Addl DC/CCpur in free text book hawmna hun uap
Lamka, Feb-7: Nghathal a Siamsinpawlpi(SSPP) Residential school ah tuni zinglam in Class I-VIII student-te lakah Free Text book hawmkhiakna om a, Maniram Sharma, IAS, Addl DC/CCpur khuallian apang in student-te lak ah hawmkhia a,huai ah SSPP Gen HQ makaite ban ah School Managing Board te’n uap uhi.

Maniram Sharma in a genna ah amah leng a neulai a school kaihun in Students’ Union-te akipan free text book sangzel hi’n gen a, laibu kichi ei hong sinsak teacher-te bang a ngaihding ahi chi a genkawm in a laibu zatte lawm, nu-le-pa leh guide dia a zatziak in tu a a dinmun tungthei hi’n gen hi. Student-te’n kuhkal, chitak leh tupguh neikawm in lai sim le uh tunung in kuapeuh officer liantak tungthei uh hi’n leng gen a, , huai dingin student te’n kuhkal taka laisim dingin hasuan hi.

Siamnunlian Valte, Chairman, SSPP Residential school managing board in kum 1988 in SSPP school patkhiak hi a, huai hunlai in SSPP non-residential school chih minvuah in om a, mi phatuamngaite ban ah Ministry of Tribal Affairs, Govt of India akipan huhna tungtawn in Residential school a kikhek hi’n gen hi. Aman a genbehna ah kum 2013 in SSPP residential school a student-te BSEM saina a Class X/HSLC examna ah SSPP Residential school min in tel uh a, tukum inl eng student 27 tel ding uh hi’n gen hi. Lianzapau Samte, President ,SSPP Gen HQ in a genna ah tunung a gam adia nu-le-pa ding student te’n hoihtaka lai sim dingin hasuan a, free text book kihawmkhiate mawk a koihdap mailou in , asung a kigelhte hoihtaka sim a theichian ding khopa laisim din student-te hasuan hi.

Nupi khat mehzuak a tulai kipuk in si
Lamka, Feb-7: Mrs. Themkhoneng(38) w/o Hemkholen Haokip of Matejang village (Torbung khawkiang) in New Bazar ah meh zuaka tulai tuni zingsang dak 7.00 velin kipuk in khua phawklou a, etkol manlouh in si chihthu om hi. Phatuam ngai pawlkhat in Hospital ah siluang va koih uh a, KKL ambulance zangin akhua uh puaktung a om hi’n kigen hi.

Mrs. Themkhoneng in nidang in heart case(lungtang natna) chikhat nei a, huai ziakin kum 3 vel apan ki-enkol a, tuma deuh akipan bangmah haksatna nei nawnlou a, normal a kisak ziakin doctor vanaih nawnlou phot uh hi’n a pasal in gen hi. Tuzing a thiltung pen BP stroke (heart-fail) ziak hidingin gintak huai hi’n kigen hi.

Mrs Themkhoneng in tuni zingsang dak 6.00 velin Matejang khua akipan vatawt(duck) leh zongtah tamkhop zuak ding a hong pawtou in New Bazar a a tutna munah huaite zuak a, sawtlou a tut nungin kipuk a si hi’n kigen hi. A innkuante gendanin zan nitakin bangmah chilou a, innkuan kikhopna leng nei in halh mahmah chi uhi. Hileleng doctor ava naih nawnlouh ziak ua buaiphut hidin gintakthu gen uhi. Mrs Themkhoneng in a pasal banah tanu 3 leh tapa 2 nusia a, tuni’n Matejang hanmual ah kivui hi.

Numei pawl Bank kongah dharna tu
Lamka, Feb-7: Guta pawlkhat in Feb 4, 2014 nitak in SBI/Tuibuong Branch a bang (wall) khuakvang in luh uh a,hileleng sum koihna(strong room) a hon zawhlouh ziak lel un lawhsam uhi. Huai thu ah Women Welfare Assn. Tuibuong-te makaihna in numei pawlin bank luhte mawhpaihna in tuni zinglam dak 10.00 akipan SBI/Tuibuong Branch a main gate bulah dharna tu uhi.

Rebecca, Secy, Women Welfare Assn. Tuibuong in agenna ah SBI/Tuibuong Branch omna high security zone mun himahleh gutate’n nuamtaka a luhtheih uh lamdang sakthu gen a, SBI/Tuibuong branch building leng side 3 ah 27-Sector Assam Rifles te’n umkhual mahle leng bitzou tuanlou ahihman in SBI/Tuibuong Branch ah security koihding, fencing hoihtak bawlding, main gate ah security post khat koih ding chih telin DC/CCpur; SP/CCpur leh Commander, 27-Sector Assam Rifle ah memorandum pia uhi.

Financial assistance hawmkhe ding
Lamka, Feb-7: BPL family atel natna tuamtuam ziaka Hospital a om hunkhop ‘Manipur State Illness Assistance Fund’ nuai a financial assistance ngente lakah CCpur district akipan 2nd batch dingin mi 51 telkhiat-te lakah Health Minister Phungzathang Tonsing in Feb 8, 2014 nitaklam dak 3:00 in New Lamka a a tenna inn ah panpihna sum cheque in hawmkhe ding hi. Health Minister in CCpur dist a financial assistance ngah 1st bath mi 31 kiang ah Oct 30, 2013 in leng panpihna sum(cheque in) hawmkhia hi.

Manipur Synod Annual Session om
Lamka, Feb-7: Nghathal Presbyterian Church ah zan nitak apan Manipur Presbyterian Church Synod Annual Session 37th veina kipan a, tuni sun in bussiness session om a, Feb 8, 2014 in sunzom lai ding uhi. Mipi kikhopna hun ah Rev Donald Alun in thugen a, Feb 9, 2014 zinglam dak 10:00 in ordination service om ding hi. Annual session leng Feb 9 nitak in zou ding uhi.

1- Day Children’s Home Staff Orientation
Lamka, Feb-7: Manipur Alliance for Children Rights (MACR), CCpur Chapter saina in tuni zinglam dak 11.00 akipan in M. Ramthar khua ah ‘One Day Children's Home(s) Staff Orientation’ om hi. Huai ah Rev. Dr. Nicky Thanga,Convenor MACR leh Pishak Singh, Chairman, Child Welfare Committee, Bishnupur district te’n sinsak uh a, CCpur dist a Children’s Home 16 apan semtu ahunkhop tel uhi.

Exam dingte thumsak ding
Lamka, Feb-7: KZP Gen HQ makaih in tutung a class X & XII exam dingte Feb 9, 2014 sunnung dak 1:00 in SYO Hall, Sim Veng ah Rev Dr Jacky Simte, Suptd Manipur Dist (AGEI) in thumsak ding hi. Huai hun ah S.Liankholal, Principal St Pauls’ Institute; T.Thangliansiam, Chairman Education Foundation, KZP leh T.Dongzalian Simte, President STC HQ te’n thugen ding uhi.

BS Kasana, DIG in salute lading
Lamka, Feb-7: STC/BSF Mualkoi a training lel BSF personnel batch No.213 & 214 te’n training zou uh a, Feb 8, 2014 zinglam dak 8:00 in Passing out Parade neiding uhi. Huai hun ah Sh B.S. Kasana, PMG, DIG, SFF, STC/BSF Mualkoi in training zouthakte apan salute lading a,huai hun ah aman training zouthakte kichiamsak ding hi.

Lamka akipan OC 2 vatel uh
Lamka, Feb-7: Council of Hr Sec Education Manipur(COHSEM) saina in Class VII/HSE examna ding ah Council leh Private Centre tuamtuam a Officer-in-charge(OC) teng meeting om a,huai ah Lamka akipan Associate Prof Lalruoivel Pangamte, OC CCpur Private Centre(A) leh Associate Prof T. Awnzagen,OC CCpur Private Centre(B) vatel uhi. Meeting ah Class XII/HSE examna feltak leh siangthoutaka sai ding tungtang genkhawm uh chihthu om hui.

Block 6 ah JNV Selection Test
Lamka, Feb-7: JNV/Tuinom ah academic session 2014 akipan Class VI zil ding lakna din Feb 8,2014 zinglam dak 11:30 in block 6 ah selection test om ding a,huai ah pasal 634 leh numei 675 kigawm 1309 exam ding uhi.CCpur block apan candidate 882 in Rayburn H/S ah exam ding uh a, .Henglep block ah 107 in Tuilaphai a Vumhao Govt H/S ah exam ding uhi. Singngat block apan candidate 54 in Singngat govt H/S ah exam ding uh a, Thanlon block a 32 in Thanlon govt H/S ah exam ding uhi. Tipaimukh block akipan 82 in in Parbung govt H/S ah exam ding uh a, Samulamlan block a 152 in INA Memorial H/S ah exam ding uhi.

All Manipur Kuki Chiefs Assn.
Lamka, Feb-7: All Manipur Kuki Chiefs Assn, CCpur dist vaipaw thak ding telna tuni zinglam dak 11:00 in Tuibuang V/A Hall ah om a, Chairman in Chinzathang, Chief of Thenjol telching uh a,Vice Chairmen in Thenmang Haokip, Chief of Ukha Luoikhai; Manga Singson, Chief of Songsang; Helkhogin Haokip, Chief of Siden leh Paoneithang, Chief of Theigotang telching uhi. Secretary in Lamkhopao, Chief of Koite; Joint Secy in Lunkhothang Haokip, Chief of L.Khengjang; Finance in Seiminthang, Chief of Ainujang; leh Information in Ngulkhothang, Chief of Tolphei telching uh a,Advisor in Paominlian Mate, Chief of Tuibuang leh Paokholun Haokip, Chief of Lajangphai tel uhi.

*********************************

IMPHAL NEWS
Assembly session ah sitting 6 om ding
Imphal, Feb-7: Manipur Cabinet in Feb 24, 2014 akipan Manipur Assembly session om dinga a thupukna a bawl dungzui un Manipur Governor in leng assembly session om dingin sapna bawl a,huai hun a genkhawm dingte leh Assembly session bangtan om ding hiam chih tawh kisai in tuni’n Assembly Speaker makaihna in Business Advisory Committee(BAC) meeting om hi. Huai ah March 3, 2014 tan Assembly session om ding un thukim uh a, sitting leng ni 6 sung om ding in bikhiah uhi. Sitting om nidingte bel Feb 24,25,26,27,28 & March 3, 214 hiding chih ahi hi.

Modi vaidawn dingin BJP-te kisakhol
Imphal, Feb-7: Gujarat Chief Minister banah BJP Prime Ministerial candidate Narendra Modi in Feb 8, 2014 a Manipur hongphak hun in a thupi theipen a vaidawn ding in BJP Manipur Pradesh-te kisakhol uh a, Imphal Airport kiangah Modi vaidawnna in ‘Welcome Gate’ thupitak bawl uhi. BJP Manipur Pradesh President Th. Chaoba in a gendan in Modi in Northeast India bial ah Manipur hongphak masak a tupna ziak thildang hilou in Northeast biala state tuantualpen(most backward state) ahihban ah corruption thupinapen ahih ziaka mu ut hiding gintakthu gen a,Modi in Prime Minister ahih hun ah Manipur gam tuantual leh corruption thuktak a kigolh bangchi bawlhoih ding hiam chih theinuam a hong enkhe kawm dinga hongzin ding hidia gintakthu gen hi.

MCI team in JNIMS inspection bawl
Imphal, Feb-7: Medical Council of India (MCI) team khat tuni in Imphal hongtung uh a, amau Porompat a om Jawaharlal Nehru Institute of Medical Sciences (JNIMS) ah deptt tuamtuam 7 a Post Graduate Courses honkhiak ding tungtang tawh kisai in thil omdan enkhia uhi. Manipur govt in JNIMS ah Anatomy, Physiology, Biochemistry, Forensic Medicine, Community Medicine, Pharmacology leh Microbiology departments ah post graduate course sinsakna tukum akipan pat lunglut ziakin MCI team 3 in Delhi apan hong enkhia uh a, huaite lakah, Physiology, Biochemistry leh Microbiology Departments a subject experts leng tel uhi.

Railway lampi bawlte lethod bomb in vakap
Imphal, Feb-7: Noney Police Station sung Tupul mun a Railway lampi bawlte Feb. 5 & 6 nitak in meltheihlouh Naga helpawlte hidia gintakte’n lethod bomb 2 in vakap uh chihthu om hi. Huai hun ah Railway lampi bawlna a duty 6th Bn IRB ten ana kapthuk uh a minute 15 vel a kikaptuah nungun helpawlte kihemmang uhi.Huai kikapna ah asi leh liam bel kuamah omlou hi’n kigen hi.

Muanmawhhuaitak in nupi khat si
Imphal, Feb-7 : Thoubal Mathak Leikai a Thoubal River kiangah tuni zingkal in nupi khat kikhailumsa a muhkhiak hi a, amah Sapam Ningol Takkhellambam Ongbi Benita @ Abemma (18) w/o T. Akash @ Nanao (19) of Thoubal Mathak Leikai hi a, a sihna mun leng a pasal tenna inn akipan metres 50 vela gamla hi’n kigen hi.
Police ten Ongbi Benita sihdan lamdangsakthu gen uh a, amah leh amah kithat dan in om mahleh kuate hiam in a thah nung ua kikhailum dan a akoih uh hidin muangmawh uhi. Police te’n misi gil ah avang lianpi leng om hi’n gen uh a, zan nitakin apasal leh a lawmten party nei ua, misi luang omna kimlak ah zu bottle leh nektheih chi tuamtuam om hi. Ongbi Benita leh a pasal akinak ziak un a pasal in a thah nung a alawmte tawh kikhailum dan a koih uh hidin muanmawh thu kigen hi.

Poppy china mun hihsia
Imphal, Feb-7: Narcotics & Affairs of Border (NAB) Manipur in NCB Imphal Sub-zone leh CCpur district police-te tawh kithuah in CCpur district sung Kaihlam tang(hill range) a Bualtang lak ah poppy chiinna gam 35 acres alian a poppy kung omte hihsia uh chihthu om chi’n SP/NAB akipan thusuak in gen hi.

SC in Delhi CM tungthu ngaihtuah
New Delhi, Feb-7: Delhi Chief Minister Arvind Kejriwal in ‘defamation case’ tawh kisai a chouna abawl tungtang ah Supreme Court(SC) in Kejriwal kiangah theihsakna khauhtak pia chih ahi hi.Supreme Court in tuni’n Arvind Kejriwal kiangah theihsakna pia in Delhi High Court in atunga ‘defamation case’ abawl tawh kisai in SC in order abawlsate khawlsak ‘stayed’ phot ahi chi a, hiui thu nguntaka gel detdet ding om chi uhi. Congress leader banah Union Law Minister Kapil Sibal tapa Amit Sibal in Kejriwal tungah ‘defamation case’ file chih ahi. May 15, 2013 a Kejriwal in press conference ah Amit Sibal tungah ngawhna tuamtuam bawl in Vodafone tungthu a thubuai om ah Supreme Court ma ah tua huna Union Communications Minister Kapil Sibal sik-le-tangin a tapa Amit Sibal va kilang daih chi a, huai thu Amit Sibal in zadah mahmah chih hi. Kejriwal in press conference ah ngawhna a bawlte bawlkhial mah hi’n kigen a, huchi kalah court niamzaw leh sangzaw khenkhat in a sap hun in leng kilang utlou in midang sawlzel chihthu om a, tu in Supreme Court in Kejriwal tungthu limtakin etzui sawm chihthu om hi.