah Linguistics department a Guest Lecturer dingin March 1, 2014 apan join ding hi’n kigen hi.

SDO/CCpur khakna nei uh
Lamka, Feb-22: SDO/CCpur staff te’n tuni sunnung a office uah Laltranpuii Vanchhong @ L.T Puii, MCS, ADC Pherjawl & SDO/BDO CCpur khakna nei uh a, staff te’n bel leh BA puandum pia in ankuang umpih uhi. L.T Puii in staff-te’n a kithuahpihna ziakun kipahthu gen a, hihkhelh leh bawlkhelh omte kingaidam tuah chiat dingin ngen hi. Tunung in lampi a kituah hun a om leleng kihoupih zel a, kuapeuh midang dana kibawllou dingin staff-te ngen hi.

Fertility campaign in cattle cross breeding
Lamka, Feb-22: Vety & AH deptt leh Manipur Livestock Dev Board, Imphal saina in tuni zinglam in Thingkangphai a YMA Hall ah ‘One Day Fertility Campaign in Cattle Cross Breeding’ om hi. Huai ah Chief Guest in Lal Hossan, EM/ADC pang a, Functional President in Dr N.Rajendro Singh, Jt Director(Vety)/CCpur pang hi.

Chief Guest in Fertility campaign a lawhchin deihthu gen a, NKT area kichi CCpur dist adia ganvulhte khoina munpi hi a, huai tungtawnin sum-le-pai muhna kia hilou in hauhsaktheihna leng hi'n gen hi. Mihing adin damtheihna a poimawh bangin ganvulhte adamlouh hun uah aneite’n poimawh ngaih a, Doctor-te' ensak leh zel din ngen hi. Campaign hun ah Dr Rosangzuol Khulum, Vety Officer; Dr O.Lokendro Singh, Vety Officer leh Dr N.Rajendro Singh, Jt Director (Vety) te'n ganvulhte etkol dingdan sinsak uhi. Program zat sungin khualliante'n gan khoitute kiangah ganvulhte ading vitamin (potent supplement for ruminants) hawmkhia uhi.

CCpur college ah SSC exam omding
Lamka, Feb-22: Staff Selection Commission(SSC) saina in Feb 23, 2014 in Multi Tasking (Non Technical) staff semding lakna din Matriculate/Class X Level Examination om ding a, Lamka a exam centre CCpur College ah candidate-te exam ding uhi. Morning shift zinglam dak 10:00-12:00 in candidate 520 vel exam ding uh a, evening shift ah sunnung dak 2:00-4:00 in candidate 380 vel exam ding uhi.

KIC Annual Assembly omding
Lamka, Feb-22: Kuki Inpi,CCpur dist te'n March 8, 2014 zinglam dak 11:00 in B.Vengnuom Community Hall ah KIC Annual Assembly nei ding uh a, huai ah tribal issue tawh kisai Land Records & Revenue; Police Boundary/Jurisdiction; forest policy; Panchayat thu; Village Authority Act; gam zuak leh leithu; KIC nuai a organisation omdan; KIM budget/project; Kuki Chiefs Assn/CCpur leh KIC plan/project telin thu tuamtuam genkhawm ding uhi. Huai hun ah Orgn tuamtuam, tribe leh students orgn tuamtuam telding in theisak uh a, huai hun tawh kituak din kuama’n program bawllou ding leh bandh/strike bawllou dingin ngen uhi.

IPPI 2nd round omding
Lamka, Feb-22: Gamsung pumpi ah Feb 23, 2014 in IPPI/NIDs 2nd round om ding a, CCpur dist ah leng neih hiding hi. Huai dingin district pumpi ah booth 435 kihong ding a, OPV vials 2505 zangin (0-5yrs) kikal naupang 36133 te' zeng dalna damdoi (polio) dawnsak hiding uhi.

BADP tawh kisai Seminar om
Lamka, Feb-22: Dist Admn saina in tuni zinglam dak 11:00 in Tuibuong a Dist Training Centre ah Thanlon block-te adin ‘Workshop-cum-Seminar on Capacity Building & Skill Dev under BADP 2012-13’ om hi. Huai hun ah S.Thienlaljoy Gangte, SDO/BDO Thanlon in ‘Demonstration & training on Cash Crops plantation’ tawh kisai sinsak hi.

TKSU Gen HQ O/B bawl uh
Lamka, Feb-22: Thadou Kuki Students' Union(TKSU) Gen HQ te'n tuni sunnung in IB Rd a KKL complex ah kum 2014-2017 sunga TKSU Gen HQ a Office Bearer ding guanna leh kichiamsak hun zang uh a, Peter Mate, President, KSO Gen HQ in kichiamsak a, Pastor Khupjalen in Pathian kiangah thumsak hi. TKSU Gen HQ makai thakte-President in Lalminthang Misao; Vice President (Admn) in Lalkhohao Chongloi; Vice President (External) in Jamkhotinthang Haokip; Gen Secy in Lunkhohao Haokip; Jt Secy in Henkholen Kipgen; Secy Orgn in Thongkholen Kilong; Secy Finance in Doujathang Lhungdim; Secy Education in Kakai Doungel; Secy Social & Culture in Jangkholien Haokip;Treasurer in Nengpi Haokip; Secy Women Wing in Hoineivah Haokip; Secy Literature & Magazine in Thangkhohao Haokip; Secy Information in Mangminlen Touthang leh Asst Secy Inf-cum-Media incharge Khupjangam hi uhi.

Anngawl a thumkhawmna om
Lamka, Feb-22: EBC Lamka South Divn. nuai a Missions deptt saina in tuni zing dak 7:00 akipan sunnung dak 1:00 tan New Lamka a EBCC Pethuel biakinn ah anngawl thumna om hi. Huai hun ah EBC Lamka South Divn. nuai a saptuam tamtak apan Missions deptt-te telin saptuam makai tamtak tel uhi.

Lhunkhongam Touthang a omna kitheilou
Lamka, Feb-22: Lhunkhongam Touthang(35) s/o Ngamthong Touthang of Walkhu village, Sangaikot TD Block apaisa Feb 19, 2014 in Sugnu bazar a hawh tunitan inn tungkik lou a, adin sandan feet 5’5’’ vel hi’n kigen hi. Amah mukha leh a omna theikhate’n Thangkholun Touthang, Chief of Walkhu village, Sangaikot TD block, CCpur district contact. No.8014329412 or 9586903362 theisak ding in a innkuasnpihte’n kuapeuh ngen uhi.

IMPHAL NEWS
Tuni leng Mass Casual Leave la
Imphal, Feb-22: Manipur govt nuaia sem AMTUC leh AMGEO kikhaikhawmna Joint Administrative Council(JAC) pawlin Manipur govt kiang ah employee-te 6th pay commission in lawh abikhiah tawh kibang kimtaka pe dinga phutna in zan leh tuni in Mass Casual Leave la uh a, huaiziakin Manipur Secretariat tanpha ah leng zan leh tuni in office nasepna gen vuallouh in nawngkai hi.Manipur govt in JAC te thilnget a pichinsak tuankei leh March 6, 2014 akipan JAC pawlin hunchiam omlou ding ceasework strike pan ding uh hi’n puang uhi.

NEC Project a cheque gelhna din 6% la
Imphal, Feb-22: PWD a Executive Engineer (NEC Division 1) in Kangpokpi-Tamei leh Tamei-Tamenglong kikal lamlian kekletna nasep phase 4na ading North Eastern Council (NEC) fund zanga nasepna a sum piakna din cheque a gelhna ah 6% zel la a, cheque tungtawn a Rs. 22.6 crore a gelhna ah aman Rs. 1.3 crores vel kaikhawm hi’n kigen hi.

Manipur govt in Tamenglong-Tamei lamlian adin Rs. 9.6 crore leh Kangpokpi-Tamei lamlian adingin Feb 1, 2014 in contractor-te adin Rs. 13 crore khahkhia(released) hi’n kigen hi. Kum 2012-2013 a tender kisuah nungin lamlian kekletna dingin contractor 5 in nasem uh a,nsepna din a veka kigawm Rs. 70 crore hidia bikhiah hi’n thusuak in gen hi.

Bomb hattak khat puakzak
Imphal, Feb-22 : Imphal West district sung Sagolband Leirak Machin mun ah zan nitak dal 7.55 vel in bomb hattak khat puakzak hi. Huai bomb bel Social welfare department a sem A. Binodini tenna innkiang puakzak hi a, himahleh asi leh liam omlou hi. Huai tawh kisai kuate thilhih hihiam chih theih hilou a, akipuang leng omlou hi.

Kg. 6 a gik naungek khat piang
Imphal, Feb-22 : JNIMS hospital ah zan nitak dak 8:00 velin naungek khat kg. 6 agik piang a, tuatawh kiton in JNIMS a naungek piangtungte laka gikpen hilai dan in kigen hi.

Pensioners Assn. ten sit-in-protest nei
Imphal, Feb-22 : AMTUC & AMGEO ten State govt ah a thilphut uh support-na in tuni’n Manipur State Pensioners’ Union ten Pishumthong a Singjamei Chingamakhong mun ah sit-in-protest tu uhi. Amau state govt in central government a sem pensione- te tawh kibang a DR/DA piak ding phut uh hi’n gen uhi. Amau a taklatna uah Central Government in DR/DA a punsak tawh kiton in vanman leng naktakin pung a, tuaziakin state govt apan sepna a pension-te leng DR/DA punsak deihthu puang uhi. Nagaland, Mizoram, Assam leh Arunachal Pradesh state a pensioner-te’n DR/DA 90% mu uh hidan in gen uhi.

Application piaktheih lai
Imphal, Feb-22: Govt of India nuaia CIPET in DoNER Ministry apan huhna zangin tuailai sepna neiloute kha 6 sung Machine Operator zil ding mi zong uh a, training sungin nekman, hostel fee, laibu, uniform, pen leh note book manbei a piak hiding uh a,kha 6 sung lawhchingtaka training zoute CIPET in Private company ah sepna muhsak ding uh a, kha lawh Rs. 7500-10,000/- kikal in kipan ding chih hi.Huai dinga lunglutte’n Class X certificate,residential certificate. Income/BPL certificate (photocopy), passport lemlak leh application kithuah Feb 22, 2013 tan Manipur Express office ah submit theih ding chih hi Feb 22 tana submit manlou te’n Feb 23,2013(Sunday) nitalam dak 5.00 tan submit theihlai ding hi.