Deputy Commissioner 5 sanga tawmzawlou kisuan ding; ECI in kum 3 sanga sawtzaw om DC-te suankhe din thupia
Imphal, Feb-9: Election Commission of India(ECI) in Manipur govt kiang ah district khat ah kum 3 sanga sawtzaw om Deputy Commissioner(DC) teng Lok Sabha election om ni(date) puankhiak ahihman ngei a suankhe ding in gelhthawh in theihsakna pia chihthu om hi.

Lok Sabha election om hun ah Inner Manipur Parliamentary Constituency leh Outer Manipur Parliamentary Constituency adin Member of Parliament(MP) khat tuak tel hiding hi.Thusuak in a gendan in a sepna uh kisuan ding DC te Feb 15,2014 ma a order suak thei ding hi’n leng kigen hi.

Thu kizadan in DC/Imphal West, DC/Chandel, DC/Senapati, DC/CCpur leh DC/Tamenglong in a sepna uh district chiat ah kum 3 sanga sawtzaw omta uh a,huaite lakah DC/Imphal West in a sepna district ah kum 3 sanga sawtzaw a om kia hilou in amah leng phaijang bial district mi hi’n kigen hi. Manipur govt in ECI a ngetna pia in DC/Imphal West in a sepna district ah election om huntan sem dingin ngen uh a,hileleng ECI in state govt ah dawnna bangchibang pia hiam chih thuchian zak om nailou hi.

DC/Imphal West in Inner Manipur Parliamentary Constituency a Returning Officer (RO) hihna lensek a, DC/Thoubal in Outer Manipur Parliamentary Constituency ah Returning Officer hihna lensek hi. District danga DC te Asst Returning Officer(ARO) hitangpi sek uhi. DC/Thoubal a omna district ah kum 3 ching nailou a, huailou in amah Manipur phaijangmi ahihlouh ziakin nawngkaina omlou ding hi’n kigen hi. Huailou in ECI thupiak dungzui in IAS leh IPS officer khenkhat leng kisuan thei dinmun a om uh hi’n kigen hi.

Thudang kizadan in Lok Sabha election om hun ding leng February 2014 kal nanung ahihkeileh March kal masa sunga puankhiak theih ding dinmun a om hi’n kigen a, hileleng Manipur Assembly term 10na a session 7veina February 24, 2014 akipan March 3, 2014 sung om ding ahihman in session zawh a puankhiak ahih gintak-huaizaw chihthu leng om hi. Protocol dungzui in election ni ding puankhiak ahih tawh kiton in Election Model Code of Conduct zat kipan pah ding chih ahi hi.
January 6,2014 in Chief Electoral Officer, Manipur in Assembly constituency 60 a Final Electoral Rolls a suahkhiak dungzui in vote neithei mihing(voter) 17, 39, 005 om lak ah pasal 8, 52, 918 leh numei 8, 86, 087 om a, Manipur mihing omzah laka 60% in vote nei uhi. Huchi kalah Manipur ah Polling station om zah 2662 ahi hi.

Numei naupang sualluihna thu ah kiphinna paizom zel
Lamka, Feb-9: Northeast biala Manipur-mi numei nungaknou kum 14 lela upa khat Feb 7, 2014 nitak dak 10.30 velin Munirka area ah sualluih in om a, zan akipan Northeast state tuamtuam akipan Delhi a omte’n kiphinna aneih uh tuni’n leng sunzom zel uh a, lam-et banga dawnna a omkei leh kiphinna tawpsan sawmlou uh chihthu kiza hi. Thu kizadan in numei naupang rape tupa tungtang tuni’n Patiala House Court, New Delhi ah hearing omlai in Northeast mi tamkhop banah pawl tamtak kikhawmte’n husa ngaihtak nei uh a, lehlam ah Delhi a Siamsinpawlpi makaite’n Dy.Commissioner of Police(DCP) tawh kihouna nei in FIR pen ahiding bangtak a paisak dingin ngen uhi.

Thiltung tawh kisai in Delhi Women Commission makai Barkha Singh leh Bina Laksmi Nepram te’n numei naupang pen munkhat ah counselling neihpih in kemlel uhi. Victim pen Paite mi ahihdungzui in YPA heutu Dorothy Nem telin maban panlak dingdan ngaihtuah uh a, compensation leng ngaihtuah sak hiding chi uhi.

Vasant Vihar DCP BS Jaiswal room ah YPA leh ZYA heutute tawh kihouna om a, DCP in FIR number 98/14 file a omta ahihdan gen a, India Penal Code section 363, 366A, 376 (2i), 342, 509, 323, 3 SC/ST Act leh 3 of POSCO pansan a file hi’n gen hi. Aman a genbehna ah huai case a muanmawhpa CCTV footage ah chiangtak a kimu thei hi’n gen a, tunung ni 20 sung ngeia chargesheet hihfel dinga genkawm in DNA leh test tuamtuam om ding hi’n gen hi. Mat a ompa Police –te’n custody ah koih lel lai a, court in a mawhpaih leh damsung jail tang thei ding hi’n kigen hi.

Class X & XII exam ding student-te thumsakna om
Lamka, Feb-9: Khangthah Zuun Pawl (KZP) Gen HQ sainai in tuni sunnung dak 1:00 in Simveng a SYO Hall ah Board of Secondary Education Manipur(BSEM) nuaia Class X/HSLC examna a tel dingte leh Council of Hr Sec Education Manipur(COHSEM) saina a Class XII/HSE examna a tel ding student-te Rev Dr Jacky Simte, Suptd Manipur Dist (AGEI) in thumsak hi. Huai hun ah S.Liankholal, Principal St Paul’s Institute; T.Thangliansiam, Chairman Education Foundation, KZP leh T.Dongzalian Simte, President STC HQ te’n student-te hasotna thugen uh a, KZP member BSEM nuaia Class X examna ding ah candidate 60 leh COHSEM saina a Class XII examna ding ah mi 35 tel ding uhi.

Rev Dr Jacky Simte in a genna ah class X zillai in ngaihzawng neite’n khen haksa-sa mahmah uh a, kuama’n ngaihzawng nei nailou phot dingin student-te thuhilh hi.Student te’n thilhih khempeuhte ah nu-le-pa ban ah Pathian kipakna ding hiam? chih ki- etthak poimawh hi’n gen a, midangte’n laisimna hun ni 1 in dakkal 8 a piaktheih ualeh huai sanga leng sawtzaw piaktheih hi’n gen a, laisim lai in tup neih tinten a, huai lawhchinna dingin kuhkal, chihtak leh Pathian thei kawma pangding in student-te hasuan hi.

T.Dongzalian Simte in agenna ah student te’n i rights kia theilou in i duty leng theih ngai hi’n gen hi. Duty theilou a, i duty louhpi i sepkhak chiangin buaina tuntu hi’n gen a, examna ah pass-na dingkia a laisimlou in siam taktakna dinga kuapeuh in laisim ding in hasuan hi. Midangte lak ah Chief Guest apan theihna dingin kum 5 sung nu-le-pa kiangah hoihtaka kikhum a, laisim tou charchar ding in student-te hasuan a, kum 5 sung kidekzou kawm a lai hoihtaka simte nam leh gam makai ding, officer liantak hong hidingte hi’n gen hi. Student te’ numei-pasal kuapeuh kicheina uanglua zanglou a, TV a fashion show peuh kuaman zuilou dingin leng hasuan hi.

S.Liankholal in a genna ah student te’ exam kuan a ihmut khamtaka ihmut hit-hit ding, exam 1st day ni in kuamah late mailou in a baihthei lam a exam centre tungchiat ding in thuhilh hi. Exam hall ah question paper-te aveka ensuak phot a, theihhoih penpen amasapen a dawnna piakding ahih banah time management leng poimawh mahmah hi’n gen a, question teng dawn zawhnung a hun a omlai leh answer gelhsa teng 1vei velthak ding in hasuan hi.

T.Thangliansiam in agenna ah midangte’n nangmah laisim ding honsim sakthei lou a, laisimna ah lungkiat hun ah leng pangteitei ding, huaite mah atawp a mi lawhching hi’n gen hi. Nu-le-pa te’n mahni tate laisim hun ah hoihtaka etkol ngeingei ding hi’n leng gen hi.

Feb 16 &23 in SSC exam om ding
Lamka, Feb-9: Staff Selection Commission (SSC) saina in Feb 16 & 23, 2014 in Multi Tasking (Non Technical) Staff semding lakna din Matriculate/Class X Level Examination om ding a, Lamka a exam centre ah leng exam om ding hi. Feb 16,2014 in CCpur dist apan morning & evening shift ah candidate 550 vel om a, amau CCpur govt college ah exam ding uh a, Feb 23, 2014 in morning & evening shift ah candidate 513 vel om hi. Morning shift zinglam dak 10:00-12:00 sung hiding a, evening shift sunnung dak 2:00-4:00 hiding hi.

Lamka ah ‘ Zomi Nam Ni’
Lamka, Feb-9: Hiangtam Lamka a YPA Gen HQ Hall ah Feb 20 in Zogam Artists' Association (ZAA)-te saina in Zomi Nam Ni 2014 lopna om ding hi. Huai hun ah Live Concert leng on ding a, Cpur district sunga lasiam tuamtuamte’n aban-ban in lasa ding uhi.

Vety Aid Camp-cum-Mass Vaccination
Lamka, Feb-9: Directorate of Vety & AH services nuaia Animal Disease Monitoring & Surveilance Unit saina in Feb 6, 214 in Tangnuam khua ah ganvulh tamtak natna tuamtuam akipan kivenna ding ‘Vety Aid Camp-cum-Fee Mass Vaccination campaign om a, huai ah district Vety office tawh kithuah in ganvulh tuamtuam 45 enkol uhi. Huai ah ganvulh 28 vel damdoi a nek ding uh bikhiah(prescribed) hi a, ui-hai dalna damdoi in ui 65 kap(vaccinated) hi a,bawng leh ganvulh dang 75 vel BQ,HS leh FMD damdoi akap hi uhi.Huailou in swine fever dalna damdoi in vok 65 vel mah kap in om chihthu kiza hi.

Tuisa a kibuak kha naungek liam
Lamka, Feb-9: Manhoihkim (1yr) d/o John of Gangte Veng tuni’n tuisa a kibuak kha a khe leh anuailam liam a, Letgunthang (1yr) s/o Letkhopau of L Phaimol zan zinglam in tuisa a kibuak kha in a khut langnih liam a, amaute hospital a etkol hi uhi.

GZA khawmpi 2veina om ding
Lamka, Feb-9: Global Zomi Alliance(GZA) in Tedim khawpi ah March 13-17, 2014 sung GZA Khawmpi 2veina nei ding uhi. GZA khawmpi Nov 14-17, 2013 sung neih dinga programme abawl uh himahleh (late) Rev. Dr. ChinDo Kham tungthu a buaina om ziakin ahun kisuan hi. Huai hunah kum 2014 a Burma Census tawh kisai kikup pipen in nei ding uh a, Tedim-GZA Committee in huai hunzatna adin kisakhol lel uhi.

Zomi Nam Ni lopna om ding
Lamka, Feb-9:Thanlon sub-divn sung Phaijang area a Pangen Community Hall ah Feb 20, 2014 in Zomi Nam Ni 66veina lopna om ding a, Chief Guest in Genneikhup,EM/ADCC pang ding hi. Huai ah Guest of Honour in Goulal,MLA’ nominee Thanlon A/C pang ding a,Chief Host in Haupi, Chief of Tuikumuallum pang ding hi.Functional President in Jangpu, Chief of Muntha;H. Sawnthang,Chief of Chongmun(Nungba Sub-divn) leh Soia, President, GTU Gen HQ pang ding hi.

Sunhun in Chief Guest in Zomi Nam Ni suangphuh hong ding a,football final kidemna in zui ding hi. Huaizawh in mipi ankuang luina leng om ding hi.Nitak kikhopna ah khualliante akipan thugenna leh item tuamtuam zat hiding a,programme zawh in Musical Nite om ding hi.

Burma Census 2014 om ding
Lamka, Feb-9: Burma gamsung a ethnic group tuamtuamte telin Burma gama mihing omzah kisimpina March 30-10 April 2014 sung om ding hi. Nation-wide census sai dingin school teacher 100,000 vel zat hiding uh chih hi a, tulelin ethnic group 135 vel om hi. Census code- 914 pen ‘Zomi’ hi a, code- 401 pen ‘Chin’ hiding a,code- 101 pen ‘Kachin’,code- 201 pen ‘Kaya’, code -301 pen ‘Kayin’, code 501- pen ‘Myanmar’,code- 601 pen ‘Mon’, code-701 pen ‘Rakhine’,code- 801 pen’ Shan’ leh code-901 pen gamdangmite kigelhlut theihna code hiding hi.

IMPHAL NEWS
Bank-te dakkal 48 strike ding
Imphal, Feb-9: United Forum of Bank Unions apan ngetna om ziakin Feb 10, 2014 akipan
Dakkal 48 sung All India Bank Strike om ding chi’n Manipur State Committee of Banks Union thusuak om hi. Huaiziakin nationalized banks, public sector banks, rural banks leh private banks a employee leh officer teng MG Avenue a SBI, Imphal branch kong ah zinglam dak 9.30 akipan sunnung dak 2.00 tan sit-in-ptotest tung ding uhi. Thusuak in a gendan in lawh pung(wage revision) ding ngetna a kiphinna om ding ahih ziakin Manipur a bank om teng Feb 10 & 11, 2014 in kikhak ding chih ahi hi.

Dy. CM in Press-te kimuhpih
Imphal, Feb-9 : Dy. Chief Minister Gaikhangam in tuni’n Babupara a official residence ah Press-te kimuhpih a, zan a BJP Prime Ministerial candidate Narendra Modi in Manipur hongphak sunga buaina omlouh ziakin kipahthu gen a, DGP telin security te’n venbitna hoihtak a piakna tung uah kipahhuai sakthu gen hi. Modi in Manipur a hong phaktheih Congress-te ziak hidan in gen a, BJP-te tup ahihleh ‘one nation, one religion leh one law’ ahi chi hi. Aman a genzelna ah kum 2012 in filmstar Hema Malini in BJP adin Manipur ah vote campaign hong nei a, tua kum in BJP candidate kuamah telching hilou a, tua ziakin Narendra Modi ziakin Congress niamkiak tuanlou ding chi hi. Delhi a Northeast mite thuakna tawh kisai in state govt in akinlam in Delhi CM Arvind Kejriwal kimuhpih ding hi’n gen a, tua banah President leh Prime Minister kiang ah Manipur mite humbit dinga nget hiding, chi hi. (UNA)

Handgrenade 1 kimu khia
Imphal, Feb-9 : Imphal West district sung a Khagempali Pankha a om Merchant Navy a sem Potsangbam Devan (50) s/o P. Manikchand tenna inn huangsung ah tuni zinglam dak 10:30 velin meltheihlouhte’n akoih uh handgrenade khat muhkhiak in om hi. Huai handgrenade bel helpawl kuate hiam in a paihlut uh hidia gintak hi a, bangtanhiam nungin police ten vala khia in muntuam ah hihsia(defused) uhi.

NE mite tunga gamtatna mawhpaih
Imphal, Feb-9 : Akhil Bharatiya Vidyarthi Parishad (ABVP) Manipur te’n Delhi a om Northeast mite tunga thangtatna leh bawlsiatna thiltung sekte ziaka lungkimlouh latsakna in tuni’n Nagamapal a Traffic point kiangah kiphinna nei uhi. Huai hun ahABVP Secretary Narendra Sapam in Delhi i chih misualte ading a munpi tawh kibang hidan in gen hi. Aman a genbehna ah Northeast mi tamtakin zilna sangzaw delhin Delhi zuan uh a, himahleh amaute India mi banga bawl hilou uh a, ut dandan a soisak sawm pawl om hi’n gen hi. Tuni tan in leng Northest mite thuak gige lai uh, chi hi.

Zanzek in Arunachal state apan Nido vuaklup in om a, tua thu veng nailou in zan in numei naupang kum 14 vel mi sualluih in om hi. Hiai tungtang ah Central govt in mawhna neite tunga action kichiantak a laklouh ziak hi’n gen a, ABVP in hibang Northeast mite tung a gamtatna naktak in mawhpaih a, maban ah hibanga om nawnlouh deihthu gen hi.

National Rally a teldin mi 15 kuan
Imphal, Feb-9: All India Student’s Federation(AISF) Manipur State Council a State Finance Secretary makaihna in member 15 in tuni’n Imphal nusia in Delhi ah zin uh a, Feb 11, 2014 in Parliament House konga National Rally ah vatel ding uhi. KG classes akipan PG level tan common & free education phutna banah privatization deihlouh banah Inbdia gama khawpi(metro cities) tuamtuam ah Northeast mite bawlsiatna mawhpaihna leh numeite bitna ding tangkoupih kawm in National Rally ah state tuamtuam akipan Federation a palai tamtak tel ding uh chihthu om hi.

Tuni in Bikers rally om
Imphal, Feb-9 : Royal Riders Manipur (RRM) te saina in tuni’n ‘Bike Rally against Racial Discrimination’ chih thupi a zangin Bike Rally om hi. Royal Riders Manipur- te office, Meitei Langol complex mun ah Royal Enfield 50 vel ding khahkhiak hi uh a, amau Imphal khawpi sung mun tuamtuam tawn in taikual uh a, tuazawh in Thangal Bazar ah program zang uhi. Huai hun ah racial discrimination tawh kisai lahna om uhi.

Manipur Governor-lui Burney si
Imphal, Feb-9: IAS officer(retired ) banah Masnipur leh state tuamtuam a Governor aleng pang SMH Burney(90) a taksa upat tak banah natna tuamtuam ziakin Feb 7, 2014 nitak in New Delhi ah si hi. SMH Burney bel IAS officer(Orissa cadre) hi a, huai state ah Chief Secretary dinmun tanpha len hi. A pension nungin Himachal Pradesh, Haryana, Manipur leh Northeast state khenkhat ah Governor in leng pang a,kum 1990-1995 sung Delhi a Jamia Millia Islamia University ah Chancellor in leng pang hi.Aman kum 1988-1992 sung Fourth & Fifth Minority Commissions ah Chairman hihna len hi.