Tuni’n SP/CCpur khakna om
Lamka, Feb-17: L.Mangkhogin Haokip, IPS, SP/CCpur in SP/VIP Security(with Addl charge of ST Tech) lending in Imphal ah kisuan ding a, huaiziakin tuni zinglam in SP’ office staff-te leh Police Officer te’n khakna nei in singpi dawnpih uhi. SP/CCpur in Feb 19, 2014 in Lamka nusia in a sepna mun thak ding join ding chih hi.

Class XII/HSE examination kipan
Lamka, Feb-17: Council of Hr Secondary Education Manipur (CoHSEM) saina in March 15, 2014 tan daihding in tuni’n Class XII/HSE examination,2014 kipan a, CCpur dist a exam centre 2-Rengkai Hr Sec school (Exam centre‘A’) leh Lamka college (Exam Centre‘B’) ah a kigawm in candidate 1965 in exam uh a, exam centre ‘A’ Rengkai Hr Sec school nuai a sub- centre in Don Bosco Hr Sec School zat in om hi. Imphal apan CoHSEM official te’n CCpur a exam centre enkhia uh a, exam siangthou sa mahmah uhi.
Exam Centre‘A’ Rengkai Hr Sec school ah Science candidate 654 te’n exam uh a, Don Bosco Hr Sec school ah Arts candidate 589 exam uhi. Exam Centre ‘B’ Lamka college ah Arts candidate 384, Science candidate 274 leh Commerce candidate 64 kigawm candidate722 in exam uhi.

Ni 10 nasepna ding sanction om
Lamka, Feb-17: MGNREGS 2013-14 a 3rdphase (VA proposal) Job Card Holder te’n ni 3 nasepna ding leh 4th phase (Line Deptt work proposal) Job Card holder nasepna ding ni 7 aveka kigawm ni 10 nasepna ding Chairman &Executive Director, DRDA in block 10 ah sanction bawl uhi. Huai dungzui in Saikot block ah khua 39; Singngat block ah 95; Thanlon block ah 64; Tipaimukh block ah 18; Lamka block ah 53; Sangaikot block ah 98; Vangai block ah 35; Henglep block ah 166; Tuibuong block ah 144 leh Samulamlan block a khua 103 ah Job Card holder te nasepna ding ni 10 ading sum sanction in om hi. MGNREGS 2013-14 a 1st phase ni 8 leh 2nd phase ni 14 sanction in omkhin a, ni 100 nasepna ding lakah Financial Year ma in ni 32 kia sanction in ompan a, ni 100 nasepna din akimkhat leng sanction manlouh khakding lauhuai hi’n kigen hi.

Tibetan teamte’n Lamka hongpha
Lamka, Feb-17: Tibet Womens Football team mi 21 leh official 6 te’n Lamka hongpha in Bungmual a Lalpuithluaii Foundation School(LFS) ah tuni sunnung in amaute vaidawnna om hi. Amau bel Imphal a ‘1st Ladies Spring Soccer Festival, 2014’ a hongtel hi uh a, match 3 akimawl nung un Lamka hongpha uhi. Tibetan teamte’ New Zealand akipan Shane Kidby in makaih hi. Imphal a akimawl masakna uah 7-0 in zoulou uh a, a nihna ah 4-2 a zou in, third match ah Manipur team tawh 2-2 ki-draw uhi. Amau Himachal Pradesh a Dharamsala apan hongkuan hi uh a, Feb 18, 2014 in kiknawn ding uhi. Tuni a LFS a vaidawn hun ah nampuan piak in om uhi.

Thangdam in SO hihna len
Lamka, Feb-17: Board of Secondary Education,Manipur(BSEM) saina in Feb 20, akipan March 14, 2014 sung Class X/HSLC examination, 2014 om ding a, BSEM Secretary L Rajmohan Singh leh Controller of Examination in CCpur Private centre a Supervising Officer (SO) hihna len dingin H Thangdam, Z EO(retd) guang nawn hi. H Thangdam ahihleh March 1, 2004 in ZEO/CCpur hihna apan retired hi a, huai kum apan BSEM in saina a class X/HSLC examination om hun tengin CCpur Private centre ah SO dingin BSEM in appoinment pia uh a, tukum telin kum 14 sung akizom in SO hihna len hi.

Lamlian lai ah hawktui luangkhia
Lamka, Feb-17: Tuni’n Lamka khawpi ah avangkim in vuahzu a, khawpi sung lamlian jula nullah akipan hawktui luang dimlet in lamlian lai ah luangkhia a, adiakin IB road-Tipaimukh road kisuktuahna ah nullah ginatlouh ziakin hawktui dimlet ziakin lamlian lai tanpha ah luangkhia a, gimse petmah hi’n kigen hi.

Probation in kha 2 sung om ding
Lamka, Feb-17: MPSC saina nuai ah Manipur Police Service(MPS) muthak mi hunkhop in dist tuamtuam ah kha 2 sung daihding probation in paikual uh a, huai lakah Sangboi Gangte, MPS leng CCpur dist ah kha 2 sung (Feb 17-April 29, 2014 sung) omding in tuni’n hongpai hi.

YVA Imphal Block in panpihna pia
Lamka, Feb-17: YVA Imphal Block in Ukhrul district sung Litan khua a meikang thuak innkuante panpihna tuni’n hawmkhe nawn uhi. Mun tuamtuam akipan kang panpihna a donkhawmte uh gari 3 zangin Litan khua tan pawtung uh a, antang bag 11, allu bag 4 leh puansilh bag 10 vel Relief Committee tungtawn in mipi lakah hawmkhia uhi. Hemkhothang Baite,Chief of Litan & Convenor, Relief Committee in Litan khua kichi Vaiphei hauhsakna khua himahleh nam chikim phial khawsakhawm uh a, nam tuamtuam kituaktak a khawsa khawm ahih bang un panpihna thilpiakte leng kilual taka hawmzak hidin gen chikawm in YVA IB tungah kipahthu gen hi.

BSNL gui kitan ziakin ni 2 sia
Lamka, Feb-17: Bishnupur leh Keinou kikal a BSNL gui kiphum JCB gari in a phuttan khak ziakin zan leh zanhal in BSNL broad-band kisia a, himahleh tuni sunnung in bawlhoih hi a, nitaklam dak 3.30 akipan Lamka area ah BSNL Broadband ngeina bangin painawn hi.

VPC election om ding
Lamka, Feb-17: Vaiphei Peoples’ Council (VPC) Gen HQ Presidential election Feb. 18, 2014 in Vaiphei Community Centre, Bethel Veng, New Lamka ah om ding hi. Huai ah President dingin mi 2 in nomination file a, Vice President dingin leng mi 2 mah in nomination file uhi. President dia nomination file-te tulel a President Khatkhotong Baite leh C. Munpi Hausa Hauneilal Vaiphei, Chief of C. Munpi hi uh a, Vice President dingin tulel a lenlel Lalzakhai leh Soikhothang of Kamuching vill, Sadar Hills hi uhi.

TKSU Gen HQ makai thak kitel
Lamka, Feb-17: Thadou-Kuki Students’ Union(TKSU) Gen HQ kitelna ding notification suah nungin post chiat ah nomination khat chiat om a,huai dungzui in President-Lalminthang Misao of Lhahvom village, General Secretary-Lunkhohao Haokip of Molnom village leh Finance Secretary-Doujathang Lhungdim of M. Songgel tuhtu omlou in ching uh a, Tuibuong a KIC office ah Feb 18, 2014 zinglam dak 11.00 in kichiam ding uhi. Huailou in Feb 22, 2014 zinglam dak 11.00 apan KIC office ah Executive Member kiguang thakte kichiam ding uhi.

Essay Competition om ding
Lamka, Feb-17: CCpur block te’n Feb 21, 2014 zinglam dak 10:00 apan in Rengkai Hr Sec School ah National Rural Drinking Water Awareness Week 2014 tawh kisai in Class VI-VIII kikal student te’n “Save Water Sources” chih thupi pansan in Essay Competition nei ding chih himahleh Class XII/HSE exam om ziak in Phungkhothang govt H/S a neih dingin amun kisuan hi.

BSEM Registration No. poimawh
Lamka, Feb-17: ZEO/CCpur nuai a om schoolte’n class VIII certificate & countersign tawh kisai school thuneite’n result sheet, Head of institution specimen signature ban ah Board of Secondary Education Manipur (BSEM) nuai a Class VIII registration No. tellou in ZEO/CCpur in maban ah class VIII certificate ah countersign bawl nawnlou ding chihthu om hi. Thu kingahdan in Police leh sepaih kilakna ding a Class VIII certificate poimawh mi tamtak buai ding hi’n kigen hi.

Measurement form lak ngai
Lamka, Feb-17: CCpur block nuai a govt school a class I-VIII kikal student te’n govt apan free uniform ngah ding uh a, huai tawh kisai in School tuamtuama Head te’n akintheilam in measurement form la in submit ngai hi’n DI of schools/CCpur apan kiza hi.

SUUNNA
Jamkhanlam (34) s/o Chinzasuan of Lanva tuzing baihtak in a inn gei ua haikung(mango tree) ah awklumsa in kimukhia a, tuni mah in Lanva hanmual ah kivui hi.
Konkhothang Baite (76) of Hengken village, Sugnu damlouh ziaka district Hospital a om tuni nitak dak 8.00 in si a, Feb 17 in Hengken khua ah kivui ding hi.
&&&&&&&&&&&&&&&&&&&&&&&&&&&&&&&&
IMPHAL NEWS
Maj. Gen. Sharma in Imphal hongpha
Imphal, Feb-17 : Major General RK Sharma, ADG, NCC,North East Region in tuni in North East tour tawh kisai in Manipur hongpha hi. Amann Education Minister M. Okendro kimuhpih a, state govt in NCC-te hoihtaka athuap ziakun kipahthu gen hi. Tuabanah Moirang ah NCC unit dinkhiak ding tawh kisai leng genkhawm uh a, Manipur a NCC te panlakna kipahthu gen hi. Aman Mount Everest a kal tung NCC cadres Ph. Bidyachand Singh of Moirang Khunou leh UO Chirom Shankar te pahtakthu gen hi.

ATSUM pawlin blockade tawpsak
Imphal, Feb-17: Emboi Serto makaihna ATSUM pawl mi 23 leh Chief Minister O. Ibobi makaihna Manipur govt tuni sunnung dak 2.00 akipan CM bungalow ah kihou uh a, dakkal 3 sung a kihou nungun Manipur govt in ATSUM in charter of demand point 8 a luikhiakte sep pichin dia a chiam ziakin ATSUM pawlin zan nitak zankim akipan blockade puan uh Feb 18, 2014 zinglam dak 8.00 akipan tawpsak(call-off) uh hi’n thusuak in gen hi,
Thusuak kingah dan in govt in March 15, 2014 tan in 200 point roster reservation policy bawlthak din bikhiah a, police boundary tungtang leng Chief Secretary makaihna a etzui hiding chih hi a, singtanggam a khua 100 vel phaijang bial police station nuaia om tungtang leng Feb 24, 2014 in Home Minister Gaikhangam tawh genkhawm hiding chi’n govt thupuangtu Education Minister M. Okendro in gen hi. Tuni a kihouna ah kum 2014-15 sung singtanggam district HQ tengah Tribal Dev office om ding chihthu leng tel hi. Huailou in govt in Addl Director of Education(Hills) tuam koih din leng thukim uh chihthu om hi.
Tuni a kihouna ah Dy CMr Gaikhangam, IFCD Minister Ngamthang Haokip, RD&PR Minister Francis Ngajokpa, Revenue Minister Th Devendro leh Education Minister M Okendro leng tel uhi. .

Council exam ah mi 11 nawhkhia
Imphal, Feb-17 : Council of Hr. Sec Education, Manipur (CoHSEM) saina in tuni’n Class XII/HSE examination, 2014 kipan a, chindan hoihlou zat ziakin centre tuamtuam ah mi 11 nawhkhiak in om uhi. Wangjing Private Centre ah Roll No. 13291, Lilong Haoreibi College Council Centre ah mi 4 – Roll Nos. 7485, 7491, 7457, 7364 nawhkhiak hi uhi. Mekola Gulap Hr. Sec. School Council Centre ah Roll Nos. 2680, 2713 leh 2640 nawhkhiak hi uhi. Noney Private Centre ah Roll No. 21697 leh 21698 (Arts) nawhkhiak hi uh a, Kangpokpi Private Centre ah Roll No. 21153 (Arts) nawhkhiak hi uhi.

AMWJU te’n Dy CM mu uh
Imphal, Feb-17 : Imphal Free Press a senior reporter Aribam Chaoba tenna inn ah zan nitak a meltheihlouhten thau round 2 avakap utawh kisai in tuni’n All Manipur Working Journalists’ Union (AMWJU) President W. Shyamjai makaih AMWJU team in Dy. CM Gaikhangam kimuhpih uhi. AMWJU in journalists-te bitna ding tawh kisai telin Aribam Chaoba dinmun genpih uhi. Amau Chaoba tungah kilawmloutak a om IRB personnel tung ah action khauhtak la din ngen uh a, soisak ahih nung a case registered nungin IRB personnel zalentak in omthei a AMWJU huai tawh serious mahmah hi’n Dy CM genpih uhi. Dy. CM in AMWJU ngetna tawh kisai enkai dinn chiam a, IRB personnel akinlam in police custody a koih din leng chiam hi.AMWJU team in Dy CM a muhkhit un Press Club ah Special General Body Meeting nei ua, thiltung tawh kisai Law Court tut dingin thukim uhi.

P. Doungel, IPS in khatna la
Imphal, Feb-17 : All Manipur Gymnasium Welfare Assn. saina in Khuman Lampak Indoor Stadium ah ni 2 daih ding 4th Junior/Master/Physically Challenged National Body Building Championship-2014 pailel a, huai ah 50-60 years Master category atel P. Doungel, IPS, Addl DGP in khatna la a, Odisha state apan Kartekashwar Jen in 2na la a, 3na in Manipur mi Lukram Kiran Singh pang hi. hi. Huai Body Building Championship tuni in zawh in om hi

Singjamei ah SBI Branch hongkhia
Imphal, Feb-17: State Bank of India(SBI) in Singjamei Chingamathak mun ah tuni’n SBI branch thak honguhi. Huai ah Chief Guest in PHED Minister I. Hemochandra in pang a, Functional President in Imphal Division SBI Asst General Manager Thangboi Haokip pang hi. Bank branch honkhiak mipite adin poimawh ahih tawh kiton in tulai in bank tuamtuam in kidemna in zang ua, mipiten hamphatpih mahmah uh chi’n Minister in gen hi. Thangboi Haokip in SBI in district leh sub-division teng ah branch honsuak sawm ahihdan genkawm in, mipite khualna in ATM tawh kibang Cash Deposit Machine leng koih hidin gen hi.

Meltheihlouhten bomb paihkhum
Imphal, Feb-17: Helpawl hidia gintak meltheihlouh pawlkhar in zan nitak dak 6:45 velin Palace compound a om MPCC Vice-President Sagolsem Achouba tenna inn ah handgrenade va paihkhum uhi. Huai hun ah Achouba’ innkuante innsung ah TV en in om uh a, himahleh kuamah aliam omlou uh hi’n kigen hi. Sagolsem Achouba bel kum 2012 a Assembly Election omlai in Wangoi A/C ah Congress candidate ahi hi.

BSF khat amah leh amah kithat
Imphal, Feb-17 : Lamlai PS huamsung Laikoiching mun a om 49-Bn BSF a Assistant Sub-Inspector(ASI) sem Ranbir Singh zan nitak dak 9:40 velin a thautawi in amah leh amah kikap lum hi. ASI Ranbir Singh bel Haryana state akipan hi a, bangziaka kikaplum hiam chih theih hilou hi.