GRTCS in District admn tunga lungkimlouh thu puang; Electric gui niamlua ziakin Bus tunga tuanglai hetkhia

Lamka, Feb-6: Paukhankham(19) s/o Thangchinlal of Lungthul (Singngat sub divn) tuni zingsang dak 7:30 velin Sinzawl zuan ‘Wonderland Travels’ kichi Bus tunga tuanglai Kawnpui khawlai ah electric-gui in hetkhia a, damzoulou in si hi’n kigen hi. Huai tungtang ah Guite Road Transport Co-operative Society Ltd (GRTCS) in poisakthu puang uh a, lusunna thuak misi innkuanpihte thuakpihthu puang uhi.

Thusuak kizadan in Paukhankham hihding poimawh a neih ziaka Lamka hongzin hi’n kigen a, tuni zingsang in a khua uh zuanding in Lanva kim lak akipan bus tung ah tuang a, bus malam atu ding a kisalai electric gui niamdeuh a kikhung in hetkha in kia hi’n kigen hi. Zinglam dak 8:00 velin Dist Hospital a Casualty tut hi a, a gimziak in doctor te’n RIMS adi’n zinglam dak 8:30 velin refered uh a, RIMS zuanlai Bishnupur area ah damzoulou in lampi a si hi’n kigen hi. Bus neite’n siluang puandum a tuam in Rs.30,000/- in sigal uh a, gan gawh sikin Rs 5000/- pia in Lungthul(L) tan siluang puakna dingin gari hire sak uh a, thunung thuma omlou ding in kihoulem uh chihthu kiza hi.Siluang tuni sunnung dak 2:30 velin Lungthul (L) khua a vuiding in kipua hi.

GRTCS a Info. Secy K Thuampi apan thutut kingah in a gendan in Lamka leh akim mun tuamtuam ah electric gui, phone gui leh cable gui niam theilua tawh kisai panla ding in Dist. Administration kiang ah CCpur Dist Hills Transports Union min in 2 vei ngetna piak himahleh tunitan sepkhiat taktak a om tuanlouh ziakin GRTCS in thuneitute’n pan a laklouh uh poisa in mawhpaih thu leh khasiat-thu puang uhi. Maban ah Dist admn lam apan ngetna omte hihbuchin ahihtuankei leh Society in electric gui, telephone gui leh cable gui niamluate tawh kisai kul leh poimawh asak bang in panla ding a, hihkhelhkhak a om leleng Dist. heutute’n mawh paw ding uh hi’n taklang hi.

Gari neu(R 15) gutu matkhiak in om
Lamka, Feb-6:Tuibuong Area Youth Club(TAYC) pawlin tuni nitak dak 8:00 velin Tuibuong khawsunga Tedim Road lakah gari(two wheeler) R 15gu khat mankhia uhi. Thusuak kizadan in mi 3 in gari R15 (MN-05B/7292) gu in lampi a tawl lai TAYC te’n thei in a delh ualeh mi 2 taikhe man uh a, khat amun ah mankha uhi. Matkhiak a om Tongminlien Haokip (25) s/o Tongkholen of Kamdou Veng hi a, thuhilhna a neih zawh un police ah pekhia uhi.Police te’n Tongminlien Haokip lawmte kuate hihiam chih suizui kawmin mat a om leh gari leng kem uhi. Lamka khawpi ah kum 2/3 paisa apan gari tamtak adiakin 2 wheelers guk mang hi a, district hospital huangsung akipan in leng gari neu hunkhop gukmang hita a, tualou in zan zek inleng khawpi sung mun tuamtuam apan gari neu abikin Honda Activa hunkhop gukmang in om hi.

Tongdam village honna om ding
Lamka, Feb-6: CCpur sub-divn sung a khawthak ‘Tongdam village’ kichi Feb 8, 2014 zinglam dak 11.00 in Health Minister Phungzathang Tonsing khuallian apang in hong ding a, Rev Awnkhankhup, ex-Moderator,ZPCS in thumna in lan ding hi.Huai hun Functional President in M. Ginsuanhau Zou,MLA pang ding a, Guest of Honour in Manglianthang, President UZO pang ding a, Chief Host in Langkhanpau Guite, Chaimran,ADC/CCpur pang ding hi. Programme zatzawh in ankuang luina in zui ding chih ahi hi.

Cash transaction kipan nawn ding
Lamka, Feb-6: Zanhal nitak in meltheihlouh guta pawlin SBI/Tuibuong Branch Branch Manager’ tutna room a bang (wall) khuakvang in luh uh a, zan nitaklam in bang (wall) a khuakvangna mun Bank te’n hubing uhi. Zan in SBI/Tuibuong staff te’n nasemlou uh a, tuni’n cheque tuamtuam transaction bawl himahleh cash transaction om nailou a, Feb 7, 2014 apan cash transaction kipan nawnding hi’n thusuak kingah hi.

Study Tour di’n mi 2 telkhia
Lamka, Feb-6: Lok Sabha akipan panpihna tungtawn in Manipur a Hr Sec School student mi 20 (pasal 10 leh numei 10) te Feb 11, 2014 in Manipur apan flight(lenna) in New Delhi ah zin ding uhi. Huaite lakah CCpur dist a Rengkai Hr Sec School akipan class XI simlel Miss Rebec Ngamlalmoi leh Lalruotlien telkhiat hi uh a, CCpur dist apan mi 2 mah Khumi, ZEO office in makaih ding a, Delhi ah a omsung un 5 star hotel ah giak ding uh a, Feb 14, 2014 in hongtung kiknawn ding uhi.

Mi 2 kiangah buhpal chii(seed) pia
Lamka, Feb-6: Dist Agri. Officer/CCpur in CCpur dist adia masapen dingin tuni’n Chongboi of Khengjang leh Genlianpau of S.Munnuam kiangah kum 1 sunga double cropping om thei buhpal chii(1st crop) Hybrid kichite pia hi. Buhpal chii(Hybrid) te kg 1 in Rs 260/-man a, buh piangkhia lam pung mahmah hi’n kigen hi. Huailou in DAO/CCpur makaih in Agriculture deptt apan staff 10 in tuni in Mata khua ah kum 1 sunga double cropping omtheihna ding in awareness campaign bawl mahle uh lou(paddy field) neite kuamah buhpal ching ut omlou hi’n DAO/CCpur in gen hi. Aman agenzelna ah Mata area ah Khuga dam canal apan tui hoihtak omziak in kum 1 sungin double cropping omna ding in hoih mahmah hi’n gen a, hileleng tuilou neitu kuamah a utlouh ziak un lamdang leh poisakthu gen hi.

Freedom Fighter-te’ pension sum pia
Lamka, Feb-6: Manipur government nuaia Home deptt, in State Freedom Fighter leh Nupilal Freedom Fighter -e adin kha 1 in mi 1 zel ah Rs 500/-pia a, DC/CCpur in CCpur dist a Freedom Fighter/ Pensioner mi 10 te kiang ah kha 3 (1/10/2013-31/12/2013) ading Rs 1,500/- chiat released hi.

Certificate hawmna leh vaidawnna
Lamka, Feb-6: Delhi ah Jan. 26, 2014 a Republic Day rally ah Rayburn High School NCC cadet numei 2 leh pasal 2 vatel uh a, huaite vaidawnna leh NCC ‘A’ certificate hawmna Feb. 8, 2014 zinglam dak 6:45 in Rayburn H/S campus ah om ding hi. Huai ah Capt. Max Kamminlun, Coy Commander 33 corps, Darjeeling in Chief Guest hihna tawh uap ding hi.

DAPCU employee-te procession pai
Lamka, Feb-6: Dist AIDS Prevention & Control Unit (DAPCU) Employee-te leh NGO te’n tuni zinglam in DAPCU office pan DC/CCpur office tan procession pai uh a, Chief Secretary ading charter of employees Welfare Programme tawh kisai Addl DC/CCpur kiang ah pia uh na, Addl DC in fax tungtawn a thon ding hi’n gen hi. DAPCU staff-te gendan in All India AIDS Control Employees Assn pawlin Central govt ah demand tuamtuam 7 a piaklut uh buchin ahihlouh ziakin Jan 30, 2014 apat All India Level Indefinite Strike kipan a, govt in tunitan bangzah hihbuching lou in AIDS doudalna ah NAPC I-III tan zawh nung NAPC- IV kipan lel ah staff hunkhop govt in paikhia a, hamphatna ding tuamtuam omte leng mulou uh hi’n gen uhi. CCpur Dist ah ART damdoi ne dinga registration kibawl 4800 val lakah mi 1800 val te’n ART damdoi nelel uh a, strike ziakin ART damdoi nete’n genvuallouh haksatna tuak uh hi’n gen uhi.

KMAA in Medal 6 la uh
Lamka, Feb-6: MFI Pro-Muaythai Promotional Council leh Manipur K-I Assn saina in Feb 1-4, 2014 sung Khuman Lampak a YAS Boxing Arena ah 3rd Imphal National Muaythai Challenger Cup leh 1st K-I Amateur Open India Championship kidemna ah Kuki Martial Arts Association akipan vatel mi 3 in Silver Medal 6 la uh chihthu kiza hi. Huai Championship ah
West Bengal, Tamil Nadu, Jharkhand, Tripura, Meghalaya leh Manipur akipan player tamkhop tel uh hi’n kigen hi.

Dimapur a mimang kimuta
Lamka, Feb-6: Thangbenjohn(21) s/o (late) Tualbiakmuan of Bungmual (Silo-am Veng) zan zinglam dak 3.00 vela Dimapur train station akipan a omna kitheilou a om pen Assam a Karbi Anglong a Diphu Train Station va tungkha hi’n kigen hi. Manipur Express in thil omdan a suah internet tungtawna kapzak sawn ahih apan Dimapur leh mun tuamtuam a Lamka-lam mi omte ‘alert’ mahmah uh chih ahi hi.
Diphu railway station ah gam mang pasal khat om chihthu zakphetin Diphu a om abiktakin Rev T Paukhanmang, Field Suptd/EBC, Karbi Field leh a office te’n delh ua, tualou in YPA/Diphu President S. Ginmuanlal, Diphu EBCC Pastor T Khupkhansiam banah Dimapur apan mi hunkhopin delh uh chih hi. Thangbenjohn in zan zinglam dak 3 velin Dimapur train station ah coffee adawn zawhnung sawtlou in alawmpa tawh kisumang kha-in kizong tuah uh a, state dang a zinkhiakna uh ahih tawh kitonin train hong tai masapen ah alawmpa leng tuangding sa in amah leng vatuang hi’n kigen hi.
Train a ticket enkai pawl TE te’n koi a paidek, bangchidan a train ticket neilou chi’n dotna tuamtuam dong kawmin Diphu railway station ah kumsak uh chih hi. Huai apan aman leng a innkuanpihte phone in thuzak thei chih ahi hi. Tuni nitakin Diphu YPA President Ginmuanlal inn ah an ne in giak a, Lamka apan amah tanchin suizui dia Dimapur akuan te’n Diphu zuan suakin, Feb 7 in Lamka manawh in hongkik ding uh chihthu kiza hi.

Academic Year Calender laktheih
Lamka, Feb-6: Director of Education (S) in Manipur a govt school teng in a zuihding ‘School Academic Year Calender 2014’ bawlkhia a, Feb 7, 2014 in CCpur district a govt school-te’n mahni bial pawtu DI of schools akipan laktheih ding chihthu om hi.

Army te’n sum demand mi 3 mankhia
Lamka, Feb-6: Police apan kizadan in Tronglaobi a Zilla Parishad member Vishal Singh kiangah KCP pawlin Rs. 10 lakh demand uh a, Feb 3, 2014 nitaklam dak 5:00 velin sum lading a kuan KCP member 3 te 5/9- Gorkha Rifles te’n New Bazar area a mankhia in Imphal Police ah pekhia uhi. CCpur Police te’n a case lasawn in KCP cadre 3- Husnam Shyam @ Druba (39) s/o (late) H.Leiboklokpa Singh of Thanga Husman Leikai; Moirangthem Ibochouba @ Pataba(32) s/o M.Ibotombi Singh of Thanga Moirangthem Leikai leh Salam Brojen @ Punsijao (34) s/o S.Matumba Singh of Sagang Bazar, Kumbi tuni’n CJM court ah pawkhia uh a, JCM in Feb 11, 2014 tan Police custody a omdin phalsak hi. Police te’n thil omdan suizui kawm in FIR No. 24 (2) 2014 CCP-PS U/S 17/20 UA(P) A.Act registered uhi.

&&&&&&&&&&&&&&&&&&&&&&&&&&&&&&&&&&
IMPHAL NEWS
Senapti ah Tripartite Talk 7veina om
Imphal, Feb-6: United Naga Council (UNC) pawlin Manipur a Naga mite adia kivaipuakna tuam ‘Alternative Arrangement’ a phut utawh kisai in tuni’n Senapati a Old DC complex ah India govt, Manipur state govt leh UNC in kihouna ‘Tripartite talk 7veina’ nei uhi.Tuni a kihouna ah India govt sikin Ministry of Home Affairs a Joint Secretary(NE incharge) Sambhu Singh tel a, Manipur govt sik in Commerce & Industries Minister Govindas Konthoujam makaihna in RD & PR Minister Francis Ngajokpa, Hill Areas Comm Chairman Dr Chaltonlien Amo, MLA Biren,Manipur Chief Secretary PC Lawmkunga leh Principal Secretary( Home) Suresh Babu tel uh a, UNC lam ah President L Adani makaihna in mi 10 tel uhi.
Sambhu Singh tuanna Helicopter in khaw hoihlouh ziakin Senapati bawhpah theilou in sunnung dak 12.30 in kihouna pan uh a, Assam-Arunachal Pradesh gamgi lakah buaina sousang thei dia patauhna om ziakin Sambhu a kinawh luat ziakin sunnung dak 1.30 tan sunzom uhi. Kihouna om khit in UNC General Secy in Gaidon Kamei kihouna hoihtak a neih ahihdan gen a, political issue kihouna a hihman in kihouna tungtawn a lawhchinna a om hun ah puankhiak theih hiding chih tanlel gen hi.UNC makai dangte’n lungkim huailou hi a genkawm in tutung kihouna ah Minister-te a tel ziakun kihouna in masawn hidan in gen veve uhi.

NSG Commando hunkhop hongtung
Imphal, Feb-6: BJP Prime Ministerial candidate banah Gujarat Chief Minister Narendra Modi in Feb 8, 2014 a Manipur hongphak ding ziakin tuni’n National Security Guard (NSG) commandos hunkhop Imphal hongtung uh a, DIG khat makaihna in Gujarat state akipan in leng police team khat hongtung uh a, Modi hongzinna ding security tawh kisai thil omdan enkhia uhi. Narendra Modi in special flight in Feb 8, 2014 zinglam dak 10.00 in Delhi apan Tulihal Airport hongtung ding a, Airport akipan helicopter in Langjing a CRPF Group Centre a helipad bawh ding a, huai akipan public meeting mun zuan ding chih ahi hi. Manipur Pradesh BJP President Th. Chaoba in tutung a Modi in Manipur hongphak hun a mipi paikhawm zah Manipur a mipi kikhopna a tampen hithei ding khop in panlak ahihdan gen hi.

Feb 15 in Lui-Ngai-Ni kizang ding
Imphal, Feb-6: Naga mipite’n haichi chiin hun a nopbawlna(seed sowing festival) a zat sek uh’ Lui-Nghai-Ni festival’ kichi February 15, 2014 in ‘Our Culture Our Unity’ chih thupi a zangin Tamenglong district HQ ah zang ding uhi. Huai hun ah folk dance, lasak leh Naga mite traditional chindan tuamtuam a neihte lakna leng om ding hi.Organising Committee a Secretary K. Marigold in a gendan in kum 1986 akipan Lui-Ngai-Ni festival zat hi a, kum 1987 akipan thupisem a zat ahihdan gen hi. Manipur govt in huaini state holiday in puang a,India govt a Ministry of Tourism in leng India a tourist festival khat a puang hi’n gen hi.

M/R personnel telin mi 2 apan galvan mukhia
Imphal, Feb-6: Imphal East leh Imphal West Commandos kigawmte’n zan in Sawombung Khunjao akipan PLA cadre 2 mankhia in amau akipan galvan leng mukhia uh a, mi 2 matkhiakte laka khat bel Manipur Rifles personnel hi’n thusuak in ghen hi. Matkhiak a om mi 2te Nanda Kamei (41) s/o (late) Gaigapao Kamei leh MR personnel Langbaljao Palmei (50) s/o (late) Makujaipu ofSawombung Khunjao hi’n kigen a, Commando te’n mi 2te akipan 9mm pistol 1 leh atang round 15 banah mobile handset 2 mukhia uhi. Police thusuakin a gendan in mi 2te self-styled PLA Commander Nilakanta @ Jesus @ Meira nuaia sem hi uh chi’n gen hi.

COHSEM in OC teng meeting din sam
Imphal, Feb-6: Council of Hr Secondary Education,Manipur(COHSEM) in Feb 17,2014 akipan March 15, 2014 tan Class XII/Hr Secondary Examination om ding siangthoutak leh feltaka sai ahih deihna ziakin February 7, 2014 zinglam dak 11.00 in Babupara a COHSEM office ah Council leh Private Centre a Officer-in-Charge(OC) teng meeting ding in sam uh a, huai ah OC teng telkim dingin theisak uhi.

URF te’n dakkal 11 sung bandh puang
Imphal, Feb-6: Gujarat Chief Minister banah BJP Prime Ministerial candidate Narendra Modi in Feb 8, 2014 a Manipur hongphak ding United Revolutionary Front(URF) pawlin boycott puang uh a, Feb 8, 2014 zingsang dak 5.00 akipan nitaklam dak 4.00 tan dakkal 11 sung General Strike puang uhi. URF pawlin thusuah a bawlna uah BJP in Manipur mipite hun sawtpi nelhsiah uh hi’n puang uhi.
Modi in Feb 8 in Guwahatu a Khanapara Veterinary College Ground a mipi kikhopna ah thugen masa ding a,huai akipan lenna atuang in Manipur hongpha ding a, BJP Manipur Pradesh vaisaina in Langjing a CRPF Group Centre kiang Langjing Achouba ground a mipi kikhopna ah Lok Sabha election om hun a BJP candidate adia campagn bawlin thugen ding hi.