Govt hoihlou leh corrupt hileleng BJP in bawlhoih ding-Narendra Modi, BJP in Imphal ah Lok Sabha election adia campaign pan
Imphal, Feb-8: BJP in Northeast ah Lok Sabha election adia campaign masapen ding tuni’n Imphal ah pan uh a, BJP Prime Ministerial candidate banah Gujarat Chief Minister Narendra Modi in campaign patna ding kawmin Langjing Achouba ground a mipi tamtak kikhopna ah thugen a, aman Congress makaihna centre a UPA govt leh Manipur state govt naktakin soisel hi. Aman a thugenna ah Northeast bial ah helna(insurgency),vaihawmna hoihlou, nekguk takgukna(corruption), sepna neilou tamtak omte leh sum-le-pai thanghuai taka zat ahih ziakin gamsung khantouhna dinmun keniam hi’n gen a, BJP in Centre ah vaihawmna a let aleh govt siangthou, vaihawmna hoih leh diktat banah corruption tellou bawlkhiak hiding chi’n gen hi.

Narendra Modi in tuni zinglam dak 10.50 velin special flight in Imphal a Tulihal Airport Hong bawh a, huai apan Langjing Achouba ground a mipi kikhopna mun tan private Helicopter in pawtung hi. Aman a genzelna ah Manipur gam leitang, mipite leh Manipur culture ngaisang mahmah ahihdan gen a, Indiqn culture leng Manipuri lam(dance) tellou in bukimlou hi’n gen hi.Sports lam ah leng hockey, football, boxing leh archery adin leng akipatna(birth house) Manipur hi’n gen hi.

BJP in govt a bawlkhiak leh Manipur ah sports lama lunglutte adin panla ding a,Imphal-Jiribam lamlian leh Imphal-Dimapur lamlian leng poimawh ahih dungzui in ngaih poimawh masakpen hiding chi’n Modi in gen hi.Manipur a sepna neilou tamtak omte leh corruption ngaih poimawhhuai sakthu leng gen a,bio-diversity leh mineral resources omte zatsiam hileh mi tamtakin sepna mu ding chi’n leng gen hi. Border fencing tungtang leh drug tawh kisai leng thil serious tak hi a,Centre leh Manipur state govt pangkhawm a panlak ngai hi’n gen hi.

Huailou in Manipur a women police 200 zel kum 2 sung Gujarat ah deputation dan in laklut theih hiding a, huai tungtawn in sepna neilou tamtak sepna ngahsak thei ding chi hi.

BJP Prime Ministerial candidate Modi in AB Vajpayee makaihna NDA govt in kum 2001 in Northeast adia thil thupi leh manpha tamtak a sepkhiakte taklang kawm in aman Prime Minister hihna a let aleh Northeast bial puahna dinga Prime Minister-lui Vajpayee in a patkhiak development scheme leh project tuamtuam tamtakte sunzom ding hi’n gen hi. Huailou in BJP in govt a bawl leh black money gamdanga tamtak omkhiate India gam ah kaihlut teitei hiding chi’n leng gen hi.
.
Mipite’ govt bawl dinga hunlem pe dia ngenkawmin huai hileh kha 6 sung lelin leng kikhen lamdangna(chance) om ngei ding hi’n gen a, thil bawlhoihna ding in kum 5 sung leng hun mahmah ding hi’n gen hi. Aman a thugen tawpkuan in mipite’n ni 100 sung lel haksatna thuaklai ding uh a, huaizawh in BJP vaihawmna nuai ah mipi adia hunhoih leh nuam hong kipan ding chi’n gen hi. Narendra Modi in campaign a thu a genzawh sunning dak 12.50 velin election campaign hundang a tel dingin Guwahati zuan in lengkhia hi.

Suangsiboh kiang a om Tongdam khua honkhiak in om
Lamka, Feb-8: Thingkangphai kipan gamlalou Suangsiboh Machet kichi khaw thak ‘Tongdam village’ tuni sunma deuh in Health Minister Phungzathang Tonsing in khuallian a pang in honkhiak banah Tongdam village memorial stone(suangphuh) leng hong a, Rev Awnkhankhup, ex-Moderator, ZPCS in thumna in lan hi. Huai hun ah Functional President in M. Ginsuanhau Zou, MLA pang a, Guest of Honour in Manglianthang, President UZO leh Chief Host in Langkhanpau Guite, Chairman,ADC/CCpur pang hi.

Chief Guest in a thugenna ah nam makaite’n vision hoihtak nei a Zomi ana paipih uh tuni chiangin lawhching touzel hi’n gen a, tuni a kihongkhia Tongdam masawnna ding leh bubitna dinga hausa in ngetna abawlte makaite tawh kikum in panlakpih dingin chiam hi. Tongdam village pen mi-le-sate adia kingakna tham ching hidingin deihsakthu gen a, tukum tuktui luanma in Tedim road leh Tongdam village kizopna lampi blacktopping a bawlsak ding hi’n gen hi. Chief Guest in ZYA ading football leh volleyball banah khawsung a inn 30 omte ading thousilen khat chiat pia a, siatni-phatni a zat dingin tarpaulin khat leng pia hi.

Functional President in Lamka ah Zoute tamtak omta hi’n gen a, tuni a Tongdam khua kihong thaka khawmite kituahna dingin saptuam lamte leng biakinn khat a kikhawm dingin hasuan hi. Khawthak sat theihna dinga panlate kipahpih kawm in masawnna hi’n gen a, hausapa puansan silhsak in mipite adingin tarpaulin pia hi. Chief Host in khawvel a poimawh kituahna leh kilainatna hi’n gen a, Pathian tawh tonkhawm in tengkhawm lehang khawnuam hiding chi hi. Tongdam village adia JB School ngetna tawh kisai makaite tawh etkhawm hiding chi’n gen hi.
Tuni a hun zatna ah H. Mangchinkhup, EM/ADC; M. Gouzamang Guite, EM/ADC; Tongkai Baite, MDC; Mannuamching, CEO/ADC leh mituam tuam in Special Guests hikawm in uap uh a, programme zatzawh in mipi ankuang luina leng om hi.

Lamka nungaknou khat sualluih(rape) ziakin Delhi sousang
Lamka, Feb-8: Zan nitak dak 10.30 velin Delhi khawpi sunga Munirka veng ah Lamka mi nungaknou kumchinglou khat sualluih in om hi. Thu kizadanin innsung van poimawh lei dinga pawtkhia numei naupang kum 14 vel mi khat HYGEA Hospital (Daya Hospital) kianga Pharmacy kong ah pasal khat in mantang in room awng(vacant) khat a lutpih in sual(rape) chih hi. Numei sualluih ahihnung in amai(cheek & chin) liam a, huailou in a private part tanpha liam in Safdarjung Hospital, New Delhi ah medical test bawl hi a, etkol in omlel hi.

Thiltung in Northeast mite thang paisak mahmah in tuni’n JNU student-te’ makaihna in Vasant Vihar police station kongah kiphin uh a, Munirka tawh JNU kikal lampi Vasant Kunj lam zotna mun tunitak tan in leng kikhak(close) hial in kiphin pawlte lampi ah pumdim uhi. Huai kiphinna ah NE mite chihlouh Delhi a Vaite student tamtak leng tel uh a, Northeast akipan student tamtak kiphinte ziakin hiaithu sutkhiak ahihtan in Delhi sousang mahmah lai a, mi tamkhop in numei sualtu tenna inn manawh uhi.
Tuabang kalah numei rape-tupa ahihleh a innluahna uh neipa’ tapa hi a, Vasant Vihar police station ah Protection of Children from Sexual Offences (POCSO) Act nuaia FIR register ahihnungin muanmawh a om Vicky kichi Police te’n mankhia uhi.

Financial Assistance hawmkhia
Lamka, Feb 8: Health Minister Phungzathang Tonsing tuni nitaklam in a tenna inn ah BPL family atel natna tuamtuam ziaka Hospital a om mi hunkhop ‘Manipur State Illness Assistance Fund’ nuai a financial assistance ngente laka 2nd batch mi 51 telkhiatte lak ah Langkhanpau Guite,Chairman, ADC/CCpur tawh kithuah in panpihna sum(cheque in) pekhia hi.
Health Minister in Manipur State Illness Assistance Fund kichi Congress govt in a bawlkhiat ahihdan gen hi. Chairman,ADC in in agenna ah Minister hahpanna ziak in Manipur State Illness Assistance Fund kichi omthei hi’n gen a, panpihna ngahte’n damna ngah a, damlouhna ziaka govt apan pahpihna mu nawnlou din deihsakthu gen hi.

Passing-out Parade ah BSF Jawan 329 tel uh
Lamka, Feb-8: STC/BSF a Jawan training zouthak mi 329 in tuni zinglam in Passing-out Parade nei uh a, Batch No.213 & 214 akipan training zouthakte’ Baljit Sing Kasana, PMG, DIG, SFF, STC/BSF Ccpur ma ah kichiam kawm uhi. Training zouthakte’n passing-out parade a neihna uah DIG in salute la a, amaute gam adia nasem nuam a kichiam hi un BSF thusuakin gen hi. Tulelin STC/BSF Ccpur akipan batch 212 in training zoukhia uh a, huaite lakah State Armed Police Constable telin sepaih 41,244 hi uhi.

Youth Conference-cum- Music Festival
Lamka, Feb 8: Evangelical Churches Assn (ECA) a Youth & Music Committee, ECA, ECCI saina in K.Salbung a ECA Compound ah Feb 6, 2014 nitak in Youth Conferenece-cum- Music Festival 2014" kipan a, Rev Jangkholam, Executive Director ,ECA in hong hi. Conference ah Rev. Dr. H.M Songate, former Executive Director, NEICORD in Pathian thu gen a, devotion hun ah Rev. Dr .T.J Haokip, Registrar, ECT leh Rev. Lalboy Haokip, Academic Dean, JM Bible College te’n makai uhi. Zan sun in outdoor games nei uh a, kidemna tuamtuam om hi. Feb 9, 2014 zing kikhop zawh in Seminar omding a, Upa J. Lhungdim, IDAS, Planning Adviser, NEC in sinsak ding hi. Nitak mipi kikhop tawp in Youth & Music Committee makaih in closing ceremony omding a, Upa S.Khaikholam, Chairman, ECA in thumna in hun khak ding hi.

Block 6 ah JNV selection test om
xLamka, Feb 8: JNV/Tuinom ah academic session 2014 akipan Class VI zil ding lakna ding in tuni in block 6 ah selection test om hi. CCpur block apan candiate te'n New Lamka a Rayburn H/S ah exam uh a, huai ah candidate 633 present uhi. Henglep block ah candidate 107 te'n Vumhao Govt H/S,Tuilaphai ah exam uh a, Singngat block a candidate 54 te'n Singngat govt H/S ah exam uhi. Thanlon block ah candidate 32 te’n Thanlon govt H/S ah exam uh a, Tipaimukh block ah candidate 82 te’n Parbung govt H/S ah exam uh a, Samulamlan block ah candidate 152 te'n INA Memorial H/S ah exam uhi.

Public Ambulance service thak
Lamka, Feb-8: Vunglam Ngaihte of Lamlian Veng, Bungmual in damlouhna tawh kisai emergency thil a public zat theih ding Ambulance service a patkhiak thak tuni’n Rev. S. Vung Minthang, General Secy, EBC in Pathian min in latna nei hi. Vunglam Ngaihte in kumlui apan JSSK /Dist. Hospital tawh kizom in M.L. Ambulance Service(Pvt) kichi ana pankhia a, tuni a gari thak bel public in a poimawh hun un samthei ding uhi. Huai Ambulance sungah Oxygen telin thil tuamtuam kikoih a, Contact No. 9615222348 tungtawn in sap theih ding hi’n kigen hi.

NABARD’ Finance Literacy Awareness
Lamka, Feb-8: National Bank for Agriculture and Rural Development (NABARD) pawlin “Financial Literacy Awareness Camp-2014” a neih uh sunzom zelin Gangpimuol community hall ah tuni’n nei nawn uh a, K.S. Guite, AGM(DDM); Letkholen Haokip, Financial Advisor; leh Joy Singh te’n thupi tuamtuam zangin mipi paikhawmte sinsak uhi.

Mauzum in dawtliam
Lamka, Feb-8: Thanlon sub-divn sunga Tuipiphai village ah zan sun in louvat lai Nangliensang (48) s/o Kamkham in mau asat dek pen kipik in a taltang dawtkha a, amit kikal a dawtkha in liam hi. Huaiphet in khua phawklou a, aloukuanpihte’n khawsung mite hilh uh a, tuzing dak 6.00 velin Tuipiphai akipan Leijangphai tun uh a, huai akipan DI Tata a hong kipua in sun dak 2.00 velin dist hospital ah admit in om hi.

Awareness Program on Drugs & its Law
Lamka, Feb 8: Narcotics Control Bureau, Imphal Sub-Zone saina in Feb 10, 2014 zinglam dak 10:00 in Rayburn College ah “One Day Awareness Program on Drugs and its Laws” om ding hi. Huai ah K.V. Robinson Gangte, SP, NCP; Aram Anth, Investigation Officer (IO), NCB; Samuel C.Hangzo, IO, NCB leh Lalkhogin Bulte, IO, NCB te’n sinsak ding uhi.

Chairman,ADC in suunthu puang
Pauneikhai,ex-Minister damlou in si
Lamka, Feb-8: Pauneikhai(93),ex-Minister & f/o S.Minlianthang,IAS of Tuibuong taksa upat tak banah teknat ziakin tuni sunning dak 1.00 in si a, Tuibuon hanmual ah Feb 9, 2014 in kivui ding hi.(A tanchin tomkim page 2na ah kisuah hi).
Langkhanpau Guite, Chairman/ADC apan kizadan in heutu masate banah 1st Chairman, ADC/CCpur (1973-75) T. Goukhenpau (86) s/o (late) T. Sinpum of Vengnuam, New Lamka in Dec 22, 2013 in hon sihsan a, 3rd Chairman ADC/CCpur (1976-77) Pauneikhai in tuni a hong nutsiatna tung ah ADC/CCpur sik-le-tangin suunthu puang a, nam leh gam adia manna(loss) thupitak hi’n gen hi. Heutu masate’n a nutsiat uh azi-leh-tate uleh innkuante Pathian in khamuanna pia a, heutu masa site akha uh Pathian kiangah tawldam taka omchiat dingin deihsakthu puang hi.

IMPHAL NEWS
Third Integrating BIMSTEC 2014 om
Imphal, Feb-8 : Indian Chamber of Commerce saina in tuni’n Imphal a Classic Hotel ah ‘Integrating Bengal Initiative for Multi-Sectoral Technical and Economic Co-operation (BIMSTEC) 2014’ kichi om hi. Tuni nitaklam in Chief Miniser O. Ibobi khuallian a pang in uap hi. BIMSTEC kichi bel ASEAN leh SARRC tawh ki-link hi a BIMSTEC in South Asia leh Southeast Asia gamte trade leh commerce, religion leh language in kaikhawm a, huaiziakin hiai BIMSTEC kichi ‘Look West Policy of Thailand leh Look East policy of India tungtawn a patkhiak a om leng ahi hi. Tuni a BIMSTEC tawh kisai hunzatna a 3veina ahi hi.
Tuni zinglam a hun zatna ah Chief Guest in Chief Secretary PC Lawmkunga,IAS pang hi. Tua ah Indian resident Mission & Economist Ms Kavita Iyengar of Asian Development Bank; Chairman Dr. Jayantha Dias Samarasinghe of Sri Lanka Council of Agricultural Research Police; Principal Secretary PW Ingty of Ministry of External Affairs te’n leng thugen uhi.

Helpawlte’n attack : A/R 1 si
Imphal, Feb-8: Ukhrul district a Nambisha village ah tuni zingsang in 44-Assam Rifles team khat patrolling pailai meltheihlouh helpawlte’n bomb zangin attack uh a, galvan hoihtak tawh leng kap uh hi’n thusuak in gen hi. Huai ah Rifleman KK Mehta (Army No. 3201173) liam a, Leimakhong a Military Hospital puaktung himahleh damzoulou in si a, A/R jawan dang 2 leng liam hi’n kigen hi. Assam Rifles pawlin kapthuk in bangtanhiam kikap tuah uh a, sawtlou nungin helpawlte’n huaimun taikhiaksan uh hi’n kigen hi. Tuni a thiltung RPF pawlin amau thilhih hidan in puang uh chihthu om hi.

URF te bandh in hindan nawngkaisak

Imphal, Feb-8 : BJP Prime Ministerial candidate Narendra Modi in tuni a Manipur a hongphak tawh kiton in United Revolutionary Front (URF) pawlin tuni zingsang dak 5:00 akipan dakkal 11 sung Manipur ah general strike puang uhi. Tua ziakin Imphal khawpi tawh kikawmtuah a tai passenger gari tai omlouh banah Imphal khawpi sung ah leng gari tai muh ding tawm mahmah a, hindan ngeina nasatak in nawngkaisak hi. Imphal khawpi sung a market leh school tamzaw kikhak a, khawpi sungah mi muh ding leng tawm mahmah hi.

Anti Racial Discrimination Law
Imphal, Feb-8: Delhi khawpi leh India gamsung mun tuamtuam ah Northeast mite bawlsiat ahih ban uah numeite kilawmlou leh mualphou taka soisak ahih sek un lungkimlou in AMSU pawlin ‘Anti Racial Discrimination Law’ bawlkhe ding a Centre nawhna kawm in .movement khat patkhiak sawm uh hi’n kigen hi. AMSU General Secy in tuni’n DM College Campus ah a gendan in Arunachal MLA’ tapa Nido Tania thah ahih banah Delhi ah Manipuri numei 2 soisak hi a, zan nitakin Vasant Bihar Police Station a Munirka area ah kum 14 a upa numei khat pawngsual ahih ziakin mainland India ah Northeast mite muhsit a om taktak uh ahihdan kichian mahmah hi’n gen hi. Huaiziakin Centre in Anti Racial Discrimination Law bawlkhe dinga phutna in AMSU in movement pan ding a, Feb 10,2014(Sepnawnni) in Keishampat ah zinglam dak 10:00 akipan nitaklam dak 3:00 tan sit-in-protest om ding hi’n puang uh a, huai ah communities tuamtuam akipan mipi leh organization tuamtuam tel dingin chial uhi.

Feb 9 in Bike rally om ding
Imphal, Feb-8 : Royal Riders Manipur-te saina in Feb. 9, 2014 in ‘Bikers against Racial Discrimination’ chih thupi pansan in Bike Rally om ding hi. Huai rally bel Royal Riders Manipur –te’ office Meitei Langol mun ah khahkhiak(flag-off) hi ding hi. Huchibang rally mah Northeast pumpi ah om ding hidan inleng kigen hi.