Health Minister Phungzathang Tonsing in damlou 4-te’ veh; Northeast mipite Parliament Street ah kiphin ding
Lamka, Feb-13: Northeast(India malsuah bial) mite’n Delhi khawpi ah soisakna leh bawlsiatna banah mualpjoutaka koih leh sihna tanpha a tuah sek uh thuakzou nawnlou in Feb 13, 2014 zinglam dak 11.30 akipan in New Delhi a Parliament Street ah mipi tamtheipen kikaikhawm in ‘NE Protest’ kiichi kiphinna nei ding uh a, huai ah Delhi khawpi a Northeast(NE) student orgn teng leng telkim ding uh chihthu om hi. Thudang kizadan in Health Minister Phungzathang Tonsing in Madangir a om Bungmual khawmi 2te a innluahna uah vaveh in Rs 3000 tuak pia a, innluahman leng piaksak hi’n kigen hi. Minister in AIIMS a etkol a om nungaknou kum 14 mi leng veh a, huailou in tem dawtliam a om Gl. Khupsiamgen Thangkhal leng Saket City Hospital a om vaveh in Rs 5000 pia hi’n thusuak in gen hi.

Hibang kalah Northeast mite bawlsiatna tawp tuanlou in zan nitak dak 9.30 in GB Pant Hospital a Staff Nurse sem Manipur apan numei khat suam in om a, mobile phone leh bag sunga Rs 7000 banah document poimawh tuamtuam laksak in om hi.Huaiziakin Racism, racial discrimination, racial attack, hate crime leh Northeast mite tunga thiltung dangdangte mawhpaihna in Feb 13, 2014 in protest thupitak om ding chi’n Delhi akipan thutut kingah hi. Huailou in a omna kitheilou Miss Lhingneilam pen Delhi khawpi sung munkhat ah muhkhiak hi a, amah bel bangmah chilou hi’n kigen uhi.

Thusuak dang ah Bungmual khawmi 2 soisate laka mi 4 matkhiak ahihnung in amaute kipawlna Gang makai Deva kichi matkhiak hinawn a, amau pawlin Metro station leh akim lak ah mi tuamtuam suam zel uh a, himahleh kumchinglou ahihziak un Juvenile home a koih hi uhi. Deva bel Punjab akipan hi a, Mehrauli area ah Saket Police Station makaih a matkhiak hi uhi. Police official-te’ gendanin hiai Gang(suamhat) pawlte khamtheih hih zongsang ngen hi uh a, kumchinglou(juvenile) leng hilai uhi.

Zan in New Delhi a Arunachal House ah NE Meeting omlai in official leng tamkhop vatel in thupukna tuamtuam 7 bawl uh a, High Court in NE Special Helpline kal 6 sunga piak ding, High Court thupiak dungzui a NE mite adia vulnerable areas-te ah Delhi Police te patrolling paisak ding chih ahi. Huailou in High Court kiangah NE makaite’n NE mite approach theih ding Delhi Police station khat bawl ding, Special Court for North East bawlkhiak ding chih banah CBSE, NCERT etc syllabus ah Northeast states-te tangthu leh tanchin telsak ding, Enactment of Anti Racial Law koih ding, North East Core Team puahphat ding chih hi a, Feb 14-15, 2014 sungin Jantar Mantar a Nido Memorial Service leh Rally kithuah ah Northeast mi tamtheipen paikhawm ding chih thukim uhi.

Bank tawh kisai meeting om ding
Lamka, Feb-13: DC/CCpur makaih in Feb 19, 2014 zinglam dak 11:00 in DC's office a BRGF Resource Centre ah Bank tawh kisai Dist Consultative Committee (DCC)/Dist Level Review Committee (DLRC) meeting om ding hi. Huai ah Sept 13, 2013 a DCC/DLRC thupuknate etkikna, Dist a Bank Branch Network leh nasepdan etkikna, bank te’ CD Ratio thu leh Dist ACP 2013-14 achievement etthakna neiding uhi. Huai ban ah govt sponsored scheme tuamtuam ban ah Social benefits ngahdingte' bank account opening etkikna, RSETI thu, RBI Adopted village etkikna ban ah Women SHG sepsuahna thu genkhawm ding uhi.

ABVP makaih in Sit-in- Protest om
Lamka, Feb-13: Thangsangkham, Co-ordinator, Akhil Bharatiya Vidyarthi Parishad (ABVP)/CCpur dist makaih in Rayburn College a degree course (BA, B.Com) student te'n tuni’n Lamka Public ground ah sit-in-protest nei uh a, huai zawhin DC/CCpur kiang ah Manipur Governor ading memorandum pia uhi. ABVP pawlin Delhi a om NE mi ban ah Lamka mi numei rape ahih banah pasal bangzahhiam chi-le-kuang a kideidanna ziaka soisate mawhpaihna ziakin sit-in-protest nei uh hi'n gen uhi. Governor ading memorandum apiak uah Delhi a NE mi soisate akinlam a matkhiat banah dan(law) dungzui a booked ding, India gamsung pumpi a Education System ah NE state-te telsak ding, Delhi govt in social security improve bawl a, Rapid Action Team bawlkhe din ngen uhi.

DC/CCpur tuni’n office kainawn
Lamka, Feb-13: Ms Jacintha Lazarus,IAS,DC/CCpur in Feb 11, 2014 in official thil poimawh neihziak in Delhi ah zinkhia hi. Amah tuni'n Lamka hong tungkik in tuni mah in office kai ib nasep sunzom nawn hi.

YPA Pearsonmun in Culvert dai bawl
Lamka, Feb-13: Young Paite Assn(YPA) Pearsonmun Unit in tuma a Diesel Auto lenkhiakna Pearsonmun a Lanva leibul(bridge) lauthawn huaitak a om ngai poimawh in zan zingkal an nekma akipan fencing(dai) bawl uh a, tuni’n zou uhi. YPA Pearsonmun Unit makaite gendanin Auto accident nungin leng gari khenkhat tuahse thei dingin om a, poimawh sak ziakin mun sautak huap in dai bawl uh hi’n gen uhi.

Khaipao in V/A house hongkhia
Lamka, Feb-13: Kholmun khua ah tuni sunnung in Khaipao Haokip, MDC (Kholmun) in Village Authority House kibawlthak hong a, Upa Letkhojam, Chairman Church Committee, ECA (Kholmun) in thumna in lan hi.Khaipao in agenna ah MGNREGS a MDC’te share 25% tungtawn in khawsung khantouhna ding nasepnate hoihtaka pia hi’n gen a, tuni a V/A house honkhiat a omleng ama’ bawlkhiat hilou in mipi pankhawmna ziaka kibawl hi’n gen hi. Aman a genbehna ah MGNREGS 25% tungtawn in khawteng ah V/A house bawlna ding piak hi a, khua 4 ah V/A House honkhiat theih a om hi’n gen hi. Maban ah development works sepding tamtak om a, kuapeuh pangkhawm a semkhawm chiat dingin ngen hi.

Legal Awareness Training om
Lamka, Feb-13: Action for Women & Child Advancement (AWCA)-te saina in tuni zinglam Lailam Veng a AWCA office ah ‘One Day Legal Awareness Training’ om hi. Huai ah ‘Criminal Procedure Code (CrPC)’ chih thupi pansan in Yumkham Rother, CJM/CCpur in sinsak a, George Munluo, Advocate in ‘Social Legislations and the Tribal Customary Laws relating to Women’ chih pansan in sinsak hi. ‘Domestic Violence Acts (DV Acts) and Schemes for Support Services to Victims of Rape: A scheme for Restorative Justice’ chih pansan in Grace Zamnu, MDC & Executive Secy, AWCA in sinsak a, mi ahunkhop tel uhi.

CUCO in mawhpaihthu puang
Lamka, Feb-13: CCpur United Clubs Orn(CUCO) pawlin Delhi a om Northeast(NE) mite soisak banah numeite sual(rape),thah leh bawlsiatna tuamtuam omte puaknat thu taklang kawm in huchibanga gamtangte mawhpaihthu puang uhi. Huchibang thilhihte Indi govt in mankhe ding leh akituahpih gawtna pe ding in deihthu puang uhi.

Meeting a tel din theisak uh
Lamka, Feb-13: Lamka Block Village Authority Council pawlin MGNREGS tawh kisai in Feb 14, 2014 zinglam dak 10:00 in Hiangtam Lamka a PTC Conferenc Hall ah meeting sam uh a, huai ah CCpur district a TD Block a Chief/VA assn a Chairman leh Secy teng tel dingin theisak uhi.

Economic Blockade thu ah Students’ Union-te kituak lou uh
Lamka, Feb-13: All Tribal Students’ Union (ATSUM) Emboi Serto makaihten Feb. 16, 2014 akipan hunchiam omlou a Economic Blockade bawl a sawm uh tawh kiton in CCpur District Students’ Union (CDSU) ten tuni in press release suah in singtanggam ah economic blockade om theilou ding hidan in taklang uhi. Amau a taklatna uah hibang a economic blockade bawlsawmte’n amau mimal hamphatna ding zong uh hidan in gen uha, kuaman gum(support)lou dingin leng ngen uhi.
Hibang kalah students’ Union 5-HSA/CCpur, KRSU/CCpur, Zillai/CCpur, TKSU/CCpur leh MZP-Manipur te’n ATSUM in Indefinite Economic Blockade a puan support uh hi’n puang kawm in CDSU kichi om nawnlou ahihdan press statement suahkhia uhi. Amau a taklatna uah CDSU kichi mimal kuate hiam in amau hamphatna ding a a bawl uh hi a, CDSU atel body 9 laka atamzaw KRSU,TKSU,ZILLAI,TKSU leh MZP in CDSU a nutsiat khit ziakun CDSU defunct hidan in gen ua, kuaman CDSU min zang nawnlou ding inleng theisak uhi.

SUUNNA:
Liansonmang(42) s/o (late) Rev. Khupkhawthang of Red Cross Road tuni nitaklam dak 3.00 velin BP niam in si a, Feb 14 in New Christian Cemetry ah kivui ding hi.

&&&&&&&&&&&&&&&&&&&&&
IMPHAL NEWS
Govt aided schools a post awngte huk hidng
Imphal, Feb-13: CM Secretariat ah tuni nitaklam in Chief Minister O. Ibobi makaihna in Cabinet meeting om a, huai ah govt aided school a teacher post awng(vacancy) omte luah ding lak hidingin Cabinet in thupuk uh chihthu om hi. Govt thupuangtu Education Minister M Okendro in a gendan in govt in Feb 16, 2014(Sunday) akipan indefinite economic blockade patsawm ATSUM-te tawh a thilnget tungtang uh genkhawm ding in Feb 14,2014 in ATSUM palaite tawh kihouna om ding hi’n gen hi.
Govt aided school adin teacher post 1749 bikhiah lakah tutan in 1530 fill-up hi a, teacher retired leh asi om ziakin tuni’n vacancy 219 om hi’n Education Minister in gen hi. Huailou in tuni a Cabinet meeting in direct recruitment in MPSC tungtawn in MCS 17, MPS 20 leh Election Officer 2 lak ding in leng thukim uhi.Huailou in Assembly Speaker-lui (late) Dr. Sapam Budhichandra leh MLA 8 in loan a lakte uleng ngaihdam(write-off) din Cabinet in thupukna bawl uhi. Cabinet meeting tuni nitaklam zekai hun tanpha in sunzom uhi.

Nagaland CM in uap ding
Imphal, Feb-13: Naga mite adia festival minthang ‘Lui-Ngai-Ni(seed sowing festival)’ kichi Tamenglong district HQ ah Feb 15, 2014 in zat hiding a, Nagaland Chief Minister Neiphiu Rio in khuallian a pang in uap ding hi. Huai hun ah Guest of Honour in Nagaland a Education Minister CM Chang pang ding a,Chief Host in Nagaland akipan mah Planning Minister TR Zeliang pang ding hi.Forest Minister Y. Patton,CM Political adviser Chingwang Konyak, Special Officer to CM YM Humtsoe leh OSD(Security) to CM Krodi Rhetso in Nagaland Chief Minister Rio hongzui ding uh chih ahi hi.

Reporter soisa IRB Hav suspend in om
Imphal, Feb-13: IRB 1st Bn a Havilder Md Majibur Rahman in Feb 10, 2013 nitak in
Imphal Free Press reporter Aribam Dhanajoy @ PaojelChaoba a soisak ziakin Police department in thil omdan suikhe ding in fact-finding inquiry bawl a, huaite suikhiak dungzui in Havilder Md Majibur Rahman leng apaisa Feb 11, 2014 akipan suspend a om hidan in thusuak in gen hi. Huai tawh kisai in Addl DGP(Armed Police) in MrR/IRB battalion tenga CO teng kiang ah duty a om police personnel te’n mipi vantang(public) tawh ki-deal hun ah kamsiam leh omdan kilawmtak a omsak chiat dingin theisak chih ahi hi.

Political party hunkhop in protest rally nei
Imphal, Feb-13: Delhi a Northeast mi omte bawl gentheite mawhpaihna in tuni in Manipur a Political parties tuamtuam CPI Manipur State Council (CPI-M), Manipur Peoples Party (MPP), JD (U) leh Trinamool Congress te’n Samumakhong ah sunnung dak 1:00 in Protest rally nei uhi. Amau Thangal bazar apan Nagamapal telin khawpi sung mun tuamtuam phakual in slogan sam uhi. Amau huai hun ah state govt leh Central govt in Delhi a Northeast mite bitna dinga panla dingin ngen uhi.

NIT Campus ah bomb puak
Imphal, Feb-13 : Langol a National Institute of Technology (NIT) campus ah tuni sunnung dak 2:40 velin meltheihlouh helpawlte hiding a gintakte’n handgrenade khat va pailut ua, puakzak mahleh asi leh liam bel omlou hi. Akigendan in handgrenade puakzak in NIT building kibawl thak mun khenkhat hihse zek a, mihing bel ahihkhak omlou hi.

ECI team in Manipur hongpha ding
Imphal, Feb-13 : Election Commission of India (ECI) team ten Feb. 19, 2014 in Manipur hongpha ding uh a, amau SVEEP-II Project tawh kisai hong etkhiak banuah District HQ teng leng phasuak ding uh hi’n kigen hi. Amau Utilization certificates, Campus Ambassador appointment tungtang leh Voters Facilitation Centre-te enkhe ding uhi.
ECI team in Chief Secretary, DGP, Principal Secretary(Home) leh Police Nodal Officers tawh meeting nei ding uh a, Lok Sabha election ding tawh kisai a Expenditure Monitoring deploy ding tungtang genkhawm ding uhi. Tua banah election ding tawh kisai a transfer & posting tungtang telin thil tuamtuam leng genkhawm ding uhi. ECI teamte bel TC Kom, Under Secretary; Anoop Kumar Khakhlary, Section Officer leh Dilip Kumar Mahto, Section Officer hiding uhi.

Congress govt pukse pah ding chi’n gen
Imphal, Feb-13: Manipur a Trinamool Congress President Ms Kim Gangte in a gendan in Congress in India gam ah kum 60 vel vai a hawm nung un deidanna leh deihsaktuan neikawm a vaihawm ziakin pukse pahta ding uh chi’n gen hi.Kim Gangte in tuni’n Senapati district sunga Kangpokpi khua ah Sadar Hills ading Trinamool Congress Party office hong kawm in a genna ah Congress in kum 60 phial govt a bawl sungun masawnna leh khantouhna thil ah chiamtehtham ching bangpi sepkhiak neilou uh hi’n gen a, mipi tawh kizopna hoih leh kiptak a neihlouh ziak un pukse pah ding dinmun a om uh hi’n gen hi. Congress puksiatna ding ziak laka khat ahihleh party leader leh worker-te nekguk takgukna(corruption) ah a kigolh ziak uh hi’n gen hi.