MLA(Singngat A/C) in Old Age Pension card hawmkhia
Lamka, Aug-20:Ginsuanhau, MLA( 60-Singngat A/C) in tuni zinglam in Lailam Veng a a tenna inn ah a bialsung(Singngat A/C) a meithai leh pitek-putek kum 60 akipan a tunglamte lak ah Manipur Old Age Pension(MOAP) scheme ngah ding mi 156 guangthak a, huaite lakah old age pension card hawmkhia hi. MLA in a genna ah Old Age Pension kichi a bialsung mipite adinga hamphatna liantak hi a, govt. apan huhna kichiantak om chiang in, election kuan a thuchiam tuamtuam a bawlte ahi bangbang a hamphatna ngah dingte’ piak hiding chi’n gen a, tu in bel govt. apan fund om nailou ahihman in a om hun chiangin atam theilam hawmzak hiding in gen hi.

Ginsuanhau, MLA in tuni nitaklam in a tenna inn akipan Singngat khua vapha a SDO/Singngat office building kibawl va enkhia hi. Aman agenna ah March 2013 akipan SDO office building kibawl kipan hi’n gen a, tu in nasepna bangtanhiam zawhsiang hita chi’n gen hi.

DC in Footpath leh Super Market complex enkhia
Lamka, Aug-20: Ms Jacintha Lazarus, IAS, DC/CCpur in tuni sunnung dak 2:00 in New Bazar a Super Market complex enkhia a, huaizawh in Lanva apan Tuibuong kikal lamlian nawla foothpath kibawlte abanban in etkhia (inspect) a, foothpath naihlua thiltuamtuam omte JCB zang in hihsiat in om hi. New Bazar a Super Market complex building tung leng enkhia a, akim leh kiang a mehzuakte omdan leng enkhia hi. Super Market a ground floor kia ah meh, malta leh thil tuamtuam zuakte om uhi. DC in inspection a bawlna ah SP/CCpur, H.Mangchinkhup, EM/ADC; Kamsuanlun, EM/ADC; CEO/ADC CCpur; SDO/BDO CCpur; Police-te ban ah DRDA staff leh SDO/CCpur staff te’n zui uhi.

DC/CCpur in foothpath kibawl Lanva akipan enkhia a, footpath naihlua a kibawl sa (meat) zuakna, ngasa(fish) zuakna, verandah tunga dukan om footpath hihkha tamtak JCB zangin hihsiat hi a, DC in Tuibuong tan footpath kibawl enkhia hi. Nitaklam dak 4:00 in DC in Police Station ah Press- te kimuhpih in tuni a footpath inspection leh eviction kibawl omdan hilhchian hi.

DC in a genna ah MGNREGS tungtawn in khawpi sungah footpath kibawl a,thil haksapi himahleh Village Authority te’n hoihtaka nasem in MDC 5 in leng hoihtaka kithuahpih uh hi’n gen hi. Tuni a eviction ah a thangpai hunkhop om ding a, hileleng mipi adia thilhoih ahihziaka eviction kibawl hizaw a gen in mipi’n kithuahpih chiat dingin ngen hi. Footpath geilak Tedim road ah tunungin shingling kisung ding hi’n gen a, Imphal zom a khawpi om sun Lamka ahihziakin mipi’n sianthouna lam pibawl ding a ngen in tulelin khawpi sung buah lua hi’n gen hi.

New bazar a footpath gei a thil tuamtuam zuakte leh Super Market complex kim leh kianga thil tuamtuam zuakte Aug 21, 2013 tana akisuankhiak kei ualeh a poimawh bangin SP/CCpur in nasem ding hi’n gen a, khawpi sunga gari parking dan space kinehlua leng SP/CCpur in enzui ding hi’n gen hi. SP/CCpur in Traffic stand hoihtak a bawlkhiat ziakin DC in kipahthu gen hi.Tunungin khawpi sung mun tuamtuam ah Convex mirror leng koih hiding a, Nehru Marg-Tedim Road-IB Road junction ah leng Traffic Stand 1 bawl hidinn gen hi.

DC in a genzelna ah khawpi sung adia poimawh mahmah footpath/drainage zawh hita a, maban ah water supply etkai hiding a, huai ah NGO te leng telthei ding uh chi’n gen hi. Khawpi sunga veng tuamtuamte’ tui poimawhdan tawh kisai committee kiform ding a, committee te’n veng chih ah study bawlding uh a, huai dungzui in vengsung mipi in tui a poimawh zah uh theih nungin BRGF, MGNREGS ban ah fund tuamtuam omtheite zang in Veng chih ah tanky bawl hiding a, tanky tungtawn in vengsung mipi’n tui poimawh zah a ngah theihna ding uh ngaihtuah hidin gen hi.Veng chih a tanky kibawl dingte a vengsung mipi’n maintenance telin enkai ding uh chi’n gen hi.

SDPO/CCpur in Traffic stand thak hong
Lamka, Aug-20: ‘Environment Friends’pawlin Lamka Police station kong Tipaimukh Road- Tedim Road junction ah Traffic stand thak a bawl uh zawhsiang hita a, tuni zinglam in S.David Piaklian, MPS, SDPO/CCpur in hongkhia a, Pastor V.Chinpau, Local Pastor, EBCC Zenhang Lamka in thumna in lan(dedicate) hi. SDPO/CCpur in agenna ah DC/CCpur in SP tungtawn in panpihna pia a, Environment Friends te’n Traffic stand hoihtak a bawlkhiat uh kipahpihthu gen a, mipi’n kembit chiat dingin ngen hi.

Lamkhosiem, DTO/CCpur in agenna ah Environment Friends’ a Mung naupangchik himahleh mipi muhtheih dinga Traffic Stand hoihtak a bawlkhiat kipahpihthu gen a, maban ah khawpi sung mun tuamtuam ah concex mirror bangzah hiam thuah ding uh hi’n gen hi. I khawpi, eimah in ipuah a, i chei kei leh kuaman hon bawlsaklou ding ahihziak in Traffic stand kibawlthak kuapeuh in kembit chiat ni, chi’n ngen hi.

S.Khaikhopau Ngaihte, BO Hq, DC’s office in agenna ah nasepna tuamtuam ah apung (profit) kia delh mailou ding leh khawpi sungah eimah in nasem a cheimawi in quality maintain kawm a nasep sawmchiat dingin kuapeuh hasuan hi. Traffic stand kibawl mipi a ahihziakin hihse mailou a, kembit chiat dingin mipite ngen hi.

SP/CCpur in Book Fair hong
Lamka, Aug-20: L.Mangkhogin, Haokip, IPS, SP/CCpur in tuni zinglam IB Road a Synod Hall ah Book Link, Kolkata; Penguin Books (Delhi) leh HSA Jt HQ,Lamka pangkhawm a a sai uh ‘the 3rd Lamka Book Fair 2013’ hongkhia a, aman huai Book Fair ah laibu tuamtuam kizuakte abanban in enkhia hi. Huai Book Fair bel Aug 29, 2013 tan om ding a, laibu kizuak te 10% discount in zuak uhi. Tuni’n mi tamtak in laibu tuamtuam lei uhi.

NYK makaih in singnou 900 val suan
Lamka, Aug-20: Prime Minister lui (late )Rajiv Gandhi birthday ‘Sadbhavana Diwas’ zatna kawm in India gam pumpi a NYK omna teng ah Aug 15-20,2013 sung “Massive plantation Drive under My Earth My duty campaign” kichi singnou suan om hi. H.Doungel, DYC, NYK/CCpur makaih in affiliated YC member ten leng khaw tuamtuam ah singnou 900 val suan uh a, tuni’n Daihenjang village ah singnou suanna hun zou uhi. Huai hun ah member paikhawm teng in ‘Sadbhavana Diwas’ pledge simna leh signature bawlna nei uhi.

Navy a Captain in kaisang
Lamka, Aug-29: Lalsuonglien Tonsing s/o T.Tuankhopau of Nehru Marg, Central Lamka in kum bangzahhiam Indian Navy a Commander a sep nungin August 16, 2013 in Navy a Captain in kaisang hi.Amah tulelin New Delhi a Naval Headquarter ah posting hi.

‘One Day Community Workshop’
Lamka, Aug-20:Thangzam Road a Hill Town Community Hall ah tuni akipan Contribute & DNP+(Delhi) saina in‘One Day Community Workshop on Hepatitis C Virus (HCV) om a, mi tamtak tel uhi. Huai hun ah Dr.Zamlienmang, MO PHC/Henglep leh Loon Gangte, Regional Co-ordination ITPC te’n sinsak uhi.

Thianhoihnem in topper hihna la
Lamka, Aug-20: NEHU nuaia MA(Anthropology) results 2013 zan zeka suak ah Miss Thianhoihnem d/o P.Tuankhothang of Siloam Veng, Bungmual in 74.10% mark mu in NEHU ah topper hihna la hi. Thu kizadan in apaisa kum 2011 in NEHU nuaia BA(Anthropology) result suah hun ah Thianhoihnem in 71.25% marks mu in topper hihna mah ana la hi. Amah Women's College akipan Graduate hi’n kigen hi.

Zomi Language Data Collection
Lamka, Aug-20: Zomi Language and Literature Society(ZOLLS) saina in Aug 22-24, 2013 sung Lamka College ah Zomi Language Data Collection Workshop om ding a, Aug 22, 2013 zingsang dak 7.00 in workshop programme honna om ding hi.Huai workshop ah Zomi nomenclature pomte laka literature society tuamtuam apan mi 2 chiat tel ding uhi

EBC Pastor dingin mi 7 ching
Lamka, Aug-20: EBC a Pastor semding lakna ding zanin New Lamka a Dorcas Hall ah written test om hi. Tuni’n practical leh personal interview om a, nitaklam in a result suak hi. Pastor semding interview a lawhchingte- K.Sonlian of Bethuel, New Lamka; Thuamminlian of Hebron Veng, New Lamka; N.Khaikhuphang of Hiangmun village; H.Tuanbiakson of Zion Veng, New Lamka; T.Lamkhanthang of Vengnuam, New Lamka; P.Hau Shoute of Thyuam leh K.Thangmuanlal of Singngat hi uhi. Amaute EBC Kumsim khawmpi lian om hun ah ordination piak hiding uhi.

Dist Level Workshop on Bamboo
Lamka, Aug-20: Forest Development Agency, Southern Forest Divn/CCpur inntekna in tuni in Southern Forest Divn/CCpur office a FDA Conference Hall ah ‘District Level Workshop on Bamboo Utilization Prospects in Manipur’ om a, Lamka a om bamboo artisan/craftmen ahunkhop tel uhi. Kh Brojendro, IFS, Conservator of Forests in a genna ah National Bamboo Mission tungtawn in Manipur ah gua/mau (bamboo) tamtheipen suan lehang economy naktaka hkhantouhna tun ding a, CCpur, Chandel leh Tamenglong ah gua hoih mahmah hi’n gen hi. Tulelin ei laka gua kizang tampen Mobi Bamboo kichite fencing, inn bawlna telin thil tuamtuam ah kizang a, huaite sanga hoihzaw Engineering Bamboo kichite koimun peuh ah mi’n deih a, China gam ah huaite zangin lupna, khawlum hun a khut a kizapna (fan) telin thil tuamtuam bawlkhia uh hi’n gen hi.Technical session ah H.Sukumar , Design Consultant leh N.Somorendro , ADMD, Manipur National Bamboo Mission te’n sinsak uhi.

State Level ah school 8 kuanding
Lamka, Aug-20: CCpur Dist a Inspire award ading in Rs 5000/- chiat govt in St Mary H/S; Don Bosco Hr Sec School; Hermon English school; Gilgal English school; Kingship English school; Bunglon H/S; Dr Radhakrishnan Foundation School leh Sunchine English school pia hi. CCpur Dist apan school 8 te Sept 11-13, 2013 sung Imphal a State Level Science Exhibition & Project Competition ah telding uh a, huai a telna dingin inspire award Rs 5000 chiat govt in pia hi’n kigen hi.

Talent Search leh Merit Scho
Lamka, Aug-20: Academic session 2013-14 a class X sim private leh govt school-te adin ZEO/CCpur office ah State Level National Talent Search Exam(SLNTSE) 2013-14; Class IX simlel private leh govt school te adingin State Talent Search Exam(STSE)2013-14 leh academic session 2013-14 a class VIII simlelte ading in National Means cum Merit Scholarship(NMMS) Exam 2013-14 tukum sung in Lamka ah omding hi. ZEO/CCpur office ah Sept 15 tan application form kihawm ding a, Sept 30, 2013 tan in ZEO/CCpur office mah ah submit ngai ding hi.

Suunna
V. Paukhankham Guite (65) s/o (late) Thangkhokam of New Lamka, Vengnuam tuni nitak dak 7:00 velin cancer in si a, Aug. 21 in New Lamka YPA hanmual ah kivui ding hi.

&&&&&&&&&&&&&&&&&&&&&&&&&&&&&&&&&&
IMPHAL NEWS
Rajiv Gandhi pianni champha zatna om
Imphal, Aug-20 : Manipur Secretariat South Block ah tuni’n India Prime Minister-lui Rajiv Gandhi pianni champha (birth anniversary) ‘Sadbhavna Diwas’ chi a minvuah in zatna om hi. Huai hun a khuallian Chief Minister O. Ibobi in Manipur a pawl leh nam tuamtuamten mahni tawndan kembit chiata midangte aleng zahtaksak poimawh hi’n gen hi. Huai banah kuapeuh kituaktak a tenkhawm theihna dinga panla chiat dingin leng CM in ngen hi. Dy. CM Gaikhangam in pawl tuamtuam in kituak taka Manipur gam kipumkhatna humbitna dinga panla chiat dingin ngen hi. Huai hun zatna ah top official tamtak leng tel uhi.

Food Security Mission lawhchinna din beneficiary zah suizui lel
Imphal, Aug-20:Centre a govt bawl UPA in National Food Security Mission zat dinga a puankhiak Manipur ah leng lawhching taka nasep khiak ahih theihna ding in state govt in beneficiary om zah kichiantak a suikhiak sawmin nasepna pailei a, beneficiary omzah tawh kituak India govt in allocation pe ding hi’n kigen hi. Official thusuak in a gendan in Manipur ah kum 2011 cansus dungzui in mihing 27,27,749 omzah seh 3 suah seh 2 chih bel mihing 23.78 lakh vel huai scheme in huamkha ding a koih hi a, huchibang hamphatna ngah ding innkuan leng 4.75 lakh vel hiding hi. Innkuan khat ah mi 5 zel omdan a tuat hileh scheme zat hun ah singtanggam a om mihing 70.31% chihbel mihing 16.72 lakhs leh khawpi a khawsa 29.64% chih bel mihing 7.05 lakhs in phattuamna ngah ding a tuat ahi hi.Hiai Food Security Mission sepkhiak theihna ding in India govt in ordinance tanpha suahkhe khinta hi.Manipur ah hiai scheme zat ahih hunchiang in beneficiary-te’n antang kg 1 Rs. 3 in leiding uh a, wheat kg. 1 man Rs. 2 hiding a, havai kg. 1 in Re 1 man ding chih ahi hi.

2nd Semester Result suak
Imphal, Aug-20: Manipur University nuaia BA/B. Sc/B. Com/B Sc (Biotech)/BSW second semester (June 2013) result zan in suak a, BA ah candidate 9684 laka 7219 passed in pass zah 74.54 % tung hi. B.Sc ah mi 8450 lakah 5844 passed in pass zah 69.15 % tung a, B.Com ah 504 laka 431 passed in pass zah 85.5% tung hi. BSW ah 40 laka 40 passed in pass zah 100% tung a, B.Sc(Bio-technology) ah 20 laka 20 passed in pass zah 100% mah tung hi.

Tuni’n Sit in protest om
Imphal, Aug-20 : Kwakeithel Konjeng Mayai Leikai a Grocery dawr neitu K. Rajen(53) zanlam zek Aug 7, 2013 in KCP President Group pawlin sum demand na lehkha pia uh a, huai tawh kisai in tuni zingsang in a dukan ah envelop sunga thautang kikoih muhkhiak in om hi. Huai envelope sungah Mugamba (KCP-President Group) chih kigelh a, huai thu theihphet in vengsung mipi’n mawhpaihna in Sit-in-protest tu uhi.

1-day voluntary blood donation
Imphal, Aug-20: Rajiv Gandhi 69th Birth Anniversary tawh kiton in National Students’ Union of India(Manipur), Deptt of Immunohaenatology leh Blood Transfusion, RIMS pangkhawm in Dept of IHBT RIMS ah tuni’n ‘1- Day voluntary blood donation’ nei uhi. Manipur State AIDS control / State Blood transmission council sponsor-na nuaia blood donation hunah T. Manga Vaiphei, Chairman, MTDC leh M. Prithivi Raj Singh, MLA(Moirang), DK Kongthang, MLA(Tengnoupal), leh E Mangi Babu, MLA(Thanga) banah NSUI Manipur heutute tel uhi.

Imphal lui ah siluang kimukhia
Imphal, Aug-20 : Imphal East district sung Mahaballi mun a Imphal River a Water Reservoir Pump area kiangah tuni in naupang khat sisa in kimu hi. Muhkhiak a om bel kum 2/3 vel ding mi hi a, Muslim mi hiding in muanmawhthu kigen hi. Aluang JNIMS morgue ah koih in om hi. Aman T-Shirt vom silh a, half pant vom teng hi.

Manipuri Language Day zang uh
Imphal, Aug-20 : All Manipur Students’ Union (AMSU) te saina in tuni in Thangmeiband a THAU Ground ah ‘The 22nd Manipuri Language Day’ zang uhi. Huai bel Indian Constitution a 8th Schedule ah August,20, 1990 in Manipuri Language telsak a om ahi hi. Tuni a programme zatna ah Sagolsem Saratchandra,former President, AMSU & MSU, Saratchandra Thiyam- Columnist and Sahitya Academy Awardee, P. Premananda Meitei- former President, AMSU leh Thiyam Naresh Singh- President AMSU in Chief Guest, Guests of Honour leh President hihna tawh uap uhi.