Tuni’n ‘One Day Political Awareness Programme’ om
Lamka, Aug-19: ‘The Hill Peoples’Forum, Manipur(HPF-M)’-te saina in Rengkai Community Hall ah tuni zinglam akipan ‘One Day Political Awareness Programme’ om hi. Rev. Fimthrasang, EFCI, Sielmat in thumna in programme ahon zawh in VL Mawia,Vice Chairman,HPF-M in vaidawnna thu gen a, Dr. R. Sanga, Chairman, HPF-M in pawlpi tawh kisai pulak hi. Aman ah lungsim kibang(like minded) teng adingin nasa zawsem a HPF-M keklet theihna di’n tunungin amaute’n lem asak uleh Ukhrul, Senapati leh Chandel telin dist dangte ah Dist. Level Committee phuhkhiak hiding chi a, issue based in HPF-M kalsuan ding hi’n leng gen hi.

LB Sona, Spokesman in Peoples Consultation Committee for Peace(PCCP) tungtang pulak in UPF leh Govt. tawh kala kihouna omtheihna dingin PCCP kibawlkhia hi’n gen hi. India Prime Minsiter telin Congress makaite kiangah memorandum tamveitak piak hita, chi hi. Aman a genzelna ah Aug 2008 in Govt. tawh UPF in SoO suaikai thei ua, tunung a maban paizel ding ah leng nasatak a panlak hiding, chi hi.

Resource Persons in Dr. John Pulamte leh K. Guite pang uh a, Pulamte in agenna ah Autonomous Hill State leh Kuki State i chihte kilamdang lou in kibang a, khat zawsamsam lawhching leleng akibang mah ahi, chi hi. Aman agenzelna ah mi tamzaw uap a, min lianzaw a neih theihna dingin UPF demand pen Autonomous Hills State(AHS) kichi hizaw, hi’n gen hi.

K. Guite in agenna ah Manipur ah demand tuamtuam om a, huaite lakah General status akipan ST status lut dinga demand tungtang awlmawh huai ahihdan gen a, pawlkhat in Autonomous Hill State ngetna nei ua, hiai in kuanam, kuapau chih khentuamlou in, Manipur a singtang miteng huamkha hi’n gen hi. Demand tuamtuam omte lakah AHS mah kingakna tham ching hi’n gen a, tuhun ah huai lawhchinna dinga panlak poimawh, chi hi.

Awareness programme zawh in CCpur District Working Committee bawlkhiak hi a, Rev Th. Mangthianlal in vualzawlna thumna neihsak hi.Jammang Baite, Vice Chairman in vote of thanks a genzawh in Rev Edwin,RPC in thumna in hunkhak hi.
&&&&&&&&&&&&&&&&&&&&&&&&&&&&

ZRO in A/R-te mawhpaihthu puang
Lamka, Aug-19: 46-Bn Assam Rifles te’n Aug 17-18, 2013 kikal zan kimlai in ZRA a 2nd-in-Command tenna inn a ziak bei in buluh uh chi’nh Zomi Re-Unification Orgn(ZRO) a Ditector,Ministry of Info & Public Relations in mawhpaihna thusuah hi.Huai hun ah ZRA cadre 1 mankhia in amah akipan in AK-56 rifles 2, hand grenade 8,thautang 250 leh magazine 5 laksak uh chi hi.SoO a suaikai group-te melma lauhuailou suaksak uh a, SoO a suaikaih leng bangmahlou tawh kibang suah uh chi’n thusuak in gen hi.

Maj Vikash Kundu makaihna a inn luh pawlin a pichinlouhna langsak in Officer dinga kilawmlou in gamtang uh a, sum Ra. 1.5 lakh, mobile handset 1, digital camera 1, 2-cell torchlight battery 1 leh khukri 1 laksak uh a,huchi’n 2nd in-Command’ nu-leh-pa vaulau in blank paper ah suaikai sak uh chi’n thusuak in taklang hi.Huailou in ZRA te’n khamtheih hih leh zuakte apan a muhkhiak uh heroin gr 150, SP strip 500, Relepen strip 480 hihsiat dinga a koihlai uleng innluh sepaihte’n laksak uh a, hibang thilte ‘Friends of the North-east’ te akipan lam-etlouh a lawhtak suak chi uhi.

Huailou in Aug 14, 2013 nitakin galvantawi mi 3 in Tuithapi Village Authority Chairman pimang(kidnap) in Tuibuang area tunpih uh a,hileleng Assam Rifles te’n mi kidnap-te matkhiak sawmlou uh chi’n huai thusuak in taklang hi.A/R te’n matkhiak sawm hile uh huai nitak mahin mankhe thei mahmah ding uh chi’n thusuak in gen a,huaiziakin 46-A/R te leh mi kdnap bawlte’n kizopna nei uhiam chih dotna tanpha bawl uhi.Maj Vikash Kumdu leh a nungzuite’n kidnapping thu bangchidan a kitheilou sak uhiam chikawm in SoO a suaikai loute kitheihmawh bawl in SoO atel group te melma bang khop in bawl chi’n thusuak in gen hi.

Dan dungzui in mi kuahiam mat ahihleh dakkal 24 sungin Police Station naipen a piakkhiak ding chih himahleh Maj Vikash Kundu in Police station ah a mi mat leh vante pekhe tuan nailou chi’n thusuak in gen hi.

Kemtu ding neilou Jairam kuate hiam in soisa
Lamka, Aug-19: Lamka khawpi sungah naupangte’ gari zanga thil tuamtuam pua a khe aleng pailou in kitawtawn thawh a om Jairam (54) kichi zan nitak in meltheihlouh kuate hiam in Chiengkawnpang a Dalson Enterprise kong lak Tipaimukh Road a omlai soisa in sisan suah uhi.Tuni zingsang in Insp Elvy Tunglut, OC/CCpur makaih in Police te’n Chiengkawn apan pawkhia in Dist Hospital a Casualty ah dressing bawlsak uh a, Jairam’ bil (ear) gei veilam liam hi’n kigen a, admit hial ngailou in Police-te’n a omna mun Chienkawngpang ah koihkik nawn uhi.

January, 2011 in Dist Hospital ah kemtu ding neilou Jairam a taklam pheipi guh kitan hun sawttak etkol hi a, Dr Shyamsunder Singh hahpanna ziak in operation theih in om a, operation bawlna a sum-le-pai beiteng Langkhanpau Guite, Chairman, ADC/CCpur in seng a, phatuamngai tamtakin sum-le-pai ban ah zanpuan ding, silh-le-ten pekhawm uhi.

Kemtu ding neilou, waiting shed ban ah kuate hiam varandah a giakzel Jairam soisak a om zakha phot in lamdangsa uh a, Jairam’ sum neih sunsun kuate hiam in a laksak zawh ua soisa uh hiding in gintakthu kigen hi.
&&&&&&&&&&&&&&&&&&&&&&&&&&&&&

DC in Footpath kibawlte enkhe ding
Lamka, Aug-19:Ms Jacintha Lazarus, IAS, DC/CCpur in August 20, 2013 sunnung in Lanva apan Tuibuong kikal lamlian nawla foothpath kibawlte abanban in etkhiakna (inspection) neiding hi. Huai hun ah Police-te leng telding uh a, footpath a encroacher om mehzuakte leh van chituamtuam zuakte ban ah footpath tunga inn leh varanda omkha teng Police-te phelkhe sak vek ding hi'n kigen hi.Lamka block ah Footpath zawhsiang hita a, hileleng Tuibuong block a khua/veng khenkhat in footpath nasepna neilai om uhi.

SBI ading sum tamtak hongtung
Lamka, Aug-19: Reserve Bank of India (RBI) in July 16, 2013 akipan SBI/CCpur Branch leng RBI sik-le-tanga sum kemthei ding in ‘Currency Chest Branch’ khat hisakta a, SBI/CCpur branch “Currency Chest Branch” ahihnung adia masapen ding in security khauhtak venna nuai ah tuni’n Imphal apan sum tamtak hongtung hi. RBI in SBI/CCpur ah Rs 30 crore tan kemsak thei ding hi’n kigen a, tuni a sum hongtung teng Rs 10 crore vel hi’n kigen hi.

Old Age Pension card hawmkhe ding
Lamka, Aug-19: Ginsuanhau,MLA(Singngat A/C) in Aug 20, 2013 zinglam dak 11.00 in Lailam Veng a a tenna inn ah 60-Singngat A/C a Old Age Pension(MOAP) ngah dinga a guanthakte lakah pension card hawmkhe ding chihthu om hi. Card neitute’n Bank account ahon khit chiang un Social Welfare office in pension sum a muh dingte uh amau account chiat ah thunsak theipan din g uh chih hi a, card holder te’n huai ngaihven ngai ding chihthu om hi.

Dist Jail repair dingin enkhia
Lamka, Aug-19: Jail Official-te leh Manipur Police Housing Corpn (MPHC) Ltd official te'n tuni sun dak 12:00 velin Lamka hongpha uh a, Tuibuong a District Jail enkhia uhi. Thu kizadan in Jail official-te leh MPHC offical te'n Tuibuong a District Jail siatna munte bawl thak(repair) dan ding hong enkhia uh hi’n kigen hi.

DLCC meeting ding kisuan
Lamka, Aug-19:DC/CCpur makaihna in Aug 21, 2013 zinglam dak 11:00 in Dist Level Co-ordination Committee (DLCC) meeting om ding chih himahleh Aug 23, 2013 zinglam dak 11:00 a aneih ding in ahun kisuan hi. Huai hun ah deptt tuamtuam in a nasepkhiakte uh genkhawmna leh development lam nasepna tawh kisai thu poimawh tuamtuam omte genkhawm ding uh a, Dist Level Officer (DLO) teng telchiat ding in BO,HQ/DC’s office in theisak hi.

Nitaklam dak 5:30 zel in zu zuakna khakdin theisak
Lamka, Aug-19: YPA Lamka block te’n khawpi sung a zu zuakna (vendor) tengin nitaklam dak 5:30 zel a khakchiat dingin theisak uh a, khawpi sunga khamtheih leh zudawn/ hihte’n vantang munte ah hihlou ding in theisak uhi. YPA Lamka block theihsakna YPA Unit chih in amau area chiat ah semkhe dingin mawhpuakna leng pia uh a, kuapeuh in panla chiat ding leh panlakna ah kuama’n namthil(communal) a lalou ding in ngen uhi.

Computer tawh kisai training om
Lamka, Aug-19: SSA/CCpur saina in tuni zinglam in Synod House ah school 25 a teacher te’ ading in ‘training on Implementation of multi-media educational conten’t kichi om a, PR Dorie, Director, Sakhi Automation Solution Private Limited, Chennai in sinsak hi.
SSA/CCpur apan kizadan in school 25-te computer piak hiding uh a, student-te educational content (E- Content) tungtawn in sinsakna piak hiding uh hi’n gen uhi.

3rd Lamka Book Fair omding
Lamka, Aug-19: Book Link, Kolkata; Penguin Books (Delhi) leh Hmar Students’ Assn.(HSA) Jt HQ,Lamka pangkhawm in IB Road a Synod Hall ah Aug 20-29, 2013 sung zinglam dak 9:00 apan nitak dak 6:00 kikal ‘The 3rd Lamka Book Fair 2013’om ding hi. Huai Book Fair om sunga laibu kizuak teng 10% discount hi ding a, Huge Stock of General on Art, Music, Literature, Classic, Fiction, Spirituality, Cookery, Children Books telin laibu tuamtuam kizuak ding hi’n kigen hi.

TCSA Annual Sports Meet kipan
Lamka, Aug-19: Tedim Chin Students’ Assn. (TCSA) Gen HQ saina in tuni sunnung dak 2:00 in Pangzawl Playground ah Annual Sports Meet 2013 kipan a, H. Mangchinkhup, EM/ ADC khuallian apang in hongkhia hi. Huai hun ah Functional President in N.Thuam Khan Suan, SDC/Singngat pang hi.

Dist Level Students’ Sc Seminar
Lamka, Aug-19: ZEO/CCpur nuai a Science Unit saina in Aug 23, 2013 zinglam dak 11:30 in Hiangtam Lamka a YPA Gen HQ Hall ah ‘Water Co-operation: Issues and Challenges’ chih thupi pansan in 35veina ‘Dist Level Students’ Science Seminar 2013’ om ding a, ZEO/CCpur khuallian hiding hi.

SaS booking upto June 5, 2013 Stock 306
&&&&&&&&&&&&&&&&&&&&&&&&&&&&&&&&&&&&
IMPHAL NEWS

Union Health Minister in uap ding
Imphal, Aug-19: Regional Institute of Medical Sciences (RIMS) Foundation Day 42veina hongtung ding Sept 14, 2013 in zang ding uhi. Hiai hun Union Minister of Health & Family Welfare Ghulam Nabi Azad in uap ding hi’n kigen hi. Tuni in RIMS a Media Advisor in press statement a suahna ah huai hun tawh kituakin Union Minister in Imphal hongpha ding a, tua ah RIMS Foundation Day zatna leng uap ding hidanin taklang hi. Huai tawh kisai in RIMS a faculties, staffs leh students banah medical, Dental & Nursing Institute-te naktak in kisakhol panta uhi.

Manipur ah Hydro Project khenkhat nasepna lawhching thei din kilang
Imphal, August-19: Manipur in Hydro-electric Power Project 6 semkhe nuam Company-te akipan Expression of Interest (EOI) a sap lawhching mahmah in Company tamtak in lunglut uh hi’n dawnna pia uh a,huai in Hydro-electric Power Project tungtawn in Manipur in masawnna thupitak ngahthei ding ahihdan kichian chihthu om hi. Project 6 a nasepna bel Manipur State Hydro Power Policy, 2012 nuai ah sepkhiak hiding hi.

Manipur in sepkhiak masak dinga a bikhiah Project 6-te Tamenglong district sung Irang lui a kibawl ding Irang Hydroelectric Power Project(60 MW capacity); CCpur district a Tuivai lui a kibawl ding Tuivai project(51 MW); Tamenglong district sung Barak lui a kibawl ding Pabram Project(190 MW); Tamenglong district a Leimatak lui a kibawl ding Nungleiband Project(105); Senapati district sung Barak lui a kibawl ding Khongnem Chakha Project(67 MW) leh Ukhrul district sung Maklang Tuyungbi lui a kibawl ding Maklang Tuyungbi Project(45 MW) hi uhi.

Family Welfare staffs te’n nasemlou
Imphal, Aug-19 : Family Welfare depttt a staffs te’n Director kiangah alawh utawh kisai akan ua leh Director in kampau kilawmlou in numei staff-te hou a, huai lungkimlou in tuni in staff te’n nasemlou in nuak uhi. Amau a gendan un Family Welfare a semte’n alawh uh tukum March 2013 apan tunitan lalou uh a, huaiziakin staff-te’n sub-staff-te kiangah leng amau support ding leh nasemloua nuak dingin ngen uhi.

Project sepkhiakna dinga loan lak khawl phot ding
Imphal, Aug-19: Manipur a sum dinmun(financial condition) a siatluat ziakin development nasepna tawh kisai Project sepkhiakna ding a loan lak himhim khawlphot ngai chi’n Finance portfolio len Chief Minister O. Ibobi in gen hi. Tuni in CM Secretariat a meeting ah Chief Minister; makaihna in Nilakuthi a Food Park tungtang genkhawmna ah Commerce & Industries Minister Govimdas Konthoujam; Chief Secretary PC Lawmkunga; Power & Infrastructure Advisor to Chief Minister Jarnail Singh; Principal Secretary Commerce & Industries O. Nabakishore Singh; Finance Commissioner Barun Mitra; Chief Engineer PWD Loken Singh leh IFCD official-te tamtak tel uhi.CM in a gendan in state a sum dinmun asiat lai in project tuamtuam nasepna ding in NABARD leh Agency tuamtuam apan loan tamtak lak hi a, huaite ditna in Manipur in kha tengin Rs. 30 crores seng gige hi’n gen hi.Huaiziakin loan la a project nasepna himhim mangngilh phot ngai hi’n leng CM in gen hi.

KRA-U in cadres 5 tawpsak
Imphal, Aug-19 : Kuki Revolutionary Army Unification (KRA-U) a C & C cum JMG, SHT Gorge in tuni’n a gendan in KRA-U a cadres 5 in pawlpi dan kalh a a gamtat ziak un tawpsak(expelled) a om uh hi’n puang hi. Huai tawh kisai in mi 5te gamtatna KRA-U in theihpih nawnlou ding uh hi’n leng gen hi. Amaute bel Letjoulen(Kenedy), Sheibeng (SB Balke), Lampao (Jeferson), Paothang (Thoi) leh Lunmang (Jelvi) hi uhi.

JAC ten CM ah memorandum pia
Imphal, Aug-19 : JAC against Brutal Killing of Okram Gyanendra pawl in tuni’n Chief Minister O. Ibobi kiang ah memorandum pia uh a, ni 3 sung in Okram Gyanendra thatte mankhe ding in theisak in dan tawh kituak gawtna pe dingin ngen uhi.

Okram Gyanendra bel Aug. 18, 2013 nitak a meltheihlouhten Wangoi police station sung aom Narankonjil Palli mun a athah uh hi a, tuni in JAC pawlin Singjamei Community Hall ah public meeting nei uh a, tua zawh in National Highways lampi bangtanhiam khaktan uhi. All Manipur Motor Drivers Union pawlin leng lungkimlouh taklatna in Hicham Yaicham Pat area lampi khaktan in kiphin uhi.

Khamtheih tawh mi 3 man
Imphal, Aug-19 : Narcotics & Affairs of Border a Inspector RK Bikramjit Singh, OC makaihna in tuni in Hayel Labuk mun ah mi 3 akipan in khamtheih hunkhop mankhia uhi. Huai khamtheih thilte LUPOCOF cough syrup bottle 550 hi a, mat a omte bel, Md. Najim Khan @ Thethe (28) Md. Riyaz Khan (24) of Hayel Labuk Mayai Leikai leh Md. Ayas hi uhi.

World Photograph Day kizang
Imphal,Aug-19: Manipur Amateur Photo Club-te saina in tuni’n Manipur Press Club ah ‘A picture is worth thousand words’ chih thupi zangin World Photography Day zang uhi. Huai ah Assembly Speaker Th. Lokeshwore khuallian hi a, Guests of Honour in ex MLA, Bijoy Koijam; TN Hoakip,MLA leh AMWJU President W. Shyamjai pang uhi.Chief Guest in photographer-te pilvang dia hasuan kawm in 19th century lai in photography om hileh Manipur history chiamteh nuam mahmah din gen hi. TN Haokip in Manipur ah photographer ten mun kichian neilou ua, kuaman leng recognize lou hi a gen in ngaih poimawhhuai sakthu gen hi. Programme zatna ah members ten photo alak uh tamtak lakkhia uhi.